Kaike Standard Traslation
यूह 5
योह् कत्यामग पछेघाति ताह्पा
अन्न ङिक यहूदीवन तेवर ङ्याह्, रे येसु यरूसलेमग होई। यरूसलेमग लूपा झलान रह्म्म ङा थाम थेम्पा रह्पान योह् पोखरीदी ङ्याह्, कनग हिब्रु ल्होईग बेथस्दा र्वाङ। स्याह् राँसा राँसान खङ्नानव, आथबा मी मरङ्नान, लेह्न मतैनान, ल्हो मगुल्नान्न सिमिव क्याङक्याङ छ्युँ। [ख्यु त्यु कन्न भेला कुल्ङ र्वार्वा कूङ। तैङर्वाङिन परमप्रभुन दुतदीजै कार्तौ-कार्तौ योह् कत्यामग धुलधुल त्यु कुल्ङ, रे त्यु कुल्मी सु ङू त्युन झिङ जाःङ, तैस्याङ्न नाजाई खङ्पा रानै, मन ताँ।] स्याह् ङिच्यु रै च्योर्गे परालै खङ्पा सिमिदी ङ्याह्। येसुई नू स्याह् क्याङक्याङ छ्युङ्पा रङ्बो आलै भेला र्याङ्मलै मन अन धसा ङिम्न र्वार्वा क्युई राह्राह् येसुई नू र्वाबो, “तै ना ताःसुम खेनौ?”
खङ्नानजै नू र्वाबो, “गुरु, कन्न भेला त्यु कुल्ङ मन्न भेला ङाः पोखरीन त्यु थाल साःनान ङन सिमि सुई मीपा, ङा वैतौवैतौ ङन खेरे ङू घङ सिमि त्यू धुल्ङ।”
येसुई नू र्वाबो, “च्याँ, रे जेँन ल्हौ तुह्या, रे ल्हेना।” तुरुन्तै अन सिमि ताह्बो, रे नु जेँन ल्हौ हुरहुर ल्हेम्बो। अन्तौ नाह्न ल्हाः ङ्याह्। अन्नकारन ताःफाम्पा मन सिमी यहूदीवजै र्वाबो, “त्या ता नाह्न ल्हाः जेङ्पा, कानुन अन्सार नाः ल्हौ हुर्चे लः मह्या।”1 नुई ख्युकाङ्मोः झब बिम्बो, “सुई ङाः ताःफाम्बो नुई यङ र्वाबो, ‘जेँन ल्हौ हुरहुर ल्हेना’।” ख्युई नू लोप्पो, “नाः ल्हौ हुरहुर ल्हेना र्वानान सिमि सु जेङ्पा?” जेङ्नै ताःपान मन सिमिजै नु सु ङ्याह् र्वार्वा स्योपा मह्या, तैङर्वाङिन मन ठाउँग मोङ रह्पान कारन येसु स्याह्लै वैतपा ङ्याह्। अन्न ङिक येसुई नू आराधनालयग दोदो र्वाबो, “सेह्ना, ना ताह्पा ङ्याह्। ह्याङ तीपा नख्या, रे नान लाह्ः हेँ ह्याल्म अलः नराःयो।”
नू ताःफान्नान ता येसु जेअँ र्वार्वा मन सिमिजै वैवै यहूदी आङ खेनान्न सिमिकाङ्मोः र्वाबो। अन्नकारनजै यहूदीवजै येसू तेपफाम्मः जाःबो, तैङर्वाङिन नुई अन धोन नाह्न ल्हाः खेपा ङ्याह्। तब येसुई ख्युकाङ्मोः र्वाबो, “ङन पाई चोँन बेर धोन खेपाई ङ्याह्, रे ङा यङ धोन खेपाई ङिह्पा।” अन्नकारन यहूदी आङ खेनान्न सिमिवजै येसू सह्म्मः हेँ ह्याल्म प्रयास खेमः जाःबो, तैङर्वाङिन नुई नाह्न ल्हाःन कानुन नोङ्फान्चेन धोन मात्र नङ्पा, जेङ्नै जेँगै परमेस्वरन तोह्या दोङदोङ नुई परमेस्वरग जेँनै पा र्वापा ङ्याह्।
ङोह्जोन आङ
येसुई ख्युकाङ्मोः र्वाबो, “तेम्माई, ङा ङेनकाङ्मोः र्वाचे, ङोह्जो जेँजै तये खे मतैनान, जेङ्नै पाई तै खेपा रँ अनै मात्र खेँ, तैङर्वाङिन पाई तै खेँ, ङोह्जोई झामै खेँ। तैङर्वाङिन पाई ङोह्जोः मया खेँ, रे नु जेँजै खेपाई रह्पान धोन पुरू ङोह्जोः थङ्ङ। अन खेरे मकेकुकेन किम धोन नुई ङोह्जोः थन्नान ङ्याह्, रे ङेन हालाईनान ङ्याह्। तैङर्वाङिन कुजुई पाई सिह्पाकाङ्मोः सोम्फान्नान रे ख्युकाङ्मोः झुनी बिन्नान, झामखेखेई ङोह्जोई सू सम खेनान, नू झुनी बिन्नान। तैङर्वाङिन पाई सुई न्याय मखेनान, जेङ्नै न्याय खेनान्न धोन पुरू ङोह्जो बिम्पा ङ्याह्, ताकि पुरूजै ङोह्जोन सम्मान ख्याःयो, कुजुई ख्युई पान सम्मान खेँ। ङोह्जोन सम्मान मखेनान सिमिजै नू फेन्नान पानै सम्मान मखेनान।”
तेम्माई, ङा ङेनकाङ्मोः र्वाचे, सुई ङन बचन ङ्यान्नान रे ङा फेन्नान्न लाह्ः बिस्वास खेनान, नुन ङ्याबो मताह्नान्न झुनी ङिह्पा। अन न्यायग मस्वानान, जेङ्नै सिपालै नु झुनी ताप्पा ङिह्पा। तेम्माई, ङा ङेनकाङ्मोः र्वाचे, अन भेला स्वायङ ङ्याह्, रे अन भेला चोँ जेङ्पा, जब सिह्पावजै परमेस्वरन ङोह्जोन बचन ताह्नान ङ्याह्, रे ताह्नानकाङ्मोः सम्पु राह्राह् च्याङ्नान ङ्याह्। तैङर्वाङिन कुजुई पा जेँगै झुनी ङ्याह्, उजुखेखेई नुई ङोह्जोः र्वार्वा जेँनै ङ्याबो जिन्दगीन फु राचेन आङ बिम्पा ङ्याह्, आलै नू न्यायन फैसला बिन्चेन आङ बिम्पा ङ्याह्, तैङर्वाङिन नु सिमिन ङोह्जो जेङ्पा। “अनग हानलाया, तैङर्वाङिन भेला स्वायङ ङ्याह्, जब तुह्र्साः रह्पा पुरूवजै नुन केह्ः ताह्नान ङ्याह्, रे खोलोः गेग्गे स्वानान ङ्याह् धोन लः खेनानव सम्पु ग्युर्नान्न भिह्तु, रे धोन अलः खेनानव चन धल कूचेन भिह्तु सम्पु ग्युर्नान ङ्याह्।”2
येसुन साँचिव
“ङह् तये खे मतैनान। कताःम ङा ताँ, झामै न्याय ङा खेनान, रे ङन न्याय लः ठहरी राह्नान, तैङर्वाङिन ङा जेँन इच्छ्या मफान्नान, जेङ्नै ङाः फेन्नान्न इच्छ्या फान्नान।” “यदि ङै जेँन भारेः साँचि बिङ्ङिन ङन बयान तेम्मा मराह्नान। ङन भारेः साँचि बिन्नान घङ ङिह्पा, रे ङाः क्युई ङिह्पा, कि ङन भारेः नुई तै साँचि बिङ्ङ, मन साँचि तेम्माई जेङ्पा।” “ङेनजै यूहन्नान स्याह् लोम्म फेप्पा, आलै नुई तेम्मान साँचिन बिम्पा ङ्याह्।3 ङै स्वीकारी खेनान्न साँचि सिमिन नङ्पा, जेङ्नै ङेनकोन उद्धार रायो र्वार्वा ङा अन ल्होई र्वानान। यूहन्ना छ्यान्नान रे चम्कि राह्नान लज्युङ लैम ङ्याह्, रे ङेन नुन ताह्मग ङाईदी बेर स्याङ्मः ङ्याम्बो।” “जेङ्नै ङन ङ्याबो कन साँचि ङिह्पा, मन यूहन्नान साँचि खेरे किम ङिह्पा। तैङर्वाङिन कन धोनव पुरा खेमः पाई ङाः बिम्पा ङिह्पा, मन धोन ङै खेपाई ङिह्पा, आलै नुई ङन भारेः साँचि बिम्पाई ङ्याह् कि पाई ङाः फेप्पा जेङ्पा। ङाः फेन्नान पा जेँजै ङन भारेः साँचि बिम्पा ङ्याह्। नुन केह्ः ङेनजै हातौयै ङ्याम्पा मह्या, आलै नुन ध्वा हातौयै रङ्पा मह्या।4 नुन केह्ः ङेन ङ्याबो मलुईनान। तैङर्वाङिन सू नुई फेप्पो, ङेन नुन लाह्ः बिस्वास मखेँ। ङेन पबित्रसास्त्रग फाङ्ङ, तैङर्वाङिन स्याह् मताह्नान्न झुनी देङ्ङ र्वार्वा ङेन छूँ। ङन भारेः साँचि बिन्नान मनै पबित्रसास्त्र जेङ्पा, जेङ्नै ङेन झुनी देम्म ङन ङ्याबो स्वासुम मखेँ। ङै सिमिवलम सम्मान देस्सुम मखेनान। जेङ्नै ङाः क्युई ङिह्पा, कि ङेन कत्यामन सिमि जेङ्पा। आलै ङाः क्युई ङिह्पा, ङेनकोन समग परमेस्वरन भिह्तु मया तये मह्या। ङा ङन पान मिह्नग स्वापा ङिह्पा, जेङ्नै ङेन ङाः स्वीकार मखेँ। घङ सुई जेँनै मिह्नग स्वाङिन नू स्वीकार खेनान ङ्याह्। ङेन कुजुई बिस्वास खेतैनान, जब कि ङेन राह्ङराङ्साः तीजै-घङ लम सम्मान देस्सुम खेँ, आलै अन सम्मान्न वास्ता मखेँ, कन तीबाःदि परमेस्वरलम स्वाङ? अन नछुवा, कि ङा पान ङू ङेनकाङ्मोः दोस बिन्नान ङ्युँ। ङेनकाङ्मोः दोस बिन्नान ता मोसा ङ्याह्, सुन लाह्ः ङेनजै जेँन आस नाम्पा ङ्याह्। तैङर्वाङिन ङेनजै मोसाः बिस्वास खेपा जेङ्न ङा यङ बिस्वास खेनान ङ्याह्, तैङर्वाङिन नुई ङन भारेः सर्पा ङ्याह्। जेङ्नै ङेन नुई सर्पान ल्होईव बिस्वास मखेङिन, ङन ल्होई कुजुई बिस्वास खेनान?”
Source notes (4)
- Cross-reference नहे १३:१९; यर १७:२१
- Cross-reference दान १२:२
- Cross-reference यूह १:१९-२७; ३:२७-३०
- Cross-reference मत्ती ३:१७; मर्क १:११; लुक ३:२२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.