Skip to content
BibleKenya

Kaike Standard Traslation

मर्क 16

येसु सिह्पालै सम्पु राह्‌राह्‌ च्याङ्पा

(मत्ती २८:१-८; लुक २४:१-१२; यूह २०:१-१०)

नाह्‌न ल्हाः वैमी मरियम मग्दलिनी रे याकूबन मा मरियम रे सलोमीजै र्हिस्याम छि येसुन ल्होग दुच्‌चेन भिह्तु र्‌युप्पो। आलै नेर्यान ङूस्योवान दिन नाप्पर्म ङिह्‌मा स्यातौ ख्यु तुह्‌र्साः होई। आलै ख्युई राह्ङराङ्साः र्‌वाबो, “ङिन भिह्तु तुह्‌र्सान ङुरन लुङ किम सुई छ्युचे?” ङ्याः सेन्तौ ख्युई तुर्सान अन लुङ छ्युछ्यु नाम्पा रङबो। अन लुङ मिह्दा किम ङ्याह्। आलै तुह्‌र्सान झिँङ जाःजाः ख्युई पाह्‌ल्म घोलाङ गोम्पा छबा सिमिदी याईपाक्याँ छ्युङपा रङ्बो, रे ख्यु मिह्दा हालाईबो। नुई ख्युकाङ्मोः र्‌वाबो, “हानलाया, ङेनकाङ्मोः नासरतन येसू फान्नौ, सु क्रुसग चुम्पा ङ्याह्। नु सम्पु राह्‌राह्‌ च्याङ्पा ङ्याह्। नु स्यीह् मह्‌या। नु नाम्पा ठाउँ सेह्‌ना। वया, नुन चेलाव रे पत्रुसग र्‌वा कि नु ङेन ङूह्ङूह् गालीलग वैयङ ङ्याह्। नुई ङेनकाङ्मोः र्‌वापालैम ङेनको नू स्याह्‌ रङ्नान ङ्याह्।” आलै ख्यु येसुन तुह्‌र्सा होङलै गेग्गे धालैधालै होई, तैङर्‌वाङिन ङिनङिन रे हालाईलाई ख्यु दार्पाई छ्युङ्पा ङ्याह्। आलै ख्युई सुई तेय मर्‌वाबो, तैङर्‌वाङिन ख्यु तेम्माई ङिन्पा ङ्याह्।

येसु मरियम मग्दलिनीग थम्पा

(मत्ती २८:९-२०; लुक २४:१३-५३; यूह २०:११-२३; प्रे १:४-११)

[नेर्यान ङूस्योवान दिन नाप्पर्म नू सम्पु राह्‌राह्‌ च्याङ्मी नू पहिली मरियम मग्दलिनीन ङू थम्बो। नुनलम येसुई मुव ने छ्युपा ङ्याह्। मरियमजे वैवै नुन फुरीकाङ्मोः अन ल्होन बिम्बो। ख्यु समतु खेईखेई दापाई छ्युङ्पा ङ्याह्। जेङ्नै जब येसु सम्पु रह्बो रे मरियमन ङू थम्बो र्‌वानान ल्होई ख्युई ताह्बो, तब ख्युई हीमछेबो।

चेला ङेह्पाः येसु थम्पा

(मत्ती २८:९-१०; यूह २०:११-१९)

आलै चेला ङे नामरा वैतौ ख्युन ङू येसु घङ मेसो थम्बो। आलै ख्यु होलहोल होई घङ चेलाकाङ्मोः स्याप्पो। जेङ्नै ख्युई ख्युकाङ्मोः र्‌वार्‌वा बिस्वास मखेबो।

येसु च्युदी चेलाकाङ्मोः ङू थम्बो

(मत्ती २८:१६-२०; लुक २४:३६-४९; यूह २०:१९-२३; प्रे १:६-८)

ङाईलै येसु च्युदी चेलावन ङू ख्यु झाम छ्युङपान भेला थम्बो, आलै ख्युन अबिस्वास रे सम ख्वान भिह्तु नुई ख्युकाङ्मोः ङार्बो; तैङर्‌वाङिन नू सिह्पालै सम्पु राह्‌राह्‌ च्याङ्मी नू रङ्नानवन ल्होई ख्युई बिस्वास खेपा मह्‌या। आलै येसुई ख्युकाङ्मोः र्‌वाबो, “पुरू सन्सारग वैवै पुरू दोङ्पा सिमिकाङ्मोः ल्होन् लः ताह्फेरा।1 बिस्वास खेनान रे बप्‌तिस्मा वन्नानजै उद्धार देन्नान ङ्याह्, जेङ्नै बिस्वास मखेनानजै धल देन्नान ङ्याह्। बिस्वास खेनानवन ङ्याबो अन ताईलुवान धोन खेनान्न सक्ति बिन्नान ङ्याह्, ख्युई ङन मिह्‌नग मुव दान्नान ङ्याह्, ख्युई सार्बा सार्बा ल्होईवग ल्होई र्‌वानान ङ्याह्, ख्युई भुलेनव जुङ्नन ङ्याह् रे कान दू ङिह्पान चिज थुङ्नै तै खेखेई मनजे ख्युन हानि खेनान मह्‌या। ख्युई नाप्पुवावन ल्हाः जेँन ल्हा नान्नन ङ्याह् रे ख्यु तानान ङ्याह्।”

येसु पान्नाङग लिप्पा

तब झाःम खेखे ख्युन ङ्याबो ल्होई र्वातामी प्रभु येसु पान्नाङग लिप्पो, रे परमेस्वरन याईपाक्याँ छ्युङ्बो।2 आलै ख्यु चेलावजै पुरू ठाउँग वैवै ताह्फेप्पो। प्रभुई ख्युन ङ्याबो धोन खेखेई छ्युङ्बो, रे हालाईचेन धोनव रे ख्युई ताह्फेप्पा अन केह्ः तेम्मा ङ्याह् र्‌वार्‌वा पर्मानित खेबो आमेन।]

Source notes (2)
  1. Cross-reference प्रे १:८
  2. Cross-reference प्रे १:९-११

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.