Kaike Standard Traslation
मत्ती 25
कन्या च्युपान द्रिस्तान्त
मन्न भेला येसुई हेँ र्वाबो, “स्वर्गन राज्य चन धोमः वैनान्न कन्या च्युपान ल्होई लैम राह्नान ङ्याह्। कन्या जेँ-जेँन लज्युङ वव्वै मापाः धोमः होई।1 मन च्युपान बर्ग ङापा बुद्धिमानी रे ङापा चन मुर्ख ङ्याह्। मुर्खवजै लज्युङ ता वव्वै होई, जेङ्नै घङ छि चन मवप्पो। जेङ्नै बुद्धिमानीवजै चन लज्युङ्न ङ्याबो बत्ताः घङ छि यङ वप्पो। कुकु छ्युङ्तौ माःपा स्वामः पुल्म राह्राह् ख्यु पुरू ङ्योम्ङ्योम राह्राह् मिवा च्युमः जाःबो।” “छान फेःग ख्युई ‘सेह्ना माःपा, नू खेमः च्याँ’ र्वापा ताह्बो।” कन्या पुरूव जुरुक्क च्याङच्याङ जेँ-जेँन लज्युङव तयार खेबो। मुर्ख कन्यावजै चन बुद्धिमानीकाङ्मोः र्वाबो, “ङेनकोन छि ङी र्वार्वा ङाई क न, ङिन लज्युङव ता सिमै जाःपा ङ्याह्।” जेङ्नै बुद्धिमानीवजै झब बिम्बो, “ङेनकाङ्मोः र्वार्वा घङ छि ङिन ङ्याबो मीपा, ङेन पसलग वैवै र्युर्र्युई सह्रा न।” “आलै मन मुर्ख कन्याव छि र्युह्म्मः वैतौ माःपा स्वा ताप्पो। तयार राह्राह् छ्युङ्पान बुद्धिमानी कन्या ङापा चन माःपान ङ्याबो भ्यान भत्यार मनाई खेमः झिङ जाःबो रे झला यङ बन रह्बो।” “ङाईदिलै मन मुर्ख कन्याव यङ स्वा ताप्पो रे र्वामः जाःबो, ‘हे प्रभु, हे प्रभु, ङिन भिह्तु झला पोवा’!”2 जेङ्नै माःपाई झब बिमबिम र्वाबो, “तेम्माई, ङा ङेनकाङ्मोः मस्योःनान!” झामखेखेई येसुई र्वाबो, ङेन जेर्म राह्राह् छ्योवा तैङर्वाङिन सिमिन ङोह्जो कन्न लाह्ः रे कन भेला स्वानान ङ्याह्, अन ङेनकाङ्मोः क्युई राह्नान मह्या।
राङ्पा सुमपावन द्रिस्तान्त
(लुक १९:११-२७)
मन्तौ स्वर्गन राज्य झाम राह्नान ङ्याह्, “सिमिन ङोह्जो स्वानान्न भेलाः चन मालिकदी परदेस वैवै यिम होल्नान्न भेलाः रह्पालैम राह्नान ङ्याह्। मन सिमिजै परदेस वैचेन खेरे ङू जेँन राङ्पाकाङ्मोः स्वा र्वार्वा जेँन क्यु जिम्म बिम्बो।3 नुई राङ्पान बुद्धि अन्सार ती हजार ङा, घङग हजार ङेह् रे घङग हजारदी मरन सिक्का जिम्मा बिमबिम पर्देसग होई। हजार ङा मरन सिक्का जिम्मा वन्नान राङ्पा चन तुरुन्तै वैवै मन सोह्ङ व्यापारग कह्बो रे नुई मनलै घङ हजार ङा मरन सिक्का कमाई खेबो। उजुई खेखे हजार ङेह् सिक्का जिम्मा वन्नान राङ्पाई र्वार्वा घङ हजार ङेह् मरन सिक्का कमाई खेबो। जेङ्नै हजारदी मरन सिक्का जिम्मा वन्नान राङ्पाई चन साः लुह्म ख्वाख्वा मालिकन ग पेरपेर नाह्म्बो।” “भेला लैः वैमी मन राङ्पावन मालिक होलहोल स्वाबो रे ख्युलम जेँन हिसाब वप्पो। हजार ङा मरन सिक्का देन्नानजै स्वास्वा मालिकग र्वाबो, ‘सेह्ना, नाई ङाः हजार ङा मरन सिक्का बिम्पा ङ्याह्, मनलम ङै घङ हजार ङा बुद्धिजै कमाई खेखे सप्पा ङिह्पा।’” मालिकजै र्वाबो, “साबासाबा! ना लः रे र्वापालैम राङ्पा जेअँ। ना ल्होई ङाईग र्वापालैम रह्पान कारन ङा नाः घङ लैः ल्होईन जिम्मा बिन्चे। ना स्वास्वा ङन ङ्याबो स्याँ।” मन्न छाम्म हजार ङेह् मरन सिक्का देन्नानजै स्वास्वा र्वाबो, “गुरु, नाई ङाः हजार ङेह् मरन सिक्का बिम्पा ङ्याह्। सेह्ना, ङै घङ हजार ङेह् कमाई खेखे सप्पा ङिह्पा।” मालिकजै र्वाबो, “साबासाबा! ना लः रे र्वापालैम राङ्पा जेअँ। ना ल्होई कत्याःमः र्वापालैम ङिह्पान कारन ङा नाः घङ लैः ल्होईन जिम्मा बिन्चे। ना र्वार्वा स्वास्वा ङन ङ्याबोई स्याँ।” “मन्न छाम्म हजारदी मरन सिक्का देन्नान सिमिजै स्वास्वा र्वाबो, ‘गुरु, ना क्योङ्जाखाबा ङ्याह्, नाई जेँजै मपाह्पान भालि गम्गम वन्नान रे जेँजै मताम्पा साह्ई यङ रूनान र्वानान्न ल्होई ङाः क्युई ङ्याह्।’ अन्नकारन नाः ङिनङिन ङै ता नान सिक्का सान पोँ क्युक्यु नाम्पा। स्यीह् सेह्ना अन नान सिक्का जेङ्पा।” तब मालिकजै नू र्वाबो, “ए बदमास रे अल्छी राङ्पा! ङा जेँजै मपाह्पान बालि गम्गम् वन्नान रे जेँजै मताम्पा साह्ई रूनान क्योङ्जाखाबा जेङ्पा र्वानान नाः क्युई ङ्याह् र्वाङिन नाई ङन सोह्ङ वव्वै ब्याजग बिन्चे नङ्पाऊ न? आलै ङा होलहोल स्वातौ तये मराह्नै ब्याज देङ्ङ! नुनलम अन मरन सिक्का तलतल मनै च्यु थाम मरन सिक्का ङिह्पा सिमी भिना तैङर्वाङिन सुन ङ्याबो ङ्याह्, नू हेँ बिन्नान ङ्याह् रे नुन ङ्याबो हेँ हाति र्वार्वा राह्नान ङ्याह्। जेङ्नै सुन ङ्याबो मह्या, नुनलम ङाई ङिह्पा यङ तल्नान ङ्याह्।4 ता अन फान मीपान राङ्पाः वव्वै खोलोः नाःतुमाः पह्रा। स्याह् अनजै सो चमैचमै दाःचे खेपाई छ्योवायो!”5
अन्त्यन न्याय
“सिमिन ङोह्जो महिमा किमः स्वर्गदुतवन ङ्याबो स्वास्वा जेँन महिमामय सिङ्हासनग छ्युङ्नान ङ्याह्।6 मन्न भेला पिर्थीबिन सिमि पुरूव नुन ङू च्याङ्नान ङ्याह् आलै ग्वाल्याई राह् रे लूपावग फापालैम नुई मन सिमिकाङ्मोः र्वार्वा फानान ङ्याह्। नुई लूपावग जेँन ल्हा याईपाक्याँ रे राह्वग जेँन ल्हा योम्मक्याँ फाफा नान्नान ङ्याह्। झलीजै जेँन याईपा ल्हाक्याँन सिमिकाङ्मोः र्वानान ङ्याह्, ‘ए ङन पा परमेस्वरलम असिका देप्पान सिमिव हो! स्वास्वा सन्सारन स्रिस्तिलै ङेनकोन भिह्तु तयार दोङदोङ नाम्पान राज्यग छ्योवा तैङर्वाङिन ङा गुसितौ ङेनजै ङाः ख्वाबो, त्यु बुल्तौ त्यु बिम्बो रे ङा परदेसी रातौ यङ नान यिम ङाः छ्युङ्फाम्बो। ङा चत्यापा रातौ घोलाङ थम्बो, खङ्तौ सेन्चे खेबो, झ्यालखानाः थेप्तौ ङाः धोमः स्वाबो।’” “अन ताह्ताह् परमेस्वरन र्वापा ङ्यानैङ्यानै स्वापान धार्मिक सिमिवजै नू लोन्नान ङ्याह्, ‘प्रभु, ङी नाः हातौ गुसिपा रङ्पा रे ख्वापा? हातौ त्यु बुल्पा रङ्पा रे त्यु बिम्पा? हातौ ना परदेसी रातौ ङिन यिम नाः छ्युङ्फाम्पा? हातौ नाः चत्यापा रङ्पा रे घोलाङ थम्पा? हातौ नाः खङ्पा रङ्पा रे सेन्चे खेपा? आलै हातौ झ्यालखानाः थेप्पो रे ङि धोमः स्वापा?’” तब झलीजै झब बिमबिम र्वानान ङ्याह्, “तेम्माई ङा ङेनकाङ्मोः र्वाचे, ङन भाइवन बर्ग पुरून खेरे छ्युमः ङेनजै तै खेपा, अन ङाः र्वार्वा खेपा जेङ्पा।” मन्न छाम्म नुई जेँन लाह् याईपाक्याँ रह्पाकाङ्मोः र्वानान ङ्याह्, “ए परमेस्वरन सरापित सिमिव हो, स्यीह्लै वया! दियाबलस रे नुन स्वर्गदुतकाङ्मोः तयार खेखे नाम्पा हातौयै मसिह्नान्न मेह्ग वया! तैङर्वाङिन ङा गुसितौ ङेनजै ङाः मख्वाबो, त्यु बुल्तौ त्यु मबिम्बो। ङा परदेसी राह्राह् स्वातौ ङेनजै ङाः जेँन यिम छ्युङ मफाम्बो, चत्यापा रातौ घोलाङ मथम्बो। ङा खङ्तौ रे झ्यालखानाः थेप्तौ ङेन ङाः धोमः मस्वाबो।” “आलै ख्युई लोन्नान ङ्याह्, ‘प्रभु, हातौ ङी नाः गुसिपा, त्यु बुल्पा, परदेसी रह्पा, चत्यापा रह्पा, खङ्पा आलै झ्यालखानाः थेप्पा रङरङ यङ नान सेवा मखेपा?’ मन्न भेला झलीजै ख्युकाङ्मोः र्वानान ङ्याह्, ‘तेम्माई ङा ङेनकाङ्मोः र्वाचे, ङन भाइवन बर्ग पुरून खेरे छ्युमः फुरी मखेपाई ङाः मखेपा जेङ्पा।’ आलै ख्युई चन हातौयै मताह्नान्न धल देन्नान ङ्याह्, जेङ्नै धार्मिक सिमिवजै चन हातौयै मताह्नान्न झुनि देन्नान ङ्याह्।”7
Source notes (7)
- Cross-reference लुक १२:३५
- Cross-reference लुक १३:२५
- Cross-reference लुक १९:११-२७
- Cross-reference मत्ती १३:१२; मर्क ४:२५; लुक ८:१८
- Cross-reference मत्ती ८:१२; २२:१३; लुक १३:२८
- Cross-reference मत्ती १६:२७; १९:२८
- Cross-reference दान १२:२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.