Kaike Standard Traslation
मर्क 5
येसुई मु ताह्पा सिमी ताःफाम्पा
(मत्ती ८:२८-३४; लुक ८:२६-३९)
येसु रे नुन चेलाव गालील योह्न धेरा गेरासेनसन छेत्रग स्वाबो। येसु दोङालै खोलोः गेप्लुङ्मीम तुह्र्सालै खोलोः स्वास्वा मु ताह्पा सिमिदीजै येसू धोबो। अन तुर्सा रह्पू छ्युँ। सुई नू साँगलजै खीखी नान मतैङ। तैङर्वाङिन अन लै नेल रे साँगलजै खीपा ङ्याह्, जेङ्नै नुई साँगलव तुकरा तुकरा खेखे परेङ्ङ। सिमि सुई र्वार्वा नू अधिनग नान तैपा मह्या। अन ङिम्मेछाम्मे एकुरो तुर्साव रे धुरवग फाईरा खेईखेई जेँजै जेँगै लुङजै छैछै ल्हेङ्ङ। आलै जब नुई येसू ग्याङमलै रङ्बो तब धालैधालै स्वाबो, रे येसुन ङू खल्बू क्यापक्याप छ्याःफुल्बो। आलै केह्ः किमै फाईरा खेखे नुई र्वाबो, “हे पुरून खेरे किम परमेस्वरन ङोह्जो येसु, नाई ङाः तै खेमः जाःपा जेङ्पा? ङा परमेस्वरग रेनरुरु नाः छ्याफुल्चे, कि ङा तूरि नबिना।”1 तैङर्वाङिन येसुई नू र्वापा ङ्याह्, “ए मु, मन सिमीलै गेग्गे वया।”
आलै येसुई नू लोप्पो, “नान मिह्न तै जेङ्पा?” नुई नू झब बिम्बो, “ङन मिन फौज जेङ्पा, तैङर्वाङिन ङि लै ङिह्पा।” आलै नुई येसू मन ठाउँलै मुकाङ्मोः खोलोः नछ्यूयायो र्वार्वा घलिछ्याचल र्वार्वा छ्याःफुल्बो।
स्याह् ङेह्मन धुरग छ्योअन मोह्ङ किमदी छापाई छ्युङ्पा ङ्याह्। आलै मन मुवजै झाःम र्वार्वा येसू छ्याःफुल्बो, “ङी छ्योअवन ङ्याबो वै फाना, रे ङि ख्युन झिङ जाचे।” तब नुई ख्युकाङ्मोः वैफाम्बो, रे मुव मन सिमिलम गेग्गे छ्योअवन झिङ जाःबो, आलै क्वाईमाल्ला हजार ङेह्तौ छ्योवान अन मोह्ङ जारग लम योह्क्याँ पाह्मैपाह्मै होई, रे योह्ग नुपनुप सिबो।
मन छ्योवा छानान्न सिमिव ज्यार्बो, रे सहर रे नाम नामग ताह्फेप्पो। रे तै रह्दँ र्वार्वा सेह्म्म सिमिव स्याह् स्वाबो। तब ख्यु येसुन स्याह् स्वाबो, रे रङ्बो कि अन मु ताह्पान सिमि लः राह्राह् घोलाङ गोनगोन छ्युङ्पा ङ्याह्। अन रङरङ ख्यु ङिह्म्बो। आलै सुई अन रङ्पा ङ्याह्, ख्युई मु ताह्पा सिमि रे छ्योअकाङ्मोः तै रह्पा ङ्याह् अन सिमिकाङ्मोः स्याप्पो। आलै ख्युन छेत्रलै वया र्वार्वा सिमिवजै येसू छ्याःफुल्मः जाःबो।
येसु दोङाः चप्म जातौ अन मु ताह्पा सिमिजै नुन ङ्याबो वैचेन भिह्तु छ्याःफुल्बो।
जेङ्नै येसुई नू वैमफाम्बो, आलै नू र्वाबो, “ना जेँन यिम वैवै नान जेँन सिमिकाङ्मोः प्रभुई नान भिह्तु खेपान मकेकुकेन किम धोन रे ना थम्पान दया किमन बर्नन ख्या।” आलै अन सिमि होई, रे येसुई नुन भिह्तु कताःमन धोन किम खेपा ङ्याह् अन देकापोलिस भरी ताह्फेम्मः जाःबो, रे अन ताह्नान सिमि पुरूवजै हालाईबो।
याइरसन चमेः रे येसुन घोलाङ ज्यार्नान चिमिचा
(मत्ती ९:१८-२६; लुक ८:४०-५६)
जब येसु ह्याङ दोङाः चपचप योह्न धिक्याँ होई, तब मोह्ङ किमदी नुन धेँवछोँ जोम्बो। नु चन योह्न नाः ङ्याह्। यहूदी आराधनालयन अगुवावन बर्ग याइरस मिह्न्न सिमिदी येसुन स्याह् स्वाबो, रे नू रङरङ नुन ल्हेग खल्बु क्याप्पो, रे झाःम र्वार्वा छ्याःफुल्बो, “ङन कत्याम चमेः सिम जाःपा ङ्याह्, स्वास्वा नुन ङ्या ङेन ल्हा नाह्ना, रे अन ताःयो रे सोनायो।”
तब येसु नुन ङ्याबो होई। मोह्ङ किमदी नुन ङिग जाःबो, रे सिमिव नुन धेँवछोँ फुल्चीफुल्ची खेमः जाःबो। आलै च्योङे परान ङूलै कह वैनान्न नाह्जा ङिह्पा चिमिचादी स्याह् ङ्याह्। नुई लै अम्जीवन स्याह् वैवै यङ तातैपा मह्या। जेँन ङ्याबो ङिह्पान क्यु पुरू अन्नै भिह्तु खर्च खेतपा ङ्याह्, जेङ्नै ताःचेन पूँ झन स्हरजै नू जुङ्पा ङ्याह्। येसुन भारेः नुई ताह्पा ङ्याह्, रे नुई मोह्ङन ङिक्याँलै स्वास्वा येसुन घोलाङ ज्यार्बो।
तैङर्वाङिन नुई समसमग र्वाबो, “ङै नुन घोलाङ मात्र ज्यार्ङिनै ङा ताःनान ङ्याह्।”
नुई येसुन घोलाङ ज्यार्बो रे तुरुन्त नुन कह वैचे छ्याबो, रे जेँन ल्होन नाह्जा ताःपा नू क्युई रह्बो। जेँनलम सक्ति खोलोः गेप्पा येसू हरक्क क्युई राह्राह् मोह्ङक्याँ होलहोल लोप्पो, “ङन घोलाङ सुई ज्यार्बो?”
चेलावजै येसू र्वाबो, “मोह्ङजै फुल्चीफुल्ची खेपा ता ङेनजै रङ्पाई ङ्याह्, जेङ्नै ङेन र्वाङ ‘सुई ङा ज्यार्बो?’”
जेङ्नै येसुई जेँग सुई ज्यार्बो र्वार्वा धेराछोरा सेह्म्बो। तब जेँग तै रह्पा ङ्याह् अन क्युई राह्राह् अन चिमिचा ङिनङिन दारैदारै स्वास्वा येसुन ङू खल्बु क्याप्पो, रे नू तेम्मा ल्होई पुरू र्वाबो। तब नुई चिमिचाः र्वाबो, “ए चमेः, नान बिस्वासजै नाः ताःफाम्पा ङ्याह्। ता नान स्हर वयायो रे ना किम्म खेखे वया।”
येसुई झाःम र्वातौर्वातौ हाकिम याइरसन यिमलै सिमिव स्वास्वा र्वाबो, “ङेन चमेः ता सिबो। गुरुज्यूग ता घङ तूरि तैङ बिन्नान?” जेङ्नै ख्युई र्वापान ल्होईवग ध्यान मबिमबिम येसुई येहूदी जोम्पुन हाकिमग र्वाबो, “नङिना, बिस्वास मात्र ख्या।” आलै नुई पत्रुस, याकूब रे याकूपन भाई यूहन्ना नङ्म घङ सुई जेँन ङ्याबो स्वा मफाम्बो। ख्यु यहूदी जोम्पुन हाकिम याइरसन यिम स्वाबो, आलै नुई फाईराकुईरा खेनानव, दानानव रे बैरा खेखे दानानकाङ्मोः रङ्बो। झिङ जाःजाः नुई ख्युकाङ्मोः र्वाबो, “ङेनको तैङ फाईराकुईरा खेनान तैङ दानान? कोम्मे सिह्पा मह्या, जेङ्नै आःपाई छ्युङ्पा ङ्याह्।” जेङ्नै ख्यु नुन ल्होईग रैबो। तब नुई ख्यु पुरूग खोलोः छ्यूबो, रे कोम्मेन पोमा रे नुन चेलाकाङ्मोः ङ्याबो वव्वै कोम्मे ङिपुन झिङ होई। आलै कोम्मेन ल्हा जुङजुङ येसुई नू र्वाबो, “तालिता कूमी” अन्न अर्थ जेङ्पा, “ए कोम्मे, ङा नाः र्वाचे, च्याँ।” आलै कोम्मे तुरुन्तै च्याङ्बो, रे ल्हेम्म जाःबो। नु च्योङे परान ङ्याह्। आलै मन्नै भेला सिमिव मिह्दा हालाईबो। नुई ख्युकाङ्मोः अन सुई क्युई नराःयो र्वानान्न करा आग्या बिम्बो। आलै कोम्मेग तयाः झाफाना र्वार्वा ख्युकाङ्मोः र्वाबो।
Source notes (1)
- Cross-reference मत्ती ८:२९; १ झली १७:१८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.