Kaike Standard Traslation
यूह 19
तब पिलातसजै येसु वव्वै चेरन ताल्च्या फ्याङ फाम्बो। आलै सिपाहीवजै चेरन मुकुत दोङ्दोङ नुन थोप्पाः थम्बो, रे नू रङ ल्होःम रे पिङ्म होम्पा घोलाङ थम्बो, रे नुन रह्म्म स्वास्वा र्वाबो, “नमस्ते, यहूदीवन झली!” आलै ख्युई नू ताप्पर फ्याङ्बो।
ह्याङ खोलोः गेग्गे पिलातसजै ख्युकाङ्मोः र्वाबो, “सेह्ना, ङा नू ङेन स्याह् खोलोः सप्पा ङिह्पा, रे ङेनकाङ्मोः स्यास्सुम ङिह्पा, ङा नू दोस तये मदेन्नान।” तब चेरन मुकुत रे बैजनी रङन घोलाङ थम्पा येसु खोलोः स्वाबो, रे पिलातसजै ख्युकाङ्मोः र्वाबो, “सेह्ना, अन सिमी!”
जब ङोत्वा पुजारीव रे पालेवजै नू रङ्बो, ख्यु झाम र्वायङ फाईरा खेमः जाःबो, “नू क्रुसग चुना!” नू क्रुसग चुना पिलातसजै ख्युकाङ्मोः र्वाबो, “ङेनजै नू वव्वै क्रुसग चुना, तैङर्वाङिन ङा नुग दोस तये मदेन्नान!” यहूदीवजै नू झब बिम्बो, “ङ्योअन ती कानुन ङिह्पा, रे मन कानुन अन्सार अन सित्वानान, तैङर्वाङिन नुई जेँगै परमेस्वरन ङोह्जो जेङ्पा र्वार्वा दाबि खेपा ङ्याह्।”1 अन ल्होई ताह्ताह् पिलातस झन ङिह्म्बो। नु ह्याङ महलन झिङ जाःबो रे येसु लोप्पो, “ना खान जेङ्पा?” जेङ्नै येसुई नू झब तये मबिम्बो। अन्नकारन पिलातसजै नू र्वाबो, “तै ना ङन ङ्याबो ल्होई मर्वानौ? ना फेच्चेन आङ ङन ङ्याबो ङिह्पा, रे ना क्रुसग चुम्चेन आङ यङ ङन ङ्याबो ङिह्पा र्वानान ना क्युई मीपाऊ?”
येसुई झब बिम्बो, “ङेन ङ्याबो परमेस्वर लम आङ मबिम्पा जेङ्न ङन लाह्ः ङेन तये आङ राह्नान मह्या। अन्नकारन ङा नान लाह्ग बिन्नान हेँ ह्याल्म तीपान दोसी ङिह्पा।” आलै पिलातसजै नू फेच्चेन प्रयास लै खेबो। जेङ्नै यहूदीव झाम र्वायङ फाईरा खेबो, “यदि ङेनजै अन सिमि फेङ्ङिन ङेन कैसरन फुरी मराने। जेँगै झली जेङ्पा र्वार्वा धिपी खेनान पुरू कैसरन बिरोधग च्याङ्नान।” पिलातसजै अन ल्होई ताह्ताह् येसु खोलोः सप्पो, रे नु “लुङन पाती” र्वानान ठाउँग (कनग हिब्रु ल्होईग गब्बथा र्वानान) न्याय आसनग छ्युङ्बो। अन्तौ निस्तार-तेवरन तयारीन दिन ङ्याह्। ङिजेन क्वाईमाल्ला बार बजि रह्पा ङ्याह्। पिलातसजै यहूदीकाङ्मोः र्वाबो, “सेह्ना, ङेन झली!” जेङ्नै ख्यु झाम र्वायङ फाईरा खेबो, “नू सह्रा, नू सह्रा, नू क्रुसग चुना!” पिलातसजै ख्युकाङ्मोः लोप्पो, “तै ङा ङेन झली क्रुसग चुना?” ङोत्वा पुजारीवजै झब बिम्बो, “कैसर नङ्म घङ ङ्योअन झली मीपा।” तब पिलातसजै नू क्रुसग चुम्मः ख्युन लाह्ग बिम्बो। अन्नकारन सिपाहीवजै येसु जिम्मा वप्पो।
येसू क्रुसग चुम्पा
(मत्ती २७:३२-४४; मर्क १५:२१-३२; लुक २३:२६-४३)
नु जेँन क्रुस ङजै हुरहुर खप्परे र्वापू होई, कनग हिब्रु ल्होईग गलगथा र्वानान। स्याह् ख्युई नू क्रुसग चुम्बो रे नुन ङ्याबो घङ ङेह्पाः चुम्बो, तीपा तीक्याँ रे घङग घङक्याँ, आलै घूँ येसु। पिलातसजै ती दोस-पत्र यङ सर्बो, आलै क्रुसन लाह्ः चुम्बो। मनग अनै सर्पा ङ्याह्, “नासरतन येसु, यहूदीवन झली।” ता लै यहूदीवजै अन दोस-पत्र तोअबो, तैङर्वाङिन येसु क्रुसग चुम्पान ठाउँ सहरन ङेह्मः ङ्याह्। अन हिब्रु, ल्यातिन रे ग्रीक ल्होईग सर्पा ङ्याह्। यहूदीवन ङोत्वा पुजारीवजै पिलातसग र्वाबो, “यहूदीवन झली, र्वाचे नङ्पा, जेङ्नै ‘नुई ङा यहूदीवन झली जेङ्पा र्वाबो’ र्वार्वा सह्रा।” पिलातसजै झब बिम्बो, “ङै तै सर्नै, सर्पा।”
सिपाहीवजै येसू क्रुसग चुनतामी नुन घोलाङ वव्वै काला ली कबो रे राह्ङराङ्साः परेःबो। नुन घोलाङ र्याङ्म चन ङ्यालै पोँथाल ब्योई मत्वानान खेखे दोङ्पा ङ्याह्। अन्नकारन ख्युई राह्ङराङ्साः र्वाबो, “अन चन मछ्योम्मता, जेङ्नै अन सू थेप्नान जेङ्पा र्वार्वा चित्ता कामता।” पबित्रसास्त्र पुरा राःयो र्वार्वाई अन रह्पा ङ्याह् “ख्युई ङन घोलाङ राह्ङराङ्साः परेःबो, रे खोलोःन घोलाङ चन चित्ता कबो।”2
अन्नकारन सिपाहीवजै अन धोन खेबो। आलै येसुन क्रुसन रह्म्म नुन मा, नुन मान बहिनी, क्लोपासन मिसा मरियम रे मरियम मग्दलिनी थाङथाङ छ्युङ्पा ङ्याह्। जब येसुई जेँन मा रे नुई मया खेनान चेला रह्म्म थाङथाङ छ्युङ्पा रङ्बो, तब नुई जेँन मा र्वाबो, “चिमिचा, सेह्ना, ङेन ङोह्जो!” तब मन चेलाः र्वार्वा नुई र्वाबो, “सेह्ना, नान मा!” मन्न भेलालै मन चेलाई नू जेँनै यिम वप्पो।
येसु सिह्बो
(मत्ती २७:४५-५६; मर्क १५:३३-४१; लुक २३:४४-४९)
आलै येसुई ता ल्होई पुरू तह्बो र्वार्वा क्युई राह्राह् पबित्रसास्त्र पुरा रायो र्वार्वा र्वाबो, “ङा त्यु बुल्बो।”3 स्याह् खु खाःपाई नाङ्पान धाङदी नाम्पा ङ्याह्। अन्नकारन खु खाःपा नाङ्पान कपासदी हिसपन धाः नान्नान ख्युई नुन ङुरग साःबो।4 जब येसुई खु खाःपा वप्पो, तब नुई र्वाबो, “ता तह्बो,” रे नुई थोप्पा कुकु जेँन परान पप्पो।5
दुङ्जै काँचिली चापा
मन्न लाह्ः तयारीन दिन ङ्याह्। अन्नकारन यहूदी आङ खेनान्न सिमिवजै नाह्न ल्हाः (तेम्मा खेखे अन नाह्न लाह्ः, कन चन ङोत्वाखाईमे ङ्याह्) सिपा ल्होव क्रुसग नलुयाःयो र्वार्वा पिलातसग छ्याःफुल्बो, रे ख्युन लेह् क्युक्क्युई ख्युन ल्हो वच्चे धेरायो र्वार्वा तोल्बो। तब सिपाहीव स्वास्वा नुन ङ्याबो क्रुसग चुम्पावन लेह् क्युप्पो, पहिली तीपान, आलै घङ्न। जेङ्नै जब मन सिपाहीव येसुन रह्म्म होई तब ख्युई नु लैःलै सितपा रङ्बो, अन्नकारन ख्युई नुन लेह् मक्युप्पो। जेङ्नै सिपाहीव बर्ग तीपाई नुन काँचिली दुङ्जै चाबो, रे तुरुन्तै कह रे त्यु गेप्पो। ङेन यङ बिस्वास खेतयाःयो र्वार्वा अन रङ्नानजै बयान बिम्पा जेङ्पा रे नुन साँचि तेम्मा ङिह्पा, रे तेम्मा ल्होई र्वानान र्वार्वा नु हाकोँ। “नुन स्युह्रु ती यङ क्युन्नान मह्या” र्वानान पबित्रसास्त्रन केह्ः पुरा राःयो र्वार्वा अन ल्होई राम स्वाबो।6 आलै ह्याङ घङ ठाउँग पबित्रसास्त्र र्वाङ, “सू ख्युई चापा ङ्याह्, ख्युई नू सेन्नान ङ्याह्।”7
येसु लुम्पा
(मत्ती २७:५७-६१; मर्क १५:४२-४७; लुक २३:५०-५६)
अन्न ङिक अरिमाथियान योसेफ, सु यहूदीकाङ्मोः ङिनङिन फाक मात्र येसुन चेला ङ्याह्, नुई पिलातसग येसुन सिह्पान ल्हो वच्चे धेरायो र्वार्वा छ्याःफुल्बो। पिलातसजै वपफाम्बो। तब नुई स्वास्वा नुन कुँह्म वप्पो। आलै ङू नुन रह्म्म छान स्वानान निकोदेमस यङ क्वाईमाल्ला: किलो सुमच्यु मूर्र रे एलवा होम्पा रिह् स्यामन छि सस्सै स्याह् स्वाबो। झामखेखे ख्युई येसुन ल्हो यहूदीवन लुम्नान्न ल्हू अन्सार र्हिस्याम छिन ङ्याबो सुतीन घोलाङग खीबो। नु क्रुसग चुम्पान ठाउँग ती क्वा ङ्याह्। मन क्वाग सुई हातौयै मनाम्पा तुह्र्सादी सार्बा ङ्याह्। तैङर्वाङिन यहूदीवन तयारीन दिन ङ्याह्, आलै मन तुह्र्सा यङ ङेह्मः ङ्याह्, रे ख्युई येसू अनै तुर्सा नाह्म्बो।
Source notes (7)
- Cross-reference लेवी २४:१६
- Cross-reference भजन २२:१८
- Cross-reference भजन २२:१५; ६९:२१
- Cross-reference भजन ६९:२१
- Cross-reference लुक २३:४६; मर्क १५:३७
- Cross-reference प्रस १२:४६; गन्ती ९:१२; भजन ३४:२०
- Cross-reference जक १२:१०; प्रका १:७
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.