Kaike Standard Traslation
मर्क 6
नासरतग येसू अस्वीकार खेपा
(मत्ती १३:५३-५८)
स्याह्लै गेग्गे येसु जेँनै सहरग होल्बो। नुन चेलाव ङ्याबो स्वाबो। नाह्न ल्हाः नुई यहूदी आराधनालयग लह्म्मः जाःबो। ङ्यान्नान सिमिव लैजै हालाईलाई राह्ङराङ्साः झामखेखे ल्होई र्वामः जाःबो, “अन सिमिजै अन ल्होईव खालै लह्न्दँ? कताःमन बुद्धि देत्त! नुई कुजुई झाःम ताईलुवान धोन खेँ? तै नु अनै कर्मी नङ्पा तै? तै नु ता मरियमन ङोह्जो आथबा याकूब, योसेफ, यहूदा रे सिमोन्न दाज्यु नङ्पा तै? तै नुन मितिकोव रे ङिन ङ्याबोई मह्या तै?” झाःम र्वाईर्वाई ख्युई येसू बिस्वास मखेबो।
तब येसुई ख्युकाङ्मोः र्वाबो, “भबिस्यबक्ताग जेँन देस रे जेँन क्यालाकिप्पावन घूँ रे जेँनै यिम नङ्म घङ खाई अनादर मराह्नान।”1
रे येसुई मन ठाउँग कान-कान नाह्प्पुवावन ल्हाः जेँन ल्हा नान्नान ख्युकाङ्मोः ताःफान्चेन धोन नङ्म घङ ताईलुवान धोनव तये खे मतैबो। ख्युन अबिस्वास रङरङ नु हालाईबो। आलै नु नाम-नामग लह्नैलह्नै होई।
येसुई चेला च्योङेपाः फेप्पा
(मत्ती १०:१,५-१५; लुक ९:१-६)
येसुई चेला च्योङेपाः जेँन रह्म्म स्वा र्वाबो, रे ख्युकाङ्मोः ङेह् ङेह् खेखे फेप्पो। नुई ख्युकाङ्मोः मुवन ङ्या आङ यङ बिम्बो। आलै नुई ख्युकाङ्मोः झाःम र्वार्वा आग्या बिम्बो, कि “लेन्चेन भिह्तु ङ्याबो तये नहुरा, न ता रोता, न ता झोला, न धबग सोङ, जेङ्नै पेर्गादी मात्र हुरा। पौला गोना, जेङ्नै घङ ह्याल्म भन्दि नहुरा।” नुई ख्युकाङ्मोः हेँ र्वाईर्वाई होई, “कान नामग ताप्तौ कन यिम जानान, मन नामलै मगेन्न बेर मनै यिम छ्योवायो। यदि कान ठाउँग ङेनकोन स्वागत मराङिन, सिमीवजै ङेनकोन ल्होई ङ्याम्म अस्वीकार खेङिन, ङेनको मन ठाउँलै गेत्तौ ख्युन बिरोधग साँचिन भिह्तु जेँन तिङ्पान थल्जुब खारा।” अन ख्युन चेतावनीन भिह्तु र्हानान ङ्याह्।
तब ख्यु गेग्गे होई आलै सिमीवजै जेँन तीपालै घ्योप्पा ख्याःयो र्वार्वा ताह्फेप्पो। ख्युई लै मुकाङ्मोः छ्यूबो, रे लै नाह्प्पुवाकाङ्मोः छि दुद्दुई ताःफाम्बो।2
बप्तिस्मा-बिन्नान यूहन्ना सिह्पा
(मत्ती १४:१-१२; लुक ९:७-९)
ता झली हेरोदजै अन ल्होई पुरू ताह्पा ङ्याह्, तैङर्वाङिन खास्या पुरू येसुन मिनकै ङ्याह्। सिमिव र्वाङ, “बप्तिस्मा-बिन्नान यूहन्ना सिह्पालै सम्पु रह्दँ, अन्न कारन ता नुनलम झाःम सक्तिसाली धोन रह्पाई ङ्याह्।”3 जेङ्नै घङवजै र्वाबो, “नु एलिया जेङ्पा।” रे ह्याङ घङवजै र्वाबो, “नु ता ताङ्बोन भबिस्यबक्ताव लैम भबिस्यबक्तादी जेङ्पा।” जेङ्नै जब हेरोदजै अन ताह्बो तब नुई र्वाबो, “यूहन्ना, कन्न थोप्पा ङै थुम फाम्पा, नुई सम्पु ग्युर्दँ।” तैङर्वाङिन हेरोदजै जेँन भाइ फिलिपन मिसा हेरोदियासन भिह्तु यूहन्नाः जुङ फानफान नू खीखी झ्यालखानाः कह्पा ङ्याह्, तैङर्वाङिन नुई हेरोदियासग मिह्जी खेपा ङ्याह्।4 तैङर्वाङिन यूहन्नाई हेरोदग झाःम र्वापा ङ्याह्, “कानुन्न अन्सार ङेन जेँन भाइन मिसा ङ्याबो मिह्जी खेचे लः नङ्पा।”5
अन्न कारन हेरोदियासजै यूहन्नान ङ्या खूँ नाम्पा ङ्याह्, रे नु सत्सुम खेपा ङ्याह्, जेङ्नै हेरोदन कारन खेतैपा मह्या। तैङर्वाङिन यूहन्ना ती धार्मिक रे पबित्र सिमि र्वार्वा छुछु हेरोद नुन ङ्याबो ङिह्ङ्ङ, रे नू झ्यालखानाः सेन्चे खेखे नाम्पा ङ्याह्। यूहन्नान ल्होई ताह्ताह् नु आत्ति खेँ, जेङ्नै नुन ल्होई स्याङस्याङ ङ्याङ्ङ।
जेङ्नै र्वापालैमन मौका मन्तौ स्वाबो, जब हेरोदजै जेँ केह्पान ल्हा जेँन मकेकुकेन किम पदाधिकारीव, अधिकृतव रे गालीलन ङोत्वा-ङोत्वा सिमिकाङ्मोः भत्यार किम बिम्बो। तैङर्वाङिन जब हेरोदियासन जेँनै चमेः झिङ स्वास्वा छ्याम्बो, तब नुई हेरोद रे नुन केह्पान भत्यारग स्वापाकाङ्मोः स्याङ फाम्बो। आलै झलीजै मन चिमिचाः र्वाबो, “नाः तै तोलसुम दोङ्ङ तोला, रे ङा अन नाः बिन्नान ङ्युँ।” ह्याङ झलीजै रेनरुरु नू र्वाबो, “राज्य फेई तोल्नै ङा नाः बिन्चे।”6 आलै नुई खोलोः गेग्गे जेँन माः लोप्पो, “मा ङा तै तोल्चे?” नुई र्वाबो, “बप्तिस्मा-बिन्नान्न यूहन्नान थोप्पा।” अन तुरुन्तै झिङ झलीन रह्म्म होई, रे झाःम र्वार्वा तोल्बो, “ङेनजै चोँ ङाः बप्तिस्मा बिन्नान्न यूहन्नान थोप्पा तेर्माः क र्वानान ङा इच्छ्या खेनान।” अन ताह्ताह् झली मिह्दा तुँलाक्या रह्बो, जेङ्नै अकेःन दम्फुवन ङू रेनरुरु मन चिमिचा बिन्चे र्वापान कारन ह्याङ मबिन र्वा मतैबो। झलीजै तुरुन्तै गारदन तीपा सिपाहीग फेप्पे यूहन्नान थोप्पा सह्रा र्वार्वा कोह्बो। आलै नुई झ्यालखानाः वैवै यूहन्नान थोप्पा थुम्बो, रे नुन थोप्पा तेर्माः सस्सै चिमिचाः बिम्बो, रे चिमिचाई अन नुन माः बिम्बो। यूहन्नान चेलावजै जब अन ल्होई ताह्बो तब ख्यु स्वास्वा नुन कुँह्म सोलसोल तुह्र्साः वव्वै लुँह्म्बो।
येसुई मोह्ङ किम ख्वापा
(मत्ती १४:१३-२१; लुक ९:१०-१७; यूह ६:५-१३)
आलै प्रेरितव येसुन रह्म्म जोम्बो, रे ख्युई तयाः-तयाः खेपा ङ्याह् रे लम्पा ङ्याह्, मन पुरू नू स्याप्पो। नुई ख्युकाङ्मोः र्वाबो, “ङेह् रे ङन ङ्याबो तीपू स्वा, रे ङाई नाह्।” तैङर्वाङिन स्याह् आउजाउ खेनानव लै ङ्याह्, रे ख्युकाङ्मोः झाचेनै घाम मह्या। आलै ख्यु तै मर्वारे दोङाः चपचप तीपू होई। लै सिमीवजै ख्यु वैयङ खेपा रङरङ स्योःबो, आलै सिमिव सहरवलै धालैधालै स्वास्वा चेलावन खेरे ङूई स्याह् ताप्पो। जब येसु नाः गेप्पो तब नुई मोह्ङ किमदी रङ्बो, रे नुई ख्युकाङ्मोः दिसाबो। तैङर्वाङिन ख्यु ग्वाल्या मीपान लूपावलैम ङ्याह्। रे नुई ख्युकाङ्मोः लै ल्होई लह्म्मः जाःबो।7 आलै जब भेला लै होई तब येसुन चेलावजै नुन रह्म्म स्वास्वा र्वाबो, “स्यीह् तीपू ङ्याह्, रे ता ङ्याजे रह्बो। सिमिकाङ्मोः भिदा भिना, रे ख्युई धेँवछोँन छ्युङ्पु रे नामग वैवै जेँन भिह्तु तयाः झायाप र्युह्यायो।”
जेङ्नै येसुई ख्युकाङ्मोः र्वाबो, “ङेनकोजै ख्युकाङ्मोः तयाः झाफाना।” जेङ्नै ख्युई नू र्वाबो, “तै ङी वैवै मुलन सिक्का क्याम ङेह्न रोता र्युह्र्युह् ख्युकाङ्मोः झा फान्चे तै?” येसुई ख्युकाङ्मोः र्वाबो, “ङेनकोन ङ्याबो रोता हाति ङ्याह्? वैवै सेह्ना।” आलै ख्युई सेह्म्बो रे येसू झब बिम्बो, “रोता ङा रे ङाह् ङेह्।”
आलै येसुई सिमिकाङ्मोः क्वा पिङ्मग लयन खेखे छ्युङ्फाम्बो। ख्यु क्याम ती-ती रे फेराङ सुमथल-सुमथलन लयन दोङदोङ छ्युङ्बो। नुई मन रोता ङा रे ङाह् ङेह् वव्वै पान्नाङक्याँ सेनसेन परमेस्वरग असिका तोल्बो, रे अन रोता क्युप्पो आलै सिमिवन ङू नाह्ना र्वार्वा चेलाकाङ्मोः बिम्बो, रे अन ङाह् ङेह् यङ नुई पुरूग परेःबो। आलै पुरूजै बरङबरङ झबो। ङाईलै चेलावजै रोता रे ङाह्न लामा रह्पान तुकराव थाम च्योङे खाप्च्योवा तुईबो। रोता झानान्न चोलोङ्चाव हजार ङा ङ्याह्।
येसु त्युन ल्हाः लेम्पा
(मत्ती 1४:२२-३६; यूह ६:१६-२१)
आलै येसुई तुरुन्त जेँन चेलाकाङ्मोः दोङाः चपचप योह्न धिक्याँ बेथसेदा नामग फेप्पो, नुँह् चन सिमिवन मोह्ङग भिदा बिम्म स्याह्ई छ्युङ्बो। ख्युकाङ्मोः भिदा खेतामी नु धुरग सोअताप्मः होई। छानजे दोङा समुन्द्रन घूँ ङ्याह्, रे येसु चन तितिमाई नाःन साः ङ्याह्। चेलाकाङ्मोः दोङा कुल्चे तूरि रह्पा नुई रङ्बो, तैङर्वाङिन लन ख्युन फिचीङघोल्वाक्याँ ङ्याह्। नाह्पन तिन बजेलै छ बजेन घूँ नु ख्युन स्याह् समुन्द्रन ल्हाः ल्हेनैल्हेनै स्वाबो, रे ख्युकाङ्मोः ङू तलतल वैमः जातौ ख्युई नु समुन्द्रन ल्हाः लेन्यङ खेपा रङ्रङ मु जेङ्पा र्वार्वा छुबो, रे ख्यु फाईरा खेबो। तैङर्वाङिन नू रङरङ पुरू ङिनपा ङ्याह्। जेङ्नै हतपत नुई ख्युकाङ्मोः र्वाबो, “हिम्मत ख्या, ङा जेङ्पा, नङिना।” आलै येसु ख्युन ङ्याबो दोङाः चप्पो, रे लन छ्याबो। आलै ख्यु मिह्दा हालाईबो, तैङर्वाङिन ख्युई हजार ङा सिमिकाङ्मोः झाम बिम्पा रोतान भारेन ल्होई हाकोपाई मह्या, जेङ्नै ख्युन सम क्योङ्म रह्पा ङ्याह्।
येसुई गनेसरेतग नाह्प्पुवाकाङ्मोः ताःफाम्पा
(मत्ती १४:३४-३६)
योह् गार्मी येसु रे नुन चेलाव गनेसरेतन प्रदेसग स्वा ताप्पो, रे ख्युई दोङा नाः नाह्म्बो। जब ख्यु दोङालै गेप्पो तब मन्न भेलाई सिमीवजै येसू स्योःबो, मन्नकारन ख्युई लिब्रुङक्याँ धालैधालै वैवै येसु स्वाबो र्वानान्न ल्होन फेलफाम्बो। आलै सिमिवजै खङ्ननाकाङ्मोः खातग नान्नान सम्म जाःबो। आलै नामवग, सहरवग, रे छ्युङ्पू खाः-खाः नु जाःबो, सिमीवजै नाह्प्पुवाकाङ्मोः बजार-बजारग नाह्म्बो, रे नुन घोलाङ्न नाः मात्र यङ ज्यार्चे धेरायो र्वार्वा ख्युई नू छ्याःफुल्बो, रे हातिपाई ज्यार्बो ख्यु पुरू ताःबो।
Source notes (7)
- Cross-reference यूह ४:४४
- Cross-reference याक ५:१४
- Cross-reference मत्ती १६:१४; मर्क ८:२८; लुक ९:१९
- Cross-reference मत्ती ४:१२; लुक ३:१९-२०
- Cross-reference लेवी १८:१६; २०:२१
- Cross-reference एस ५:३-६; ७:२
- Cross-reference गन्ती २७:१७; १ झली २२:१७; २ इति १८:१६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.