Kaike Standard Traslation
मर्क 8
येसुई हजार ली सिमिकाङ्मोः ख्वापा
(मत्ती १५:३२-३९)
मन दिनग ह्याङ सिमिन मोह्ङ किमदी जोम्बो, जेङ्नै ख्युन ङ्याबो झायाप तये मह्या। तब येसुई चेलाकाङ्मोः जेँन ङ्याबो स्वा र्वार्वा र्वाबो, “ङा अन सिमिकाङ्मोः दिसाँ, तैङर्वाङिन अजोव ङन ङ्याबो छ्युङ्पा त्या सुमङी रह्बो, रे ख्युन ङ्याबो झाचे तये मह्या। आलै यदि अजोव: फोङ यिम फेङ्ङिन अजोव लमगै बेहोस राह्नान ङ्याह्। अजोवन बर्ग कान-कान ग्याङ्मलै स्वापा ङ्याह्।”
येसुन चेलावजै नू र्वाबो, “अन सुनसान ठाउँग अकेःन सिमिकाङ्मोः ख्वाचेन भिह्तु हाति र्वार्वा ङ्योप्पा खालै सच्चे?”
येसुई ख्युकाङ्मोः लोप्पो, “ङेनकोन ङ्याबो रोता हाति ङ्याह्?” ख्युई झब बिम्बो, “रोता नेह्” नुई सिमिन मोह्ङ्ग साः छ्युङ्फाम्बो, आलै नुई रोता नेह् ल्हाग वव्वै परमेस्वरग मया रह्बो र्वामी रोता क्युप्पो, रे जेँन चेलाकाङ्मोः सिमिन मोह्ङ्ग परेःया र्वार्वा बिम्बो। आलै चेलावजै सिमिकाङ्मोः परेःबो। ख्युन ङ्याबो तयाः ङाह् कत्याःमव यङ ङ्याह्, रे नुई परमेस्वरग असिका तोलतोल मन यङ चेलाकाङ्मोः परेःफाम्बो। आलै सिमिवजै झाझा बरङ्बो रे ख्युई लाःमा रह्पान तुकराव थाम नेह् नाङ्पा तुईबो। स्याह् क्वाईमाल्ला: हजार ली सिमिव ङ्याह्। नुई ख्युकाङ्मोः भिदा खेखे फेप्पो, आलै नु चन जेँन चेलावन ङ्याबो तुरुन्तै दोङाः चपचप दलमनुथान छेत्रक्याँ होई।
फरिसीवजै ताईलुवान धोन्न भिह्तु लोप्पो
(मत्ती १६:१-४)
फरिसीवजै येसुन रह्म्म स्वास्वा नुन ङ्याबो खाथू खेमः जाःबो, रे नू छोए सेन्चे फारैफारै र्वाबो, “ङी स्वर्गलै स्वानान्न ताईलुवान धोनदी थना।” जेँन आत्माग नुई ऊ र्याङ्म वव्वै र्वाबो, “अन पुस्ताई तैङ ताईलुवान धोन फाङ्ङ? तेम्माई, ङा ङेनकाङ्मोः र्वाचे, अन पुस्ताः ताईलुवान धोन तये बिन्नान मह्या।” आलै ख्युकाङ्मोः ख्योवाख्योवा नु ह्याङ दोङाः चपचप योह्न धिक्याँ होई।
फरिसीव रे हेरोदन सोरा
(मत्ती १६:५-१२)
चेलावजै ङ्याबो रोता हुर्चे ह्याका लेत्तँ, रे दोङाः ख्युन ङ्याबो रोता तीबाःदि ङ्याह्। येसुई चेलाकाङ्मोः झाःम र्वार्वा चेतावनी बिम्बो, “ङेनको फरिसीवन सोरा रे हेरोदन सोरालै होस खेखे छ्योवा।”1
जेङ्नै ख्युन ङ्याबो रोता मीपान कारन येसुई झाःम र्वापा जेङ्पा र्वार्वा ख्युई राह्ङराङ्साः ल्होई र्वाम जाःबो।
येसुई ख्युकाङ्मोः समन ल्होई हाकोको र्वाबो, “ङेनकोन ङ्याबो रोता मह्या र्वार्वा ङेनको तैङ राह्ङराङ्साः ल्होई र्वानान? तै ङेनको हेँद्रि मरङ्नान कि हाकोनान? तै ङेनकोन सम क्योङ्म रह्पा ङिह्पाऊ? मी रानै तै ङेनको मरङ्नौ? नाम्ज्योवा रानै तै ङेनकाङ्मोः मताह्नौ? तै ङेनकाङ्मोः ह्याका मीपाऊ,2 जब ङै रोता ङा हजार ङा सिमिवन भिह्तु क्युप्पा, तब हाति थाम नाङ्पा तुकरा ताकरीव ङेनकोजै तुईपा? ख्युई नू झब बिम्बो, च्योङे।”
जब येसुई लोप्पो, “अन रोता नेह् हजार ली सिमिवन घूँ क्युप्पा ङ्याह्, तब हाति थाम नाङ्पा तुकरा ताकरीव ङेनकोजै तुईपा ङ्याह्?” ख्युई नू र्वाबो, “नेह्।” येसुई चेलाकाङ्मोः र्वाबो, “तब तै ङेनको हेँ हामकोनौ?”
येसुई बेथसेदाग काना सिमिदीग ताःफाम्पा
मन्न छाम्म नु बेथसेदा स्वाबो, रे सिमिवजै काना सिमिदीग नुन स्याह् सप्पो, रे नू झ्यारा र्वार्वा येसू छ्याःफुल्बो। येसुई मन काना सिमिन ल्हा जुङजुङ नू नामलै खोलोः सप्पो, रे नुन मी छिमा पप्पे नुन ल्हाः जेँन ल्हा नान्नान नू लोप्पो, “तै ना तयाः रङ्नौ?”
आलै ङ्यालक्याँ सेनसेन नुई र्वाबो, “ङा सिमिकाङ्मोः तङ्पुव लैम लेम्पाई छ्युङ्पा रङ्नान।” तब नुई ह्याङ नुन मी ल्हा नाह्म्बो, रे नुई लः खेखे सेह्म्बो। आलै नुई रङ्चे देप्पो, रे तैस्याङ पुरू लः खेखे रङ्म जाःबो। तब येसुई नू नाम्मरा नजायो र्वार्वा नुन यिम फेप्पो।
येसुन भारेः पत्रुसन घोसना
(मत्ती १६:१३-१६; लुक ९:१८-२१)
येसु रे नुन चेलाव कैसरिया फिलिप्पी सहरन रह्म्म ङिह्पान नामवक्याँ वैतौ नुई लमग जेँन चेलाकाङ्मोः झाःम र्वार्वा लोप्पो, “सिमिवजै ङाः सु जेङ्पा र्वाङ?”
ख्युई येसू र्वाबो, “कानजै र्वाङ, ‘बप्तिस्मा बिन्नान्न यूहन्ना।’ यहूदीन खोलोःन सिमिवजै ‘एलिया,’ आलै घङ हातिपाई र्वाङ, ‘भबिस्यबक्तावन बर्ग तीपा।’”3
तब येसुई ख्युकाङ्मोः लोप्पो, “जेङ्नै ङेनको चन ङाः सु जेङ्पा र्वार्वा र्वानान न।” पत्रुसजै झब बिमबिम नू र्वाबो, “ना मसिह जेङ्पा।”4
येसुई ख्युकाङ्मोः अन ल्होईन भारेः सुई तये नर्वा र्वार्वा आग्या बिम्बो!
येसु जेँन तूरि रे कालन भारेः र्वापा
(मत्ती १६:२१-२८; लुक ९:२२-२७)
मन्न छाम्म येसुई चेलाकाङ्मोः जेँन भारेः झामखेखे र्वामः जाःबो, “सिमिन ङोह्जोई तूरि लैः हुरत्वानान। अगुवाव, ङोत्वा पुजारीव रे कानुन लन्नान्न सिमिवजै नू अस्वीकार खेनान ङ्याह्, सन्नान ङ्याह्। जेङ्नै सुमङीग नु सिह्पालै सम्पु ग्युर्नान ङ्याह्।” झाःम खेखे नुई अन ल्होई लः खेखे र्वाबो। जेङ्नै अन ताह्ताह् पत्रुसजै नू तीक्याँ वव्वै ङार्म जाःबो। जेङ्नै होलहोल जेँन चेलाकाङ्मोः सेनसेन, पत्रुसग नुई झाःम र्वार्वा ङार्बो, “ए सैतान, ङन लम वया, तैङर्वाङिन नान नावा परमेस्वरलम नङ्पा, जेङ्नै सिमिन स्वभाऊलै स्वाङ।”
तब नुई जेँन चेलावन ङ्याबो मोह्ङ्ग जेँन स्याह् स्वा र्वार्वा ख्युकाङ्मोः र्वाबो, “कान सिमि ङन ङिक जासुम खेङिन नुई जेँग अस्वीकार ख्याःयो, रे जेँन क्रुस सोलसोल ङन ङिक जायो।5 तैङर्वाङिन सुई जेँन परान सोमफान्सुम खेँ, नुई मन मोल्नान ङ्याह्, जेङ्नै ङन रे ल्होन् लःन भिह्तु जेँन परान पन्नानजै अन बचाई खेनान ङ्याह्।6 तैङर्वाङिन सिमिजै सन्सार पुरू ल्हाग थेपथेप जेँन परान मोल्ङिन नू फाइदा तै राह्नान? आथबा सिमि सुई र्वार्वा जेँन परान्न भिह्तु तै बिन तैनौ? यदि अन ब्यभिचारी रे पापी पुस्ताग सुई ङा रे ङन बचनलै ब्याङ्ङिन, सिमिन ङोह्जो यङ जेँन पान महिमाग पबित्र स्वर्गदुतवन ङ्याबो स्वातौ मन सिमिलै ब्यान्नान ङ्याह्।”
Source notes (6)
- Cross-reference लुक १२:१
- Cross-reference यर ५:२१; इज १२:२; मर्क ४:१२
- Cross-reference मर्क ६:१४-१५; लुक ९:७-८
- Cross-reference मत्ती १०:३८; लुक १४:२७; यूह ६:६८-६९; ८:३४
- Cross-reference मत्ती १०:३८; लुक १४:२७
- Cross-reference मत्ती १०:३९; लुक १७:३३; यूह १२:२५
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.