Skip to content
BibleKenya

Kaike Standard Traslation

मर्क 9

आलै येसुई ख्युकाङ्मोः र्‌वाबो, “तेम्माई, ङा ङेनकाङ्मोः र्‌वाचे, स्यीह् थाङथाङ छ्युङ्पावन बर्ग कान-कान ङ्याह्, सुई परमेस्वरन राज्य सक्तिग स्वापा मरङ्न बेर तै खेखेई सिह्‌नान मह्‌या।”

येसुन खरि फिप्पो

(मत्ती १७:१-१३; लुक ९:२८-३६)

मन्न रुर्यान ङिक येसुई पत्रुस, याकूब रे यूहन्नाः नुन ङ्याबो वव्वै ला किमदीग वप्पो। स्याह् ख्यु मात्र ङ्याह्, ख्युई सेन्तौसेन्तौ येसुन खरि फिप्पो।1 आलै नुन घोलाङ ताह्‌म रे मिह्दा पाह्‌ल्म रह्बो, झाःम कि पिर्थीबी सुई र्‌वार्‌वा थुथु अकेःन पाह्ल्म धोङ मतैनान। तब चेला सुमपाई एलिया रे मोसा येसुन ङ्याबो ल्होई र्‌वापाई छ्युङ्पा रङ्बो। पत्रुसजै येसू र्‌वाबो, “गुरुज्यू, ङि स्यीह् रह्पा लः रह्बो। ङि स्यीह् आति सुम दोङ्मता, ती नान भिह्तु, ती मोसान भिह्तु रे ती एलियान भिह्तु।” ख्यु यामयाम ङिन्पान कारनजै पत्रुसग तै र्‌वाचे र्‌वार्‌वा क्युई मरह्बो।

आलै नमलूदी स्वास्वा ख्युकाङ्मोः कप्पो, रे नमलूलै झाःम केह्ःदी गेप्पो, “अन ङन स्याङ्पान ङोह्जो जेङ्पा, ङेनकोजै नुन ल्होई ङ्याना।”2

आलै हतपत धेँवछोँ सेन्तौ ख्युई जेँन ङ्याबो येसू नङ्म घङ सुई मरङ्बो।

ख्यु लालै धुल्तौ येसुई ख्युकाङ्मोः “सिमिन ङोह्जो सिह्पालै सम्पु मग्युर्न बेर ख्युई तै रङ्पा ङ्याह् मन सुई नर्‌वा र्‌वार्‌वा आग्या बिम्बो।”

ख्युई अन ल्होई समग नाह्‌म्बो, जेङ्नै सिह्पालै सम्पु ग्युर्नान र्‌वापा चन तै जेङ्पा र्‌वार्‌वा राह्ङराङ्साः ल्होई र्‌वामः जाःबो।

आलै ख्युई नू झाःम र्‌वार्‌वा लोप्पो, “ङू एलिया स्वा त्वानान र्‌वार्‌वा कानुन्न कानुन लन्नान्न सिमिव तैङ र्‌वानान?”3

येसुई र्‌वाबो, “तेम्माई, एलिया ङू स्वानान, रे तैस्याङ पुरू ह्‌याङ दोङ्नान। जेङ्नै सिमिन ङोह्जोई लै तूरि कूकू यहूदीन खोलोःन सिमिवलम अस्वीकार राह्‌नान ङ्याह् र्‌वार्‌वा पबित्रसास्त्रग तैङ सर्पा ङ्याह् न? जेङ्नै ङा ङेनकाङ्मोः र्‌वाचे, कि एलिया ङूई स्वातपा ङ्याह्, रे पबित्रसास्त्रजै नुन भारेः र्‌वापालैम सिमिवजै नू जेँनै इच्छ्या अन्सार बेऊरा खेबो।”

येसुई मुन आत्मा ताह्पान चोलोङ्चाः ताःफाम्पा

(मत्ती १:१४-२१; लुक ९:३७-४३)

ख्यु घङ चेलावन स्याह् होलहोल स्वातौ ख्युकाङ्मोः मोह्ङ किमदीजै क्योरक्योर नाम्पा रे ख्युन ङ्याबो कानुन लन्नान्न सिमिवजै खाथू खेपाई छ्युङ्पा ख्युई रङ्बो। जब सिमिवजै येसू रङ्बो, ख्यु मिह्दा हालाईबो रे नुन ङ्याबो धालैधालै होई येसू सिह्‌म ङिह्पाऊ र्‌वाबो। येसुई चेलाकाङ्मोः लोप्पो, “ङेनको अजोवन ङ्याबो ल्होई तैन भारेः खाथू खेनान?”

मोह्ङलै सिमिदीजै येसू झब बिम्बो, “गुरुज्यू, ङन ङोह्जोः वाम्पा दोङ्नान्न मुन आत्मा ताह्पा ङ्याह्, रे ङेन स्याह् सप्पा ङिह्पा। जब अनजै ङन ङोह्जोः जुङ्‌ङ, तब नू साः दिम्फाङ्‌ङ, आलै नुई ङुरलै भ्वा छ्यूङ, सो चह्ङ्‌ङ, रे ख्याःङ। ङै ङेन चेलाकाङ्मोः मन मुन आत्मा छ्यूयाःयो र्‌वार्‌वा छ्याःफुल्पा, जेङ्नै ख्युई मतैबो।”

तब येसुई ख्युकाङ्मोः झब बिम्बो, “ए अबिस्वासी सिमिव, ङा हातौन बेर ङेनकोन ङ्याबो लुईदरा? ङेनकाङ्मोः ङा हाति कूचे? चोलोङ्चाः ङन रह्‌म्म सह्‌रा।” ख्युई मन चोलोङ्चाः नुन रह्‌म्म सप्पो। येसू रङ्लुङ्मीम मन मुन आत्माई चोलोङ्चाः काङ्‌क्याल सुमक्याल धेफाम्बो, रे नु साः दिमदिम ङुरलै भ्वा छ्युईछ्युई काङ्‌क्याल सुमक्याल धेम जाःबो। नुई अन्न पाः लोप्पो, “हातौलै अनग झाःम रह्पा जेङ्पा?” नुई र्‌वाबो, “वैचान भेलालै।” “मुई नू घरीघरी मेह् रे त्यू पप्पे सच्‌चे फाङ्‌ङ। गुरु! नाई तैङिन ङी दिसासा भलो ख्या।”

येसुई नू र्‌वाबो, “ङेनजै तैनौ र्‌वार्‌वा तै र्‌वानान? बिस्वास खेनान्न सिमिन भिह्तु ल्होई पुरू रा तैनान।” तब तुरुन्तै चोलोङ्चान पाई दादा र्‌वाबो, “ङा बिस्वास खेचे, जेङ्नै ह्‌याल्म मह्‌या। ङा ह्‌याजन बिस्वास देम्म फुरी ख्या।”

तब मोह्ङ ङ्याबो धालैधालै स्वापा रङरङ येसुई मन मू झाःम र्‌वाबो, “ए वाम्पा रे नाज्योवा मताह्‌नान्न मुन आत्मा, ङा नाः र्‌वाचे, नुन स्याह्‌लै गेग्गे स्वा, रे ह्‌याङ हातौयै नुन झिङ नजा।” आलै आत्मा फाईरा खेखे अन चोलोङ्चाः मिह्दा काङ्‌क्याल सुमक्याल धेफानफान मन आत्मा गेप्पो, रे अन चोलोङ्चा सिह्पा लैम रह्बो, सिथाल कि पुरूजै अन सिदँ र्‌वार्‌वा छुबो। जेङ्नै येसुई नुन ल्हा जुङजुङ नू जुरुक्‌क सोल्बो, रे नु च्याङ्बो।

आलै जब येसु यिम वैपा तब नुन चेलावजै फाक नु झाःम र्‌वार्‌वा लोप्पो, “ङ्योअजै आत्मा तैङ छ्यु मतैबो?”

येसुई चेलाकाङ्मोः र्‌वाबो, “अन लैम आत्मा चन सोअतापजै नङ्म घङ मेसो तैजै छ्यु मतैनान।”

येसुई जेँन सिचेन भारेः ङेरेप र्‌वापा

(मत्ती १७:२२-२३; लुक ९:४३-४५)

आलै स्याह्‌लै गेग्गे ख्यु गालील राह्‌राह्‌ होई। अन ल्होई सुई क्युई नराःयो र्‌वानान नुन सम ङ्याह्, तैङर्‌वाङिन येसुई जेँन चेलाकाङ्मोः लनयङ ङ्याह्। नुई ख्युकाङ्मोः र्‌वाबो, “सिमिन ङोह्जो ङा सिमिवन ल्हाग थोन्नान ङ्याह्, रे ख्युई ङाः सन्नान ङ्याह्, रे ङा सिह्पान सुमङीन ङिक ह्‌याङ सम्पु राह्‌राह्‌ च्याङ्नान ङ्युँ।”

जेङ्नै चेलावजै अन ल्होईन अर्थ हामकोबो, आलै येसू लोच्‌चे ङिह्‌म्बो।

पुरून खेरे किम सु जेङ्पा?

(मत्ती १८:१-५; लुक ९:४६-४८)

येसु रे नुन चेलाव कफर्नहुम स्वाबो, रे यिम ताप्मी येसुई ख्युकाङ्मोः लोप्पो, “लमग ङेनकोजै तैन ल्होई र्‌वापा?” जेङ्नै ख्यु तै मर्‌वारे छ्युङ्बो, तैङर्‌वाङिन लमग ख्युई “ङ्योअग पुरून खेरे किम सु जेङ्पा?” र्‌वार्‌वा राह्ङराङ्साः ल्होई र्‌वापा ङ्याह्।4

तब नु छ्युङ्बो, रे च्योङेपाः घ्वाबो, रे ख्युकाङ्मोः र्‌वाबो, “कान सिमि ङूस्योवा राचेन सम खेङिन, अन पुरून खेरे ङीस्योवा रे पुरून राङ्पा रा त्वानान।”5 आलै वैचा छ्युमदी वव्वै येसुई नू ख्युन घूँ नाह्‌म्बो, रे नू खोलग वव्वै नुई ख्युकाङ्मोः र्‌वाबो, “सुई झाःम छ्युम वैचावन बर्ग तीपा ङन मिह्‌नग स्वीकारी खेँ नुई ङाः स्वीकारी खेनान, रे सुई ङा स्वीकारी खेँ नुई ङाः नङ्पा, जेङ्नै ङाः फेन्नानग स्वीकारी खेनान।”6

सु ङिन बिरोधग मह्‌या नु ङिन भिह्तु जेङ्पा

(लुक ९:४९-५०)

यूहन्नाई नू र्‌वाबो, “गुरुज्यू, सिमिदीजै ङेन मिह्‌नग मुव छ्यूपाई छ्युङ्पा ङी रङ्पा। ङी नू उजु खे मफाम्पा, तैङर्‌वाङिन मन ङिन मोह्ङन नङ्पा।” येसुई ख्युकाङ्मोः र्‌वाबो, “नू नकाः, तैङर्‌वाङिन ङन मिह्‌नग ताईलुवान धोन खेनान सुई र्‌वार्‌वा हतपत ङन बिरोधग अलः ल्होईव र्‌वा मतैनान। तैङर्‌वाङिन सु ङिन बिरोधग मह्‌या, नु ङिन पछेग ङ्याह्।7 तैङर्‌वाङिन सुई ङेनकाङ्मोः मसिहन जेङ्पा र्‌वार्‌वा ङेनकाङ्मोः ङन मिह्‌नग त्यु खोरेदी थुङ् फान्दरा, तेम्माई ङा ङेनकाङ्मोः र्‌वाचे, नुई तै खेखेई जेँन इनाम मोल्नान मह्‌या।”8

तीपान लोभव

(मत्ती १८:६-९; लुक १७:१-२)

“यदि कानजै अन छ्युमवन बर्ग कानग ङन ङ्या खेनान्न बिस्वासलै फाफा तीपा खेफाङ्‌ङिन, मन सिमिन होलाः ल्हाकोर किमन लुङ चुनचुन समुन्द्रग पच्‌चे लः राह्‌नान। अन्नकारन यदि नान ल्हाजै नाः तीपा खेफाङ्‌ङिन मनग थुमा। ल्हा ङेह् राह्‌राह्‌ ङ्यालान मसिह्‌नान्न मेह्ग वैचेन पूँ दुर्या राह्‌राह्‌ झुनी जाचे ङेनकोन भिह्तु लः जेङ्पा।9 [ङ्यालाः ता न भु सिह्‌नान, न मेह्ई सिह्‌नान।] आलै नान ल्हेजै नाः तीपा खेफाङ्‌ङिन मनग थुमा। ल्हे ङेह् राह्‌राह्‌ ङ्यालाः पच्‌चेन खेरे ता खोर्या राह्‌राह्‌ झुनी जाचे नान भिह्तु लः जेङ्पा। [ङ्यालाः ता न भु सिह्‌नान, न मेह्ई सिह्‌नान।] यदि नान मीजै नाः तीपा खेफाङ्‌ङिन मनग छ्यूछ्यू पह्‌रा। मी ङेह् राह्‌राह्‌ ङ्यालाः पच्‌चेन खेरे ता काना राह्‌राह्‌ परमेस्वरन राज्य जाचे ङेनको भिह्तु लः जेङ्पा।10 ङ्यालाः ता न भु सिह्‌नान, न मेह्ई सिह्‌नान।”11

बलिदान चाई छाङ्म दोङ्पा लैम पुरू मेह्‌लम छाङ्म राह्‌नान ङ्याह्। “चा लः जेङ्पा, जेङ्नै चान ङम्नान वैङिन, अन तैजै ङम्नान दोङ्चे? ङेनको राह्ङराङ्साः चा नाह्‌ना, रे राह्ङराङ्साः सान्तिग छ्योवा।”12

Source notes (12)
  1. Cross-reference २ पत्र १:१७-१८
  2. Cross-reference मत्ती ३:१७; मर्क १:११; लुक ३:२२; २ पत्र १:१७; भजन २:७
  3. Cross-reference मला ४:५; मत्ती ११:१४
  4. Cross-reference लुक २२:२४
  5. Cross-reference मत्ती २०:२६-२७; २३:११; मर्क १०:४३-४४; लुक २२:२६
  6. Cross-reference मत्ती १०:४०; लुक १०:१६; यूह १३:२०
  7. Cross-reference मत्ती १२:३०; लुक ११:२३
  8. Cross-reference मत्ती १०:४२
  9. Cross-reference मत्ती ५:३०
  10. Cross-reference मत्ती ५:२९
  11. Cross-reference यसै ६६:२४
  12. Cross-reference मत्ती ५:१३; लुक १४:३४-३५

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.