Kaike Standard Traslation
यूह 11:25
Verse 25 is marked below, with the whole chapter around it. Read from the start
लाजरस सिह्बो
लाजरस मिह्न्न सिमिदी खङ्पा ङ्याह्। नु मरियम रे नुन ति मार्थान नाम बेथानियान ङ्याह्।1 प्रभू मकेकुकेन कुम्म अत्तर छिनछिन नुन लेह् जेँन छमजै फ्याःनान्न मरियम अनै ङ्याह्। नुनै भाइ लाजरस खङ्पा ङ्याह्।2 अन मितिकोवजै येसुन स्याह् झाःम र्वार्वा ल्होन कोर्बो, “प्रभु, सू ङेन मया खेनान, नु खँ।”
जेङ्नै अन ताह्ताह् येसुई र्वाबो, “अन खङ्नान सिचेन भिह्तु नङ्पा, जेङ्नै अन परमेस्वरन महिमान भिह्तु जेङ्पा, ताकि अन्न लम परमेस्वरन ङोह्जोन प्रसङ्सा रायो।” येसुई मार्था, नुन बहिनी रे लाजरसग मया खेँ, जेङ्नै लाजरस खँ र्वानान ताह्ताह् येसु खाः ङ्याह्, हेँ ङेर्या स्याह्ई छ्युङ्बो। आलै येसुई चेलाकाङ्मोः र्वाबो, “स्वा, ता ङ्योअग ह्याङ यहूदिया होलहोल वैमता।” चेलावजै नू र्वाबो, “रब्बी, चोङ्ङा यहूदीवजै नाः लुङजै फ्याङ्चे फाङ्ङ, रे तै ह्याङ ना स्याह्ई वैसुम खेनौ?” येसुई झब बिम्बो, “तै दिनग घन्ता च्योङे मराह्नान तै?” दिनग आउजाउ खेनानग मथ्वानान, तैङर्वाङिन नुई अन सन्सारन साल्म रङ्नान, जेङ्नै छान्जे आउजाउ खेनान सिमि थ्वानान, तैङर्वाङिन छान्जे ता नुन ङ्याबो साल्म मराह्नान। आलै नुई ख्युकाङ्मोः र्वाबो, “ङिन फुरी लाजरस आःपा ङ्याह्, जेङ्नै नू मिवालै सोल्मः ङा स्याह् वैचे।” चेलावजै नू र्वाबो, “प्रभु, नु आःपा ङ्याह् र्वाङिन नु ताःनान ङ्याह्।”
येसुई र्वापान अर्थ चन “लाजरस सितबो” र्वानान ङ्याह्। जेङ्नै चेलावजै चन लाजरस तेम्माई आःपा मात्र ङ्याह् र्वानान छुपा ङ्याह्। येसुई ख्युकाङ्मोः ल खेखे र्वाबो, “लाजरस सिपा ङ्याह्। ङेनजै बिस्वास ख्या र्वार्वा ङेनकोन खातिर ङा स्याह् मीपान कारन स्याङ्पा ङिह्पा। तै रानै ता ङि नुन स्याह् भै।”
तब दिदुमस र्वानान थोमाई जेँन ङ्याबो रह्पान चेलाकाङ्मोः र्वाबो, “स्वा, ङि रे भै, रे नुनै ङ्याबो सीमता।”
येसुन सम्पु ग्युर्नान रे जिन्दगी
जब येसु स्वा ताप्पो, तब लाजरसग तुह्र्सा नाम्पा लिर्या रातपा क्युई रह्पा। बेथानिया यरूसलेमलै ङेह्मः क्वाईमाल्ला किलोमितर सुमतौन ग्याङ्म ङ्याह्। लै यहूदीव मार्था रे मरियमन स्याह् नुन भाईन भारेः ख्युकाङ्मोः सान्त्वना बिम्म स्वापा ङ्याह्।
येसु स्वायङ ङ्याह् र्वानान ताह्ताह् मार्था होई रे नू धोबो। जेङ्नै मरियम यिमै छ्युङ्बो। तब मार्थाई येसू र्वाबो, “प्रभु, ना स्यीह् रह्पान राङिन ता ङन भाइ सिह्नान मह्या। जेङ्नै ता रे ङाः क्युई ङिह्पा, नाई परमेस्वरन ङ्याबो तै तोल्नान, परमेस्वरजै नाः बिन्नान ङ्याह्।” येसुई नू र्वाबो, “नान भाइ ह्याङ सम्पु राह्नान ङ्याह्।” मार्थाई नू र्वाबो, “ङाः क्युई ङिह्पा, कि नु अन्त्यन दिन्न सम्पु ग्युर्नानग ह्याङ सम्पु राह्राह् च्याङ्नान ङ्याह्।”3 येसुई नू र्वाबो, “सम्पु ग्युर्नान रे झुनी ङाई जेङ्पा। ङाः बिस्वास खेनान सिङिनै सम्पु राह्नान ङ्याह्। आलै सोन्नान रे ङन लाह्ः बिस्वास खेनान पुरू हातौयै सिह्नान मह्या। तै ना अन बिस्वास खेनौ?”
नुई येसु र्वाबो, “जेङ्पा प्रभु, ङा बिस्वास खेनान, ना सन्सारग स्वानान मसिह, परमेस्वरन ङोह्जो जेङ्पा।”
येसु दाबो
अकेः र्वार्वा मार्था होई, रे जेँन बहिनी मरियमग कताङ्कताङ् सुतुक्क र्वाबो, “गुरुज्यू स्वा ताप्पो, रे नाः स्वा र्वाङ।” अन ताह्ताह् मरियम हतपत च्याङच्याङ येसुन स्याह् होई। अन्न बेर येसु नामग स्वा ताप्पा मह्या, जेङ्नै नु स्याह्ई ठाउँग ङ्याह् खाः मार्थाई नू दोपा ङ्याह्। यिम नू सान्त्वना बिम्म स्वापा यहूदीवजै मरियम हतपत च्याङच्याङ खोलोः वैपा रङरङ, नु मन तुह्र्साः दामः वैपा जेङ्पा र्वानान छुछु, नुन ङिक जाःबो।
जब मरियम येसु रह्पा ठाउँग स्वाबो रे नू रङ्बो, तब झाःम र्वार्वाई नु येसुन ल्हे ध्वा खेबो, “हे प्रभु, ना स्यीह् रह्पान राङिन ता ङन भाइ सिह्नान मह्या।” जब येसुई नू दापा रे नुन ङ्याबो स्वानान यहूदीव यङ दापा रङ्बो, तब नु समलै मिह्दा बैराः च्याङ्बो आलै लै तुँलाक्या रह्पा। येसुई ख्युकाङ्मोः लोप्पो, “ङेनजै नू खाः लुम्पा ङ्याह्?” ख्युई नू र्वाबो, “प्रभु, स्वास्वा सेह्ना।” येसु दाबो। अन्नकारन यहूदीवजै र्वाबो, “सेह्ना, नुई नू हाति मया खेँ।” जेङ्नै कान-कानजै र्वाबो, “तै कानाः रङ तैनान दोङ्नान नुई अन सिमी र्वार्वा सिपालै सोन फानतैनान मह्या तै?”
येसुई लाजरसग सम्पु दोङ्बो
तब येसु ह्याङ मिह्दा तूँलाक्या राह्राह् तुर्साः होई। अन तुह्र्सा पुदीग ङ्याह्। अन्न ङुर ती लुङजै कप्पा ङ्याह्। येसुई र्वाबो, “लुङ परा।” सिपा सिमिन ति मार्थाई नू र्वाबो, “हे प्रभु, ताह्सुपन बेर ता अन रिह्खामः जाः तपा जेम्तौ, तैङर्वाङिन अन सिपा लिर्या रातबो।” येसुई नू र्वाबो, “तै ङै ना र्वापा नङ्पाऊ, ‘नाई बिस्वास खेङिन परमेस्वरन महिमा रङ्नान ङ्याह्?’” ख्युई लुङ पप्पो। आलै येसुई ङ्यालक्याँ सेनसेन र्वाबो, “हे पा, ङा ङेन ङ्याबो धन्यवाद बिन्चे, तैङर्वाङिन ङेनजै ङन छ्याःफुल्पा ताह्बो। ङा क्युई ङिह्पा, कि ङेनजै ङन छ्याःफुल्पा एकुरो ङ्यान्नान। जेङ्नै स्यीह् थाङथाङ छ्युङ्पा मोङ्न खातिर ङै अन र्वापा जेङ्पा, ताकि ङेनजै ङाः फेप्पा जेङ्पा र्वार्वा ख्युई बिस्वास ख्याःयो।” आलै अन ल्होई र्वामी येसुई केह्ः किमई फाईरा खेबो, “लाजरस, खोलोः गेग्गे स्वा।” अन सिपा सिमि नुन लाह् रे लेह् पत्तीजै खीपागै रे नह्मी घोलाङजै च्योम्पागै खोलोः गेग्गे स्वाबो। येसुई ख्युकाङ्मोः र्वाबो, “नुन खीपा फोला, रे नू वैफाना।”
येसुन बिरोधग सदेन्त्र
(मत्ती २६:१-५; मर्क १४:१-२; लुक २२:१-२)
मरियमन स्याह् स्वापा लै यहूदीवजै येसुई खेपा धोन रङरङ नुन लाह्ः बिस्वास खेबो। जेङ्नै ख्युन बर्ग कान चन फरिसीवन स्याह् होई, रे येसुई खेपा धोनव स्याप्पो। तब ङोत्वा पुजारीव रे फरिसीवजै महासभान सदस्यकाङ्मोः घ्वाबो रे नू र्वाबो, “ता ङ्योअग तै खेचे? तैङर्वाङिन अन सिमि ता लै ताईलुवान धोनव खेपाई ङ्याह्। अनग झामै ख्योवाङिन पुरूजै अन्न लाह्ः बिस्वास खेनान ङ्याह्, रे रोमी आङ खेनान्न सिमिवजै स्वास्वा ङ्योअन आराधनालय रे ङ्योअन देस ङ्योरुमग मीपा दोङ्नान ङ्याह्।”
जेङ्नै ख्युन बर्ग तीपा, कैयाफा, सु मन पाह्ङन प्रधान पुजारी ङ्याह्, नुई ख्युकाङ्मोः र्वाबो, “ङेन ङ्याबो तये क्युई मह्या! लै देस मीपा राचेन खेरे बरु जनतान भिह्तु सिमिदी सिचेई ङेनकोन भलो ङ्याह् र्वार्वा ङेन हामकोँ।” अन नुई जेँनै लम र्वापा मह्या, जेङ्नै अन्न पाह्ङन प्रधान पुजारी रह्पान कारन देसन भिह्तु येसु सित्वानान र्वानान भबिस्यबानी र्वापा जेङ्पा। देसन भिह्तु मात्र नुई अन र्वापा मह्या, जेङ्नै खास्या पुरू रह्पा परमेस्वरन सिमि ङ्याबो रूचेन भिह्तु अन र्वापा ङ्याह्।
अन्नकारनजै मन्न लाह्ःलै यहूदी आङ खेनान्न सिमिवजै येसु सच्चेन सदेन्त्र खेबो। अन्नकारन येसु ह्याङ यहूदीवन घूँ हाकाहाकि आउजाउ मखेबो, जेङ्नै स्याह्लै सुनसान ठाउँन ङेह्मः रह्पान एफ्राइम र्वानान सहरग होई, रे स्याह् चेलावन ङ्याबो छ्युङ्बो। यहूदीवन निस्तार तेवर ङेह्मः ङ्याह्, रे नाम-नामलै लै सिमिव राह्ङराङ्साः छाङ्म दोङ्चे र्वार्वा निस्तार तेवरन सुरु राचेन ङू यरूसलेमग होई।4 तब ख्युई येसू फाप्पो, आलै ख्यु आराधनालयग च्याङ्तौ राह्ङराङ्साः र्वामः जाःबो, “ङेनकाङ्मोः कताःम लाई राँ, तै नु तेवरग स्वादरा?” ङोत्वा पुजारीव रे फरिसीवजै चन येसु जुङ्मः नु खाः ङ्याह् र्वार्वा सुई क्युई राङिन ताह्फेरा र्वानान्न आग्या बिम्पा ङ्याह्।
Source notes (4)
- Cross-reference लुक १०:३८-३९
- Cross-reference यूह १२:३
- Cross-reference प्रे २४:१५
- Cross-reference २ इति ३०:१७
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.