Kaike Standard Traslation
मत्ती 23
येसुन कानुन लन्नान्न सिमिव रे फरिसीवन बिरोधग चेतावनी
(मर्क १२:३८-४०; लुक ११:३९-५२; २०:४५-४७)
येसुई सिमिवन मोङ रे जेँन चेलाकाङ्मोः झाम र्वाबो, “कानुन लन्नान्न सिमिव रे फरिसीवजै मोसान कानुन लन्चेन आङ देप्पा ङ्याह्। अन्नकारन ङेनजै ख्युई र्वापान ल्होईव ख्या जेङ्नै होस खेखे तैङर्वाङिन ख्युई घङग ता छोए लह्ङ्ङ, जेङ्नै जेँ चन मन मखेँ। ख्यु घङग चन कानुन्न हुर लीह्म हुर फाङ्ङ, जेङ्नै जेँ चन मन हुर हुर्चे ता धेरा नाह्ना, ल्हाजुपजै र्वार्वा मज्यार्ङ।” ख्यु ल्होई पुरू थन्चेन भिह्तु मात्र खेँ। ख्यु जेँन पह्राई रे ल्हान कानुन्न हिगा किम-किम धोँ रे धर्मी जेङ्पा र्वार्वा थम्मः जेँन घोलाङ्ग झुम्का र्याङ्म र्याङ्म थुप्ङ।1 ख्यु भत्यारवग सम्मान देच्चे रे आराधनालयग ङोतोव आसनवग छ्युङ्म स्याँ। बजारवग तूतौ सिमिवजै जेँग सम्मान खेखे ध्वा ख्याःयो आलै गुरु र्वाःयो र्वानान ङेन इच्छ्या खेँ। जेङ्नै “ङेनकाङ्मोः सुई गुरु नर्वाःयो तैङर्वाङिन ङेन ता पुरू थिक्कोवई जेङ्पा। ङेनकोन तिबाःदि गुरु ङ्याह्। अन पिर्थीबी ङेनजै सुई पा नर्वाःयो तैङर्वाङिन ङेनकोन तीबाःदि पा ङिह्पा, सु स्वर्गः ङिह्पा। ङेनकाङ्मोः सुई गुरु नर्वाःयो तैङर्वाङिन ङेनकोन गुरु तीबाःदि मसिह जेङ्पा। ङेनकाङ्मोः पुरून खेरे किमै चन पुरून सेवक रात्वानान।2 जेँ किम राचे फान्नान चन छ्युम दोङ्नान ङ्याह् रे जेँग छ्युम दोङ्नान चन किम दोङ्नान ङ्याह्।”
कैफतिन बिरोधग चेतावनी
(मर्क १२:४०; लुक ११:३९-४२; २०:४७)
“ए कानुन लन्नान्न सिमि रे फरिसीव हो! ङेनकाङ्मोः धिक्कार ङ्याह्! ङेन ता ख्वाकिबा ङ्याह्। ङेनजै स्वर्गन राज्यन झलाः थाःपा ङ्याह्। ङेह् र्वार्वा झिङ मजाँः आलै झिङ जाःचे फान्नानकाङ्मोः र्वार्वा जाःमफाङ्ङ।” “ए कानुन लन्नान सिमि रे फरिसीव हो! ङेनकाङ्मोः धिक्कार! ङेन ता ऊजूपा ङ्याह्। ङेनजै लम्मावन यिम तल्ङ रे हेँ थन्चेन भिह्तु र्याङ्म-र्याङ्म सोअताप्ङ। अन्नैकारन ङेनजै ह्याल्म धल देन्नान ङ्याह्।” “ए कानुन लन्नान्न सिमि रे फरिसीव हो! ङेन ता ख्वाकिबा ङ्याह्। घङग जेँन पातिग सम्म सन्सारभरी रूङ रे सुई जेँन पातिग सङ्ङिन नू जेँनखेरे दोब्बर ङ्यालान सम स्योरस्योर लैम धोँ।” “ए काना अगुवाव हो! ङेनकाङ्मोः धिक्कार! ङेनकोजै ‘आराधनालय ज्यारज्यार रेनरुतौ तये मराह्नान, जेङ्नै आराधनालयन मर ज्यारज्यार रेनरुतौ चन रेनरुपा ताह्नान’ र्वार्वा लह्ङ्ङ। ङेन कताःमन काना रे मुर्ख ङ्याह्! कनचन ल्होई किम जेङ्पा, मर कि मरग पबित्र दोङ्नान्न आराधनालय? ह्याङ ‘बेदी ज्यार्ज्यार रेनरुङिन तये मराह्नान, जेङ्नै बेदीग फुल्पान भेति ज्यारज्यार रेनरुतौ चन रेनरुपा ताह्नान’ र्वार्वा लह्ङ्ङ। ङेन कत्यामन काना सिमिव! कनचन ल्होई किम जेङ्पा, बेदीग फुल्पान भेति कि भेती पबित्र दोङ्नान्न बेदी? बेदी ज्यारज्यार रेनरुनानजै ता बेदी रे अनग फुल्पान भेति पुरूव ज्यारज्यार रेनरूँ! उजुई खेखे आराधनालय ज्यारज्यार रेनरुनानजै चन आराधनालय रे आराधनालयग छ्युङ्नान्न परमेस्वरगै ज्यारज्यार रेनरूँ। स्वर्गन मिह्न वव्वै रेनरुनानजै चन स्वर्गन सिङ्हासन रे अनग छ्युङ्नान्न परमेस्वरनै मिह्नग रेनरूँ।”3 “धिक्कार ङेनकाङ्मोः कानुन लन्नान्न सिमि रे फरिसीव हो! ख्वाकिबा हो! तैङर्वाङिन ङेन पुदीना, सुप रे जिरा परमेस्वरग फुल्ङ। जेङ्नै न्याय, दया रे बिस्वासलैम कानुन्न ङोत्वा ल्होईवन चन ङेन वास्ताई मखेँ। मन घङ ल्होईन ङ्याबोई न्याय, दया रे बिस्वास यङ खेचे ख्या।4 ङेन काना अगुवा जेङ्पा तैङर्वाङिन ङेनजै साल्लाँ ता याल्ङ, जेङ्नै ऊँतग चन गाल्ङ।” “ए कानुन लन्नान्न सिमि रे फरिसीव हो! ङेनको ता ख्वाकिबा ङ्याह्। ङेनकोजै तेर्मा रे खोरे छाङ्म दोङ्चे ता धोँ, जेङ्नै मन्न झिङ चन स्वार्थ रे लोभजै खुखु सप्पान ल्होईवजै काँ। ए काना फरिसीव हो! ङू खोरेन झिङक्याँ फ्याँ आलै खोलोःक्याँ यङ खामसाङ्म राह्नान ङ्याह्।” ए कानुन लन्नान्न सिमि रे फरिसीव हो! ङेनकाङ्मोः धिक्कार! ङेनको हाति ख्वाकिबा ङ्याह्। ङेनको ता कमेरोई छिम्पान तुह्र्सा लैम ङ्याह्। मन तुह्र्सा खोलोःलै सेन्तौ ता लः रँ, जेङ्नै झिङक्याँ चन कुँह्म तोन्पान स्युह्रु रे बाःपान तैस्याङ पुरू लुईपा राह्नान।5 उजुई खेखे खोलोःलै सेन्तौ चन ङेन सिमिन ङू धर्मी लैम रँ, जेङ्नै झिङ चन ख्वा रे अलःजै नाङ्पा राह्नान।
येसुई ख्युन धलन भारेः भबिस्यबानी खेपा
(लुक ११:४७-५१)
“ए कानुन लन्नान्न सिमि फरिसीव हो! ङेनकाङ्मोः धिक्कार! ङेनको ता ख्वाकिबा ङ्याह्। ङेनकोजै भबिस्यबक्तावन भिह्तु तुह्र्सा लः लःव धोँ रे परमेस्वरन आग्याग जाःपान पबित्र सिमिवन तुह्र्साव यङ छाईङ। आलै ङेन र्वाङ, ‘ताङ्बो ङिन खेपुलवजै ता भबिस्यबक्ताकाङ्मोः सह्प्पो। जेङ्नै ङेन यङ ख्युन ङ्याबो रह्पान कारन ङ्योअजै चन मनलैम धोन खेमः ख्युकाङ्मोः फुरी खेनान मह्या।’ झाःम र्वार्वा ङेन जेँगै मन भबिस्यबक्ताकाङ्मोः सन्नान्नै सन्तान जेङ्पा र्वार्वा साँचि बिङ्ङ! ता ङेनकोन खेपुलवजै सुरु खेपान धोन पुरा ख्या!” “ए भुलेनव रे भुलेन्न सन्तान हो! ङेन ङ्यालान धललै कुजुई सोनतैनान?6 ता लः खेखे ङ्याना, ङा ङेन स्याह् भबिस्यबक्ता, स्योःनान सिमि रे कानुन लन्नान्न सिमिकाङ्मोः फेन्नान ङ्युँ। ख्युन बर्ग ङेनजै हातिग सन्नान ङ्याह्, हातिग क्रुसग च्यार्नान ङ्याह् आलै हातिग चन आराधनालयग चेरन ताल्च्या फ्याङ्नान ङ्याह् रे हातिग सहरदीलै घङ सहरथाल धाम्नान ङ्याह्। पिर्थीबी पप्पान धर्मी सिमि पुरून कह: निर्दोस हाबिलन कहलै वव्वै बेरेक्याहन ङोह्जो जकरियान कह थाल, सू ङेनकोजै पबित्र ठाउँ रे बेदीन घूँ सह्प्पो। अन दोस ङेनकोनै थोप्पाः स्वानान ङ्याह्।7 तेम्माई ङा ङेनकाङ्मोः र्वाचे, अन पुरून दोस अन पुस्तान थोप्पागै स्वानान ङ्याह्।”8
येरुसलेमन भिह्तु येसुन मया
(लुक १३:३४-३५)
“यरूसलेम, ए येरुसलेम! ना भबिस्यबक्ताकाङ्मोः सह्ङ्ङ रे परमेस्वरजै फेप्पाकाङ्मोः लुङजै फ्याङ्ङ। काःमाई काःचावग कप्पालैम ङै हातिरेप नान ङोह्जो-चमेःकाङ्मोः जगाई खेचे फाप्पो, जेङ्नै नाई मङ्याम्बो।” “सेह्ना, नान यिम तये मीपा दोङदोङ ख्योवानान ङ्याह्।9 ता ङा र्वाचे, ‘जबथाल नाई परमप्रभुन मिह्नग स्वानान हाति धन्न जेङ्पा’ मर्वाङ, तबथाल नाई ङाः रङ्नान मह्या।”10
Source notes (10)
- Cross-reference मत्ती ६:१; कानुन ६:८; गन्ती १५:३८
- Cross-reference मत्ती २०:२६-२७; मर्क ९:३५; १०:४३-४४; लुक २२:२६
- Cross-reference यसै ६६:१; मत्ती ५:३४
- Cross-reference लेवी २७:३०
- Cross-reference प्रे २३:३
- Cross-reference मत्ती ३:७; १२:३४; लुक ३:७
- Cross-reference उत ४:८; २ इति २४:२०-२१
- Cross-reference उत ४:८; २ इति २४:२०-२१
- Cross-reference यर २२:५
- Cross-reference भजन ११८:२६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.