Kaike Standard Traslation
यूह 18
येसू जुङ्पा
(मत्ती २६:४६-५६; मर्क १४:४३-५०; लुक २२:४७-५३)
येसुई सोअतापतामी नु जेँन चेलावन ङ्याबो किद्रोन चाङ्पुन धिक्याँ होई। स्याह् ती क्वा ङ्याह्। येसु जेँन चेलावन ङ्याबो स्याह् ताप्पो। नू जुङ्फान्नान यहूदाई र्वार्वा अन ठाउँ स्योपा ङ्याह्, तैङर्वाङिन येसु जेँन चेलावन ङ्याबो स्याह् लै वैतपा ङ्याह्। तब बत्ति, मेह्न छ्याप्पान मेराङ रे हतियारव सस्सै सिपाहीवन ती दल रे ङोत्वा पुजारी रे फरिसीवजै फेप्पा पालेव सस्सै यहूदा क्वाग स्वाबो। तब जेँन लाह्ः स्वानान ल्होई पुरू क्युई राह्राह् येसु ङू स्वाबो, रे ख्युकाङ्मोः र्वाबो, “ङेन सू फान्नान?”
ख्युई नू र्वाबो, “नासरतन येसू।” येसुई ख्युकाङ्मोः र्वाबो, “ङा नुई जेङ्पा।” ता नू जुङ्फान्नान यहूदा यङ ख्युन ङ्याबोई थाङथाङ छ्युङ्पा ङ्याह्। जब येसुई ख्युकाङ्मोः “ङा नुई जेङ्पा” र्वाबो। तब ख्यु ङिक होई, आलै सा घ्याबो। ह्याङ नुई ख्युकाङ्मोः लोप्पो, “ङेन सू फान्नान?” ख्युई र्वाबो, “नासरतन येसु।” येसुई झब बिम्बो, “ङै ङेनकाङ्मोः र्वापा न, ङा नुई जेङ्पा। अन्नकारन यदि ङेन ङा फाप्पे ङिह्पा र्वाङिन ख्यु सिमिकाङ्मोः चन वैफाना।” “ङेनजै ङाः बिम्पा सिमिवन बर्ग तीगै ङै ममोल्पा” र्वार्वा नुई र्वापा केह्ः पुरा राःयो र्वार्वा अन रह्पा।
सिमोन पत्रुसजै जेँन ङ्याबो रह्पान तरवाली छ्युछ्यु ङोत्वा पुजारीन राङ्पा फ्याङ्बो रे नुन याईपा नाम्ज्योवा च्वात्त थुम्बो। मन राङ्पान मिह्न माल्खस ङ्याह्। येसुई पत्रुसग र्वाबो, “तरवाली स्युह्पग का। तै पाई ङा बिम्पा खोरे मथुङ्चेऊ?”
हन्नासन ङू येसु
आलै रोमी सिपाहीवन दल, ख्युन सुबेदार, रे यहूदीवन पालेवजै येसु जुङ्बो, रे नू खीबो। पहिली ख्युई नू हन्नासन स्याह् वप्पो, कन अन्न पाह्न्न प्रधान पुजारी कैयाफान खेः ङ्याह्। अन नुई कैयाफा ङ्याह्, सुई “जन्तान भिह्तु सिमिदी सिचेई ल: ङ्याह्” र्वार्वा यहूदी आङ खेनान्न सिमिकाङ्मोः सल्ला बिम्पा ङ्याह्।1
पत्रुसजै येसू अस्वीकार खेपा
(मत्ती २६:६९-७०; मर्क १४:६६-६८; लुक २२:५५-५७)
सिमोन पत्रुस रे येसुन घङ चेलादी येसुन ङिक जाःबो। मन घङ चेला चन प्रधान पुजारीन स्योपा सिमि ङ्याह्, रे येसु ङ्याबोई प्रधान पुजारीन ख्यामग जाःबो। जेङ्नै पत्रुस खोलोः झलाः थाङथाङ छ्युङ्पा ङ्याह्। मन घङ चेला चनजै, सु प्रधान पुजारीन स्योपा सिमि ङ्याह्, खोलोः गेग्गे झलाः छ्युङ्नान चिमिचा र्वार्वा पत्रुसग झिङ सप्पो। तब झलाः छ्युङ्नान मन राङ्माई पत्रुसग र्वाबो, “तै ना रे अन सिमिन चेलावन बर्ग ती जेङ्पौ?” पत्रुसजै र्वाबो, “ङा नङ्पा।” स्याह् राङ्पा रे पालेव मेह् धेधे थाङथाङ छ्युङ्पा ङ्याह्। तैङर्वाङिन ख्याःरि ङ्याह्। आलै पत्रुस यङ ख्युन ङ्याबो थाङथाङ मेह् धेम जाःबो।
येसु प्रधान पुजारी लम प्रस्न
(मत्ती २६:५९-६६; मर्क १४:५५-६४; लुक २२:६६-७१)
ता प्रधान पुजारीजै येसु नुन चेलाव रे नुन छोएन भारेः लोप्पो। येसुई नू झब बिम्बो, “ङै सन्सारग हाकाहाकि र्वापा ङिह्पा। ङै एकुरो जोम्पू रे यहूदीन आराधनालयग लम्पा ङिह्पा, खाः पुरू यहूदीव जोम्नान। ङै फाक तये र्वापा मह्या। ङा तैङ लोन्नान? ङै ख्युकाङ्मोः तै र्वापा अन ङ्यान्नानकाङ्मोः ल्होरा। ङै र्वापा ल्होईव अजोव क्युई ङ्याह्।”
येसुई अन ल्होई र्वातौ रह्म्म थाङथाङ छ्युङ्पा पालेवन बर्ग तीपाई झाःम र्वार्वा येसू ताप्पर फ्याङ्बो, “तै प्रधान पुजारी झामखेखे झब बिन्नौ?”2 येसुई नू र्वाबो, “ङै घोलोवा र्वापा जेङ्न अन्न पर्मान भिना, जेङ्नै यदि ङै तेम्मा र्वापा जेङ्न ङा तैङ फ्याङ्नान?” तब हन्नासजै नू खीपागै प्रधान पुजारी कैयाफान स्याह् फेप्पो।
पत्रुसजै खेपा ङेरेप रे सुमरेपन अस्वीकार
(मत्ती २६:७१-७५; मर्क १४:६९-७२; लुक २२:५८-६२)
सिमोन पत्रुस थाङथाङ छ्युङछ्युङ मेह् धेपाई ङ्याह्। ख्युई नू र्वाबो, “तै नुन चेलावन बर्ग तीपा ना रे नङ्पाऊ?” नुई अस्वीकार खेखे र्वाबो, “ङा नङ्पा।” प्रधान पुजारीन राङ्पाव बर्ग तीपा, सुन सिमिन नाम्ज्योवा पत्रुसजै थुम्पा ङ्याह्, नुई लोप्पो, “तै ङै ना नुन ङ्याबो क्वा मरङ्पा तै?” तब ह्याङ पत्रुसजै अस्वीकार खेबो। आलै तुरुन्तै काःपा तर्बो।
पिलातसन ङू येसु
(मत्ती २७:१-२; २७:११-१४; मर्क १५:१-५; लुक २३:१-५)
तब ख्युई येसू कैयाफान यिमलै महलक्याँ वप्पो। अन्तौ नाह्प ङ्याह्। बाःपा राह्राह् निस्तार-तेवरन भत्यार झाचे मदेन्नान र्वानान ङिनङिन ख्यु महलन झिङ मजाबो। अन्नकारन ख्युन स्याह् खोलोः गेग्गे पिलातसजै र्वाबो, “अन सिमिन बिरोधग ङेन तै दोस बिन्नान?” ख्युई नू र्वाबो, “यदि अन सिमि अपराधी मराङिन ङ्योअग नू ङेन स्याह् फेन्नान मह्या।”
पिलातसजै ख्युकाङ्मोः र्वाबो, “ङेन नू होरा, रे ङेनकोन जेँनै कानुन अन्सार नुन न्याय ख्या।” यहूदीवजै नू र्वाबो, “सिमि सुई र्वार्वा सच्चेन धल बिन्चेन आङ ङ्योअग मीपा।” जेँ कुजुई सित्वानान र्वार्वा येसु जेँजै र्वापान ल्होई पुरा राचेन भिह्तु झाम रह्पा।3 पिलातस ह्याङ महलन झिङ जाःबो, रे नुई येसु घ्वाघ्वा र्वाबो, “तै ना यहूदीवन झली जेङ्पौ?” येसुई झब बिम्बो, “ङेन ङजै झाम र्वानान, आथबा ङन भिह्तु ङेन ङ्याबो घङ सुई र्वापा?”
पिलातसजै झब बिम्बो, “तै ङा यहूदी जेङ्पौ? नानै सिमि रे ङोत्वा पुजारीवजै नाः ङन लाह्ग थोप्पो। नाई तै खेपा?” येसुई झब बिम्बो, “ङन राज्य अन सन्सारन नङ्पा। ङन राज्य अन सन्सारन रह्पा जेङ्न ता ङन सेवकव ङन भिह्तु फ्याङ्ची खेनान ङ्याह्, रे ङा यहूदीवन लाह्ग थेप्नान मीह्। जेङ्नै ङन राज्य अन सन्सारन नङ्पा।” पिलातसजै नू लोप्पो, “तै ना झलीई जेङ्पौ?” येसुई झब बिम्बो, “ङा झली जेङ्पा र्वार्वा नह् र्वाङ। अन्नै भिह्तु ङा केह्पा जेङ्पा, रे अन्नै भिह्तु तेम्मान साँचि बिम्म ङा अन सन्सारग स्वापा जेङ्पा। पुरू सु तेम्मान पछेग ङ्याह्, नुई ङन केह्ः ङ्यान्नान।”4
पिलातसजै नू लोप्पो, “तेम्मा तै जेङ्पा?” अकेः र्वार्वा नु यहूदीवन स्याह् खोलोः गेग्गे होई, रे ख्युकाङ्मोः र्वाबो, “ङा अन्न स्याह् दोस तये मदेङ्ङ।”
येसू सच्चेन आग्या
(मत्ती २७:१५-३१; मर्क १५:६-२०; लुक २३:१३-२५)
निस्तार-तेवरग तीपाः ङै ङेनकोन भिह्तु फेच्चेन ङेनकोन कानुन ङ्याह्। ता ङेन तै सम खेनान, कि “यहूदीवन झली फेचेऊ?” जेङ्नै ख्यु ह्याङ झाम र्वायङ फाईरा खेबो, “नू नङ्पा, जेङ्नै बारब्बा।” बारब्बा चन च्यापा ङ्याह्।
Source notes (4)
- Cross-reference यूह ११:४९-५०
- Cross-reference लुक २२:६३; मीका ५:१
- Cross-reference यूह ३:१४; १२:३२
- Cross-reference १ यूह ४:६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.