Kaike Standard Traslation
यूह 9
केतौलैन कानाः येसुई ताःफाम्पा
स्याह्लै वैतौवैतौ येसुई तीपा केतौलैन काना चोलोङ्चाः रङ्बो। नुन चेलावजै नू लोप्पो, “रब्बी, सुई तीपा खेबो, अनजै कि अन्न पोमाई, रे अन काना केह्बो?”
येसुई झब बिम्बो, “न ता अनजै तीपा खेबो न अन्न पोमाई, जेङ्नै अन अन्नकारनजै केह्तौलैन काना रह्पा कि परमेस्वरन सक्तिन धोन अन सिमिन जिन्दगी रँयो। ङिजेन साल्म रातौ यङ ङाः फेन्नान्न धोनव ङ्योअजै खेत्वानान। नम्जे रुप्मी सुई र्वार्वा धोन खे मतैनान। ङा सन्सारग रानबेर ङा सन्सारन साल्म जेङ्पा।”1
अन ल्होई र्वार्वा नुई साः छिमा पप्पो, रे छिमाई सा मोलमोल धामा नुन मी छिम्बो। आलै येसुई नू र्वाबो, “वया, सिलोआमको (कन्न अर्थ जेङ्पा, फेप्पा) पोखरी वैवै केवा।” नुई वैवै क्वबो, रे रङ्नान राह्राह् होल्बो।2 नुन खिम्जेःव रे नू भिख तोल्पा रङ्नानवजै र्वाबो, “लमग छ्युङछ्युङ भिख तोल्नान सिमि तै अन नङ्पाऊ?” कान-कानजै र्वाबो, “अन नुई जेङ्पा।” घङजै र्वाबो, “नङ्पा, अन नुई लैम रँ।” नुई र्वाबो, “ङा नुई जेङ्पा।” तब ख्युई नू लोप्पो, “ना कुजुई रङ तैनान रह्पा?” नुई झब बिम्बो, “येसु र्वानान्न सिमिदीजै सान धामा दोङदोङ ङन मी छिनछिन ङाः र्वाबो, ‘सिलोआमग वया रे केवा।’ तब वैवै ङै क्योःपा, रे ङा रङ तैनान रह्पा।” ख्युई नू र्वाबो, “नु खाः ङ्याह् न?” नुई र्वाबो, “ङा क्युई मीपा।”
फरिसीवलम ताःफान्नान्न भिह्तु छोए सेन्नान
ङू काना रह्पा मन सिमी ख्युई फरिसीवन स्याह् सप्पो। कन्न दिन येसुई सान धामा दोङदोङ मन काना सिमी रङ तैनान दोङ्पा ङ्याह् अन नाह्न ल्हाः ङ्याह्। फरिसीवजै नू लोप्पो, “ना कुजुई रङ तैनान रह्पा?” नुई ख्युकाङ्मोः र्वाबो, “नुई ङन मी सान धामा छिम्बो, आलै ङै क्योःपा रे रङ तैनान रह्पा।”
फरिसीवन बर्ग कान-कानजै र्वाबो, “अन सिमि परमेस्वरलम स्वापा नङ्पा, तैङर्वाङिन नुई नाह्न ल्हाः मङ्याङ्ङ।” जेङ्नै घङवजै र्वाबो, “कुजुई पापी सिमिजै झाम ताईलुवान धोनव खेतैनान?” रे ख्युन घूँ भाचे रह्पा। ख्युई मन कानाः ह्याङ लोप्पो, “नुई नान मी रङ तैनान दोङ्दँ, ता नुन भारेः ना तै र्वाचे?” नुई झब बिम्बो, “नु भबिस्यबक्ता जेङ्पा।”
रङ्चे देन्नान सिमिन पोमा घ्वाघ्वा मलोप्पान बेर यहूदी आङ खेनान्न सिमिवजै अन काना ङ्याह् रे रङ्नान रह्पान र्वार्वा बिस्वास मखेबो। तब ख्युई काना सिमिन पोमा लोप्पो, “तै अन ङेन ङोह्जो जेङ्पौ सु काना केह्पा ङ्याह् र्वार्वा ङेन र्वाङ? ता कुजुई अन रङ तैनान रह्पा?” नुन पोमाई ख्युकाङ्मोः र्वाबो, “ङि स्योःनान अन ङिन ङोह्जो जेङ्पा, रे काना केह्पा ङ्याह्। जेङ्नै ता अन कुजुई रङ्नान रह्बो ङी क्युई मीपा, आथबा नुन मी सुई पोङ्बो अन यङ ङी क्युई मीपा। अन्न उमेर छिप्पी रह्पान ङ्याह्, अनगै ल्होरा। जेँन भारेः नुह्ँ ल्होई र्वानान ङ्याह्।” नुन पोमाई अन ल्होई र्वाबो, तैङर्वाङिन ख्यु यहूदी आङ खेनान्न सिमिव खेरे ङिह्ङ्ङ। तैङर्वाङिन सुई नू मसिह र्वार्वा स्वीकार खेङिन, नू यहूदी आराधनालयलै छ्युत्वानान र्वार्वा यहूदीव ङूई दीपा ङ्याह्। अन्नकारन नुन पोमाई र्वाबो, “अन्न उमेर छिप्पी रह्पा ङ्याह्, नू ल्होरा।”
तब ख्युई अन केतौलैन कानाः ङेरेप स्वा र्वार्वा रेनरुफानैफानै र्वाबो, “परमेस्वरन प्रसङ्सा ख्या। ङी क्युई ङिह्पा अन सिमि पापी जेङ्पा।” नुई झब बिम्बो, “नु पापी जेम कि नम, ङा क्युई मीपा। ङा ल्होईदी मात्र क्युई ङिह्पा कि ङा काना ङ्याह्, जेङ्नै ता रङ्नान।” तब ख्युई नू र्वाबो, “नुई ना तै खेबो? नुई नाः कुजुई रङ तैनान दोङ्बो?” नुई ख्युकाङ्मोः झब बिम्बो, “ङै ङेनकाङ्मोः ङू यङ र्वातपा, जेङ्नै ङेनजै मङ्याम्बो। ता ह्याङ तैङ ङ्यानसुम खेनान? ङेन यङ नुन चेला रासुम खेनान कि कुजु?”
ख्युई नू ङारैङारै र्वाबो, “ना पो नुन चेला जेङ्पा, जेङ्नै ङि ता मोसान चेला जेङ्पा। ङ्योअग क्युई ङिह्पा मोसान ङ्याबो परमेस्वरजै ल्होई र्वापा ङ्याह्, जेङ्नै ङ्योअग क्युई मीपा अन सिमि चन खालै स्वापा जेङ्पा।” अन सिमिजै झब बिमबिम ख्युकाङ्मोः र्वाबो, “कत्याम हालाईचेन ल्होई! नु खालै स्वापा जेङ्पा ङेन ङ्याबो क्युई मीपाऊ, जेङ्नै ङन मी नुई पोङ्बो। ङ्योअग क्युई ङिह्पा कि परमेस्वर पापीवन ल्होई मङ्यान्नान, जेङ्नै परमेस्वरग ङिन्नान रे नुन इच्छ्या ङ्यान्नान सिमिन ल्होई परमेस्वरजै ङ्यान्नान।3 सन्सारन सुरुलै झाम केह्पालैन काना सिमी सुई रङ तैनान दोङ्पा ल्होई हातौयै ताह्पा मीपा। यदि अन सिमि परमेस्वरलम मस्वापा राङिन नुई तये खेतैनान मह्या।” ख्युई नू झब बिमबिम र्वाबो, “ना ता तेम्माई तीपा केह्पा ङ्याह्, रे तै ता ना ङ्योअग लनसुम खेनौ?” आलै ख्युई नू यहूदी आराधनालयलै खोलोः छ्यूबो।
आत्मान काना
ख्युई नू खोलोः छ्यूबो र्वानान येसुई ताह्बो, रे नू दोदो र्वाबो, “तै ना सिमिन ङोह्जोन लाह्ः बिस्वास खेनौ?” नुई झब बिमबिम र्वाबो, “प्रभु, नु सु जेङ्पा? ङा नुन लाह्ः बिस्वास खेनान ङिह्पा?” येसुई नू र्वाबो, “नाई नू रङ्पा ङिह्पाऊ, आलै नान ङ्याबो ल्होई र्वानान नुई जेङ्पा।” तब नुई र्वाबो, “प्रभु, ङा बिस्वास खेचे, रे नुई नू ध्वाः खेबो।”
आलै येसुई र्वाबो, “ङा न्यायन भिह्तु अन सन्सारग स्वापा कि मरङ्नानवजै रँयो रे रङ्नानव चन काना राःयो।” अन ल्होई ताह्ताह् नुन रह्म्म राह्नान फरिसीवन बर्ग कान-कानजै नू र्वाबो, “तै ङ्योअ रे काना जेङ्पौ?” येसुई ख्युकाङ्मोः र्वाबो, “ङेन काना जेङ्न ता तीपान दोसी राह्नान मह्या, जेङ्नै ङेन ‘ङ्योअग रङ्नान’ र्वाङ, अन्नकारन ङेन हेँ दोसी ङिह्पा।”
Source notes (3)
- Cross-reference मत्ती ५:१४; यूह ८:१२
- Cross-reference यसै ३५:५
- Cross-reference हितो १५:२९
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.