Kaike Standard Traslation
यूह 12
बेथानियाग येसुन अभिसेग
(मत्ती २६:६-१३; मर्क १४:३-९)
निस्तार-तेवरन रूर्यान ङू येसु बेथानियाग स्वाबो। स्याह् लाजरस छ्युँ, सू येसुई सिह्पालै सम्पु दोङ्पा ङ्याह्। ख्युई येसुन भिह्तु स्याह् ङ्याजेन ङ्योप्पा दोङ्बो। मार्थाई सेवा खेँ, आलै लाजरस चन नुन ङ्याबोई झाम छ्युङ्पावन बर्ग तीपा ङ्याह्। तब मरियमजै लितर फेःतौ जतामसी छाङ्मन रिह् स्याम कुम्म अत्तर सस्सै येसुन ल्हेग दुप्पो, आलै नुन ल्हे जेँन छमजै फ्याबो, रे अत्तरन रिह् स्यामै यिम नाङ्बो।1 जेङ्नै येसुन चेलावन बर्ग तीपा, आथबा नू बिस्वासघात खेनान यहूदा इस्करियोतजै र्वाबो, “अन मकेकुकेन कुम्म अत्तर क्याम सुम मुलन सिक्का र्युर्र्युई अन सोङ बिखारीकाङ्मोः तैङ मबिम्बो?” जेङ्नै नुई बिखारीवन वास्ता खेखे अन र्वापा मह्या, तैङर्वाङिन नु खुम्पा ङ्याह्, रे सोह्ङन खुन्चा नुई नाह्ङ्ङ, आलै स्याह्लै खुचे खेँ।
तब येसुई र्वाबो, “नू तये नर्वा, ङन लुम्चेन-दिन्न भिह्तु नू अन नानफाना। तैङर्वाङिन बिखारीव एकुरो ङेन ङ्याबो राह्नान, जेङ्नै ङा ता एकुरो ङेन ङ्याबो मराह्नान।”2
लाजरसन बिरोधग सदेन्त्र
यहूदीवन मोङ किमदीजै येसु स्याह् ङिह्पा र्वानान क्युई रह्पा, रे नुन खातिरग मात्र नङ्पा, जेङ्नै नुई सिह्पालै सम्पु दोङ्पा लाजरसगै सेन्चे र्वार्वा ख्यु स्वापा ङ्याह्। आलै ङोत्वा पुजारीवजै लाजरसगै सच्चेन योजना खेबो। तैङर्वाङिन नुई खेखे लैः यहूदीवजै ख्युकाङ्मोः अस्वीकार खेईखेई येसुन ङ्याः बिस्वास खेमः जाःपा ङ्याह्।
येसु क्यालक्याल यरूसलेमग जाःपा
(मत्ती २१:१-११; मर्क ११:१-११; लुक १९:२८-४०)
घङ्न लाह् निस्तार तेवरग स्वानान मोङ किमै येसु यरूसलेमग स्वायङ ङ्याह् र्वानान ताह्बो, रे सिमिव खजुरन धाव वव्वै नू स्वागत खेमः फाईरा खेईखेई गेप्पो, “झयजक्कार राःयो! धन्न परमप्रभुन मिह्नग स्वानान इस्राएलन झली!”3 आलै पुँह्न तजादी दोदो येसु नुन लाह्ः चप्पो, कुजु पबित्रसास्त्रग सर्पा ङ्याह्, “सियोन्न चमेः, नङिना। सेह्ना, नान झली पूँह्न तह्जान लाह्ः चपचप स्वायङ ङ्याह्।”4
“अन ल्होईव येसुन चेलावजै ङू हामकोबो। जेङ्नै येसुन महिमा रामी अन ल्होई नुन भारेः पबित्रसास्त्रग सर्पा ङ्याह्, रे अन धोन नुन भिह्तु ख्युई खेपा जेङ्पा र्वार्वा ख्युई छुबो।”
येसुई लाजरसग तुह्र्सालै घ्वाघ्वा खोलोः सिह्पालै सम्पु दोङ्तौ नुन ङ्याबो ङिह्पान मोङन सिमिवजै नुन साँचि बिम्पाई लुईबो। नुई अन हालाईचेन धोन खेपा ङ्याह् र्वार्वा ताह्पा राह्राह् यङ मोङ नू धोमः वैपा ङ्याह्। तब फरिसीवजै राह्ङराङ्साः र्वामः जाःबो, “सेह्ना, ङेन लम तये राह्नौ नङ। सन्सारै नुन ङिक जाःतबो!”
कान ग्रीकवजै येसू फाप्पो
तेवरग आराधना खेनानवन बर्ग कान-कान ग्रीकव रे ङ्याह्। ख्यु गालीलन बेथसेदा छ्युङ्नान फिलिपन स्याह् स्वास्वा झाःम र्वार्वा छ्याःफुल्बो, “गुरुज्यू, ङ्योअ येसू दोसुम ङिह्पा।”
फिलिपजै वैवै अन्द्रियासग र्वाबो, रे अन्द्रियास रे फिलिप ङ्योरुम वैवै येसु र्वाबो। येसुई ख्युकाङ्मोः झब बिम्बो, “सिमिन ङोह्जोन महिमित राचेन भेला स्वा ताप्पा ङ्याह्। तेम्माई, ङा ङेनकाङ्मोः र्वाचे, रुन्जन्न गेल्ला सा छारछार मसिङिन अन तितिमाई लुईनान। जेङ्नै अन सिङिन नुई फल लै छ्यानान। जेँन परानग मया खेनानजै अन मोल्नान, जेङ्नै जेँन परानग अन सन्सारग कत्याम छुनानजै चन मताह्नान्न जिन्दगीन भिह्तु अन ताह्ः खेखे नान्नान5 सुई ङन सेनताप खेङिन नु ङन ङिक जायो रे ङा खाः ङिह्पा, ङन सेवक यङ स्याह् ङन ङ्याबो राह्नान ङ्याह्। सुई ङन सेवा खेङिन पाई नुन सम्मान खेनान ङ्याह्।
येसु जेँ सिचेन भिह्तु र्वापा
“ता ङन परान बिचल्लि रह्पा ङिह्पा, रे ङा तै र्वाचे? ‘हे पा, ङा अन्न भेलालै सोमफाना’? नङ्पा, अन्न कारनजै ङा अन्न भेला थाल स्वा ताप्पा ङिह्पा। हे पा, नान मिह्न्न महिमा ख्या।” तब स्वर्गलै झाम ती केह्ः स्वाबो, “ङै अन महिमा खेपा ङिह्पा, रे ह्याङ खेनान ङिह्पा।”
स्याह् च्याङ्पा मोह्ङजै अन ताह्ताह् र्वाबो, “अन धू तिह्पा जेङ्पा!” घङवजै र्वाबो, “स्वर्गदुत नुन ङ्याबो ल्होई र्वापा जेङ्पा!”
येसुई ख्युकाङ्मोः झब बिम्बो, “अन केह्ः ङन भिह्तु रह्पा नङ्पा, जेङ्नै ङेन भिह्तु जेङ्पा। ता अन सन्सारन न्याय राह्नान। अन सन्सारन ङोत्वा हाकिम खोलोः पन्नान ङ्याह्। आलै ङा जब पिर्थीबिलै थीनान, ङा सिमि पुरूग जेँनक्याँ कान्नान ङ्युँ।” नु कुजुई सिह्नान, अन ताह् बिन्चेन भिह्तु नुई झाम र्वापा ङ्याह्।
मोह्ङजै येसु लोप्पो, “मसिह एकुरोभरि लुईनान र्वार्वा कानुन लम ङ्योअजै ताह्पा ङिह्पा। ना कुजुई र्वातैनान, सिमिन ङोह्जो थित्वानान रु? अन सिमिन ङोह्जो चन सु जेङ्पा?”6
येसुई ख्युकाङ्मोः र्वाबो, “हेँ ङाईन बेर ताह्म ङेन ङ्याबो ङिह्पा। साल्म ङेन ङ्याबो रान बेर आउजाउ ख्या, ताकि नातुमाई ङेनकाङ्मोः नकबाःयो। सुई नातुमा आउजाउ खेङिन, नुई ङह् खाः वैपाई ङिह्पा, अन क्युई मराह्नान। जब थाल साल्म ङेन ङ्याबो ङिह्पा साल्म बिस्वास ख्या, रे ङेन ताह्मन सन्तान रा।” अन ल्होई र्वामी, येसु स्याह्लै होई, रे ख्युन लम पेर्बो।
सिमिवन अबिस्वास
येसुई ख्युन ङू अकेःन ताईलुवान धोनव खेपा ङ्याह्, जेङ्नै ख्युई नुन लाह्ः बिस्वास मखेबो। अन ङोत्वाखाईमे ङ्याह्, कि यसैया भबिस्यबक्तान बचन पुरा राःयो, “हे परमप्रभु, ङ्योअन ल्होन सुई बिस्वास खेबो? आलै परमप्रभुन सक्ति सू थम्बो?” अन्नकारन ख्युई बिस्वास खे मतैबो, तैङर्वाङिन यसैयाई ह्याङ अन यङ र्वापा ङ्याह्, “परमेस्वरजै ख्युकाङ्मोः रङ मतैनान दोङ्पा ङ्याह्, रे ख्युन सम क्योङ्म दोङ्दोङ् नाम्पा ङ्याह्, झामखेखे ख्युई मी नरँयो, आलै समजै हानकोवाःयो, तेमन्ता ख्यु होल्नान ङ्याह् रे ङै ख्युकाङ्मोः ताह् फानत्वानान।”7
यसैयाई अन ल्होई र्वाबो, तैङर्वाङिन नुई येसुन महिमा रङ्बो, रे नुन भारेः र्वाबो।
जेङ्नै यहूदी अगुवावन बर्ग लैजे येसुन लाह्ः बिस्वास खेबो, जेङ्नै फरिसीवन ङिनङिन, रे ख्युई यहूदी आराधनालयलै छ्यूनान र्वार्वा ङिनङिन अन स्वीकार मखेबो। तैङर्वाङिन परमेस्वरन प्रसङ्सान खेरे सिमिन प्रसङ्सा खेचे ख्यु ह्याल्म स्याँ।
येसुन बचनलम न्याय
येसुई केह्ः किमई र्वाबो, “ङाः बिस्वास खेनानजै ङाः नङ्पा, जेङ्नै ङाः फेन्नान्न लाह्ः बिस्वास खेनान। सुई ङाः रँ, नुई ङाः फेन्नानग रङ्नान। ङा सन्सारग ताह्म राह्राह् स्वापा ङिह्पा, ताकि ङन लाह्ः बिस्वास खेनान सुस्याङ नातुमा नलुयाःयो।” “सुई ङन बचन ङ्यान्नान, रे मन मङ्याङ्ङिन, ङा नुन न्याय मखे। तैङर्वाङिन ङा सन्सारन न्याय खेमः स्वापा नङ्पा, जेङ्नै सन्सारग सोमफाम्मः स्वापा जेङ्पा। ङाः बिस्वास मखेनान रे ङन ल्होन स्वीकार मखेनान्न भिह्तु न्यायदिसदी ङ्याह्। कन बचन ङै र्वापा नुई अन्त्यन दिनग नुन न्याय खेनान ङ्याह्। तैङर्वाङिन ङै जेँनै तर्फलम ल्होई मर्वापा, जेङ्नै ङै तै र्वा त्वानान तै जेङ्पा, रे तै र्वात्वानान जेङ्पा, ङा फेन्नान पा नजै ङा आग्या बिम्पा ङिह्पा। ङा स्योःनान, कि नुन आग्या मताह्नान्न झुनी जेङ्पा। अन्नकारन ङा तै र्वानान, पाई ङा र्वापालैम र्वानान।”
Source notes (7)
- Cross-reference लुक ७:३७-३८
- Cross-reference कानुन १५:११; मर्क १४:७
- Cross-reference भजन ११८:२५-२६
- Cross-reference जक ९:९
- Cross-reference मत्ती १०:३९; मत्ती १६:२५; मर्क ८:३५; लुक ९:२४; लुक १७:३३
- Cross-reference भजन ११०:४; यसै ९:७; इज ३७:२५; दान ७:१४
- Cross-reference यसै ६:१०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.