Kaike Standard Traslation
यूह 6
येसुई हजार ङा सिमिकाङ्मोः ख्वाबो
(मत्ती १४:१३-२१; मर्क ६:३०-४४; लुक ९:१०-१७)
अन ल्होईन ङिक, येसु गालील, आथबा तिबेरियासन योह्न धिक्याँ होई। आलै मोङ किमदी नुन ङिक जाःबो, तैङर्वाङिन नुई खङ्नानवन लाह्ः खेपान ताईलुवान धोनव ख्युई रङ्पा ङ्याह्। येसु धुरन लाह्ः होई, रे जेँन चेलावन ङ्याबो स्याह् छ्युङ्बो। यहूदीवन तेवर, आथबा निस्तार-तेवर ङेह्मः ङ्याह्। तब येसुई जेँन लिब्रुङक्याँ सेन्तौ मोङ किमदी जेँन स्याह् स्वायङ खेपा रङरङ फिलिपग र्वाबो, “अजोवग ख्वाचेन भिह्तु ङ्योअजै खालै रोता र्युचे?” येसुई नुन छोए सेन्चेन भिह्तु अन र्वापा ङ्याह्। तैङर्वाङिन नुई तै खेमः जाःपा ङ्याह् अन नू क्युई ङ्याह्।
फिलिपजै नू झब बिम्बो, “पुरूजै ङाई-ङाई देन्नै क्याम ङेह् मुलन सिक्कान रोताई ख्युकाङ्मोः झ्योनान मह्या।” नुन चेलावन बर्ग तीपा, सिमोन पत्रुसन भाइ अन्द्रियासजै र्वाबो, “स्यीह् चोलोङ्चादी ङ्याह्। नुन ङ्याबो नजन्न रोता ङा रे ङाह् ङेह् ङ्याह्। जेङ्नै अकेः ह्याल्म सिमिवन भिह्तु अकेःजै ज्योनान तै?” येसुई र्वाबो, “सिमिकाङ्मोः छ्युङ्फाना” स्याह् सी लै रह्पान क्वा ङ्याह्। तब क्वाईमाल्ला: हजार ङा चोलोङ्चाव स्याह् छ्युङ्बो। तब येसुई रोता वप्पो रे परमेस्वरग मया रह्बो र्वामी छ्युङ्नानकाङ्मोः परेःबो, रे झाःम खेखे ङाह् यङ परेःबो। ख्युई बरङबरङ झबो। जब ख्युई झातामी येसुई जेँन चेलाकाङ्मोः र्वाबो, “लामा तुकराव रुवा। तये पाह्दुर नपरा।” झानानवजै लामा नाम्पा नजन्न मन रोतान तुकराव ख्युई रूबो रे थाम च्योङे काङ्बो। अन्नकारन नुई खेपान अन ताईलुवान धोन रङरङ मन सिमिवजै र्वाबो, “सन्सारग स्वानान्न भबिस्यबक्ता तेम्माई नुई जेअँ।” ख्यु स्वास्वा नू हलजफत खेखे वव्वै झली दोङ्म जाःपा र्वानान क्युई राह्राह् येसु ह्याङ तितिमाई धुरग होई।
येसु त्युन लाह्ः लेम्पा
(मत्ती १४:२२-२७; मर्क ६:४५-५२)
ङ्याजे रामी येसुन चेलाव योह्क्याँ होई। रे दोङाः चपचप ख्यु योह्न धिक्याँ कफर्नहुमक्याँ वैमः जाःबो। अन्तौ नातुमा रह्पा ङ्याह्, रे येसु चोँन बेर ख्युन ङ्याबो स्वापा मह्या। आलै लन किम च्याङच्याङ योह्न छ्योलाप युङ्मः जाःबो। ख्युई किलोमितर ङा-रु थाल दोङा कुलकुल वप्पो। ख्युई येसु योह्न लाह्ः लेनलेन दोङान रह्म्म स्वायङ खेपा रङ्बो। आलै ख्यु ङिह्म्बो। जेङ्नै नुई ख्युकाङ्मोः र्वाबो, “ङा जेङ्पा, नङिना।” ख्युई स्याङस्याङ नू दोङा नाह्म्बो, रे दोङा तुरुन्तै ख्यु वैनान्न ठाउँग स्वा ताप्पो।
सिमिवजै येसू फाप्पा
योह्न धिक्याँ रह्पान मोह्ङजै नाप्चे स्याह् ती मात्र दोङा रङ्बो। ख्युकाङ्मोः क्युई ङ्याह्, कि येसु जेँन चेलावन ङ्याबो दोङाः चप्पा मह्या, जेङ्नै नुन चेलाव मात्र वैपा ङ्याह्। तब तिबेरियासलै घङ दोङाव मन ठाउँन रह्म्म स्वाबो। खाः प्रभुई परमेस्वरग मया रह्बो र्वामी ख्युई रोता झपा ङ्याह्। येसु रे नुन चेलाव स्याह् मरह्पान क्युई राह्राह् मन सिमिव येसु फारैफारै दोङावग चपचप कफर्नहुम होई।
येसु जिन्दगीन रोता जेङ्पा
सिमिवजै येसू योह्न धिक्याँ दोदो नू लोप्पो, “रब्बी, ना स्यीह् हातौ स्वापा?” येसुई ख्युकाङ्मोः झब बिमबिम र्वाबो, “तेम्माई ङा ङेनकाङ्मोः र्वाचे, ङेन ताईलुवान धोनव रङरङ नङ्पा, जेङ्नै बरङबरङ रोता झपान कारनजै ङाः फाङ्ङ। मीपा राह्नान साह्ईन भिह्तु तूरि नख्या, जेङ्नै मताह्नान्न झुनी थाल लुईनान साईन भिह्तु तूरि ख्या, कन सिमिन ङोह्जोई ङेनकाङ्मोः बिन्नान ङ्याह्। तैङर्वाङिन पा परमेस्वरजै नुन लाह्ः छाप छिम्पा ङ्याह्।”
ख्युई नू र्वाबो, “परमेस्वरजै चाहि खेपान धोन खेचेन भिह्तु ङ्योअजै तै खेत्वानान।” येसुई ख्युकाङ्मोः र्वाबो, “परमेस्वरन धोन अनै जेङ्पा: सू नुई फेप्पो नुन लाह्ः बिस्वास ख्या।” अन्नकारन ख्युई नू र्वाबो, “ना ताईलुवान धोन तै थन्नान, अन ङ्योअ सेम्मता, रे ङेन ङ्याबो बिस्वास खेमता? ना तै खेनान? ङ्योअन खेपुलजै तये मीपान ठाउँग मन्न झबो, कुजु पबित्रसास्त्रग सर्पा ङ्याह्, ‘नुई ख्युकाङ्मोः झाचेन भिह्तु स्वर्गलै रोता बिम्बो’।”1 येसुई ख्युकाङ्मोः र्वाबो, “तेम्माई, ङा ङेनकाङ्मोः र्वाचे। ङेनकाङ्मोः स्वर्गलै रोता बिन्नान मोसा नङ्पा, जेङ्नै स्वर्गलै ङेनकाङ्मोः तेम्मा रोता बिन्नान ङन पा जेङ्पा। तैङर्वाङिन परमेस्वरन रोता अनै जेङ्पा, कन स्वर्गलै धुलधुल स्वाङ, रे सन्सारग झुनी बिङ्ङ।”
सिमिवजै येसू र्वाबो, “प्रभु, अन रोता ङ्योअग एकुरो भिना।” येसुई ख्युकाङ्मोः र्वाबो, “जिन्दगीन रोता ङा जेङ्पा। ङन स्याह् स्वानान गुसिनान मह्या, रे ङन लाह्ः बिस्वास खेनान हातौयै त्युबुल्नान मह्या। जेङ्नै ङै ङेनकाङ्मोः र्वातपा ङिह्पा, ङेनजै ङाः रङ्पा ङ्याह्, जेङ्नै बिस्वास मखेँ। पाई ङा बिन्नान सिमि पुरू ङन स्याह् स्वानान ङ्याह्, रे ङन स्याह् स्वानान सिमी तैखेनै ङा मछ्यू। जेँन इच्छ्या पुरा खेमः ङा स्वर्गलै धुलधुल स्वापा नङ्पा, जेङ्नै ङाः फेन्नान्न इच्छ्या पुरा खेचेन भिह्तु स्वापा जेङ्पा। रे ङाः फेन्नान्न इच्छ्या अन जेङ्पा, कि नुई ङाः बिम्पान सिमिवन बर्ग सुई र्वार्वा ङा ममोलायो, जेङ्नै ख्युकाङ्मोः अन्त्यन दिनग सोम्फानायो। तैङर्वाङिन ङन पान इच्छ्या अन जेङ्पा, कि ङोह्जोः सेन्चे रे नुन लाह्ः बिस्वास खेनान पुरूजै मताह्नान्न झुनी धेरायो, रे ङा नू अन्त्यन दिनग सम्पु दोङ्नान ङ्युँ।”
यहूदीव येसुन बिरोधग गनगन खेमः जाःबो। तैङर्वाङिन नुई र्वाबो, “स्वर्गलै धुलधुल स्वापान रोता ङाई जेङ्पा।” ख्युई र्वाबो, “तै अन योसेफन ङोह्जो, येसु नङ्पायौ? नुन पा रे माः ङ्योअ मस्योनान तै? चोँ नुई कुजुई ‘ङा स्वर्गलै धुलधुल स्वापा जेङ्पा’ र्वार्वा र्वाङ?”
येसुई ख्युकाङ्मोः झब बिम्बो, “ङेन राह्ङराङ्साः गनगन नख्या। ङाः फेन्नान्न पाई मकान्ङिन सुई ङन स्याह् स्वा मतैनान, रे ङा नू अन्त्यन दिनग सम्पु सोल्नान ङ्युँ। ‘आलै ख्यु पुरूग परमेस्वरजै लन्नान ङ्याह्’ र्वार्वा भबिस्यबक्तावन किताबग सर्पा ङ्याह्। पुरू सुई पा लम ङ्याङ्ङ रे लह्ङ्ङ नु ङन स्याह् स्वानान।2 पा सिमि सुई रङ्पा मह्या, नुई मात्र रङ्पा ङिह्पा, सु परमेस्वरलम स्वापा जेङ्पा, नुई पा रङ्पा ङिह्पा।” “तेम्माई ङा ङेनकाङ्मोः र्वाचे, सुई बिस्वास खेनान नुन ङ्याबो मताह्नान्न झुनी ङिह्पा। ङा जिन्दगीन रोता जेङ्पा। ङेन खेपुलवजै तये मीपान ठाउँग मन्न झानै ख्यु सिबो। जेङ्नै स्वर्गलै धुलधुल स्वानान रोता अनै जेङ्पा, सुई अन झाँ अन सिह्नान मह्या। स्वर्गलै धुलधुल स्वापा सम्पु रोता ङाई जेङ्पा। सुई अन रोता झाङिन अन एकुरोभरि सम्पु लुईनान। रे कन रोता ङा सन्सारन जिन्दगीन भिह्तु बिन्नान ङिह्पा, अन चन ङन ल्हो जेङ्पा।” तब यहूदीव राह्ङराङ्साः ल्होई र्वामः जाःबो, “अन सिमिजै कुजुई ङ्योअग जेँन ल्हो झा फानतैनौ?” येसुई ख्युकाङ्मोः र्वाबो, “तेम्माई, ङा ङेनकाङ्मोः र्वाचे, ङेनजै सिमिन ङोह्जोन ल्हो मझाङिन, रे नुन कह मथुङ्ङिन ङेन ङ्याबो झुनी मराह्नान। ङन ल्हो झानान रे कह थुङ्नान्न ङ्याबो मताह्नान्न झुनी ङिह्पा, रे अन्त्यन दिनग ङा नू सम्पु दोङ्नान ङ्युँ। तैङर्वाङिन ङन ल्हो तेम्माई झायाप जेङ्पा, रे ङन कह तेम्माई थुङ्याप जेङ्पा। ङन ल्हो झानान रे कह थुङ्नान चन ङन स्याह् लुईनान, ङा नुग लुईनान। कुजुई सम्पु पाई ङाः फेप्पो, रे ङा पान कारनजै सोन्नान। उजुईखेखे ङा झानान सिमि यङ ङन कारनजै सोन्नान ङ्याह्। स्वर्गलै स्वापा अन रोता झाःम नङ्पा, कन खेपुलवजै झानै सिसि होई। अन रोता झानान चन एकुरोभरि सोन्नान ङ्याह्।” नुई अन ल्होई कफर्नहुमन आराधनालयग लनतौ र्वापा जेङ्पा।
मताह्नान्न जिन्दगीन बचन
अन ताह्मी नुन चेलावन बर्ग लैजे र्वाबो, “अन बचन क्योङ्म ङ्याह्, सु अन ताह् तैनान?” जेङ्नै नुन चेलाव अन्न भिह्तु गनगन खेपाई ङ्याह् र्वार्वा क्युई राह्राह् येसुई ख्युकाङ्मोः र्वाबो, “तै ङन अन ल्होईजै ङेनकाङ्मोः बाधा बिम्पाई ङ्याह्यौ? ङेनजै सिमिन ङोह्जो खाः नु पहिली ङ्याह्, स्याह् लिपाई खेपा रङ्ङिन तै राह्नान?3 झुनी बिन्नान परमेस्वरन आत्मा जेङ्पा, ल्होलै फाईदा तये मराह्नान। कन बचन ङै ङेन ङ्याबो र्वापा ङिह्पा, अनजै जिन्दगी बिन्नान्न आत्मा सङ्ङ। जेङ्नै ङेन बर्ग बिस्वास मखेनान हाति ङ्याह्, बिस्वास मखेनान सुवा-सुवा जेङ्पा, रे नू धोका बिन्नान सु राह्नान ङ्याह् र्वार्वा येसु ङूलै यङ क्युई ङ्याह्।” आलै नुई र्वाबो, “अन्नकारन ङै ङेनकाङ्मोः र्वापा ङ्याह्, यदि पा लम आङ मबिङ्ङिन सिमि सुई नुन स्याह् मतैनान।” अन्नकारन नुन चेलावन बर्ग लै ङिक च्योल्बो, रे नुन ङ्याबो वैचे ख्योवाबो। येसुई च्योङेपा र्वाबो, “तै ङेन यङ ङाः ख्योवाख्योवा वैचेऊ?” सिमोन पत्रुसजै झब बिम्बो, “हे प्रभु, ङ्योअ सुन स्याह् वैचे? नान ङ्याबो बचन ङ्याह्, मताह्नान्न जिन्दगी जेङ्पा।4 रे ङ्योअजै बिस्वास खेपा ङिह्पा रे क्युई ङिह्पा, ङेन परमेस्वरन पबित्र ङोह्जो जेङ्पा।” येसुई ख्युकाङ्मोः झब बिम्बो, “तै ङजै ङेनको च्योङेपाः दम्पा नङ्पा तै? ङेनकोन बर्ग तीपा चन सैतान5 जेङ्पा।” अन नुई सिमोन इस्करियोतन ङोह्जो यहूदान भारेः र्वापा ङ्याह्। तैङर्वाङिन च्योङेपान बर्ग तीपा राह्राह् यङ येसू धोका बिम्म जाःपा ङ्याह्।
Source notes (5)
- Cross-reference प्रस १६:४-१५; भजन ७८:२४
- Cross-reference यसै ५४:१३
- Cross-reference भजन ४७:५
- Cross-reference मत्ती १६:१६; मर्क ८:२९; लुक ९:२०
- Footnote सैतान
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.