Kaike Standard Traslation
प्रे 21
यरूसलेमग पावलन यात्रा
ख्युन ङ्याबो भिदा राह्राह् ङ्योअ त्युन जहाजग चपचप थारेः कोस तापू स्वापा, रे नाप्चे रोदसग रे स्याह्लै पताराग स्वा ताप्पा। आलै फोनिकेग वैनान्न त्युन जहाजदी दोदो ङ्योअ मनगै चपचप वैपा। जब साइप्रस तापु रङ्बो, तब ङ्योअ त्युन जहाजग योम्मक्याँ होलफानफान सिरियाक्याँ वैवै तुरोसग लिप्पा। तैङर्वाङिन त्युन जहाजन आलमाल स्याह् छ्युत्वापा ङ्याह्। चेलाकाङ्मोः फाप्पाई दोदो ख्युन ङ्याबो ङ्योअ नेर्या स्याह् छ्युङ्पा। पावलग यरूसलेमग नवया र्वार्वा ख्युई पबित्र आत्मालम र्वाबो। स्याह्लै ङ्योअन वैचेन भेला रामी ङ्योअ भाभा जेँन ल्हेम्म गेप्पा। आलै ख्यु पुरू जेँन पयार रे वैचाव यङ ङ्योअग सहरन खोलोःथाल साःमः स्वाबो, रे ङ्योअजै समुन्द्रन नाः पो जूजू सोअताप्पा, रे राह्ङराङ्सान ङ्याबो भिदा रह्पा। तब ङ्योअ त्युन जहाजग चप्पा, रे ख्यु चन जेँन यिम होल्बो।
तुरोसलै समुन्द्र-यात्रा खेखे ङ्योअ तोलेमाइग स्वा ताप्पा। स्याह् बिस्वासी जिङ्कोव स्हीम ङिह्पाऊ र्वार्वा ख्युन ङ्याबो तीँ छ्युङ्पा। नाप्चे ङ्योअ भाभा कैसरियाग स्वापा, रे ताह्फेन्नान फिलिपन यिम छ्युङ्पा। नु नेह्पान बर्ग ती ङ्याह् सू यरूसलेमन सेवकन भिह्तु दम्पा ङ्याह्। परमेस्वरन केह्ः भबिस्यबानी र्वानान नुन लिपा कन्या चमेःव ङ्याह्।1
ङ्योअ स्याह् खजिर्या छ्युङ्तौ यहूदियालै अगाबस मिह्न्न तीपा भबिस्यबक्ता स्वाबो। नुई ङ्योअन स्याह् स्वास्वा पावलन धब वव्वै जेँन लाह्-लेह् खीबो, रे र्वाबो, “पबित्र आत्मा झाम र्वाङ, ‘अन धब कन सिमिन जेङ्पा, नू यरूसलेमग यहूदीवजै झामखेखेई खीनान ङ्याह् रे यहूदीन खोलोःन सिमिवन लाह्ग बिन्नान ङ्याह्’।”
अन ल्होई ताह्ताह्, ङ्योअ रे मन ठाउँन सिमिव दीदी नू यरूसलेमग नवया र्वार्वा छ्याःफुल्पा। जेङ्नै पावलजै झब बिम्बो, “ङेन झामखेखे दादा ङन सम तैङ मक्युप्पा दोङ्नान? तैङर्वाङिन प्रभु येसुन मिह्न्न भिह्तु ज्यालग थेप्चे मात्र नङ्पा, जेङ्नै ङा यरूसलेमग सिनै तयार ङिह्पा।”
नू मनाई खे मतैतौ “प्रभुन इच्छ्या पुरा रायो” र्वार्वा ङ्योअ तै मर्वारे छ्युङ्पा।
स्याह् ङाई छ्युङ्मी ङ्योअ आलमाल तयार खेखे यरूसलेमक्याँ वैपा। ङ्योअन ङ्याबो कैसरियान कान-कान चेलाव रे वैपा, रे ख्युई ङ्योअग साइप्रसन पहिलीन बिस्वासीदी मनासोन र्वानान्न यिम सप्पो। नुन स्याह् ङ्योअ छ्युङ्त्वापा ङ्याह्।
पावलजै याकूबग दोपा
आलै जब ङ्योअ यरूसलेमग स्वा ताप्पा, तब बिस्वासी थिक्कोवजै ङ्योअग स्याङस्याङ स्वागत खेबो। घङ्न लाह्ः पावल ङिन ङ्याबो याकूबग धोमः वैपा। स्याह् मन्दलिन ताङ्बोन अगुवा पुरूव जोम्पा ङ्याह्। ख्युकाङ्मोः स्हीम ङिह्पाऊ र्वामी, पावलजै नुन सेवाकाईलम यहूदीन खोलोःन सिमिवन घूँ परमेस्वरजै खेपान धोन ख्युकाङ्मोः ती-ती खेखे स्याप्पो। अन ताह्मी ख्युई परमेस्वरन महिमा खेबो। तब नू र्वाबो, “पावल भाइ सेह्ना, यहूदीवन घूँ बिस्वास खेनानव हजारौँ ङ्याह्, रे कानुन्न ल्होईग ख्यु पुरू तखरा ङ्याह्। ख्युई नान भारेः यङ तयाः ल्होई ताह्पा ङ्याह्, अन तै जेङ्पा र्वाङिन, यहूदीन खोलोःन सिमिवन घूँ छ्युङ्नान येहूदीकाङ्मोः नाई ‘मोसान कानुनग ख्योवाःयो रे ख्युन वैचाकाङ्मोः खतना नख्याःयो रे यहूदीवन ल्हूलाम नङ्यानाःयो,’ र्वार्वा लम्पा ङ्याह्, रु। ता तै खेचे? ना स्वापा ङ्याह् र्वार्वा ख्युई तेम्माई ताह्नान ङ्याह्। अन्नकारन तै ङि र्वानान, अन ख्या। रेनरुनान्न सिमि लिपाव ङिन ङ्याबो ङ्याह्। अजोवग वव्वै ना रे अजोवन ङ्याबो ङ्याबोई छाङ्म रा, रे अजोवग त्वानान खर्च नाई फाः, रे अजोवजै छम पह्राःयो। झामखेखे नाई मोसान कानुन ङ्याम्पा रङरङ नान भारेः ताह्पा ल्होई तये तेम्मा नह् र्वार्वा पुरूग क्युई राह्नान ङ्याह्।2 जेङ्नै यहूदीन खोलोःन सिमिव सुई बिस्वास खेपा ङ्याह्, ख्यु कू भोका फुल्पान चिज, कह, होला च्योरच्योर सप्पा भस्तन स्या रे ब्यभिचारलै भाभा छ्युङ्त्वानान र्वानान्न ङ्योअन निर्नय स्यापस्याप ङ्योअजै हिगा सर्पा ङिह्पा।”
तब पावलजै मन सिमिकाङ्मोः वप्पो, रे नाप्चे ख्युन ङ्याबो ङ्याबोई जेँगै छाङ्म खेफाम्बो रे छाङ्म दोङ्नान्न दिनव हातौ पुरा राह्नान जेम, आथबा पुरून भिह्तु बिन्नान भेतीन ल्होन ताह्फेम्मः नु आराधनालयन झिङ होई।3
आराधनालयग पावलग जुङ्पा
जब नेर्या पुरा राम जाःपा ङ्याह्, तब एसिया प्रदेसन यहूदीवजै पावलग आराधनालयग रङरङ मोङ पुरूग उत्साहित दोङ्बो, रे नू जुङ्बो। ख्यु झाम र्वायङ फाईरा खेमः जाःबो “इस्राएलन सिमि हो, सहयोग ख्या! सिमिकाङ्मोः खातत्त्या ङ्योअन जाति, मोसान कानुन रे अन ठाउँन बिरोधग लनलन लेन्नान सिमि अनै जेङ्पा। अकेः मात्र नङ्पा, अनजै यहूदीन खोलोःन सिमिकाङ्मोः आराधनालयन झिङ सस्सै अन पबित्र ठाउँग बाःपा दोङ्पा ङ्याह्।” तैङर्वाङिन अन्न ङू ख्युई एफिससन त्रोफिमस र्वानान सिमि तीपाः नुन ङ्याबो सहरग रङपा राह्राह् नू पावलजै आराधनालयन झिङ सप्पा जेङ्पा र्वार्वा ख्युई छुबो।4
तब सहर पुरूग फाईरा रह्पा, रे सिमिवन ङ्याबो धालैधालै स्वाबो। ख्युई पावलग जुङ्जुङ् आराधनालयलै खोलोः पुरीपुरी सप्पो, रे तुरुन्तै झलाव थाबो। जब ख्युई नू सच्चेन प्रयास खेपा ङ्याह्, तब यरूसलेम पुरू फाईराकुईरा रह्पा ङ्याह् र्वानान ल्होईन ल्होन पल्तन्न सेनापतिन स्याह् स्वा ताप्पो। सरदार तुरुन्तै सिपाही रे सिपाहीन अफिसरन ङ्याबो वव्वै ख्युन ङ्याबो धालैधालै स्वाबो। ख्युई सिपाहीन अफिसर रे सिपाहीकाङ्मोः रङ्बो, रे पावलग फ्याङ्मः ख्योवाबो। तब मन सेनापति रह्म्म स्वास्वा पावलग जुङ्बो रे साँगल ङेह्जै नू खीफाम्बो। अन सु जेङ्पा रे अनजै तै खेबो र्वार्वा नुई लोप्पो। जेङ्नै मन मोङन बर्ग कानजै ल्होईदी रे कानजै घङ ल्होई र्वार्वा फाईरा खेबो, रे नुई अन फाईरान कारन घतना तै जेङ्पा अन क्युई रा मतैरे पावलग ब्यारेकग होरा र्वार्वा र्वाबो। जब पावल भर्याङग स्वा ताप्पो, तब थल्जुबन ङिनङिनलैमन प्रोत्साहनजै खेखे सिपाहीवजै नू थीथी वप्पो। तैङर्वाङिन सिमिवन मोङ “नू सह्रा” र्वार्वा फाईरा खेयङ ङिङि जाःपा ङ्याह्।
पावलजै जेँग सोमफाम्पा
ब्यारेकन झिङ साःमः जातौ पावलजै सेनापती र्वाबो, “गुरु, अनुमति देङ्ङिन, ङा तयाः र्वासुम ङिह्पा।” नुई र्वाबो, “तै नाः ग्रीक ल्होई स्वानौ? आन ना मन मिस्री नङ्पाऊ, सुई तोर्ज्या क्रान्ति सुरु खेपा ङ्याह् रे हजार ली सोसस्त्र आतङ्कारीकाङ्मोः सुनसान ठाउँग वप्पा ङ्याह्?”
जेङ्नै पावलजै झब बिम्बो, “ङा ता किलिकियान सहर तार्तसन यहूदी सिमिदी जेङ्पा, मामलि सहरन सिमि नङ्पा। घलिछ्याःचल, अन सिमिकाङ्मोः तयाः र्वाचे ङाः अनुमति भिना।”
जब नुई अनुमति बिम्बो, तब भर्याङ्ग थाङथाङ पावलजै सिमिकाङ्मोः लाह्जै लाःता खेबो। सिमिव पुरा छ्यामी, नुई ख्युकाङ्मोः हिब्रु ल्होईग झाम र्वाबो।
Source notes (4)
- Cross-reference योए २:२८
- Cross-reference गन्ती ६:५; ६:१३-१८; ६:२१
- Cross-reference गन्ती ६:१३-२१
- Cross-reference प्रे २०:४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.