Kaike Standard Traslation
मत्ती 26
येसुन बिरोधग सदेन्त्र
(मर्क १४:१-२; लुक २२:१-२; यूह ११:४५-५३)
अन ल्होई पुरू लनतामी येसुई जेँन चेलाकाङ्मोः र्वाबो, “ङेनकाङ्मोः क्युई ङ्याह्, ङेर्यान ङिक निस्तार तेवर स्वानान ङ्याह्। मन्तौ क्रुसग चुनचुन सच्चेन भिह्तु सिमिन ङोह्जो जुङ्फान्नान ङ्याह्।”1 मन्नै भेला कैयाफा प्रधान पुजारीन ख्यामग ङोत्वा पुजारी रे घङ अगुवाव दीदी जोम्बो। मन जोमग ख्युई येसू फाक जुङजुङ सम्मता र्वार्वा दीदी सल्ला खेबो। जेङ्नै ख्युई र्वाबो, तेवरन भेलाः चन ङी अन धोन खेचे नङ्पा, तेमन्ता सिमिकाङ्मोः फाईराकुईरा राह्नान ङ्याह्।
बेथानीया सहरग येसुन थोप्पाः अत्तर हाल्पा
(मर्क १४:३-९; यूह १२:१-८)
येसु बेथानियाग सिमोन कोरन नाह्जा ताह्पान सिमिन यिम ङिम्तौ चिमिचादी ठेकोः मकेकुकेन कुम्म अत्तर सस्सै येसुन स्याह् स्वाबो। रे नु ङ्योप्पा झामः छ्युङ्तौ नुई मन अत्तर पुरू थोप्पाः हाल्बो।2 नुई झाःम खेपा कुह् मतैरे चेलावजै र्वाबो, “अकेः ह्याल्म अत्तर तैङ भाछ्योँवा पाह्दुर पप्पा? बरु अनग सोङ लैःग र्युह्र्युह् बिखारीकाङ्मोः परेःपा जेङ्न राह्नान न!” ख्युई झाःम ल्होई र्वापा ताह्ताह् येसुई र्वाबो, “तैङ ङेन अनग तूरि बिन्नान? अनजै ङन भिह्तु धोन लःदी खेपा ङ्याह्। बिखारीव ता ङेन ङ्याबो बात्तै राह्नान, जेङ्नै ङा ता ङेन ङ्याबो बात्तै मराह्नान!3 अन अत्तर हालहाल अनजै ङन ल्होग लुम्चेन भिह्तु तयार खेपा जेङ्पा। तेम्माई ङा ङेनकाङ्मोः र्वाचे, सन्सारभरी अन ल्होन् लः खाः-खाः स्यान्नान ङ्याह्, स्याह्-स्याह् अन चिमिचाई खेपान अन धोन्नै चर्चा खेनान ङ्याह्।”
यहूदा येसू धोका बिम्मः राजि रह्पा
(मर्क १४:१०-११; लुक २२:३-६)
मन्न छाम्म चेला च्योङेपावन बर्ग यहूदा इस्करियोत र्वानान चन ङोत्वा पुजारीवन स्याह् वैवै र्वाबो, “यदि ङै येसू जुङ्फाङ्ङिन ङाः तै बिन्नान?” ख्युई नू अन धोन्न भिह्तु मुलन सिक्का सुमच्यु थाम बिम्बो।4 मन्न भेलालै यहूदाई येसू जुङ्फान्चेन मौका फाम्म जाःबो।
अन्त्यन भत्यार
(मर्क १४:१२-२६; लुक २२:७-२३; यूह १३:२१-३०; १ कोर ११:२३-२५)
सोरा मकह्पान रोता झानान निस्तार तेवरन ङूस्योवान लाह्ः चेलाव येसुन स्याह् स्वाबो रे लोप्पो, “नान भिह्तु तेवरन भत्यार ङि खाः तयार खेचे?” नुई ख्युकाङ्मोः र्वाबो, “सहरग बिसेस सिमिदीन स्याह् वया रे र्वा: गुरुई झाम र्वापा ङ्याह्, ‘ङन भेला रह्पा। ङा जेँन चेलावन ङ्याबो नान यिम निस्तार तेवरन भत्यार झासुम ङिह्पा।’” चेलावजै वैवै येसुई कोह्पा लैम खेबो आलै स्याह्ई निस्तार तेवरन भत्यार तयार खेबो।
येसु ङ्याजे रामी चेला च्योङेपावन ङ्याबोई झामः छ्युङ्बो। झातौ येसुई र्वाबो, “तेम्माई ङा ङेनकाङ्मोः र्वाचे, ङेनकोनै घूँलै तीपाई ङाः बैरिकाङ्मोः जुङ्फान्नान ङ्याह्।” अन ताह्ताह् चेलाकाङ्मोः यामयाम सम तूह्बो रे तीपा-तीपाई “प्रभु, तै ङा ता नङ्मतौ?” र्वार्वा लोप्पो।
येसुई ख्युकाङ्मोः र्वाबो, “चोँ तेर्माः ङन ङ्याबोई रोता सुप्नानजै ङाः जुङ्फान्नान ङ्याह्।5 पबित्रसास्त्रग सर्पा लैम सिमिन ङोह्जो ता वैई त्वानान। जेङ्नै धिक्कार मन सिमी, सुई सिमिन ङोह्जोः जुङ्फान्नान ङ्याह्। नु ता बरु मकेह्पा जेङ्न लः राह्नान ङ्याह्!” जुङ्फान्नान यहूदाई र्वार्वा र्वाबो, “गुरुज्यू, तै अन ङा जेङ्पाऊ?” येसुई झब बिम्बो, “अन ता नह् र्वाङ।”
प्रभु भोज
(मर्क १४:२२-२६; लुक २२:१४-२०; १ कोर ११:२३-२५)
झपाई छ्युङ्पान भेला येसुई रोता वव्वै परमेस्वरन ङ्याबो असिका बिमबिम क्युप्पो आलै चेलाकाङ्मोः परेईपरेई र्वाबो, “अन वव्वै झा, अन ङन ल्हो जेङ्पा।” मन्न छाम्म नुई खोरे यङ वप्पो आलै परमेस्वरग मया रह्पा र्वार्वा चेलाकाङ्मोः भिनैभिनै र्वाबो, “अनलम ङेन पुरूजै थुवा। अन रेनरुपा सार्बा थुप्नान्न ङन कह जेङ्पा, कन सिमि लैःन तीपा फ्याःचेन भिह्तु पन्नान ङ्याह्।”6 ङा ङेनकाङ्मोः र्वाचे, “ङन पान राज्यग ङेन ङ्याबो अङ्गुरन खु सार्बा मथुङ्न बेर ङा ह्याङ अन अङ्गुरन खु थुङ्नान मीह्।” आलै धेनदी धेमी येसु चेलावन ङ्याबो जैतून धुरक्याँ होई।
पत्रुसन अस्वीकारन भारेः येसुन भबिस्यबानी
(मर्क १४:२७-३१; लुक २२:३१-३४; यूह १३:३६-३८)
मन्न भेला येसुई चेलाकाङ्मोः र्वाबो, “त्या छान्जे ङेन पुरू ङाः ख्योवाख्योवा ज्यार्नान ङ्याह्। तैङर्वाङिन पबित्रसास्त्रग झाम सर्पा ङ्याह्, परमेस्वरजै ग्वाल्याः सन्नान ङ्युँ रे मोह्ङन लूपाव तितरबितर राह्नान ङ्याह्।7 जेङ्नै सिह्पालै सम्पु ग्युर्मी ङा ङेन खेरे ङू गालील छेत्रग वैनान ङ्युँ।”8
पत्रुसजै येसू र्वाबो, “पुरूजै ख्योवाख्योवा ज्यार्नै ङा नाः हातौयै ख्योवानान मीह्।”
येसुई र्वाबो, “तेम्माई ङा नाः र्वाचे, नाप्चे नाह्पा काःपा तर्चेन खेरे ङूई ङाः स्योई मस्योःनान र्वार्वा नाई सुमरेप थाल अस्वीकार खेनान ङ्याह्।”
पत्रुसजै झब बिम्बो, “नान ङ्याबो सित्वानै ङा नाः मस्योःनान र्वार्वा हातौयै र्वानान मीह्!” घङ चेला पुरूवजै र्वार्वा उजुई र्वाबो।
गेतसमनी क्वाग येसुन सोअताप
(मर्क १४:३२-४२; लुक २२:२९-४६)
मन्न छाम्म येसु जेँन चेलावन ङ्याबो गेतसमनी र्वानान्न क्वाग होई। स्याह् ताप्ताप् नुई चेलाकाङ्मोः र्वाबो, “ङेन स्यीह् छ्योवा कोई, ङा ङाई धेरा वैवै सोअताप्चे।” जेङ्नै पत्रुस रे जब्दियान ङोह्जो ङेह्ग चन नुई जेँन ङ्याबोई वप्पो आलै येसू मिह्दा तूरि रे पिरग थेप्पो। नुई चेलाकाङ्मोः र्वाबो, “ङन परान यामयाम छराई सिह्पालैम रह्पा ङ्याह्। ङेन चन सापसाप स्यीह् ङन ङ्याबो छ्योवा।” नु चन ङाई धेरा वैवै साः खल्बू क्यापक्याप झाःम र्वाईर्वाई सोअताप्मः जाःबो, “हे ङन पा, रा तैङिन अन तूरिन खोरे ङन स्यीह्लै ग्याङ्म होरा। जेङ्नै ङन इच्छ्या ता नङ्पा, नानै इच्छ्या पुरा राःयो।” येसु च्याङच्याङ जेँन चेलावन स्याह् होलहोल स्वातौ ख्यु आःपाई छ्युङ्पा धोबो। येसुई पत्रुसग र्वाबो, “तै ङेन घन्तादी यङ ङन भिह्तु साप्पागै छ्युङ् मतैनौ?” ङेन “स्वानान्न छोए सेन्नान्न भेला तीपाः फसि मराह्मता” र्वार्वा साप्पागै छ्युङछ्युङ सोअताबा। “तेम्माई आत्मा चन तयार ङ्याह्, जेङ्नै ल्हो चन कमजोर ङ्याह्।”
ह्याङ वैवै येसुई ङेरेप झाःम र्वार्वा सोअताप्पो, “हे ङन पा, अन तूरिन खोरे ङै मथुङ्खाईमे जेङ्न, नानै इच्छ्या पुरा राःयो।” आलै ह्याङ चेलावन स्याह् होलहोल स्वातौ ख्यु ह्याङ यङ आःपाई छ्युङ्पा धोबो। ख्युई मी पोङै मतैबो।
आलै येसुई ख्युकाङ्मोः अझामगै ख्योवाख्योवा होई सुमरेप ह्याङ ङून लैम सोअताप्पो। मन्न छाम्म नु चेलावन स्याह् होलहोल स्वास्वा र्वाबो, “तै ङेन हेँ आःआः नाह्ःनान? ङ्याना, ङा सिमिन ङोह्जो पापी सिमिन लाह्ग थोन्नान्न भेला रातह्बो। ता च्याँ, वैमता! सेह्ना, ङाः जुङ्फान्नान सिमि यङ स्वा ताप्पा ङ्याह्।”
येसू जुङ्पा
(मर्क १४:४३-५०; लुक २२:४७-५३; यूह १८:३-१२)
येसुई अन ल्होई र्वातौ च्योङेपान बर्ग यहूदा र्वानान चेलादी चन स्वा ताप्पो। यहूदान ङ्याबो पेर्गा रे तरवाली वप्पा सिमिवन मोङ किम ङ्याह्। ख्युकाङ्मोः ङोत्वा पुजारी रे घङ अगुवावजै फेप्पा ङ्याह्। जुङ्फान्नान यहूदाई मन सिमिकाङ्मोः ताह्दी बिम्पा ङ्याह्, “सू ङा मोई खेनान” नुई येसु जेङ्पा, नू झ्वाँ र्वापा ङ्याह्। ता यहूदाई थारेः येसुन स्याह् वैवै “स्हिम ङिह्पौ गुरु” र्वार्वा मोई खेबो।
येसुई र्वाबो, “ए ङन ग्याप्पा! तै खेमः स्वापा जेङ्पा, अन ख्या।” तब ख्युई येसू जुङ्बो। अन रङरङ येसुन ङ्याबो ङिह्पान फुरीदीजै जेँन तरवाली छ्यूबो रे फ्याङफ्याङ प्रधान पुजारीन राङ्पान नाम्ज्योवा थुम्बो। जेङ्नै येसुई नू र्वाबो, “नान तरवाली स्योह्पग नाह्ना। तरवाली कुल्नानव तरवालीजै सन्नान ङ्याह्। ङै तोल्पा जेङ्न ङन पाई ङाः तुरुन्त पल्तन च्योङेपा खेरेई लै स्वर्गदुतव फेङ्ङ। तै ना अन रा मतैमतौ र्वार्वा छुनौ? जेङ्नै यदि ङै तोल्ङिन ता पबित्रसास्त्रग झाःम रात्वानान र्वार्वा सर्पान ल्होई कुजुई पुरा राह्नान?”
मन्न छाम्म येसुई जेँग जुङ्मः स्वापा सिमिकाङ्मोः र्वाबो, “तै ङा च्याःपा जेङ्पौ तै ङेन पेर्गा रे तरवाली वव्वै ङाः जुङ्मः स्वापौ? ङै बात्तै आराधनालयग छ्युङछ्युङ लन्तौ ता च्या ङाः जुङ्चेन हिम्मतै मखेबो!9 जेङ्नै भबिस्यबक्तावजै पबित्रसास्त्रग सर्पान ल्होई पुरा राःयो र्वाईर्वाई अन पुरू रामः स्वापा जेङ्पा।” मन्नै भेला चेलाव भरि पुरू येसू ख्योवाख्योवा ज्यार्बो।
यहूदी जोम्पुन ङू येसु
(मर्क १४:५३-६५; लुक २२:५४-५५; यूह १८:१३-१४; १८:१९-२४)
ख्युई येसू प्रधान पुजारी कैयाफान यिम वप्पो। स्याह् कानुन लन्नान्न सिमि रे घङ अगुवाव जोम्पा ङ्याह्। पत्रुस चन येसू ग्याङ्मलै ङिक जाईजाई प्रधान पुजारीन यिमन ख्यामग ताप्पो। आलै स्याह् तै राह्नान जेम र्वार्वा सेह्म्म नु वैवै पालेवन ङ्याबो छ्युङ्बो। ङोत्वा पुजारी रे यहूदी जोम्पुन घङ जोम्पा सिमि पुरूवजै येसू सन्नान्न धल भिन त्वानान र्वार्वा लबारन साँचि फाम्मः जाःबो। लै लबार साँचि बिन्नानव स्वास्वा नू दोस बिम्बो, जेङ्नै प्रमानदी यङ मदेप्पो। ङिक सिमि ङेह्पाई ङू वैवै र्वाबो, “अन सिमिजै ता ‘ङा परमेस्वरन आराधनालय फ्वाफ्वा सुमङीगै ह्याङ दोङ् तैनान’ र्वाङ।”10
आलै प्रधान पुजारीजै च्याङच्याङ येसू लोप्पो, “ए, तैङ झब मबिन्नान? नान बिरोधग अजोवजै बिम्पान साँचिन भारेः नाः तये र्वाकोए मीपाऊ?” जेङ्नै येसु तै मर्वारे छ्युङ्बो। ह्याङ प्रधान पुजारीजै र्वाबो, “सम्पु परमेस्वरन मिह्नग रेनरुरु र्वा, तै ना परमेस्वरन ङोह्जो मसिह जेङ्पौ?” येसुई झब बिमबिम र्वाबो, “मन नँह् र्वाङ, आलै ङा ङेनकाङ्मोः र्वाचे, तान धेरा ङेनजै सिमिन ङोह्जोः सर्बसक्तिमान परमेस्वरन याईपाक्याँ सिङ्हासनग छ्युङ्पा रे स्वर्गलै नमलूग स्वायङ खेपा रङ्नान ङ्याह्।”11 अन ताह्ताह् ङोत्वा पुजारीजै वाक्क राह्राह् जेँन घोलाङ छ्योनैछ्योनै र्वाबो, “दे सेह्ना, अनजै परमेस्वरन ल्हुई झपा ङेनजै ताह्बो, ता ङी घङ तै पर्मान त्वाबो?12 दे र्वा, ङेन तै छोए खेनान?” “अन अपराधी जेङ्पा, अनजै सन्नान्न धल देत्त्वानान,” र्वाईर्वाई ख्युई येसुन ङुरग छिमा पप्पो, मुक्का फ्याङ्बो आलै हातिपाई नू ताप्पर फ्याङफ्याङ र्वाबो,13 “हे मसिह, यदि ना भबिस्यबक्ता जेङ्न ङी भबिस्यबानी, नाः सुई फ्याङ्बो?”
पत्रुसजै येसू अस्वीकार खेपा
(मर्क १४:६६-७२; लुक २२:५६-६२; यूह १८:१५-१८; १८:२५-२७)
मन्न भेला बेर पत्रुस खोलोः ख्यामगै छ्युङ्पा ङ्याह्। राङ्मादी स्वास्वा नू र्वाबो, “ना रे गालील प्रदेसग छ्युङ्नान्न येसुन ङ्याबोई ङ्याह् न, नङ्पा तै?” जेङ्नै पत्रुसजै पुरून ङू, “नङ्पा, नाई तै र्वानान ङाः क्युई मीपा!” र्वार्वा ख्यामन झलाक्याँ होई। झलान रह्म्म घङ राङ्मादीजै स्याह् ङिह्पान सिमिकाङ्मोः र्वाबो, “अन सिमि यङ नासरतन येसुन ङ्याबोई ङ्याह्!” ह्याङ पत्रुसजै रेनरुरु अस्वीकार खेखे झाःम र्वाबो, “ङा ता मन सिमी स्योई मस्योःनान!” ङाईदिलै स्याह्न सिमिवजै पत्रुसन रह्म्म स्वास्वा र्वाबो, “तेम्माई ना रे नुन ङ्याबोई ङ्याह्, नान ल्होईजै र्वार्वा अन ल्होई क्युई राँ!” आलै ह्याङ पत्रुसजै रेनरुरु र्वाबो, “ङै लबार र्वापा जेङ्न परमेस्वरन धल ङन ङ्याःई स्वाःयो, ङा ता मन सिमी स्योई मस्योःनान!” उजु र्वालुङ्मीम काःपा तर्बो रे “काःपा तर्चेन खेरे ङू ङाः सुमरेपथाल स्योई मस्योःनान र्वार्वा अस्वीकार खेनान ङ्याह्,” र्वार्वा येसुई र्वापान ल्होई पत्रुसजै नावा खेबो। नु खोलोः वैवै धुरुधुरु दाःबो।
Source notes (13)
- Cross-reference कानुन १२:१-२७
- Cross-reference लुक ७:३७-३८
- Cross-reference कानुन १५:११
- Cross-reference जक ११:१२
- Cross-reference भजन ४१:९
- Cross-reference कानुन २४:८; यर ३१:३१-३४
- Cross-reference जक १३:७
- Cross-reference मत्ती २८:१६
- Cross-reference लुक १९:४७; २१:३७
- Cross-reference यूह २:१९
- Cross-reference दान ७:१३
- Cross-reference लेवी २४:१६
- Cross-reference यसै ५०:६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.