Kaike Standard Traslation
यूह 7
येसु रे नुन भाईव
अन्न ङिक येसु गालीलगै तूचे खेबो, जेङ्नै नु यहूदियाग वैसुम मखेबो, तैङर्वाङिन यहूदी आङ खेनान्न सिमिव नू सच्चेन दाउग ङ्याह्। ता यहूदीवन आती छ्युङ्नान्न तेवर ङेह्मै ङ्याह्।1 अन्नकारन येसुन भाइवजै नू र्वाबो, “अन ठाउँ ख्योवाख्योवा यहूदिया वया। रे नाई खेपाई रह्पान धोनव नान चेलावजै र्वार्वा रँयो। कन सिमिजै मिह्नकै देस्सुम खेँ, नुई फाक धोन मखेनान। ङेन अन धोनव खेङिन जेँग सन्सारग थना।” तैङर्वाङिन नुन थिक्कोवजै नुन लाह्ः बिस्वास मखेँ। येसुई ख्युकाङ्मोः र्वाबो, “ङन र्वापालैम भेला हेँ स्वापा मह्या। जेङ्नै ङेन भिह्तु ता भेला पुरू र्वापालैम ङ्याह्। सन्सारजै ङेनकाङ्मोः ङान्ज्यान खे मतैनान, जेङ्नै ङा ता ङान्ज्यान खेँ। तैङर्वाङिन सन्सारन भारेः नुन धोनव अलः ङ्याह् र्वार्वा ङा साँचि बिन्चे। ङेन अन तेवरग वया। ङा अन तेवरग मै। तैङर्वाङिन ङन भेला हेँ पुरा रह्पा मह्या।” ख्युकाङ्मोः झाःम र्वार्वा नु गालीलगै छ्युङ्बो।
आती तेवरग येसु
जेङ्नै थिक्कोव तेवरग वैमी येसु यङ हाकाहाकि नङ्पा, जेङ्नै फाक होई। तेवरग यहूदी आङ खेनान्न सिमिवजै नू फाप्पाई ङ्याह्, रे “नु खाः ङ्याह्?” र्वार्वा लोङ्ङ।
मोङवन घूँ नुन भारेः चर्चा राम जाःबो। कानजै र्वाङ, “नु लः ङ्याह्।” घङजै र्वाङ, “नङ्पा, नुई सिमिकाङ्मोः भ्रमग थेप्पा ङ्याह्।” जेङ्नै यहूदी आङ खेनान्न सिमिवन ङिनङिन नुन भारेः सुई हाकाहाकि ल्होई र्वा मतैबो।
तेवरन घूँ येसु आराधनालयन झिङ जाःबो, रे लह्म्मः जाःबो।
यहूदी आङ खेनान्न सिमिवजै हालाईलाई झाम र्वाबो, “तये छोए मलनलन नुई कुजुई अकेःन छोए देप्पो?” तब येसुई झब बिमबिम ख्युकाङ्मोः र्वाबो, “ङन छोए ङनै नङ्पा, जेङ्नै परमेस्वरन जेङ्पा, सुई ङाः फेप्पो। यदि कान सिमिजै परमेस्वरन इच्छ्या ङ्यानसुम खेङिन, ङन छोए परमेस्वरन तर्फलम जेङ्पा, कि ङन जेँन तर्फलम जेङ्पा अन नुई क्युई राह्नान ङ्याह्। सुई जेँनै तर्फलम ल्होई र्वाङ, नुई जेँनै सम्मान फान्नान, जेङ्नै सुई जेँग फेन्नान्न सम्मान फाङ्ङ, अन तेम्मा जेङ्पा, रे नुग छल तये मराह्नान। तै मोसाई ङेनकाङ्मोः कानुन मबिम्बोयौ? जेङ्नै ङेन सुई अन कानुन मङ्याङ्ङ। ङेन तैङ ङाः सच्चे फान्नान?” मोह्ङजै झब बिम्बो, “नाः मुई सेम्पा ङ्याह्। सुई नाः सच्चेन हिम्मत खेँ?” येसुई झब बिमबिम ख्युकाङ्मोः र्वाबो, “ङै हालाईचेन धोनदी खेपा, आलै ङेन पुरू अनग हालाईङ। मोसाई ङेनकाङ्मोः खतनान लुह्ः बिम्पा ङ्याह्। (जेङ्चे ता, अन मोसान तर्फलम ता नङ्पा, जेङ्नै खेपुलवलम जेङ्पा,) रै नाह्न ल्हाः ङेन चोलोङ्चा खतना खेँ।2 मोसान कानुन भङग नराःयो र्वार्वा यदि कान सिमिजै नाह्न ल्हाः खतना खेङिन, ङै सिमि तीपा नाह्न ल्हाः पुरू ताःफाम्पा र्वार्वा तै ङेन ङन ङ्याबो सुतूनौ?3 ध्वा सेनसेन न्याय नख्या, जेङ्नै लः खेखे न्याय ख्या।”4
तै अन मसिह जेङ्पौ?
यरूसलेमन कान-कान सिमिवजै र्वाबो, “तै नु नुई नङ्पाऊ, सू यहूदी आङ खेनान्न सिमिवजै सच्चे फाङ्ङ? सेह्ना, नु ता हाकाहाकि ल्होई र्वापाई ङ्याह्, जेङ्नै ख्यु नू तये मर्वाङ! तै नुई मसिह जेङ्पा र्वानान अगुवाकाङ्मोः तेम्माई क्युई रह्बोयौ? जेङ्नै जब मसिह स्वानान, नु खालै स्वानान र्वार्वा सुई क्युई राह्नान मह्या। ङ्योअ पुरूग क्युई ङिह्पा अन सिमि खालै स्वापा जेङ्पा।”
तब येसुई यरूसलेमन आराधनालयग लन्तौ, नुई केह्ः किमई र्वाबो, “ङेन ङाः स्योङ, रे ङा खालै स्वापा जेङ्पा, अन यङ क्युई ङ्याह्। ङा जेँनै इच्छ्याई स्वापा नङ्पा, जेङ्नै सुई ङाः फेप्पो नु तेम्मा ङिह्पा। ङेन नू मस्योँ, जेङ्नै ङा नू स्योःनान, तैङर्वाङिन ङा नु लम स्वापा जेङ्पा, रे नुई ङाः फेप्पा जेङ्पा।” अन्नकारन ख्युई नू जुङ्चे फाप्पो, जेङ्नै सुई नुन लाह्ः लाह् मकह्बो, तैङर्वाङिन नुन भेला हेँ स्वातपा मह्या। जेङ्नै मोङन लै सिमिवजै नुन लाह्ः बिस्वास खेबो। ख्युई र्वाबो, “जब मसिह स्वानान, तब तै नुई सिमिन खेरे ह्याल्म ताईलुवान धोन खेनान तै?”
येसू जुङ्मः सिपाहीकाङ्मोः फेप्पा
मोह्ङजै येसुन भारेः चर्चा खेपा फरिसीवजै ताह्बो। तब ङोत्वा पुजारीव रे फरिसीवजै नू जुङ्मः आराधनालयन पालेकाङ्मोः फेप्पो। अन्तौ येसुई र्वाबो, “ङा हेँ ङाईन बेर ङेन ङ्याबो ङिह्पा। आलै ङा ङाः फेन्नान्न स्याह् वैनान ङ्युँ। ङेनजै ङाः फान्नान ङ्याह्, जेङ्नै दोःनान मह्या। रे खाः ङा राह्नान, स्याह् ङेन स्वा मतैनान।” तब येहूदी आङ खेनान्न सिमिवजै राह्ङराङ्साः र्वाबो, “नु खाः वैमः जाःपा ङ्याह्, रे ङ्योअ नू दोःनान मह्या? तै नु ग्रीक सहरग तितरबितर राह्राह् छ्युङ्पा यहूदीवन स्याह् वैवै ग्रीककाङ्मोः लनसुम खेँयौ? नुई र्वापा अन बचन तै जेङ्पा? ‘ङेन ङाः फान्नान ङ्याह्, जेङ्नै दोःनान मह्या, रे ङा खाः राह्नान, ङेन स्वा मतैनान?’”
झुनी बिन्नान त्युन फु
ता तेवरन ङिस्योवान दिन, आथबा तेवरन ङोत्वा दिनग, च्याङच्याङ येसुई केह्ः किमई झाःम र्वाबो, “यदि सुई त्यु बुल्ङिन ङन स्याह् स्वायो रे थ्वाःयो।5 सुई ङन लाह्ः बिस्वास खेँ, पबित्रसास्त्रजै र्वापान अन्सार ‘नुन समन झिङलै सम्पु त्युन स्योलाव गेग्गे वैनान ङ्याह्।’” जेङ्नै अन ल्होई नुई पबित्र आत्मान भारेः र्वापा ङ्याह्, कन पबित्र आत्मा नुन लाह्ः बिस्वास खेनानवजै देम्म जाःपा ङ्याह्। तैङर्वाङिन पबित्र आत्मा चोँन बेर बिम्पा मह्या, तैङर्वाङिन येसु महिमान भिह्तु हेँद्रि थीथी वप्पा मह्या।6
सिमिवन घूँ दीचे मरह्पा
अन ल्होई ताह्नान कान-कान सिमिवजै र्वाबो, “नु ता तेम्माई भबिस्यबक्ता जेअँ।”7 घङवजै र्वाबो, “नु मसिह जेङ्पा।” जेङ्नै कान-कानजै र्वाबो, “तै मसिह गालीललै स्वानान तै? तै पबित्रसास्त्रजै र्वापा मह्यायौ, कि मसिह दाऊदन सन्तानलम रे दाऊदनै सहर बेथलेहेमलै स्वानान।”8 अनजै येसुन कारन सिमिवन घूँ भाचे रह्पा। ख्युन बर्ग हातिपाई नू जुङ्चे फाप्पो। जेङ्नै नुन लाह्ः सुई यङ लाह् मकह्बो।
यहूदी आङ खेनान्न सिमिवन अबिस्वास
तब आराधनालयन पालेव रे ङोत्वा पुजारीव फरिसीवन स्याह् स्वाबो। ख्युई अजोवग र्वाबो, “ङेनजै नू तैङ मसप्पा?” आराधनालयन पालेवजै झब बिम्बो, “अन सिमिजै लैम ता सिमि सुई हातौयै ल्होई मर्वाबो!” फरिसीवजै अजोवग र्वाबो, “ङेनकाङ्मोः र्वार्वा छकाई पप्पो कि तै वा? तै ङेन स्योःनौ अगुवाव आथबा फरिसीवन बर्ग सुई नुन लाह्ः बिस्वास खेपा ङिह्पा? जेङ्नै अन मोङ, सुई मोसान कानुन मस्योनान, अन परमेस्वरलम स्रापित ङिह्पा।”
ख्युन बर्ग तीपा फरिसी सुन मिह्न निकोदेमस जेङ्पा, नु तीरेप येसुन स्याह् स्वापा ङ्याह्, नुई र्वाबो,9 “तै ङिन कानुनजै ङू सिमिन भारेः मताह्रे आथबा नुई तै खेपा ङ्याह् अन क्युई मराह्रे नू न्याय खेनान तै?” ख्युई नू झब बिम्बो, “तै ना रे गालीलन सिमि जेङ्पौ? पबित्रसास्त्र फाप्पे सेह्ना, रे नाई रङ्नान ङ्याह्, कि गालीललै भबिस्यबक्ता गेग्गे मस्वानान।” तब सिमि पुरू जे-जेँन यिम होई।
Source notes (9)
- Cross-reference लेवी २३:३४; कानुन १६:१३
- Cross-reference उत १७:१०-१३; लेवी १२:३
- Cross-reference यूह ५:९
- Cross-reference यसै ११:३; यूह ८:१५
- Cross-reference यसै ५५:१
- Cross-reference यसै ४४:३
- Cross-reference मत्ती २१:११
- Cross-reference २ सामू ७:१२; मीका ५:२
- Cross-reference यूह ३:१-२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.