Kaike Standard Traslation
मर्क 4
र्यु पन्नान्न द्रिस्तान्त
(मत्ती १३:१-९; लुक ८:४-८)
ङाईलै ह्याङ गालील योह्न नाः येसुई लह्म्मः जाःबो। नुन लिब्रुङक्याँ लैः सिमिवन मोह्ङ जोम्पा राह्राह् नु योह्ग ङिह्पान दोङादीग चपचप नाःलै धिङाः वैवै छ्युङ्बो। सिमिव चन मन नाःन साः छ्युङ्बो। आलै येसुई ख्युकाङ्मोः द्रिस्तान्तवग लै ल्होई लह्म्बो। नुई जेँन छोएग ख्युकाङ्मोः झाःम र्वाबो:
“ङ्याना, र्यु पन्नान्न सिमिदी र्यु पच्चेन भिह्तु गेप्पो। आलै नुई र्यु पन्तौ कान लम्राः छार्बो, रे अन र्यु युजुई स्वास्वा झबो। कान र्यु सा ताङ्खोराः छार्बो। स्याह् सा ङाईदी ङिह्पान कारन मन यिप्पुदी थुङ्बो। ङिह्मा लैः छाम रामी गुगुर्माव द्याबो, रे पादा मछ्यापान कारन मन खार्बो। कान र्यु चन चेरन घूँ छार्बो। चेर छारैछारै होई, रे बोती च्योर्बो, आलै मनग फल मछ्याबो। जेङ्नै कान र्यु सा लःग छार्बो, रे थुङैथुङै रे छारैछारै होई गुना सुमच्यु, गुना सुमथल रे गुना ङाथल फल बिम्बो।” आलै येसुई र्वाबो, “सुन ङ्यान्नान्न नाम्ज्योवा ङ्याह्, नुई ङ्यानाःयो।”
द्रिस्तान्तन उदेस्य
(मत्ती १३:१०-१७; लुक ८:९-१०)
जब येसु तितिमाई रह्बो, तब चेला च्योङेपाव रे नुन धेँवछोँ ङिह्पान सिमिवजै येसू द्रिस्तान्तन भिह्तु लोप्पो। येसुई ख्युकाङ्मोः र्वाबो, “परमेस्वरन राज्यन रहस्य ङेनकाङ्मोः बिम्पा ङ्याह्, जेङ्नै खोलोःन सिमिकाङ्मोः चन ल्होई पुरू द्रिस्तान्तग र्वानान, कि ख्यु सेन्चे ता सेह्ङ्ङ, जेङ्नै मरँ, ताचे ता ताँ, जेङ्नै हामकोँ, तेमन्ता ख्युई घ्योप्पा खेखे परमेस्वरक्याँ होल्नान ङ्याह् रे ख्युन तीपा माफ राह्नान ङ्याह्।”1
येसुई र्यु पन्नान द्रिस्तान्तन अर्थ स्याप्पा
(मत्ती १३:१८-२३; लुक ८:११-१५)
येसुई ख्युकाङ्मोः र्वाबो, “ङेनको अन द्रिस्तान्तन अर्थ हामकोँ? उजु जेङ्न घङ द्रिस्तान्त पुरूवन अर्थ कुजुई हाकोदरा? र्यु पन्नानजै परमेस्वरन बचन पन्नान। कान सिमिव लम्राः पप्पान र्युलैम ङ्याह्। जब ख्युई बचन ताह्नान, तब तुरुन्तै सैतान स्वानान, रे ख्युकाङ्मोः पप्पान बचन वन्नान। उजुखेखे सा ताङ्खोराः पप्पाव अजोव जेङ्पा, सुई जब बचन ताह्नान तब स्याङस्याङ तुरुन्तै अन स्वीकार खेनान। जेङ्नै ख्युन जेँन पादा मछेःपा राह्राह् मन ङाई बेर मात्र थुप्नान। जेङ्नै जब बचन्न कारन तूरि या तेह्पफाम्पा स्वानान, ख्यु तुरुन्तै दिम्नान। चेरन घूँ पप्पा अनै जेङ्पा, सुई बचन ताह्नान, जेङ्नै अन सन्सारन छरा, क्युन लोभ रे घङ मालन लोभ स्वास्वा बचनग च्योर्नान। आलै मनग फल मछ्याःनान। जेङ्नै सा लः पप्पाव मन जेङ्पा, सुई बचन ताह्नान, स्वीकारी खेनान, रे फल बिन्नान गुना सुमच्यु, गुना सुमथल रे गुना ङाथल।”
लज्युङ्न द्रिस्तान्त
(लुक ८:१६-१८)
येसुई ख्युकाङ्मोः र्वाबो, “तै सुई लज्युङ पार्पार फाक्तिन्न पोँ आथबा खातन पोँ नान्चे र्वार्वा झिङ सन्नौ? तै सामदान्न ल्हाः नान्चे र्वार्वा नङ्पा तै? चिज तये क्युक्यु नान मतैनान कन थन्नान मह्या, आलै चिज तये फाक मह्या कन साल्मः सन्नान मह्या। यदि कान सिमिन ङ्यान्चेन नाम्ज्योवा ङिङिन नुई ङ्यानाःयो।”
येसुई ह्याङ ख्युकाङ्मोः र्वाबो, “ङेनको तै ताह्नान, मनग ध्यान भिना। तैङर्वाङिन कन नापजै ङेनको बिन्नान ङेनकोजै अनै नापजै देन्नान। रे ङेनकाङ्मोः झन ह्याल्म बिन्नान ङ्याह्। तैङर्वाङिन सुन ङ्याबो ङ्याह् नू झन ह्याल्म बिन्नान ङ्याह्, रे सुन ङ्याबो मह्या नुन ङ्याबो ङिह्पा यङ नुनलम तल्नान ङ्याह्।”
छार्नान र्युन द्रिस्तान्त
येसुई र्वाबो, “परमेस्वरन राज्य झाःम जेङ्पा, कान सिमि तीपाई साः र्यु पह्ङ्ङ, रे नु आःनै, सापसाप छ्युङ्नै ङिम्मेछाम्मे अन र्यु थुङ्नान रे छार्नान, जेङ्नै अन कुजुई छार्नान, अन नू क्युई मराह्नान। सा जेँजै थुङ्नान, पहिली गुगुर्मा, आलै नम, ह्याङ नमग पुरू गेल्ला छ्यानान। जेङ्नै जब साई मिन्नान, तब नुई तुरुन्तै खदमाई गम्मः जाःनान, तैङर्वाङिन गेल्ला चाचेन भेला स्वातपा राह्नान।”
रायोन र्युन द्रिस्तान्त
(मत्ती १३:३१-३४; लुक १३:१८-१९)
येसुई ह्याङ र्वाबो, “परमेस्वरन राज्य तैन ङ्याबो तुर्चे? आथबा कन द्रिस्तान्तग अन्न बर्नन खेचे? अन ता छून र्यु लैम ङ्याह्, अन साः पन्नान। पिर्थीबिभरी र्यु पुरूव खेरे छ्युम रानै जब अन पन्नान, तब छार्नान, रे सागपात पुरून खेरे अन किम राह्नान, रे नुई धा किम-किम दोङ्नान, रे पान्नाङ्न युजुई अन्न छाहारीग चाङ दोङ्नान।” ख्युई हाकोतैन बेर येसुई झाःमै लै द्रिस्तान्तव र्वार्वा ख्युकाङ्मोः बचन स्याप्पो। द्रिस्तान्त मीम नु ख्युन ङ्याबो ल्होई मर्वाबो, जेङ्नै जेँन चेलाव मात्र रातौ चन नुई द्रिस्तान्त पुरून अर्थ भुझाई खेँ।
येसुई लन छ्याफाम्बो
(मत्ती ८:१८,२३-२७; लुक ८:२२-२५)
मन्न लाह्ः नम्जे रुम्मी येसुई चेलाकाङ्मोः र्वाबो, “स्वा, ङि धिक्याँ भै।” आलै मोह्ङन ङ्याबो भिदा वप्मी, येसु कन दोङाः छ्युङ्पा ङ्याह् मनगै नू चेलावजै जेँन ङ्याबो वप्पो। रे घङ दोङाव रे नुन ङ्याबो ङ्याह्। आलै स्याह् लन किम स्वाबो, रे छ्योलापव दोङाः ठ्वामः जाःबो, स्यीह् थाल कि दोङा त्युई नाङ्मः जाःबो। येसु जेँ चन दोङान ङीक्याँ खुमदी काका मिवा च्युपा ङ्याह्। ख्युई नू झाःम र्वाईर्वाई सोल्बो, “गुरुज्यू, ङि नुप्मः जाःबो र्वानान नाः वास्ता मीपाऊ?”
तब येसु च्याङ्बो, रे लनग ङार्बो, रे समुन्द्रन छ्योलापकाङ्मोः र्वाबो, “सान्त रा! छ्या!” आलै लन छ्याबो रे सान्त रह्बो। येसुई चेलाकाङ्मोः र्वाबो, “ङेनको तैङ झामखेखे ङिन्नान? ङेनको ङ्याबो हेँ बिस्वास मीपाऊ?”
ख्यु मिह्दा ङिह्म्बो रे राह्ङराङ्साः र्वामः जाःबो, “नु सु जेङ्पा? लन रे समुन्द्रजै नुन र्वापा ङ्याङ्ङ।”
Source notes (1)
- Cross-reference यसै ६:९-१०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.