Kaike Standard Traslation
मत्ती 24
येसुई आराधनालय मीपा राह्नान्न भारेः ल्होई र्वापा
(मर्क १३:१-१३; लुक २१:५-१९)
मन्न छाम्म येसु आराधनालयलै गेग्गे वैतौ चेलाव स्वास्वा नू आराधनालयन भबनव थन्चे र्वार्वा नुन रह्म्म स्वाबो। आलै येसुई र्वार्वा, “ङेनजै अन पुरू रँ आउ? तेम्माई ङा ङेनकाङ्मोः र्वाचे, अन भबनवन लुङ्दीन लाह्ः घङ लुङ यङ लाःमा लुईनान मह्या, पुरू दिम्नान ङ्याह्।” येसु जैतून धुरग छ्युङ्पान भेलाः चेलावजै तै मर्वारे स्वास्वा नू लोप्पो, “गुरुज्यू, ङी र्वा न, अन ल्होई पुरूव हातौ राह्नान ङ्याह्? आलै ना होलहोल स्वामः जाःपा रे सन्सारन अन्त्य रामः जाःपा ङ्याह् र्वार्वा ङी कुजुई क्युई रा तैनान?” येसुई झब बिम्बो, “होसखेखे छ्योवा! सुई ङेनकाङ्मोः छकाई पच्चे नधेराःयो तैङर्वाङिन लैः सिमिव ‘मसिह ङाई जेङ्पा’ र्वाईर्वाई ङन मिह्नग स्वानान ङ्याह् आलै लैः सिमिकाङ्मोः छकाई पन्नान ङ्याह्। ङेनजै युद्ध रह्पा र्वानान रे युद्ध राह्नान्न फाईराव ताह्नान ङ्याह्। जेङ्नै मन्न भेला ङेन नङिना। मन ल्होई पुरूव ता राई त्वानान, जेङ्नै मन्नै भेला ता सन्सारन अन्त्य मराह्नान। तैङर्वाङिन जातिन बिरोधग जाति, रे राज्यन बिरोधग राज्य च्याङ्नान ङ्याह्। ठाउँ ठाउँग अनिकाल राह्नान ङ्याह् रे साँगुल स्वानान ङ्याह्।” अन ल्होईव ता वैचा केतौन स्हरन सुरु मात्र जेङ्पा। मन्न भेला सिमिवजै ङेनकाङ्मोः जुङ्नान्न ङ्याह् रे सजाय बिम्म वन्नान ङ्याह्, हेँ सन्नान यङ ङ्याह्। ङन कारनजै जाति पुरून सिमिवजै ङेनकाङ्मोः मस्याङ्चे खेनान ङ्याह्। मन्न भेला लैःजै जेँन बिस्वासग ख्योवानान ङ्याह्, तीजै घङग धोकेबाज खेनान ङ्याह्, मस्याङ्नान ङ्याह्। लैः लबारन भबिस्यबक्ताव गेग्गे लैः सिमिकाङ्मोः छकाई पन्नान ङ्याह्। खातत्त्या कानुन मङ्यान्नान लैम अलःव छार्नान्न कारन लैः सिमिवन मया यङ भाम्म राह्राह् वैनान ङ्याह्। जेङ्नै अन्त्यन बेर स्थिर छ्युङ्नानव चन बचाई खेनान ङ्याह्।1 जाति पुरून सिमिकाङ्मोः साँचि राःयो र्वार्वा ङू परमेस्वरन राज्यन ल्होन् लः सन्सारभरी ताह्फेन्नान ङ्याह्। मन्न छाम्म सन्सारन अन्त्य राह्नान ङ्याह्।
ङिनङिनलैम तूरिन भेला
(मर्क १३:१४-२३; लुक २१:२०-२४)
“भबिस्यबक्ता दानिएलजै ‘आराधनालयन पबित्र ठाउँग मीपा दोङ्नान्न मस्याङ्मस्याङ लैम चिज च्याङ्च्याङ छ्युङ्पा रङ्नान ङ्याह्’ र्वापा ङेनजै रङ्नान ङ्याह्। अन्न अर्थ तोअनानवजै हाकोवाःयो।”2 मन्न भेला यहूदियाग ङिह्पाव धुरक्याँ झ्याराःयो। यिमन ल्हुपग ङिह्पाव आलमाल दर्मः पोँ यिम नधुलाःयो।3 खे-बारी ङिह्पाव जेँन घोलाङ दर्मः होलहोल यिम नस्वाःयो। मन्न भेला काँचिली या खोलग वैचा ङिह्पान माकाङ्मोः मन्न ल्हाः कत्याःमन ङिनङिन लैम रह्दरा। रुन्जेन भेला रे नाह्न ल्हाः ज्यार्चे नराःयो र्वार्वा ङेनजै परमेस्वरग सोअताबा। तैङर्वाङिन मन्न लाह्वग स्वानान लैम तूरि ता सन्सारन सुरुलै चोँन बेर रह्पाई मह्या रे ङिक यङ राह्नान मह्या।4 परमेस्वरजै मन तूरिन दिनव घताई मखेपा जेङ्न सुई सोन तैनान मह्या। जेङ्नै जेँन दम्पा सिमिवन कारनजै नुई मन दिन घताई खेनान ङ्याह्। “सेह्ना ‘मन्नै भेला मसिह ता स्यीह् ङ्याह् या स्याह् ङ्याह्’ र्वार्वा ङेनकाङ्मोः सुई र्वाङिन मन ल्होई बिस्वास नख्या। तैङर्वाङिन झाम लबारन मसिह रे लबारन भबिस्यबक्ताव रङ्नान ङ्याह्। ख्युई किम-किम ताईलुवान धोन रे हालाईचेन धोनव थनथन तैन बेर परमेस्वरजै दम्पान सिमिकाङ्मोः र्वार्वा झुक्याई खेनान ङ्याह्।” “ङ्याना, ङै ङेनकाङ्मोः अन ल्होई भेला स्वाचेन खेरै ङू र्वापा ङिह्पा।” सिमिवजै ङेनकाङ्मोः “नु सुनसान-ठाउँग ङ्याह्” र्वानै ङेन स्याह् नवया। ख्युई “सेह्ना, नु ता झिङन कोथाः पेर्पा ङ्याह्” र्वानै ङेन मन ल्होई बिस्वास नख्या।5 तैङर्वाङिन पान्नाङग स्यारलै ल्हो थाल बिजुली चम्कि रह्पालैम ङा सिमिन ङोह्जो स्वातौ राह्नान ङ्याह्। खाः कुँह्म ङ्याह्, स्याह्ई च्यारगोएव जोम्ङ!6
सिमिन ङोह्जो रङ्नान्न लाह्ः
(मर्क १३:२४-२७; लुक २१:२५-२८)
“मन तूरिन दिनव वैमी ङिह्मा तुरुन्तै नाःतुमा राह्नान ङ्याह्, धाई साल्म बिन्नान मह्या, घरव पान्नाङलै छार्नान ङ्याह् आलै पान्नाङन सक्ति पुरूव गुल्नान ङ्याह्।7 मन्न भेला पान्नाङग सिमिन ङोह्जो स्वानान्न ताह्ः रङ्नान ङ्याह्। सिमिन ङोह्जोः किम सक्ति रे मकेकुकेन किम महिमान ङ्याबो पान्नाङन नमलूग स्वायङ खेपा रङरङ सन्सारन जाति पुरूव दाःचे खेनान ङ्याह्।8 सँह्ःलिङ बुन्नान ङ्याह् आलै सिमिन ङोह्जोई स्वर्गदुतकाङ्मोः पिर्थिबी रे पान्नाङ्न कोप्चा लिब्रुङ्ग फेन्नान ङ्याह् रे परमेस्वरजै दम्पाकाङ्मोः रूरू सन्नान ङ्याह्।”
खोअन तङ्पुलम छोए
(मर्क १३:२८-३१; लुक २१:२९-३३)
“खोअन तङ्पुलम तयाः ल्होई लह्ना। अन्न धावग ल्हा पलाई राह्राह् तुसा स्वामी रेन्जे रह्दँ र्वार्वा क्युई राँ। उजुखेखेई र्वापान अन ल्होई पुरू रायङ खेपा रङ्नान ङ्याह्, तब स्वानान्न मन्न भेला रह्म्मै, झलाःगै ङ्याह् र्वार्वा ङेनकाङ्मोः क्युई रा। तेम्माई ङा ङेनकाङ्मोः र्वाचे, अन ल्होई पुरू पुरा मह्रान बेर अन पुस्ता ताह्ताह् वैनान मह्या। पान्नाङ रे पिर्थीबि फ्याफ्या वैनान ङ्याह्, जेङ्नै ङै र्वापान ल्होई चन हातौयै ताह्ताह् वैनान मह्या।”
सुई र्वार्वा मन्न लाह्ः रे भेला क्युई मह्या
(मर्क १३:३२-३७; लुक १७:२६-३०; १७:३४-३६)
जेङ्नै मन्न लाह्ः रे भेलान भारेः अन लः खेखे सुई क्युई मह्या। मन ता स्वर्गदुतव रे ङा परमेस्वरन ङोह्जोः र्वार्वा क्युई मह्या। मन ल्होई चन केवल परमेस्वर पाः मात्र क्युई ङ्याह्। ङा सिमिन ङोह्जो स्वामः जाःनान्न लाह्वग नोआन पाली रह्पालैम राह्नान ङ्याह्।9 मन्न भेला नोआ त्युन जहाजग मजाःन बेर सिमिव झायङ खेपा, थुङ्यङ खेपा रे मिह्जीव खेपाई छ्युङ्पा ङ्याह्। स्योङ स्वास्वा पुरू स्वात्तै फ्याफ्या मवन्न बेर ख्युकाङ्मोः तये क्युई मरह्पा। ङा सिमिन ङोह्जो स्वातौ यङ उजुई राह्नान ङ्याह्।10 मन्न भेला बारी धोन खेपाई छ्युङ्पान सिमि ङेह्पावन बर्ग ती वन्नान ङ्याह् रे घङ चन स्याह्ई ख्योवानान ङ्याह्। ल्हाकोर राःपाई छ्युङ्पान चिमिचा ङेह्न बर्ग ती वन्नान ङ्याह् घङ चन ख्योवानान ङ्याह्। “अन्नकारन ङेन जेर्म राह्राह् छ्योवा तैङर्वाङिन ङेनकोन प्रभु कन्न लाह्ः स्वानान ङ्याह्, अन ङेनकाङ्मोः क्युई मराह्नान। जेङ्नै अन ल्होई चिनचिन नाह्ना, खुम्पा स्वानान्न भेला क्युई रह्पा जेङ्न ता यिमन ताःपो सापसाप छ्युङ्नान ङ्याह् रे खुम्पाः यिम जाःफान्नान मह्या।11 अन्नकारन ङेन यङ जेर्म राह्राह् छ्योवा! ङा सिमिन ङोह्जो ङेनजै नावाई मखेपान भेलाः स्वानान ङ्याह्।
बिस्वासी रे अबिस्वासी राङ्पा
(लुक १२:४१-४८)
“बिस्वासी रे बुद्धिमानी राङ्पा सु जेङ्पा? उदाहरन्न भिह्तु मालिकजै जेँन यिमन धोन पुरू जिम्मा बिम्मी बुद्धिमानी रे र्वापा लैम राङ्पाई चन घङ राङ्पाकाङ्मोः भेला लः-ल:ग झाफाङ्ङ। मालिक होलहोल स्वास्वा मन राङ्पाः उजुई धोन खेपाई छ्युङ्पा दोतौ नु हाति धन्न राह्नान ङ्याह्। तेम्माई ङा ङेनकाङ्मोः र्वाचे, मालिकजै मन राङ्पाः जेँन क्यु पुरून जिम्मा बिन्नान ङ्याह्। जेङ्नै यदि मन राङ्पा अलःजै ‘ङन मालिक पुल्म खेखे होलहोल स्वाङ’ र्वानान नछुवा रे ह्याल्म रःसि थुङ्नानवन ङ्याबो झाझा योयोई घङ राङ्पाकाङ्मोः फ्याङ्मः जाःङिन मन राङ्पान मालिक नुई नावाई मखेपान लाह्ः रे भेलाः स्वा ताप्नान ङ्याह्। मालिकजै नू तुकरा तुकरा दोङ्नान ङ्याह् रे ख्वाकिबावन भागेदार दोङ्नान ङ्याह्। स्याह् नु दानान ङ्याह् रे सो चप्नान ङ्याह्।”
Source notes (11)
- Cross-reference मत्ती १०:२२
- Cross-reference दान ९:२७; ११:३१; १२:११
- Cross-reference लुक १७:३१
- Cross-reference दान १२:१; प्रका ७:१४
- Cross-reference लुक १७:२३-२४
- Cross-reference लुक १७:३७
- Cross-reference यसै १३:१०; ३४:३; योए २:१०; ३:१५; प्रका ६:१२-१३
- Cross-reference दान ७:१३; जक १२:१०-१४; प्रका १:७
- Cross-reference उत ६:५-८
- Cross-reference उत ७:६-२४
- Cross-reference लुक १२:३९-४०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.