Kaike Standard Traslation
मर्क 7
खेपुलवन छोए
(मत्ती १५:१-९)
यरूसलेमलै स्वापान फरिसीव रे कानुन लन्नान्न सिमिव येसुन लिब्रुङक्याँ जोम्बो। येसुन हातिपा चेलावजै ल्हा बाःपा, आथबा मथुपान ल्हाई ङ्योप्पा झपा ख्युई रङ्बो। फरिसीव रे यहूदी पुरूव ख्युन खेपुलवजै बिम्पान ल्हूलाम ङ्यान्नान रह्पान कारन ल्हा मथुरे ङ्योप्पा मझाँ। बजारलै स्वामी ल्हो थुथु छाङ्म मरारे ख्यु तये मझाँ। अकेः मात्र नङ्पा, ख्युई झाःम घङ लै ल्हूलाम ङ्याङ्ङ, आथबा खोरेव, धाङव रे काँसान धाङव थुनान्न ल्हूलाम।
तब फरिसीव रे कानुन लन्नान्न सिमिवजै येसू लोप्पो, “तैङ नान चेलाव खेपुलजै बिम्पान ल्हूलाम मङ्यानरे बाःपा ल्हाजै झाँ?”
तब येसुई ख्युकाङ्मोः र्वाबो, “यसैयाजै ना ख्वाकिबावन भारेः लः खेखे झामखेखे भबिस्यबानी खेबो, कताःम पबित्रसास्त्रग सर्पा ङ्याह्, ‘अन जातिजै ङाः ङुरजै मात्र सम्मान खेँ, जेङ्नै ख्युन सम ङन लम ग्याङम ङ्याह्। ख्यु भाछ्योवा ङन आराधना खेँ, जेङ्नै ख्युन छोए मात्र सिमीवजै लम्पान निम जेङ्पा।’1 ङेनको परमेस्वरन र्वापान ल्होई ख्योवाख्योवा सिमीवन ल्हूलाम ङ्याङ्ङ।” येसुई ख्युकाङ्मोः र्वाबो, “ङेनको जेँन ल्हूलाम ङ्यान्चेन भिह्तु हाति जेर्म खेखे परमेस्वरन र्वापान ल्होई पह्ङ्ङ।” तैङर्वाङिन मोसाई कानुन अन्सार र्वापा ङ्याह्, “जेँन पोमाः सम्मान ख्या, रे सुई पोमाः क्याह्ँ, मन तेम्माई सत्त्वानान।”2 यदि कान सिमिजै जेँन पोमाः “ङनलम तयाः हाति फुरी ङेनकाङ्मोः देत्त्वानान मन बलिदान जेङ्पा (अन्न अर्थ परमेस्वरग फुल्पा) र्वाङिन, ङेनको नू जेँन पोमान भिह्तु ह्याङ सेवा तये खे मफाङ्ङ। झामखेखे ङेनको जेँन ल्हूलामग जाःजाः परमेस्वरन र्वापान ल्होईग फानमत्वानान छूँ आलै मनलैम घङ लै ल्होई ङेनकोजै खेपाई छ्युङ्पा ङ्याह्।”
सिमी बाःपा दोङ्नान्न ल्होईव
(मत्ती १५:१०-२०)
येसुई ह्याङ सिमिन मोह्ङग जेँन रह्म्म स्वा र्वार्वा ख्युकाङ्मोः र्वाबो, “ङेनको पुरूजै ङन ल्होई ङ्याना रे हाकोवा। झाःम ल्होई तये मह्या कन खोलोःलै सिमिन झिङ जाःजाः नू बाःपा धोङ तैङ, जेङ्नै सिमिन लम खोलोः गेन्नान ल्होईवजै सिमी बाःपा धोँ। सुन ङ्यान्नान्न नम्ज्योआ ङ्याह् नुई ङ्यानाःयो।”
सिमिन मोह्ङग ख्योवाख्योवा यिमन झिङ जामी येसुन चेलावजै नू अन द्रिस्तान्तन भारेः लोप्पो। येसुई ख्युकाङ्मोः र्वाबो, तै ङेनको यङ हेँ घङ सिमिवलैम हाकोनान ङ्याह्यौ? तै खोलोःलै सिमिन झिङ जाःङ मह्नजै नू बाःपा धोङ मतैनान र्वार्वा ङेनकाङ्मोः क्युई मीपाऊ? तैङर्वाङिन मन नुन समग नङ्पा, जेङ्नै फौन झिङ जाःनान, रे ल्होलम खोलोः गेन्नान। (झामखेखे येसुई झायाप पुरू छाङ्म जेङ्पा र्वार्वा स्याप्पो।)
येसुई र्वाबो, “सिमिलम तै खोलोः गेङ्ङ अनजै सिमी बाःपा धोँ। तैङर्वाङिन तैस्याङ पुरून नावा अलःव समन झिङलै गेग्गे स्वानान रे नू धोन अलःक्याँ वन्नान, उदाहरन्न भिह्तु: ब्यभिचार खेनान, खुनान, सिमि सन्नान, पातार खेनान, लोभ खेनान, धोन अलः खेनान, ठग खेनान, यामखेपा राह्नान, थादोवा खेनान, सिमिन ल्हुई झानान, खिर्का राह्नान रे मुर्खन धोन खेनान। अन अलः ल्होई पुरूव झिङलै गेन्नान, रे सिमी बाःपा दोङ्नान।”
चिमिचादीन बिस्वास
(मत्ती १५:२१-2८)
आलै स्याह्लै च्याङच्याङ येसु तुरोस सहर रे सीदोन्न ङेह्मन ठाउँलै वैवै यिमदीन झिङ जाःबो। अन ल्होई सुई क्युई नराःयो र्वानान नु चाहि खेँ, जेङ्नै नु फाक छ्युङ मतैबो। मन्नै भेला चिमिचादीजै नुन भारेः ताह्बो रे स्वास्वा नुन ल्हेग खल्बु क्याप्पो। मन चिमिचान चमेःग मु ताह्पा ङ्याह्। अन सिरियान फोनिकेन ठाउँग केह्पा यहूदीन खोलोःन चिमिचादी ङ्याह्। मन चिमिचाई जेँन चमेलम मु छ्यूयाःयो र्वार्वा येसू छ्याःफुल्बो। येसुई नू र्वाबो, “ङू वैचाकाङ्मोः झा फाना, तैङर्वाङिन वैचावन रोता वव्वै ख्युकोग पच्चे लः नङ्पा।”
आलै नुई येसू र्वाबो, “जेङ्पा प्रभु, जेङ्नै ख्युकोजै र्वार्वा सिमिन वैचावजै तेबलन पोँ छार्फाम्पान तुकराव झाँ।”
ह्याङ येसुई नू र्वाबो, “नाई झाःम र्वापान कारनजै ना यिम वया। नान चमेलम मु गेग्गे वैपा ङ्याह्।” नु यिम होई रे चमेःग खातग आःपाई छ्युङ्पा धोबो रे नुनलम मु गेत्तपा ङ्याह्।
येसुई नाम्ज्योवा मताह्नान रे वाम्पा सिमी ताःफाम्पा
आलै येसु तुरोसन छेत्रलै गेग्गे सीदोन सहर राह्राह् देकापोलिसन सिमानान घूँलम राईराई गालील-योह्ग होई। स्याह् सिमीवजै नाम्ज्योवा मताह्नान रे वाम्पा सिमिदीग येसुन रह्म्म सप्पो, रे नुन ल्हाः ल्हा नाह्ना र्वार्वा नू छ्याःफुल्बो। नू सिमिन मोह्ङलम तीपू वव्वै येसुई जेँन ल्हाजुप नुन नाम्ज्योवाग कह्बो। मन्न छाम्म छिमा पप्पे नुन लही ज्यार्बो। आलै स्वर्गक्याँ सेनसेन ऊ र्याङ्म वव्वै नू र्वाबो, “इफ्फाता,” (अन्न अर्थ पोवा।) अन्नै भेला नुन नाम्ज्योवा पोङ्बो, रे नुन खीपा लही पोङ्बो, रे अन लः खेखे र्वामः जाःबो। “अन सुई नर्वा,” र्वार्वा येसुई ख्युकाङ्मोः र्वाबो। जेङ्नै हाति नुई सिमिकाङ्मोः आग्या बिङ्ङ, झन ह्याल्म तोप खेखे ख्युई अन ताह्फेङ्ङ। आलै ङ्यान्नान्न सिमिव पुरू मिह्दा हालाईलाई र्वामः जाःबो, नुई तैस्याङ पुरू लः खेपा ङ्याह्। “नुई नाम्ज्योवा मताह्नानग ताह्नान रे वाम्पाः ल्होई र्वा तैनान धोँ।”
Source notes (2)
- Cross-reference यसै २९:१३
- Cross-reference प्रस २०:१२; २१:१७; लेवी २०:९; कानुन ५:१६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.