Kaike Standard Traslation
मर्क 2
येसुई ती ल्हो मगुल्नान्न नाह्जा ताह्पा सिमी ताःफाम्पा
(मत्ती ९:१-८; लुक ५:१७-२६)
खजिर्यान ङिग येसु कफर्नहुम सहरग होल्बो, आलै पुरू सिमिकाङ्मोः नु यिम ङ्याह् र्वानान्न ल्होई क्युई रह्बो। आलै अकेः ह्याल्म सिमीव जोम्बो कि ख्यु स्याह् मस्योङ्बो, स्यीह् थाल कि झलान खोलोः यङ च्याङ्चेन ठाउँ मरह्बो, रे येसुई ख्युकाङ्मोः परमेस्वरन बचन ताह्फेप्पाई छ्युङ्पा ङ्याह्। आलै लिपाई हुर्पान ल्हो मगुल्नान्न नाह्जा ताह्पा सिमिदी सस्सै सिमीव येसुन स्याह् स्वाबो। मोह्ङन कारनजै येसुन रह्म्म मन सिमी साःमतैबो, रे ख्युई येसु ङिपुन ङ्यान लुह्प पोङ्बो, रे पोङ्पान ठाउँलै ल्हो मगुल्नान्न नाह्जा ताह्पा सिमी नु आःपान खातन ङ्याबोई पोँ साःबो। येसुई ख्युन बिस्वास रङरङ अन ल्हो मगुल्नान्न नाह्जा ताह्पा सिमी र्वाबो, “ए ङोह्जो, नान तीपाव माफ रह्बो।”
जेङ्नै स्याह् कान कानुन लन्नान्न सिमिव छ्युङपा ङ्याह्, रे जेँन समग झाःम र्वार्वा नावा खेपाई छ्युङ्पा ङ्याह्, “अन सिमिजै तैङ झामखेखे ल्होई र्वाङ? अन ता परमेस्वरन लुह्ई झपा जेङ्पा। तीबाःदि, आथबा परमेस्वरजै नङ्म घङ सुई तीपा माफ खेतैनौ?”1
आलै ख्यु राह्ङराङ्साः झामखेखे नावा खेयङ ङ्याह् र्वानान येसुई तुरुन्तै जेँन आत्माः क्युई राह्राह् ख्युकाङ्मोः र्वाबो, “तैङ ङेन जेँन समग झाःम नावा खेनान? ल्हो मगुल्नान्न नाह्जा ताह्पा सिमी ‘नान तीपा माफ रह्बो’ र्वाचे, कि ‘च्याँ, नान खात हुरहुर ल्हेना’ र्वाचे, कन चन छुम्म ङ्याह्? ङा ङेनकाङ्मोः पर्मान बिन्चे जेङ्नै सिमिन ङोह्जो पिर्थीबी तीपा माफ खेचेन आङ ङिह्पा र्वानान ङेनकाङ्मोः क्युई रा।” तब येसुई मन ल्हो मगुल्नान्न नाह्जा ताह्पा सिमी र्वाबो, “ङा नाः र्वाचे च्याँ, नान खात हुरा, रे यिम वया।”
अन च्याङ्बो, रे तुरुन्तै खात हुरहुर पुरून ङूलै होई। सिथाल कि, पुरू हालाईबो, रे “ङ्योअजै झाःम ता हातौयै रङ्पा मीपा” र्वाईर्वाई ख्युई परमेस्वरन महिमा खेमः जाःबो।
येसुई लेवी स्वा र्वापा
(मत्ती ९:९-१३; लुक ५:२७-३२)
येसु ह्याङ तीरेप गालील योह्न नाः नाः होई। आलै सिमीवन मोह्ङ किमदी नुन स्याह् स्वाबो, रे येसुई ख्युकाङ्मोः लह्म्बो। आलै वैतौ येसुई अल्फयसन ङोह्जो लेवी कर तुईनानवन ठाउँग छ्युङ्पा रङ्बो रे येसुई नू र्वाबो, “ङन ङिग जाः।” नु च्याङच्याङ येसुन ङिग जाःबो।
आलै येसु लेवीन यिम ङ्योप्पा झाम छ्युङ्तौ कर तुईनान लै सिमिव रे पापीव येसु रे नुन चेलावन ङ्याबो छ्युङ्पा ङ्याह्। तैङर्वाङिन नुन ङिग जाःनान सिमिव लैः ङ्याह्। नु पापीव रे कर तुईनानवन ङ्याबो ङ्योप्पा झपाई छ्युङ्पा रङरङ फरिसी पातिन कानुन लन्नान्न सिमिवजै नुन चेलाकाङ्मोः र्वाबो, “नु तैङ कर तुईनानव रे पापीवन ङ्याबो छ्युङछ्युङ झाँ?” अन ताह्ताह् येसुई ख्युकाङ्मोः र्वाबो, “नाह्जा मीपा सिमिकाङ्मोः दाक्तार मत्वानान, जेङ्नै नाह्प्पुवाकाङ्मोः मात्र त्वानान। ङा धर्मीकाङ्मोः नङ्पा, जेङ्नै पापीकाङ्मोः स्वा र्वामः स्वापा जेङ्पा।”
बर्तन भारेः प्रस्न
(मत्ती ९:१४-१७; लुक ५:३३-३९)
यूहन्नान चेलाव रे फरिसीव बर्त छ्युँ। मन्नकारन सिमीवजै स्वास्वा येसू र्वाबो, “यूहन्नान चेलाव रे फरिसीन चेलाव बर्त छ्युँ, जेङ्नै नान चेलाव तैङ बर्त मछ्यूँ?”
येसुई ख्युकाङ्मोः झब बिम्बो, तै भत्यारग घ्वापान लार्क्याव ङ्योप्पा मझारे वैनान तै? माःपान ङ्याबो रातौ सुई फोङै मछ्युङ्नान। जेङ्नै भेला स्वानान ङ्याह्, जब माःपा ख्युनलम फानान ङ्याह्, तब ख्यु मन्न लाह् बर्त छ्युङ्नान ङ्याह्।
“सुई घोलाङ घ्वापाः सार्बा घोलाङन लाम्मा मताम्नान, तेमन्ता ताम्पान घोलाङ ज्योमज्योम गेन्नान, आथबा सार्बा घ्वापालै ज्योमज्योम गेन्नान, रे ज्योमताँ झन अलः राह्नान ङ्याह्। आलै सुई अङ्गुरन खु सार्बा फोन घ्वापान खुन्चाः मकाह्नान, तेमन्ता मन अङ्गुरन खुजै फोन्न खुन्चाव तिल्नान, रे अङ्गुरन खु रे खुन्चा ङ्योरुम मीपा राह्नान। जेङ्नै सार्बा अङ्गुरन खु चन सार्बाई धाङग काह्नान।”
नाह्न ल्हाःन भारेः प्रस्न
(मत्ती १२:१-१४; लुक ६:१-५)
ती नाह्न ल्हाः येसु रुन्जन्न साह्ईन खेःलम राह्राह् वैयङ खेपा ङ्याह्। स्याह्लै वैतौ नुन चेलावजै लेन्तौलेन्तौ साईन नम चामः जाःबो। अन रङरङ फरिसीवजै येसू र्वाबो, “सेह्ना, नाह्न ल्हाः कानुनजै खेचे नङ्पा र्वापान धोन यङ नान चेलावजै तैङ खेँ?”
येसुई ख्युकाङ्मोः र्वाबो, “जब दाऊद रे नुन ङ्याबो ङिह्पाकाङ्मोः ल्हाग तये मर्हारे गुसिपा ङ्याह् तब दाऊदजै तै खेबो? तै ङेनकोजै हातौयै तोअपा मीपाऊ? प्रधान पुजारी अबियाथारन पाली परमेस्वरन यिम दाऊद जाःबो, रे परमेस्वरग फुल्पान रोता झबो, कानुन्न अन्सार पुजारीजै नङ्म घङ सिमिजै झाचे लः मह्या, रे अन रोता नुन ङ्याबो ङिह्पाकाङ्मोः र्वार्वा बिम्बो।” ख्युकाङ्मोः येसुई र्वाबो, “नाह्न ल्हाः सिमिन भिह्तु दोङ्पा जेङ्पा, सिमि नाह्न ल्हाःन भिह्तु नङ्पा। अन्नकारन सिमिन ङोह्जो नाह्न ल्हाःनै प्रभु जेङ्पा।”
Source notes (1)
- Cross-reference यसै ४३:२५
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.