Kaike Standard Traslation
मर्क 15
पिलातसन ङू येसु
(मत्ती २७:११-३१; लुक २३:२-३; २३:१८-२५; यूह १८:२८-४०; १९:१-१६)
नाप रालुङ्मीम ङोत्वा पुजारीव, अगुवाव, कानुन लन्नान्न सिमिव रे पुरू यहूदी जोम्पावजै राह्ङराङ्साः सल्ला खेखे येसू खीखी वप्पो, रे पिलातसन ल्हाग बिम्बो। पिलातसजै नू लोप्पो: “तै ङेन यहूदीवन झली जेङ्पौ?” येसुई नू झब बिम्बो, “ना नह् र्वाङ।”
ङोत्वा पुजारीवजै नू लै ल्होईन दोस बिम्बो। पिलातसजै नू ह्याङ झाःम र्वार्वा लोप्पो, “तै नान ङ्याबो तये झब मीपाऊ? सेह्ना, नान बिरोध ख्युई हाति ल्होईन दोस बिङ्ङ।”
जेङ्नै येसुई ह्याङ झब तये मबिम्बो, सिथाल कि पिलातस हालाईबो।
येसू सच्चेन धल बिम्पा
(मत्ती २७:१५-२६; लुक २३:१३-२५; यूह १८:३९—१९:१६)
निस्तार-तेवरन भेला ल्हूलाम अन्सार ती पराग सिमिवजै तोल्पा झ्यालखानाः त्यापा सिमिदी ख्युन भिह्तु पिलातसजै फेङ्ङ। युद्धन भेलाः बारब्बा मिह्न्न ती सिमि युद्ध खेनानवन ङ्याबो झ्यालखानाः ङ्याह्। सुई युद्धग सिमि सह्प्पा ङ्याह्। मोह्ङ स्वाबो रे पिलातसग नुन ल्हूलाम अन्सार ख्युन भिह्तु ख्या र्वार्वा छ्याफुलम जाःबो। जेङ्नै पिलातसजै झाःम र्वार्वा ख्युकाङ्मोः प्रस्न खेबो, “तै ङा ङेन भिह्तु यहूदीवन झली फेरा र्वानान ङेनकाङ्मोः सम खेनौ?” तैङर्वाङिन थादोवा खेखेई ङोत्वा पुजारीवजै येसू पिलातसन ल्हाग बिम्पा जेङ्पा र्वार्वा नु क्युई ङ्याह्।
जेङ्नै येसू नङ्पा बरु बारब्बा ङिन भिह्तु पिलातसजै फेरायो र्वार्वा ङोत्वा पुजारीवजै मोह्ङ्ग उल्बाङ खेबो। पिलातसजै ह्याङ ख्युकाङ्मोः लोप्पो, “उजु राङिन सु ङेनकाङ्मोः यहूदीवन झली र्वानान, नु ङा तै खेचे ता?” ख्यु ह्याङ फाईरा खेबो, “नू क्रुसग चुना।” पिलातसजै ख्युकाङ्मोः लोप्पो, “तैङ? नुई तयाः अलः खेपा ङ्याह् तै?” जेङ्नै झन केह्ः किम फाईरा खेखे ख्युई र्वाबो, “नु क्रुसग चुना!”
तब पिलातसजै मोह्ङग सम घुफान्चेन समजे ख्युन भिह्तु बारब्बा फेप्पो, रे येसू चेरन ताल्च्याई फ्याङफ्याङ क्रुसग चुम्मः थोप्पो।
सिपाहीवजै येसुन अपमान खेपा
(मत्ती २७:२७-३१; यूह १९:२-३)
सिपाहीवजै येसू प्रेतोरियन, आथबा राज्यपालन दरबारन चोकग वप्पो, रे ह्याजन मोह्ङग घ्वाबो।
आलै ख्युई येसू ल्होःम रङन घोलाङ थम्बो, रे चेरन मुकुत दोङ्दोङ नुन थोप्पाः थम्बो, आलै ख्युई नु नमस्ते खेखे झाम र्वाबो, “यहूदीवन झली छर्याङ्म छ्योवा”
आलै ख्युई नुन थोप्पा मिजे फ्याङतौ नु छिमा पप्पो, रे पो जूजू नु नमस्ते खेबो। आलै येसुन माबी पह्म्मी ख्युई ल्होःम घोलाङ फोल्बो, रे नुन जेँनै घोलाङ थम्बो। आलै ख्युई नु क्रुसग चुम्मः खोलोः वप्पो।
येसू क्रुसग चुम्पा
(मत्ती २७:३२-४४; लुक २३:३३-43; यूह १९:१७-२७)
आलै अलेक्जेन्दर रे रुफसन पा, कुरेनी बासिन्दा सिमोनग नामन लमलै स्वातौ ख्युई धोबो, रे सिपाहीवजै येसुन क्रुस हुरहुर वम्म सिमोनग धिप्पी खेबो।1 आलै ख्युई येसू गलगथा र्वानान ठाउँग सप्पो। गलगथान धा कह्प्लीन ठाउँ जेङ्पा। आलै ख्युई येसू मूर्र होम्पा अङ्गुरन खु थुङ्म बिम्बो। जेङ्नै नुई मथुङ्बो।
ख्युई नू क्रुसग चुम्बो। आलै सुई कन काला देच्चे अन पक्का खेमः चित्ता फ्याङफ्याङ ख्युई नुन घोलाङव राह्ङराङ्साः परेःबो।2 ख्युई नू क्रुसग चुन्तौ नाह्पन नौ बजे रह्पा ङ्याह्। आलै नुन दोस-पत्र “यहूदीवन झली” र्वानान सर्पा ङ्याह्। आलै ख्युई नुन ङ्याबो खुम्पा ङेपा क्रुसग चुम्बो, ती नुन याईपाक्याँ, रे घङ्ग नुन योम्मक्याँ। [पबित्रसास्त्रन बचन झाःम खेखे पुरा रह्बो, “आलै नू अपराधिव ङ्याबो जेर्बो।”]3
स्याह्लै आउजाउ खेनान सिमिवजै जेँन होला कुलैकुलै झाःम र्वार्वा नुन खिसि खेबो, “वाह! ना आराधनालय फोआफोआ सुमङीग दोङ्नान,4 क्रुसलै लिपलिप स्वा, रे जेँग सोमफाना।”
उजु खेखे ङोत्वा पुजारीवजै कानुन लन्नान्न सिमिव ङ्याबो झाःम र्वार्वा राह्ङराङ्साः येसुन खिसि खेबो, “अनजै घङ्ग समफाम्बो, जेङ्नै जेँग चन सोन मतैबो। ना तेम्मा मसिह इस्राएलन झली जेङ्न, क्रुसलै लिपलिप स्वा, कि ङि अन रङरङ बिस्वास खेनान ङ्याह्।” नुन ङ्याबो क्रुसग चुम्पावजै नुन ल्होई च्याप्पो।
येसु सिह्पा
(मत्ती २७:४५-५६; लुक २३:४४-४९; यूह १९:२८-३०)
बाह्र बजेलै तिन बजेन बेर देस पुरूग नातुमाई गाबो। तिन बजेरा झाःम र्वार्वा येसु केह्ः किमई फाईरा खेबो, “इलोई, इलोई, लामा सबखथनी?” कन्न धा जेङ्पा, “हे ङन परमेस्वर, हे ङन परमेस्वर, नाई ङा तैङ ख्योपा?”5
धेँवछोँ थाङथाङ छ्युङ्नानकाङ्मोः बर्ग कान-कान सिमिवजै अन ताह्ताह् र्वाबो, “ङ्याना, नुई एलिया घ्वाङ।” आलै ख्युन बर्ग तीपाई धालैधालै होई ती भोङ्म कपास अङ्गुरन खुग पुरू सुपसुप र्याङ्म मिदी झाःम र्वार्वा नु थुङ् फाम्बो, “सेम्मता, कार्तौ एलिया नु घ्याम स्वाङिम कि।”6
तब येसुई केह्ः किम छ्युछ्यु परान पप्पो।
आलै आराधनालयग कपा पर्दा ङ्यालै पोँथालै ङेकाराङ राह्राह् ज्योम्बो।7 येसुई झाःम खेखे परान पप्पा रङरङ नुन ङू थाङथाङ अफिसरजै र्वाबो, “तेम्माई अन सिमि परमेस्वरन ङोह्जो जेअँ।”
स्याह् ग्याङमलै सेन्नन कान चिमिचाव ङ्याह्। ख्यु बर्ग मरियम मग्दलिनी आलै छ्युम याकूब रे योसेफन मा मरियम रे सलोमी ङ्याह्।8 नु गालीलग रातौ, अजोव नुन ङिक जाःङ, रे नुन सेवा खेँ। येसुन ङ्याबो यरूसलेमग स्वापा घङ लै चिमिचाव स्याह् ङ्याह्।
येसू लुम्पा
(मत्ती २७:५७-६१; लुक २३:५०-५६; यूह १९:३८-४२)
आलै जब ङ्याजे रह्बो, तैङर्वाङिन अन तयारीन दिन ङ्याह्, आथबा नाह्न ल्हाःन ङूस्योवान ल्हाः, महासभान स्योःनान सिमि अरिमाथियान योसेफ, सुई परमेस्वरन राज्यन लम सेनतौ ङ्याह्, नुई सन्तक खेखे पिलातस ङ्याबो वैवै येसुन सिह्पान ल्हो तोल्बो। येसु पहिली सितपा ताह्ताह् पिलातस हालाईबो। आलै अफिसरग जेँन स्याह् घ्वाघ्वा नू सिह्पा जेम कि नम र्वार्वा लोप्पो। नू सितपान ल्होई अफिसरलम क्युई रामि पितालसजे येसुन सिह्पा ल्हो योसेफग वच्चेन आदेस बिम्बो। आलै योसेफजै मलमलन घोलाङ र्युबो, रे येसू क्रुसलै पोँ फेप्पे घोलाङजै च्योम्बो, आलै लुङ च्वाच्वा दोङ्पा तुह्र्सादीग नाह्म्बो। मन्न छाम्म तुर्सान ङुरग नुई लुङ किमदी नाह्म्बो। मरियम मग्दलिनी रे योसेफन मा मरियमजे येसू कुँह्म खाः नाम्पा ङ्याह्, स्याह्क्याँ सेम्पा ङ्याह्।
Source notes (8)
- Cross-reference रोम १६:१३
- Cross-reference भजन २२:१८
- Cross-reference यसै ५३:१२
- Cross-reference भजन २२:७; १०९:२५; मर्क १४:५८; यूह २:१९
- Cross-reference भजन २२:१
- Cross-reference भजन ६९:२१
- Cross-reference प्रस २६:३१-३३
- Cross-reference लुक ८:२-३
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.