Kaike Standard Traslation
यूह 20
तुर्सा होङ
(मत्ती २८:१-८; मर्क १६:१-८; लुक २४:१-१२)
नेर्यान ङूस्योवान दिन नाह्प नम मनाङ्तौ मरियम मग्दलिनी तुर्साः स्वाबो, रे नुई लुङ तुह्र्सालै पप्पा रङ्बो। नु सिमोन पत्रुस रे येसुई मया खेनान घङ चेलान स्याह् धालैधालै होई, रे ख्युकाङ्मोः र्वाबो, “ख्युई प्रभू तुह्र्सालै खोलोः वत्तँ, रे नू खाः नाम्पा ङ्याह्, अन ङ्योअग क्युई मह्या।” तब पत्रुस रे घङ चेला खोलोः गेग्गे तुह्र्साक्याँ होई। ख्यु ङ्योरुम ङ्याबो धालैधालै होई, जेङ्नै घङ चेला पत्रुसग ङू तलतल तुह्र्सा ङू स्वा ताप्पो। तुर्सान झिङ कुकु सेन्तौ, नुई ङू च्योम्पान सुती घोलाङव मात्र छार्पा रङ्बो, जेङ्नै नु झिङ मजाबो। सिमोन पत्रुस नुन ङिङि स्वाबो, रे तुह्र्सान झिङ जाःबो, आलै नुई र्वार्वा मलमलन च्योम्नान्न घोलाङव मात्र रङ्बो। नुन थोप्पाः च्योम्पान बर्खि चन मलमलन घोलाङव ङ्याबो मह्या, जेङ्नै तीक्याँ ताप्ताप् नाम्पा ङ्याह्। तब तुह्र्साः ङू स्वा ताप्नान घङ चेला यङ झिङ जाःबो, रे अन रङरङ नुई बिस्वास खेबो। तैङर्वाङिन ख्युई नु सिपालै सम्पु राह्राह् च्याङत्वानान र्वानान पबित्रसास्त्रन बचन चोँन बेर हाकोपा मह्या।1 अन्न ङिक मन चेलाव जेँन यिम होल्बो।
येसु मरियम मग्दलिनीन स्याह् रङ्बो
(मत्ती २८:९-१०; मर्क १६:९-११)
जेङ्नै मरियम तुह्र्सान खोलोः धाईधाई थाङथाङ छ्युङछ्युङ तुर्साक्याँ कुकु सेम्बो, रे खाः येसुन सिह्पा ल्हो नाम्पा ङ्याह्, स्याह् घोलाङ पाह्ल्म गोम्पा ङेह् स्वर्गदुतकाङ्मोः, तीपा थोप्पाक्याँ रे घङ ल्हेक्याँ छ्युङ्पा नुई रङ्बो। ख्युई नू र्वाबो, “चिमिचा, तैङ दोःनान?” नुई ख्युकाङ्मोः र्वाबो, “ख्युई ङन प्रभू वत्तँ, रे नू खाः नाम्पा ङ्याह्, ङाः क्युई मह्या।”
अन ल्होई र्वार्वा नु ङिक्याँ होल्बो, रे नुई येसू थाङथाङ छ्युङ्पा रङ्बो, जेङ्नै येसुई जेङ्पा र्वार्वा मस्योःबो। येसुई नू र्वाबो, “चिमिचा, ना तैङ दादाई ङिह्पा? सू फान्नान?” नुई नू क्वान धोन खेनान र्वार्वा छुछु र्वाबो, “गुरु, नाई नू स्यीह्लै वप्पा राङिन, खाः नाम्पा ङिह्पा ङा र्वा, रे ङा नू वन्नान ङ्युँ।” येसुई नू र्वाबो, “मरियम!” नुई होलहोल नू हिब्रु ल्होईग र्वाबो, “रब्बोनी,” आथबा “हे गुरुज्यू!” येसुई नू र्वाबो, “ङा नज्यारा, तैङर्वाङिन ङा चोँन बेर पान स्याह् वैपा मीपा। जेङ्नै ङन भाइवन स्याह् वैवै ख्युकाङ्मोः र्वा, ‘ङन पा रे ङेन पा, रे ङन परमेस्वर रे ङेन परमेस्वरन स्याह् वैपाई ङ्युँ’।” मरियम मग्दलिनी होई, रे चेलाकाङ्मोः स्याप्पो, “ङै प्रभू रङ्पा।” आलै नुई र्वापा ल्होई ख्युकाङ्मोः नुई र्वाबो।
येसु चेलावन स्याह् रङ्बो
(मत्ती २८:१६-२०; मर्क १६:१४-१७; लुक २४:३६-४९)
मन्नै लाह्ः, आथबा नेर्यान ङूस्योवान दिन्न ङ्याजे, जब यहूदीकाङ्मोः ङिनङिन चेलाव झलाव थाथा झिङ जोमजोम छ्युङ्पा ङ्याह्, येसु स्वास्वा ख्युन घूँ थाङथाङ छ्युङ्बो, रे ख्युकाङ्मोः र्वाबो, “ङेनकाङ्मोः सान्ति!” अकेः र्वार्वा नुई ख्युकाङ्मोः जेँन लाह् रे काँचुलि यङ थम्बो। प्रभू रङरङ चेलाव मिह्दा स्याङ्बो। तब येसुई ह्याङ ख्युकाङ्मोः र्वाबो, “ङेनकाङ्मोः सान्ति! कुजुई पाई ङा फेप्पो, झामखेखे ङा रे ङेनकाङ्मोः फेच्चे।” आलै अकेः र्वार्वा नुई ख्युन लाह्ः फु खेखे र्वाबो, “पबित्र आत्मा होरा। सुन तीपा ङेन माफ खेनान, ख्युकाङ्मोः माफ राह्नान, रे सुन तीपा ङेन माफ मखेनान माफ राह्नान मह्या।”2
येसु रे थोमा
येसु स्वातौ च्योङेपा बर्ग तीपा, दिदुमस मिह्न्न थोमा चन, ख्युन ङ्याबो मह्या। अन्नकारन घङ चेलावजै नू र्वाबो, “ङी प्रभू रङ्पा।” जेङ्नै नुई ख्युकाङ्मोः र्वाबो, “कन्न बेर ङा नुन ल्हाग किलावन माल मरँ, रे किलावन मालग ङन ल्हाजुप मका, नुन काँचिली ङन ल्हा मका, मन्न बेर ङा बिस्वास खेनान मीह्।”
केर्यान ङिक नुन चेलाव ह्याङ यिमन झिङै ङ्याह्। थोमा यङ ख्युन ङ्याबो ङ्याह्। झलाव थाःपा ङ्याह्, जेङ्नै येसु झिङ स्वाबो, रे घूँ थाङथाङ छ्युङछ्युङ र्वाबो, “ङेनकाङ्मोः सान्ति!” तब नुई थोमा र्वाबो, “नान ल्हाजुप स्यीह् नाह्ना, रे ङन लाह्ःव सेह्ना। नान लाह् क्याङक्याङ ङन काँचिली का। अबिस्वासी नङ्पा जेङ्नै बिस्वासी रा।” थोमाई नू र्वाबो, “ङन प्रभु, ङन परमेस्वर!”
येसुई नू र्वाबो, “नाई ङा रङ्पान कारन ङन लाह्ः बिस्वास खेपा जेङ्पा? धन्न जेङ्पा ख्यु, सुई ङा रङ्पा मह्या, रै बिस्वास खेनान।”
अन किताबन उदेस्य
येसुई घङ लै ताईलुवान धोनव चेलावन ङू खेबो, कन चन अन किताबग सर्पा मह्या। जेङ्नै अजोव सर्पा ङ्याह्, कि ङेनजै येसु परमेस्वरन ङोह्जो, मसिह जेङ्पा र्वार्वा बिस्वास ख्या, रे बिस्वासलम नुन मिह्नग ङेनकाङ्मोः झुनी धेरायो।
Source notes (2)
- Cross-reference भजन १६:१०
- Cross-reference मत्ती १६:१९; १८:१८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.