Kaike Standard Traslation
यूह 10
ग्वाल्यान द्रिस्तान्त
येसुई र्वाबो तेम्माई, ङा ङेनकाङ्मोः र्वाचे, “कन लूपा त्याःनान भङन झलालै झिङ मजाःङ, जेङ्नै घङक्याँलम चपचप जाःङ, नु चन खुम्पा रे च्यापा जेङ्पा, जेङ्नै झलालै झिङ जाःनान चन लूपान ग्वाल्या ल जेङ्पा। झला पोङ्नानजै नुन भिह्तु पोङ्नान, रे लूपावजै नुन केह्ः ङ्यान्नान, रे नुई जेँन लूपाकाङ्मोः मिह्न छ्युई-छ्युई कताङ्नान, आलै ख्युकाङ्मोः खोलोः वन्नान। जब नुई जेँन लूपाकाङ्मोः पुरू खोलोः छ्यूछ्यू ताह्नान, नु ख्युन ङूह्ङूह् लेन्नान, रे लुपाव नुन ङिक जाःनान, तैङर्वाङिन ख्युई नुन केह्ः स्योःनान। जेङ्नै मस्योपा सिमिन ङिक ख्यु मजानान, जेङ्नै नुन स्याह्लै ज्यार्नान ङ्याह्। तैङर्वाङिन मस्योनान सिमिन केह्ः ख्युई मस्योनान।” येसुई ख्युकाङ्मोः अन द्रिस्तान्त र्वाबो, जेङ्नै नुई ख्युकाङ्मोः र्वापा ल्होईन अर्थ ख्युई हामकोबो।
येसु ग्वाल्या ल
अन्नकारन येसुई ह्याङ ख्युकाङ्मोः र्वाबो, “तेम्माई, ङा ङेनकाङ्मोः र्वाचे, लूपावन झला ङाई जेङ्पा। ङनखेरे ङू स्वानान पुरू खुम्पा रे च्यापाव जेङ्पा, जेङ्नै लूपावजै ख्युन ल्होई मङ्याम्बो।1 झला ङाई जेङ्पा, यदि सिमि सु ङा लम झिङ जाःङिन अन उद्धार देन्नान ङ्याह्, रे झिङ-खोलोः आउजाउ खेनान ङ्याह्, रे क्वा झाचे देन्नान ङ्याह्।”2 “खुम्पा ता खुम, सह्म्मः रे मीपा दोङ्मः मात्र स्वानान। ङा ता ख्युई झुनी धेरायो, रे अन हाति र्वार्वा धेरायो र्वार्वा स्वापा।”
ङा ग्वाल्या लः जेङ्पा। ग्वाल्या लजै जेँन लूपावन भिह्तु जेँन परान थोन्नान।3 ज्याला वव्वै ग्वाला खेनान्न सिमि चन लूपावन जेँनै ग्वाल्या लैम नङ्पा। नुई ता फारा स्वापा रङरङ लूपाकाङ्मोः ख्योवाख्योवा अन ज्यार्नान, रे फाराई लूपाकाङ्मोः झम्ति खेखे वन्नान, रे खातत्त्याग वैफान्नान। अन ज्यार्नान, तैङर्वाङिन अन भारान सिमि जेङ्पा, नुई लूपान वास्ता तये मखेनान। “ङा ग्वाल्या ल जेङ्पा, ङा जेँन लूपाकाङ्मोः स्योःनान, आलै ङन लूपावजै ङाः स्योःनान। कुजुई पाई ङा स्योःनान, ङा पा स्योःनान, आलै ङा लूपावन भिह्तु जेँन जिन्दगी बिन्नान।”4 “ङन घङ लूपा ङिह्पा, सु अन भङन नङ्पा। ख्युकाङ्मोः यङ ङै सत्त्वापा ङिह्पा, रे ख्युई ङन बचन ङ्यान्नान ङ्याह्, रे ख्यु मोह्ङदी राह्नान ङ्याह्, रे ग्वाल्या ती राह्नान ङ्याह्।5 पाई ङा अन्नकारन मया खेँ, तैङर्वाङिन ङा जेँन परान ह्याङ होलहोल वस्सुमजै थोच्चे। सुई ङनलम ङन परान वतमतैनान, जेङ्नै ङा जेँनै समजे जेँन जिन्दगी बिन्नान। जेँन जिन्दगी बिन्नान्न आङ ङन ङ्याबो ङिह्पा, आलै ह्याङ वन्नान्न आङ रे ङन ङ्याबो ङिह्पा। अन आग्या ङै ङन पा लम देप्पा ङिह्पा।” अन बचन्न कारनजै यहूदीवन घूँ ह्याङ भाचे रह्पा। ख्युन बर्ग लैजे र्वाङ, “अनग मुई सेम्पा ङ्याह्, रे अन युङ्पा ङ्याह्। ङेन अन्न ल्होई तैङ ङ्यान्नान?” घङवजै र्वाङ, “मुई सेम्पा सिमिन ल्होई झाम मराह्नान। तै मुई काना सिमिन मी पोङ तैनान तै?”
येसु अस्वीकार खेपा
यरूसलेमग परमेस्वरग आराधनालय थोन्नान्न तेवर ङ्याह्। अन गुन्जेन भेला ङ्याह्। येसु यरूसलेम आराधनालयन झिङ सोलोमन्न नाह्पू तुह्ईतुह्ई छ्युङ्पा ङ्याह्। यहूदीवजै नुन लिब्रुङक्याँ जोमजोम लोप्पो, “हातौन बेर ना ङ्योअग आच्यामाच्या नान्नान? ना मसिह जेङ्न ङ्योअग तेम्मा र्वा।”
येसुई ख्युकाङ्मोः झब बिम्बो, “ङै ङेनकाङ्मोः र्वातपा ङिह्पा, जेङ्नै ङेन बिस्वास मखेँ। ङन पान मिह्नग तै धोन ङा खेँ, नुई ङन साँचि बिन्नान। जेङ्नै ङेन बिस्वास मखेँ, तैङर्वाङिन ङेन ङन लूपावन बर्गन नङ्पा। ङन लूपावजै ङन केह्ः ङ्यान्नान, रे ख्युकाङ्मोः ङा स्योःनान, रे ख्यु ङन ङिक स्वानान। ख्युकाङ्मोः ङा मताह्नान्न झुनी बिन्चे, रे ख्यु हातौयै मीपा राह्नान मह्या, रे सुई ख्युकाङ्मोः ङन ल्हालै तलतल वन्नान मह्या। ङन पाई मन ङाः बिम्पा ङिह्पा, नु पुरून खेरे महान ङिह्पा। पान ल्हालै सुई ख्युकाङ्मोः तलतल वत्तैनान मह्या। पा रे ङा ती जेङ्पा।”
अन ल्होई ताह्मी यहूदीवजै येसू फ्याङ्चे र्वार्वा लुङ चाबो। येसुई ख्युकाङ्मोः र्वाबो, “ङै ङेनकाङ्मोः ङन पा लम लै धोन ल थम्पा, मन बर्ग कन धोन्न भिह्तु ङेन ङा लुङजे फ्याङ्सुम खेनान?”
यहूदीजै नू झब बिम्बो, “धोन लन भिह्तु ङ्योअ नाः लुङजै मफ्याङ्नान, जेङ्नै परमेस्वरन ल्हुई झपान कारन, तैङर्वाङिन ना सिमि राह्राह् यङ जेँगै परमेस्वर दोङ्चे फाङ्ङ।”6 येसुई ख्युकाङ्मोः झब बिम्बो, कानुनग सर्पा अन्सार, “परमेस्वर र्वाङ, ङेन लाव जेङ्पौ?”7 ङ्योअग क्युई ङिह्पा कि पबित्रसास्त्रजै र्वापा ल्होई मताह्नान्न जिन्दगीन भिह्तु तेम्मा जेङ्पा। रे परमेस्वरजै मन सिमिकाङ्मोः लाव र्वाबो, सू नुन ल्होन बिम्पा ङ्याह्। पाई ङाः दमदम सन्सारग फेप्पो। “ङा परमेस्वरन ङोह्जो जेङ्पा” र्वातौ कुजुई परमेस्वरन ल्हुई झपा राह्नान? यदि ङै ङन पान इच्छ्यान धोन खेपा मीपा र्वाङिन ङन लाह्ः बिस्वास नख्या। जेङ्नै यदि ङा पान धोन खेँ जेङ्नै ङेन ङन लाह्ः बिस्वास मखेङिन अन धोनवन लाह्ः बिस्वास ख्या, रे ङेनजै क्युई रा तैनान ङ्याह् रे हाकोनान ङ्याह्, कि पा ङन ङ्याबो ङिह्पा रे ङा पान ङ्याबो ङिह्पा।
यहूदीवजै ह्याङ नू जुङ्चे फाप्पो, जेङ्नै नु ख्युन ल्हालै बुप्पो। आलै नु ह्याङ यर्दन चाङ्पुन धिक्याँ मन ठाउँग होई, खाः यूहन्नाई पहिली बप्तिस्मा बिङ्ङ, रे नु स्याह्ई छ्युङ्बो। लै सिमिव नुन स्याह् स्वामः जाःबो, रे ख्युई र्वाबो, “यूहन्नाई ताईलुवान धोन तये मखेबो, जेङ्नै यूहन्नाई नुन भारेः तयाः-हाति र्वापा ङ्याह् अन तेम्मा जेअँ।” आलै स्याह् लै सिमिवजै नुन लाह्ः बिस्वास खेबो।
Source notes (7)
- Cross-reference यर २३:१; यूह १०:२७
- Cross-reference भजन ११८:२०
- Cross-reference भजन २३:१; यसै ४०:११; इज ३४:१५
- Cross-reference मत्ती ११:२७; लुक १०:२२
- Cross-reference यसै ५६:८; इज ३४:२३; ३७:२४
- Cross-reference लेवी २४:१६
- Cross-reference भजन ८२:६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.