Kaike Standard Traslation
मत्ती 27
येसू पिलातसन स्याह् वप्पा
(मर्क १५:१; लुक २३:१-२; यूह १८:२८-३२)
नाह्पपर्म ङोत्वा पुजारी रे घङ अगुवावजै येसू सच्चे र्वार्वा सल्ला खेबो। आलै ख्युई नू साँगलजै खीखी रोमी हाकिम-किम पिलातसन स्याह् वव्वै थोप्पो।
यहूदा सिह्पा
(प्रे १:१८-१९)
येसू सन्नान्न धल बिम्पान ल्होई ताह्ताह् जुङ्फान्नान यहूदाः घ्योप्पा रह्बो। नुई मन मुलन सिक्का च्युसुम वव्वै ङोत्वा पुजारी रे घङ अगुवावन स्याह् वैबो।1 रे झाःम र्वाबो, “ङै अपराध खेपा, निर्दोस सिमी सच्चेन भिह्तु जुङ्फाप्पा।” ख्युई झब बिम्बो, “मन्न ङी तै मल्लब? अन ता नान ल्होई पो जेङ्पा।” अन ताह्ताह् येहूदाई मन सोह्ङ आराधनालयन झिङ पप्पो आलै स्याह्लै वैवै नु चुनचुन सिह्बो। ङोत्वा पुजारीवजै चन मन सोह्ङ चाह्चाह् र्वाबो, “अन ता कहन सोह्ङ जेङ्पा, कानुन अन्सार अनग आराधनालयन भकाःसः नान्चे लः मराह्नान।” अन्नकारन ख्युई प्रदेसिवन कुह्म लुह्म्मः कुमालेन खे र्वानान्न सा र्युह्नान्न सल्ला खेबो। अन्नैकारन त्यान बेरै मन साः “कहन सा” र्वानान्न लूह् ङ्याह्। झामखेखे मन्तौ यर्मिया भबिस्यबक्ताजै र्वापान अन ल्होई पुरा रामः स्वापा जेङ्पा, “इस्राएलन सिमिवजै नुन भिह्तु तोकि खेपान मोल चन मुलन सिक्का सुमच्यु ङ्याह्। मन ख्युई वप्पो।2 आलै परमप्रभुई ङाः कोह्पा लैम खेखे ख्युई मन सोह्ङ कुमालेन खेःन भिह्तु बिम्बो।”
पिलातसन ङू येसु
(मर्क १५:२-१५; लुक २३:३-५; यूह १८:२९; १९:१६)
येसु रोमन हाकिम किम पिलातसन ङू थाङ्थाङ् छ्युङ्मी हाकिमजै नू लोप्पो, “तै ना यहूदीवन झली जेङ्पौ?” येसुई झब बिम्बो, “अन ता नँह्ः र्वाङ।” ङोत्वा पुजारी रे घङ अगुवावजै येसू लै दोस बिम्मः जाःबो। जेङ्नै हाति दोस बिन्नै नुई तये मर्वाबो। अन्नकारन पिलातसजै नू र्वाबो, “ख्युई अकेह्न दोसव बिम्पा ना मताँयौ?” जेङ्नै येसुई ल्होईदीनै झब मबिम्बो। अन रङरङ हाकिम-किम मिह्दा हालाईबो।
येसू सच्चेन धल बिम्पा
(मर्क १५:६-१५; लुक २३:१३-२५; यूह १८:३९; १९:१६)
निस्तार तेवरन भेलाः रोमन हाकिम-किमै सिमिवजै दम्पा तीपा कैदी फेच्चेन ल्हू ङ्याह्। मन्न भेला बारब्बा मिह्न्न मिह्नकै रह्पान सिमिदी झ्यालखानाः ङ्याह्। आलै पिलातसजै जोम्पा सिमिकाङ्मोः लोप्पो, “दे र्वा, ङा सू फेच्चे? बारब्बाः कि मसिह र्वानान्न येसू?” तैङर्वाङिन यहूदी आङ खेनान्न सिमिवजै येसू थादोवा खेखे थोप्मः सप्पा जेङ्पा र्वानान्न ल्होई हाकिम-किम पिलातसग क्युई रह्बो।
पिलातस न्याय आसनग छ्युङ्पा ङ्याह्। मन्नै भेला नुन मिसाई नू झाःम र्वार्वा ल्होन कोर्बो, “मन धर्मी सिमी तये नख्याःयो तैङर्वाङिन त्या छान ङै नुन भारेः मङ रङरङ तूरि लैः देप्पा ङिह्पा।” जेङ्नै ङोत्वा पुजारी रे घङ अगुवावजै चन सिमिवन मोह्ङ्ग उक्स्याई खेखे झाम र्वामः जाःबो, “येसू सह्रा, बारब्बाः चन फेरा।” रोमन हाकिम-किम पिलातसजै मोङग ह्याङ लोप्पो, “तेम्माई र्वा, सू फेच्चे?” ख्युई “बारब्बागै फेरा,” र्वार्वा फाईरा खेबो। आलै पिलातसजै ख्युकाङ्मोः ह्याङ लोप्पो, “आन मसिह र्वानान्न येसू चन ङा तै खेचे?” ख्यु पुरूजै फाईरा खेखे र्वाबो, “नू क्रुसग चुना।” पिलातसजै लोप्पो, “अनजै तै अपराध खेपा ङ्याह्?” जेङ्नै ख्युई हेँ फाईरा खेखे र्वाबो, “नू क्रुसग चुनाःयो!” पिलातसग ता तै खेखेई मराह्नान लैम रह्बो। ता ता फाईराकुईरा रह्दरा र्वानान छुछु नुई पुरून ङू लाह् थुईथुई र्वाबो, “सेह्ना, अन सिमी सह्प्पान दोस ङाः नङ्पा, जेङ्नै ङेनकाङ्मोः ताह्ःयो।”3 “लौ लौ, येसू सह्प्पान दोस ङि रे ङिनै ङोह्जो-चमेःन ङ्याःई थेबाःयो!” ख्युई फाईरा खेईखेई र्वाबो। तब पिलातसजै बारब्बाः फेप्पो। येसू चन नुई चेरन ताल्च्या फ्याङफ्याङ क्रुसग चुम्मः सिपाहीकाङ्मोः जिम्मा बिम्बो।
सिपाहीवजै येसू खिसि खेपा
(मर्क १५:१६-२०; यूह १९:२-३)
मन्न छाम्म पिलातसन सिपाहीवजै येसू दरबारन झिङ वप्पो आलै घङ पुरू सिपाहीकाङ्मोः रूबो। ख्युई येसुन घोलाङ छ्यूछ्यू नू झलीन लैम घोलाङ ल्होःम थम्बो। चेरन मुकुत दोङ्दोङ् नुन थोप्पाः थम्बो रे नुन लाह् याईपाः मि वप फानफान नुन ङू कुकु खिसि खेईखेई र्वाबो, “यहूदीवन झलीन छ र्याङ्म राःयो!” मन्न छाम्म सिपाहीवजै नू छिमा पप्पो आलै मि तलतल नुनै थोप्पाः फ्याङ्बो। ख्युई नू झामखेखे खिसि खेतामी घोलाङ ल्होःम छ्यूछ्यू नुन जेँनै घोलाङ थम्बो। मन्न छाम्म ख्युई नू क्रुसग चुम्मः जाःबो।
येसु क्रुसग चुम्पा
(मर्क १५:२१-३२; लुक २३:२६-४३; यूह १९:१७-२७)
लमग वैतौवैतौ ख्युई सिमोन मिह्न्न कुरेनी सहरन सिमिदीग धोबो। ख्युई नू हलजफत येसुन क्रुस हुर फाम्बो आलै ख्यु गलगथा र्वानान्न ठाउँग स्वा ताप्पो। गलगथा र्वापा चन “कपलि रह्पु” जेङ्पा। स्याह् ताप्ताप् ख्युई येसू मान खाःपा कह्पान खु थुङ्फाम्बो। चाकि खेमी नुई थुङ्चे मङ्याम्बो।4
मन्न छाम्म ख्युई येसू क्रुसग किला थिङ्थिङ चुम्बो। नुन घोलाङ चन ख्युई राह्ङराङ्साः चित्ता फ्याङफ्याङ परेःबो।5 तब स्याह् छ्युङछ्युङ ख्यु नू सेन्चे खेमः जाःबो। नुन थोप्पान ङ्या ख्युई “अन येसु यहूदीवन झली जेङ्पा,” र्वार्वा दोसन हिगा सर्पा च्यार्बो। येसू चुन्तौ ख्युई ङेह् च्याःपाकाङ्मोः र्वार्वा नुन याईपा रे योम्मक्याँ क्रुसग चुम्बो।
मन लम राह्राह् वैनान भरि सिमि पुरूवजै होला कुलैकुलै येसू खिसि खेईखेई र्वाबो,6 “आराधनालय फ्वाफ्वा ह्याङ सुमङीगै दोङ्तैनान्न सिमि ना नङ्पाऊ? यदि परमेस्वरनै ङोह्जो जेङ्न दे ता जेँगै बचाई खेखे क्रुसलै धुलधुल स्वा!”7 उजुई खेखे ङोत्वा पुजारी, कानुन लन्नान्न सिमि रे घङ अगुवावजै र्वार्वा येसू खिसि खेबो। ख्युई र्वाबो, “नुई घङग ता सोम फाम्बो, जेङ्नै सेह्ना, जेँगै चन बचाई मतैबो। यदि अन इस्राएलीवजै झली जेङ्न क्रुसलै धुलधुल स्वाःयो आन पो ङि बिस्वास खेच्योवा! अनजै परमेस्वरग बिस्वास खेँ रे ‘ङा ता परमेस्वरन ङोह्जो जेङ्पा’ र्वार्वा ल्हेङ्ङ। परमेस्वर अन्न ङ्याबो स्याङ्पा ङिङिन ता नुई र्वार्वा अनग बचाई ख्याःयो।”8 उजुई खेखे नुनै ङ्याबो चुम्पान मन च्यापावजै र्वार्वा येसुन खिसि खेबो।
येसु सिह्पा
(मर्क १५:३३-४१; लुक २३:४४-४९; यूह १९:२८-३०)
ङिजे बार बजेलै तिन बजे थाल देसभरी नाःतुमा रह्बो। तीन बजेराः येसुई केह्ः किम छ्यूछ्यू र्वाबो, “ईलोई-ईलोई लामा सबखथनी?” अन्न अर्थ जेङ्पा, “हे ङन परमेस्वर, हे ङन परमेस्वर, ङाः तैङ ख्योवापा?”9 येसु झामखेखे फाईरा खेपा ताह्ताह् स्याह् थाङ्थाङ् छ्युङ्पावन बर्ग कान कानजै र्वाबो, “अन सिमिजै ता एलियाग कताँ!” तीपा चन धालैधालै वैवै खु खाःपाः कपास सुपसुप सप्पो रे मन झुम्रो मिन नाः कानकान येसू थुङ्फाम्बो।10 जेङ्नै घङवजै र्वाबो, “कुवा, कुवा, कार्तौ एलिया स्वास्वा अनग बचाई खेङिम कि, सेह्म्मता!” आलै मन्नै भेला येसुई ह्याङ तीरेप केह्ः किमै फाईरा खेखे जेँन परान पप्पो। तब सेह्ना, मन्नै भेलाः आराधनालयन झिङ च्यार्पान पर्दा ङयाःलै पोँथालै काला ङेह् राह्राह् छ्योम्बो। साँगुल होई, सेन्चे लुङव दिल्बो,11 तुह्र्साव पोङ्बो रे सितपान परमेस्वरन लै पबित्र सिमिवन सिह्पान ल्हो सम्पु ग्युर्बो। येसु सिह्पालै सम्पु ग्युर्मी ख्यु जेँ-जेँन तुह्र्सालै गेग्गे पबित्र सहरग जाःबो रे लै सिमिवन स्याह् रङ्बो। साँगुल वैपा रे स्याह् रह्पा तैस्याङ पुरू रङरङ येसू कुकु छ्युङ्पा सिपाहीव रे ख्युन अफिसर मिह्दा ङिह्म्बो। आलै ख्युई र्वाबो, “तेम्माई नु ता परमेस्वरनै ङोह्जो जेअँ।”
लैः चिमिचाव रे ग्याङ्मलै च्याङ्च्याङ सेम्पाई ङ्याह्। ख्युई येसू गालीललै ङिक जाईजाई रे सेवा खेईखेई स्वापा ङ्याह्।12 ख्युन बर्ग मरियम मग्दलिनी, याकूब रे योसेफन मा मरियम आलै जब्दियान ङोह्जो ङेह्न मा ङ्याह्।
येसू लुम्पा
(मर्क १५:४२-४७; लुक २३:५०-५६; यूह १९:३८-४२)
ङ्याजे योसेफ मिह्न्न तीपा अरिमाथिया सहरन रेम्पा सिमि स्वाबो। नु रे येसुनै चेला रह्पा ङ्याह्। ता नुई पिलातसन स्याह् वैवै येसुन कुह्म तोल्बो। पिलातसजै र्वार्वा नुन सिह्पान ल्हो वन्नान्न अनुमति बिम्बो। योसेफजै सिह्पान ल्हो वव्वै सुतीन घोलाङ खामसाङ्म सार्बादी च्योम्बो, रे मन सिह्पान ल्होग मात्र लुङ ख्वाख्वा जेँन भिह्तु दोङ्दोङ् नाम्पान तुह्र्सा सार्बाः नाह्म्बो आलै लुङ किमदी वव्वै तुह्र्सान ङुर थाथा नु स्याह्लै होई। मरियम मग्दलिनी रे घङ मरियम चन तुह्र्सान ङूई छ्युङ्बो।
तुह्र्साः सिपाहीव
नाप्चे नाह्न लाह्ः ङोत्वा पुजारी रे फरिसीव दीदी पिलातसन स्याह् वैवै र्वाबो, “गुरु, ङी ह्याका खेपा ङिह्पा, मन ठगजै सम्पु रातौ ‘ङा सिसि सुमङीग ह्याङ सम्पु ग्युर्नान ङ्युँ’ र्वाईर्वाई ल्हेङ्ङ।13 अन्नकारन सुमङी मवैन बेर मन तुह्र्सा लः खेखे सेन फाना। कार्तौ नुन चेलावजै स्वास्वा नुन कुह्म खुखु वव्वै ‘नु ता सिह्पालै सम्पु ग्युर्पा ङ्याह्’ र्वार्वा सिमिकाङ्मोः छकाई पच्चे नधेराःयो! तेमन्ता पहिलीन छल खेरै अन अलः राह्नान ङ्याह्।” उजु रातौ पिलातसजै ख्युकाङ्मोः र्वाबो, “सिपाहीकाङ्मोः वव्वै तैनबेर लः खेखे तुह्र्सान सेन्चे खे फाना।” आलै ख्युई वैवै तुह्र्सा सुरछित नाह्म्मः तुह्र्सान ङुर कप्नान्न लुङ्ग ताह्ः नाह्म्बो रे सिपाहीकाङ्मोः सेह्मफाम्बो।
Source notes (13)
- Cross-reference प्रे १:१८-१९
- Cross-reference जक ११:१२-१३
- Cross-reference कानुन २१:६-९
- Cross-reference भजन ६९:२१
- Cross-reference भजन २२:१८
- Cross-reference भजन २२:७; १०९:२५
- Cross-reference मत्ती २६:६१; यूह २:१९
- Cross-reference भजन २२:८
- Cross-reference भजन २२:१
- Cross-reference भजन ६९:२१
- Cross-reference प्रस २६:३१-३३
- Cross-reference लुक ८:२-३
- Cross-reference मत्ती १६:२१; १७:२३; २०:१९; मर्क ८:३१; ९:३१; १०:३३-३४; लुक ९:२२; १८:३१-३३
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.