Skip to content
BibleKenya

Kaike Standard Traslation

प्रे 22

जिङ्‌को हो आथबा वैचा हो, “ङेनकोन ङू ङै जेँन पछेग र्‌वात्वानान ल्होई ता ङ्याना।” नु हिब्रु ल्होईग ल्होई र्‌वापा ताह्ताह् ख्यु हेँ तै मर्‌वारे छ्युङ्बो।

नुई र्‌वाबो, “ङा किलिकियान सहर तार्तसग केह्पा यहूदीदी जेङ्पा, जेङ्नै अन एरुसलेम सहरग गमलिएलन ल्हेन रह्‌म्म छ्युङ्छ्युङ् छोए लम्पा। ङिन खेपुलन कानुन यङ ङै लः खेखे लम्पा ङिह्पा। त्या ङेनको परमेस्वरक्याँ हाति उत्साही ङ्याह्, ङा रे अकेई उत्साही ङ्याह्।1 ङै अन लम्न सिमिकाङ्मोः सिचेन थालै तेपफाम्पा, आलै चोलोङ्चा रे चिमिचा ङ्योरुमग साँगलजै खीखी झ्यालखानाः कह्‌पा।2 प्रधान पुजारी रे जोम्पा पुरूजै र्‌वार्‌वा ङन पछेग साँचि बिन्नान। ख्युनै भिह्तु भाइवन मिह्‌नग पुर्जी देद्‌दे ङा स्याह्‌ रह्पान बिस्वासीकाङ्मोः खीखी यरूसलेमग सस्सै सजाय बिमफाम्मः दमस्कसग वैपा ङ्याह्।”

पावलजै जेँन सम लःरिताफान्चेन भिह्तु र्‌वापा

(प्रे ९:१-१९; २६:१२-१८)

“दमस्कसन रह्‌म्म स्वा ताप्‌तौ क्वाईमाल्‌ला: ङिजे फे रातौ, तैमेग स्वर्गलै ताह्‌म किमदी ङन धेँवछोँ चम्कि रह्पा, रे ङा साः घ्यापा, आलै ङाः झाम र्‌वापाई खेपा केह्ःदी ताह्पा, ‘ए साऊल, ए साऊल, ना तैङ ङाः तेपफान्नान?’” आलै ङै लोप्पा, “हे प्रभु, ना सु जेङ्पा?” आलै नुई ङाः र्‌वाबो, “नासरतन येसू ङाई जेङ्पा, सू ना तेपफाम्पाई ङ्याह्।” तब ङन ङ्याबो हातिपा ङ्याह्, ख्युई ताह्‌म ता रङ्बो, जेङ्नै ङन ङ्याबो ल्होई र्‌वानान्न बचन चन मताह्बो। “ङै र्‌वापा, ‘हे प्रभु, ता ङा तै खेचे?’ आलै प्रभुई ङाः र्‌वाबो, ‘च्याँ, दमस्कसग वया, रे नाई खेत्वानान तोकि खेपान धोनव नाः स्यान्नान ङ्याह्।’” मन मकेकुकेन ताह्‌मन कारन जब ङै तये रङ मतैबो, तब ङन ङ्याबो राह्‌नानवजै लाह्जै जुङ्जुङ् र्‌वार्‌वा ङाः दमस्कसग सप्पो।

“मन सहरग हननिया र्‌वानान कानुन अन्सार लेन्नान्न भक्ति सिमिदी सुई स्याह्‌ छ्युङ्नान यहूदी पुरूवलम आदर देप्पा ङ्याह्, नु ङन ङ्याबो स्वाबो, रे ङन रह्‌म्म च्याङच्याङ ङाः र्‌वाबो, ‘साऊल भाइ, रङ्नान रा।’ रे ङै अन्नै भेला रङ्नान रह्पा, रे नू रङ्पा। मन्न छाम्म नुई ङाः र्‌वाबो, ‘नाई ङिन खेपुलन परमेस्वरन इच्छ्या नाई क्युई रातया र्‌वार्‌वाई नुई नाः दम्पा ङ्याह्। मन धर्मी सेवक येसू रङ्चे धेरा, रे नुन ङुरलै र्‌वापान ल्होईग ङ्यान्चे धेराःयो। तैङर्‌वाङिन सिमि पुरूवन ङू नुन भिह्तु ङेनजै तै रङ्पा रे ताह्पा ङ्याह्, ना नुन साँचि राह्‌नान ङ्याह्। ता तैङ कूनान? च्याँ, रे बप्‌तिस्मा होरा, आलै येसुन मिह्‌न्न पुकार खेखे जेँन तीपा थुवा।’”3

पावलजै यहूदीन खोलोःन सिमिकाङ्मोः ताह्फेप्पा

“यरूसलेमग होलहोल स्वामी आराधनालयग सोअतापाई छ्युङ्तौ ङै दर्सन रङ्पा। प्रभुई ङाः झाम र्‌वापाई रह्पा ङै रङ्पा, ‘खम्म खेखे यरूसलेमलै गेरा, तैङर्‌वाङिन ङन भारेः नाई बिम्पा साँचि ख्युई स्वीकारी खेनान मया।’” ङै र्‌वापा, “हे प्रभु, ङै यहूदीन आराधनालय पुरूग वैवै नान लाह्ः बिस्वास खेनानकाङ्मोः ज्यालखानाः कह्पा रे फ्याङ्पा अजोव पुरूग क्युई ङ्याह्। नान साँचि स्तिफनसन कह गेत्फान्तौ ङह् रे रह्‌म्मै च्याङ्च्याङ नू सह्त्तौ दीदी, नू सन्नानवन घोलाङ कुकु छ्युङ्पा ङ्याह्।”4 “तब प्रभुई ङाः र्‌वाबो, ‘वया, तैङर्‌वाङिन ङा नाः यहूदीन खोलोःन सिमिव स्याह्‌ ग्याङम-ग्याङ्मथाल फेन्नान ङ्युँ।’”

अकेः र्‌वान बेर सिमिवजै पावलन ल्होई ङ्यान्पाई छ्युङ्पा ङ्याह्, जेङ्नै मन्न छाम्म चन ख्युई फाईरा खेईखेई र्‌वामः जाःबो, “अनग सस्सै पिर्थीबिलै पह्त्त्वानान, ता अनग सम्पु ख्योवाचेई नङ्पा।” ख्यु जेँन घोलाङ छ्योनैछ्योनै रे थल्जुब खेईखेई फाईरा खेमः जाःबो। रोमन सेनापतिजै र्‌वाबो, “नू ब्यारेकन झिङ सह्‌रा, रे चेरन ताल्च्या फ्याङफ्याङ छोए सेह्‌ना, कि तैङ नुन बिरोधग ख्यु झामखेखे फाईरा खेपाई छ्युङ्पा ङ्याह्।” आलै जब ख्युई पावलग फोन्न रूजै खीबो, तब पावलजै रह्‌म्मै थाङथाङ सिपाहीन अफिसरग लोप्पो, “तै रोमी सिमि रे दोसी ठहरी मरह्पान सिमी कानुन्न अन्सार चेरन ताल्च्या फ्याङ्चे लः जेङ्पाऊ?”

सिपाहीन अफिसरजै अन ताह्‌मी अफिसरन स्याह् स्वास्वा झाम र्‌वाबो, “नाई तै खेमः जाःपा ङिह्पा? तैङर्‌वाङिन अन सिमि ता रोमी सिमि जेअँ।” तब सेनापतिजै स्वास्वा पावलग लोप्पो, “ङाः र्‌वा, तै ना रोमी सिमि जेङ्पौ?” नुई र्‌वाबो, “जेङ्पा।” सेनापतिजै झब बिम्बो, “ङै ता अन सिमिन आङ सोङ लै फाफा र्‌युपा जेङ्पा।” पावलजै र्‌वाबो, “जेङ्नै ङा ता केह्तौलैन रोमी जेङ्पा।” जेङ्नै नू छोए सेह्‌म्म तयार रह्पा सिमि पुरूव तुरुन्तै च्योलच्योल होई, रे पावल रोमी सिमिदी जेअँ र्‌वार्‌वा क्युई राह्‌राह्‌ सेनापति यङ ङिह्‌म्बो, तैङर्‌वाङिन नुई पावलग साँगलजै खीपा ङ्याह्।

पावल जोम्पा किमन ङू

जेङ्नै नाप्चे यहूदीवजै पावलग पक्‌का कन कारनजै दोस बिम्पा ङ्याह् अन हाकोसुमजै नू पोङ्बो, रे ङोत्वा पुजारी पुरूव रे जोम्पा किम जोमफाम्बो, आलै पावलग पोँ सस्सै ख्युन ङू सोल्बो।

Source notes (4)
  1. Cross-reference प्रे ५:३४-३९
  2. Cross-reference प्रे ८:३; २६:९-११
  3. Cross-reference योए २:३२
  4. Cross-reference प्रे ७:५८

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.