Kaike Standard Traslation
मत्ती 28:20
Verse 20 is marked below, with the whole chapter around it. Read from the start
येसु सिह्पालै सम्पु ग्युर्पा
(मर्क १६:१-११; लुक २४:१-१२; यूह २०:१-१८)
नाह्न ल्हाःन ङूस्योवा आईतन लाह्ः नाह्प ङाई नम नाङ्पान भेला मरियम मग्दलिनी रे घङ मरियम येसू नाम्पान तुह्र्सा सेह्म्म होई। मन्तौ तैमेग साँगुल किम होई तैङर्वाङिन स्वर्गलै प्रभु परमेस्वरन स्वर्गदुतदी स्वास्वा तुह्र्सान लुङ लाल्लोवा पप्पै मन्नै लाह्ः छ्युङ्बो। नुन ध्वा बिजुली लैम चम्किलो रे घोलाङ लिङ लैम पाह्ल्म ङ्याह्। पालेव चन ङिनराःछेछे दारदार साः घ्याबो रे सिह्पान सिमिलैम रह्पा। जेङ्नै स्वर्गदुतजै मन चिमिचाकाङ्मोः र्वाबो, “नङिना, ङाः क्युई ङिह्पा, ङेन क्रुसग चुनचुन सप्पान येसू फाम्मः स्वापा जेङ्पा। जेङ्नै सेह्ना, येसु स्यीह् मह्या। जेँजै र्वापालैम नु ता सिह्पालै सम्पु ग्युर्पा ङ्याह्। स्वास्वा प्रभुन सिह्पान ल्हो नाम्पु सेह्ना! मन्न छाम्म खम्म वैवै नुन चेलाकाङ्मोः ‘प्रभु ता सिह्पालै सम्पु ग्युर्पा ङ्याह्। नु ङेन खेरे ङूई गालीलग वैङ, स्याह् ङेनजै नू रङ्नान ङ्याह्’ र्वार्वा ताह्फेरा! ता वया, ङै र्वापान ल्होई ङेन ह्याका ख्या।”
मन चिमिचाकाङ्मोः ङिह्म्बो यङ रे यामयाम स्याङ्बो यङ। आलै ख्यु तुरुन्तै तुह्र्सालै गेप्पो रे चेलाकाङ्मोः ताह्फेम्मः धाल्बो।
येसुई ख्युकाङ्मोः हरक्क दोदो र्वाबो, “ङेनकाङ्मोः सान्ति राःयो!” मन्नै भेला ख्युई खल्बू क्याप्क्याप नुन लेह् ध्वा खेबो। येसुई ख्युकाङ्मोः र्वाबो, “नङिना, ङेन वैवै ङन थिक्कोवकाङ्मोः गालीलग वया र्वार्वा र्वा। स्याह्ई ख्युई ङाः रङ्नान ङ्याह्।”
सिपाहीवजै सप्पान ल्होन
मन चिमिचाव वैतामी तुह्र्साः सेन्चे खेनान कान सिपाहीव यङ सहरक्याँ होई रे तुह्र्साः रह्पान ल्होई पुरूव ङोत्वा पुजारीकाङ्मोः स्याप्पो। ङोत्वा पुजारीवजै घङ अगुवावन ङ्याबो दीदी सल्ला खेबो आलै ख्युई सिपाहीकाङ्मोः सोह्ङ लैः बिमबिम र्वाबो, “ङेनजै झाःम र्वा कोई ‘छान्जे ङि आःपान भेला येसुन चेलावजै स्वास्वा नुन कुह्म खुखु वत्तँ।’ रोमी हाकिम-किमै ताह्दँ र्वाङिन ङि नुन ङ्याबो ल्होई मिलाई खेच्योवा। ख्युई अन्न भारेः छरा तये खेमत्वानान।”
मन सेन्चे खेनानवजै सोह्ङ वव्वै ङोत्वा पुजारीवजै लम्पा लैम र्वाबो। अन ल्होई चन यहूदीवन घूँ चोँन बेरै फेल्पाई ङ्याह्।
मकेकुकेन किम आदेस
(मर्क १६:१४-१८; लुक २४:३६-४९; यूह २०:१९-२३; प्रे १:६-८)
चेला च्युदीपाव येसुई वया र्वापान गालीलन धुरग होई।1 येसू रङ्लुङ्मीम ख्यु नुन ङू खल्बू क्याप्पो। जेङ्नै ख्युन बर्ग हाति चेलाः ता “येसुई जेम या नह्म” र्वानान्न सङ्का रह्बो। तब येसु रह्म्म स्वास्वा ख्युकाङ्मोः र्वाबो, “सेह्ना, स्वर्ग रे पिर्थीबिन आङ पुरू ङाः बिम्पा ङिह्पा। ता ङेन वैवै पुरू सिमिकाङ्मोः ङन चेलाव धोँवा। ख्युकाङ्मोः पा, ङोह्जो रे पबित्र आत्मान मिह्नग बप्तिस्मा भिना।2 रे ङेनकाङ्मोः र्वापान तैस्याङ पुरू ङ्याना र्वार्वा ख्युकाङ्मोः लह्ना। आलै सेह्ना, ङा एकुरोभरि, सन्सारन अन्त्यन दिन्न बेर ङेनकोन ङ्याबोई लुईनान ङ्युँ।”
Source notes (2)
- Cross-reference मत्ती २६:३२; मर्क १४:२८
- Cross-reference प्रे १:८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.