Kaike Standard Traslation
मर्क 1
बप्तिस्मा-बिन्नान यूहन्नान ल्होन
(मत्ती ३:१-१२; लुक ३:१-१८; यूह 1१:१९-२८)
परमेस्वरन ङोह्जो येसु मसिहन भारेः ल्होन् लः झामखेखे सुरु राँ। यसैया भबिस्यबक्तान किताबग सर्पान अन्सार:
परमेस्वरजै र्वाबो, “सेह्ना, ङा ङन दुतग नान ङूह्ङूह् फेच्चे,
सुई नान लम दोङ्नान ङ्याह्।”1
सुनसान ठाउँग फाईरा खेनान्न केह्ः,
“परमप्रभुन लम तयार ख्या,
नुन लम थार्का धोँवा!”2
बप्तिस्मा-बिन्नान यूहन्ना सिमिकाङ्मोः बप्तिस्मा भिनैभिनै सुनसान ठाउँग रङ्बो। नुई सिमिकाङ्मोः झामखेखे ताह्फेप्पो, “ङेनको घ्योप्पा खेखे तीपा खेमः ख्योवा रे बप्तिस्मा होरा आलै परमेस्वरजै ङेनकोन तीपा माफ खेनान ङ्याह्।” यहूदियान प्रदेस रे यरूसलेम सहरग छ्युङ्नान सिमि पुरूव बप्तिस्मा बिन्नान यूहन्नान स्याह् स्वाबो। रे ख्युई जे-जेँन तीपा स्वीकारी खेईखेई यूहन्नालम यर्दन चाङ्पू बप्तिस्मा वप्पो। बप्तिस्मा बिन्नान यूहन्ना ऊँतन पुलै ब्योःपान घोलाङ गोङ्ङ, रे हाङग फोन्न धब दम्ङ, रे ङ्योप्पा चन नर्सिङ्का रे तप्लन-अकु झाँ।3 नुई झाःम र्वार्वा सिमिवन घूँ ताह्फेप्पो, “सु ङन ङिक स्वाङ नु ङनखेरे सक्तिसाली ङिह्पा, ङा खल्बु क्यापक्याप नुन पौलान तना फोल्चेन सम स्योरस्योरलैम मीपा। ङै ङेनकाङ्मोः त्युई बप्तिस्मा बिम्पा ङिह्पा, जेङ्नै नुई ता ङेनकाङ्मोः पबित्र आत्माई बप्तिस्मा बिन्नान ङ्याह्।”
येसुन बप्तिस्मा रे छोए सेम्पा
(मत्ती ३:१३-१७; ४:११; लुक ३:२१-२२; ४:१-१३)
बप्तिस्मा बिन्नान यूहन्नाई झामखेखे ताह्फेप्पाई छ्युङ्पान भेला येसु गालीलन नासरत सहरलै स्वाबो, आलै नुई र्वार्वा यूहन्नान ल्हालम यर्दन चाङ्पू बप्तिस्मा वप्पो। त्युलै खोलोः गेपलुङ्मीम येसुई स्वर्ग पोङ्पा रे पबित्र आत्मा पुरेन्न रुपग जेँन ल्हाः धुल्यङ खेपा रङ्बो। आलै स्वर्गलै झाःम र्वापान केह्ः ताह्बो, “ना ङन स्याङ्पान ङोह्जो जेङ्पा, नान ङ्याबो ङा लै स्याङ्पा ङिह्पा।”
मन्न छाम्म तुरुन्तै पबित्र आत्माई येसू सुनसान ठाउँग वप्पो। स्याह् सैतानलम छोए सेन्चेग थेपथेप नु ङेथलर्यान बेर सुनसान ठाउँग लुईबो, नु तप्लँन भस्तवन ङ्याबो छ्युङ्बो, रे स्वर्गदुतवजै नू सेवा खेबो।
येसुई ङाह् ज्युङ्नान सिमि लिपाः कताङ्पा
(मत्ती ४:१२-२२; लुक ४:१४-१५)
यूहन्ना ज्यालग थेप्मी परमेस्वरन ल्होन् लः ताह्फेरैफेरै येसु गालीलग स्वाबो। नुई र्वाबो, “ता भेला पुरा रह्पा ङ्याह्, रे परमेस्वरन राज्य ङेह्मः स्वातपा ङ्याह्। घ्योप्पा खेखे तीपा खेमः ख्योवा, रे ल्होन् लःग बिस्वास ख्या।”
गालील योह्न नाः तूतौ येसुई सिमोन रे नुन भाइ अन्द्रियासग योह्ग जाल कायङ खेपा रङ्बो। तैङर्वाङिन ख्यु ङाह् जुङ्नान्न सिमि ङ्याह्। आलै येसुई ख्युकाङ्मोः र्वाबो, “ङन ङिक जाः, रे ङा ङेनकाङ्मोः सिमिकाङ्मोः परमेस्वरन राज्यग कुजुई सत्त्वानान र्वार्वा लन्च्योवा।” अन ताह्लुङ्मीम ख्युई जेँन जालिव ख्योवाख्योवा येसुन ङिक जाःबो। आलै ङाई धेरा वैमी नुई जब्दियान ङोह्जो ङेह् याकूब रे नुन भाइ यूहन्नाः दोङा जालि दोङ्पाई छ्युङ्पा रङ्बो। येसुई ख्युकाङ्मोः र्वार्वा तुरुन्तै कताङ्बो, रे ख्युई जेँन पा जब्दियाग धोन खेनान सिमिवन ङ्याबो दोङाः ख्योवाख्योवा येसुन ङिक जाःबो।
येसुई मुई सेम्पा सिमिदीग ताःफाम्पा
(लुक ४:३१-३७)
येसु मन चेलावन ङ्याबो कफर्नहुम सहरग स्वाबो, आलै नाह्न ल्हाः यहूदीन आराधनालयग जाःजाः नुई लह्म्मः जाःबो। नुई लम्पा ताह्ताह् सिमिव हालाईबो तैङर्वाङिन नुई ख्युकाङ्मोः घङ कानुन लन्नान्न सिमिवजै लैम नङ्पा, जेङ्नै आङ किम खेखे लह्म्बो।
मन्नै भेला यहूदीन आराधनालयन झिङ मुई सेम्पा सिमिदी स्वास्वा फाईरा खेबो, “हे नासरतन येसु, नाई ङी तै खेमः जाःपा? तै ना ङी मीपा दोङ्मः स्वापा जेङ्पौ? ना सु जेङ्पा र्वार्वा ङा स्योःनान, ना परमेस्वरन पबित्र सिमि जेङ्पा।”4
जेङ्नै येसुई मन आत्मा अलःग झाःम र्वार्वा ङार्बो, “तै मर्वारे छ्योवा, रे अन सिमिलम गेग्गे वया।” अन र्वालुङ्मीम मुई मन सिमी काङ्क्याल सुमक्याल धेफानैफानै केह्ः किमई फाईरा खेखे नुनलम गेग्गे होई।
अन रङ्नान सिमि पुरूव हालाईलाई र्वामः जाःबो, “मोँह् अन तै जेअँ? अन ता सार्बा छोए जेअँ। अन सिमिजै ता आङ खेखे मुवगै कोँह्, रे ख्यु नुई कोह्पा ङ्याम्मन।” आलै खम्मै येसुन ल्होई गालील प्रदेसन धेँवछोँ लिब्रुङक्याँ फेल्बो।
येसुई लै सिमिकाङ्मोः ताःफाम्पा
(मत्ती ८:१४-१७; लुक ४:३८-४१)
यहूदीन आराधनालयलै तुरुन्तै गेग्गे येसु याकूब रे यूहन्नान ङ्याबो सिमोन रे अन्द्रियासन यिम जाःबो। मन्न ल्हा सिमोन्न मेह् छायोई मिह्दा खङखङ आःपा ङ्याह्, रे येसु स्वा ताप्लुङ्मीम यिमन सिमिवजै अन ल्होई नू स्याप्पो। येसुई रह्म्मै वैवै नुन ल्हा जुङजुङ सोल्बो, रे छायोई नू फेप्पो। आलै नुई ख्युन सेवा खेमः जाःबो।
मन्न ल्हा ङ्याजे ङिह्मा स्याःमी सिमिवजै नाह्प्पोवा, खङ्नान रे मुई सेम्पा पुरू सिमिकाङ्मोः येसुन स्याह् सप्पो। रे सहरभरिन सिमिव यिमन झलाः जोम्बो। येसुई लैः राँसाराँसान नाह्जाई तेह्पफाम्पा लैः खङ्नानकाङ्मोः ताःफाम्बो, रे लैः मुव छ्यूबो, मुवजै नू स्योःपा ङ्याह्, जेङ्नै नुई ख्युकाङ्मोः ल्होई र्वा मफाम्बो।
गालीलग येसुई ताह्फेप्पा
(लुक ४:४२-४४)
नाह्प नम नाङ्चेन खेरे लैः ङू येसु च्याङच्याङ यिम ख्योवाख्योवा तीपू होई, रे स्याह् सोअताप्पो। सिमोन रे नुन फुरीव नू फाम्म खोलोः गेप्पो। नू धोमी ख्युई र्वाबो, “पुरूजै नाः फाप्पाई छ्युङ्पा ङ्याह्।”
आलै येसुई ख्युकाङ्मोः र्वाबो, “स्वा, ङि ङेह्मन घङ नामग भै, रे स्याह् रे ङै ताह्फेच्चे धेराःयो, तैङर्वाङिन ङा अनै धोन्न भिह्तु स्वापा जेङ्पा।” आलै पुरू गालीलग ख्युन यहूदी आराधनालयग ल्होन् लः ताह्फेरैफेरै रे मुकाङ्मोः छ्यूईछ्यूई ल्हेम्बो।5
येसुई कोरन नाह्जा ताह्पा सिमिदीग ताःफाप्पा
(मत्ती ८:१-४; लुक ४:१२-१६)
आलै कोरन नाह्जा ताह्पान सिमिदी येसुन स्याह् स्वास्वा पोह् जुईजुई झाःम र्वार्वा छ्याःफुल्बो, “नाई चाहि खेङिन ङाः ताःफान तैनान।”
तब दिसासा येसुई जेँन ल्हा क्याङक्याङ नू ज्यार्बो रे र्वाबो, “ङा चाहि खेनान, ना ताः।” आलै नुन कोरन नाह्जा नुनलम होई, रे नु ताःबो। आलै येसुई नू करा आग्या बिमबिम झाःम र्वार्वा तुरुन्तै फेप्पो, “सेह्ना, नाई अन ल्होई सुई नर्वा, जेङ्नै वैवै ना जेँगै पुजारीन स्याह् थना रे ना ताःपा सिमिवन साँचिन भिह्तु मोसान आग्या अन्सार भोका फुला।”6 जेङ्नै अन गेग्गे होई, आलै अन्न भिह्तु खास्या पुरू ताह्फेम्मः जाःबो, रे येसु ह्याङ सहरग हाकाहाकि जाःमतैबो, रे तीपू छ्युङ्बो। जेङ्नै सिमिव लिब्रुङक्याँलै नुन रह्म्म स्वाबो।
Source notes (6)
- Cross-reference मत्ती ११:१०; मला ३:१
- Cross-reference यसै ४०:३
- Cross-reference २ झली १:८; मत्ती ३:४
- Cross-reference भजन १६:१०; यसै ४१:१४; प्रे ३:१४
- Cross-reference मत्ती ४:२३; ९:३५
- Cross-reference लेवी १४:२-३२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.