Skip to content
BibleKenya

Kaike Standard Traslation

यूह 1

बचन ल्हो रह्पा

तैस्याङ पुरू सृस्ति राचेन खेरे ङू बचन ङ्याह्, बचन परमेस्वरन ङ्याबो ङ्याह्, आलै बचन परमेस्वर ङ्याह्। नु सुरुग परमेस्वरन ङ्याबो ङ्याह्। तैस्याङ पुरू नुई दोङ्बो, रे दोङ्पान चिज तये यङ नु मीम मरह्पा। नुग जुनि ङ्याह्, रे मन जिन्दगी सिमिवन ताह्‌म ङ्याह्। मन ताह्‌म नाःतुमाः छ्यानान, रे नातुमाई नू हातौयै सप्पा मह्‌या।

परमेस्वरलम फेप्पान ल्हो‌न ताह्फेन्नान सिमिदी ङ्याह्, सुन मिह्‌न यूहन्ना ङ्याह्।1 नु मन ज्योतिन साँचि बिन्चेन भिह्तु साँचि राह्‌राह्‌ स्वाबो, कि सिमि पुरूवजै नुनलम बिस्वास ख्यायो। नुह्ँ मन ताह्ःम मह्‌या, जेङ्नै मन ज्योतिन साँचि बिम्म स्वाबो। नु तेम्मा ताह्‌म ङ्याह्, मन ताह्‌म सन्सारग स्वामः जाःपा ङ्याह्। आलै नु सिमि पुरूवग चम्कि राह्‌नान। नु सन्सारग ङ्याह्, सन्सारग नुई दोङ्बो, जेङ्नै सन्सारजै नू मस्योःबो। नु जेँनै सिमिवन स्याह् स्वाबो, जेङ्नै नुन जेँन सिमिवजै नू स्वीकार मखेबो। जेङ्नै हाति सिमिवजै नू स्वीकार खेबो रे नुन मिह्‌न्न लाह्ः बिस्वास खेबो, नुई ख्युकाङ्मोः परमेस्वरन सन्तान राचेन आङ बिम्बो। ख्यु न कहलम, न ल्हो‌न इच्छ्यालम, न सिमिन इच्छ्यालम जेङ्नै परमेस्वरलम केह्पा राह्‌नान।

आलै बचन ल्हो रह्पा, रे दया रे तेम्माजै नाङ्नाङ ङिन घूँ छ्युङ्बो। ङ्योअजै नुन महिमा रङ्पा, कन महिमा पा लम स्वापा ङोह्जो तीबाःदिन लैम ङ्याह्।2 यूहन्नाई नुन बिसयग साँचि भिनैभिनै केह्ः किमै र्‌वाबो, नु मनै सिमि जेङ्पा, “सुन भारेः ङै र्‌वापा, ‘ङन ङिक स्वानान ङनखेरे किम ङिह्पा, तैङर्‌वाङिन नु ङा केह्चेन खेरे ङूलै यङ ङ्याह्’।” नुन हाति र्‌वार्‌वा दयालम ङ्योअजै ती दयान लाह्ः घङ दया देप्पा ङिह्पा। तैङर्‌वाङिन कानुन मोसालम बिम्बो, दया रे तेम्मा चन येसु मसिहलम स्वाबो। परमेस्वरग सुई हातौयै रङ्पा मह्‌या। पान ङ्याबो ङिह्पान तीबाःदि ङोह्जो ङ्याह् सु पान पछेग ङिह्पा परमेस्वरजै नू थम्पा ङ्याह्।

बप्‌तिस्मा-बिन्नान यूहन्नान ल्हो‌न

(मत्ती ३:१-१२; मर्क १:१-८; लुक ३:१-१८)

जब यरूसलेम सहरलै यहूदीवजै अगुवावजै पुजारीव रे लेवीकाङ्मोः यूहन्नान स्याह्‌ “ना सु जेङ्पा?” र्‌वानान्न ल्होई लोम्म फेप्पो। तब यूहन्नान साँचि अन ङ्याह्। तब यूहन्नाई झब बिम्म अस्वीकार मखेबो, आलै मङी खेखे र्‌वाबो “ङा मसिह नङ्पा।” तब ख्युई नू लोप्पो, “आलै तै? ना एलिया जेङ्पौ?” नुई र्‌वाबो “ङा नङ्पा।” “तै ना मन भबिस्यबक्ता जेङ्पौ?” नुई झब बिम्बो, “नङ्पा।”3 ख्युई युहन्नाः र्‌वाबो, “ना सु जेङ्पा? ङ्योअग र्‌वा, ताकि ङ्योअग फेन्नानकाङ्मोः ङ्योअ झब बिन तैमता। ना जेँन भारेः तै र्‌वानान?” यूहन्नाई झब बिम्बो, “यसैया भबिस्यबक्ताजै र्‌वापालैम, ‘परमप्रभुन लम थार्का धोवाँ’ र्‌वार्‌वा तये मीपान ठाउँ फाईरा खेनान सिमिदीन ङा केह्ः जेङ्पा।”4 ख्युकाङ्मोः फरिसीवजै फेप्पा ङ्याह्। आलै ख्युई नू लोप्पो “ना मसिह यङ नङ्पा, एलिया यङ नङ्पा, मन भबिस्यबक्ता यङ नङ्पा र्‌वाङिन, तैङ बप्‌तिस्मा बिन्नान?”

यूहन्नाई ख्युकाङ्मोः झब बिम्बो, “ङा ता त्युई बप्‌तिस्मा बिन्नान, जेङ्नै ङेनकोन घूँ तीपा च्याङ्पा ङिह्पा, सू ङेनकाङ्मोः मस्योँ। ङन ङिक स्वानान नुई जेङ्पा। सुन पौलान तना फोल्चे सम स्योरस्योर लैम ङा मीपा।” अन ल्होई यर्दन चाङ्पुन धिक्याँ बेथानियाग रह्पा ङ्याह्, खाः यूहन्नाई बप्‌तिस्मा बिम्पाई ङ्याह्।

परमेस्वरन थुमा

नाप्चे यूहन्नाई येसु जेँनक्याँ स्वायङ खेपा रङरङ र्‌वाबो, “सेह्‌ना, सन्सारन तीपा सोलसोल वन्नान परमेस्वरन थुमा!5 नु नुई जेङ्पा, सुन भारेः ङै र्‌वापा, ‘ङन ङिक सिमिदी स्वानान, सु ङनखेरे किम ङ्याह्, तैङर्‌वाङिन नु ङा केह्चेन खेरे ङूलै यङ ङ्याह्।’ ङजै नू स्योङ, जेङ्नै नु इस्राएलग रँयो र्‌वार्‌वाई ङा त्युई बप्‌तिस्मा भिनैभिनै स्वापा।” यूहन्नाई झाःम र्‌वाईर्‌वाई साँचि बिम्बो, “ङै पबित्र आत्माग पुरेन्न रुपग पान्नाङलै धुलधुल स्वास्वा येसुन लाह्ः छ्युङ्पा रङ्पा। ङै नू स्योपा मीपा, जेङ्नै सुई ङाः त्युई बप्‌तिस्मा भिना र्‌वार्‌वा फेप्पो, नुई र्‌वार्‌वा ङाः र्‌वाबो, ‘सुन लाह्ः ना पबित्र आत्मा लिबयङ रे छ्युङ्‌यङ खेपा रङ्नान, पबित्र आत्माई बप्‌तिस्मा बिन्नान नुई जेङ्पा।’ ङै रङ्पा ङिह्पा, रे साँचि बिम्पा ङिह्पा, कि परमेस्वरन ङोह्जो नुई जेङ्पा।”

येसुन ङूस्योवान चेलाव

ह्‌याङ घङ्न लाह् यूहन्ना नुन चेलावन बर्ग ङेह्पान ङ्याबो थाङथाङ छ्युङ्पा ङ्याह्। नुई येसु वैपाई खेपा रङरङ र्‌वाबो, “सेह्‌ना, परमेस्वरन थुमा!”

यूहन्नाई र्‌वापान अन ल्होई ताह्ताह् मन चेला ङेह्पाव येसुन ङिक जाःबो। येसुई होलहोल सेह्‌म्बो, रे ख्युकाङ्मोः ङिह्‌ङिह्‌ स्वायङ खेपा रङरङ ख्युकाङ्मोः लोप्पो, “ङेन तै फान्नान?” ख्युई नू र्‌वाबो, “रब्बी (कन्न अर्थ जेङ्पा, गुरुज्यू) ना खाः छ्युङ्नान?” नुई ख्युकाङ्मोः र्‌वाबो, “स्वा, रे ङेनजै रङ्नान ङ्याह्।” ख्यु होई, रे नु छ्युङ्पान ठाउँ रङ्बो। ख्यु मन्न लाह् नुन ङ्याबो छ्युङ्बो, तैङर्‌वाङिन क्वाईमाल्‌ला: ङ्याजेन चार बजि रातपा ङ्याह्।

यूहन्नाई र्‌वापान ल्होई ङ्यान्नान रे येसुन ङिक जाःनान मन ङेह्पान बर्ग तीपा सिमोन पत्रुसन भाइ अन्द्रियास ङ्याह्। नुई ङू जेँन भाइ सिमोनग धोबो, रे नू र्‌वाबो “ङ्योअजै मसीहग (कन्न अर्थ जेङ्पा, मसिह) दोपा ङिह्पा।”6 नुई सिमोनग येसुन स्याह्‌ सप्पो। येसुई नू सेनसेन र्‌वाबो, “ना यूहन्नान ङोह्जो सिमोन जेङ्पा, ना केफास (कन्न अर्थ जेङ्पा, लुङ) र्‌वानान ङ्याह्।”

फिलिप रे नथानेलग येसुई घ्वापा

नाप्चे येसुई गालील प्रदेसग वैचे पक्‌का खेबो। रे फिलिपग दोदो येसुई नू र्‌वाबो, “ङन ङिक जा।” अन्द्रियास रे पत्रुसलैम फिलिप यङ बेथसेदा सहरनै ङ्याह्। फिलिपजै नथानेलग दोदो र्‌वाबो, “सुन भारेः मोसाई रे भबिस्यबक्तावजै र्‌वार्‌वा कानुनग सर्पा ङ्याह्, योसेफन ङोह्जो नासरतन येसु ङ्योअजै दोपा ङिह्पा।”7 नथानेलजै नू र्‌वाबो, “तै नासरतलै तयाः ल्होई लः स्वातैनान तै?” फिलिपजै नू झब बिम्बो, “स्वास्वा सेह्‌ना।” येसुई नथानेलग जेँन स्याह् स्वायङ खेपा रङरङ नुन भारेः र्‌वाबो, “तीपा तेम्मा इस्राएलीग सेह्‌ना, सू छल तेय मह्‌या।” नथानेलजै लोप्पो, “नाई ङाः कुजुई स्योपा?” येसुई नू झब बिमबिम र्‌वाबो, “फिलिपजै नाः कताङ्चेन खेरे ङू, खोअन तङ्पुन पोँ ङै नाः रङ्पा।” नथानेलजै नू र्‌वाबो, “रब्बी, ना परमेस्वरन ङोह्जो जेङ्पा, ना इस्राएलन झली जेङ्पा।” येसुई नू झब बिमबिम र्‌वाबो, “ङै ना खोअन तङ्पुन पोँ रङ्पा र्‌वार्‌वा ना बिस्वास खेँ? नाई अन खेरे हेँ किम ल्होईव रङ्नान ङ्याह्।”8 आलै नुई नथानेलग र्‌वाबो, “तेम्माई, ङा नाः र्‌वाचे, ङेनजै स्वर्ग पोङ्पा रे परमेस्वरन दुतकाङ्मोः सिमिन ङोह्जोन लाह्ः लिबयङ रे धुलयङ खेपा रङ्नान ङ्याह्।”9

Source notes (9)
  1. Cross-reference मत्ती ३:१; मर्क १:४; लुक ३:१-२
  2. Cross-reference १ यूह ४:९
  3. Cross-reference कानुन १८:१५-१८; मला ४:५
  4. Cross-reference यसै ४०:३
  5. Cross-reference १ पत्र १:१९; यसै ५३:७
  6. Cross-reference यूह ४:२५
  7. Cross-reference मत्ती २१:११
  8. Cross-reference यूह ११:४०
  9. Cross-reference उत २८:१२

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.