Juray Soura Bible
ମନଙ୍ ଞନଙ୍ଞଙ୍ବର୍ 7
ଏ ଅ ଅନ୍ଞେନ୍, ବର୍ନେଞେନ୍ ଅଡ଼୍କୋନ୍ ମାନ୍ନେଆ ଆରି ବନାଁୟ୍ବର୍ଞେନ୍ ଅମଙ୍ନମ୍ ତର୍ତୁମ୍ଲେ ଡକ୍କୋଆ । ଞନଙ୍ଞଙନ୍ ଅଡ଼୍କୋନ୍ ମାନ୍ନେଆ, ଏତ୍ତେଲ୍ଡେନ୍ ଆମନ୍ ଅମେଙ୍ତମ୍ ଆରି ଅବାୟ୍ମଡ୍ନମ୍ ଅନ୍ତମ୍ ବନାଁୟ୍ଞେନ୍ ଜୁବାୟ୍ଲେ ଡକ୍କୋଆ । ଅଣ୍ତେର୍ସିଲୋଙ୍ନମ୍ ଅଡ଼୍କୋନ୍ ତିଆତେ ଜିବାଡା; ଉଗ୍ଗର୍ ପଟାଲୋଙ୍ନମ୍ ତିଆତେ ଅଡ଼୍କୋନ୍ ଇଡ୍ଲେ ଡକ୍କୋଆ । ଗିଆନନ୍ଆଡଙ୍ ବରା, ଆମନ୍ ତନାନ୍ଞେନ୍, ଆରି ମନଙ୍ ଅନିୟମନ୍ଆଡଙ୍ ଅସିଙ୍ମର୍ଞେନ୍ ଗାମ୍ଲେ ବରା । ଏତ୍ତେଲ୍ଡେନ୍ ଆନିଞ୍ଜି ବମନ୍ରା ଆଡୁକ୍ରି ସିଲଡ୍, ଆରି ତୁର୍ବିଲଙ୍ବଜନ୍ ଆତନଙଡ୍ ସିଲଡ୍ ଆମନ୍ଆଡଙ୍ ଡୋବ୍ତମ୍ଞ୍ଜି । ଞେନ୍ ଅସିଙ୍ଞେନ୍ ଆ ଜର୍କାଲୋଙ୍ ମେତଙ୍ ଡରଙ୍କାବ୍ଗଡ୍ ପେର୍ମୋଡ୍ଲେ ଗିୟ୍ଲାୟ୍, ସିଲଡ୍ତ୍ତେ ଞେନ୍ ଗିୟ୍ଲାୟ୍, ଏର୍ଗିଆନନ୍ ଆମଙ୍ଲୋଙ୍ ଆରି ଅମ୍ମଡ୍ଲାୟ୍ ବେଣ୍ଡିଆଞ୍ଜି ଆମଙ୍ ସିଲଡ୍ ବୟ୍ନେ ଏର୍ବୁଡ୍ଡି ବେଣ୍ତିଆମରନ୍ ସିଲଡ୍ତ୍ତେ ଆନିନ୍ ଜୋଣ୍ତଡ଼ିବଜନ୍ ଆସିଙ୍ ଆଲଙ୍ନେଗଡ୍ ସନ୍ଲେ ଆନିନ୍ ଆସିଙ୍ବାନ୍ ଆଜିର୍ତେନ୍ ଆ ତଙର୍ଗଡ୍ ତଙିୟ୍ଲନ୍ । ତିଆଡିଡ୍ ବୁବ୍ୟୋଙେନ୍, ଅରୁବେନ୍, ସାଲ୍ଲୁମେନ୍, ଆରି ଲୋଙଡେନ୍ । ସିଲଡ୍ତ୍ତେ ଗିୟ୍ବା, ଅବୟ୍ ଆଇବଜନ୍ ଆନିନ୍ଆଡଙ୍ ରବାଙେନ୍, ଆ ଜିଜିନେନ୍ ଡ ଆ ତରମ୍ତମନ୍ ଜୋଣ୍ଡଡ଼ିବୟ୍ଗୋ, ଆରି ଆ ଉଗ୍ଗର୍ଲୋଙନ୍ ତରକ୍କଡମ୍ । ଆନିନ୍ ମାଡ୍ଡ ତୋଙ୍କାବୟ୍ ଆରି ପେଲ୍ଲା, ଆତାଲ୍ଜଙନ୍ ଆସିଙ୍ଡମ୍ଲୋଙନ୍ ଅଡ୍କୋଏ । ଆନିନ୍ ତଙ୍ବଡିନା ରୋତ୍ତରେଙନ୍ ଆରି ତଙ୍ବଡିନା ପାଡ଼ାର୍ରେଙନ୍ ଡକୋତନ୍ ଆରି କୁନେରେଙନ୍ ଜଗ୍ଗେଲେ ତଙ୍କୁମ୍ଲେ ଡକୋତନ୍ । ତି ଆଇବୟ୍ ଆନିନ୍ଆଡଙ୍ ଞମ୍ଲେ ଜୋର୍ଜୋରେନ୍, ଆରି ଏର୍ଗନ୍ରଜନ୍ ଆମୁକ୍କା ବାତ୍ତେ ଆନିନ୍ଆଡଙ୍ ବରେନ୍ । “ସନୟୁ ଅନମଙନ୍ ମଙ୍ଞେନ୍ ଡକୋ; ଞେନ୍ ଲଙେ ବାସାଞେନ୍ ବବ୍ରିୟ୍ଲାୟ୍ । ତିଆସନ୍ ଆମନ୍ ସରିନ୍ ଆର୍ନବାଙ୍ ଆସନ୍ ଞେନ୍ ଜାଙ୍ଲନ୍ ଡୁଙ୍ଲନାୟ୍ ଆରି ଜୁବାୟ୍ଲେ ଆମନ୍ଆଡଙ୍ ଆସନାୟ୍ଡଙ୍ ଆସନ୍ ଜିର୍ରାୟ୍, ଆରି ଆମନ୍ଆଡଙ୍ ରବାଙ୍ଲମ୍ । ଞେନ୍ ବରେଲ୍ନେ କାବ୍ଞେନ୍ ମିସର୍ବାୟ୍ଜି ଆ ଲମନ୍ ତାଡ଼େରନ୍ ବାତ୍ତେ ଆତୁବ୍ତୁବ୍ ଲତୁମ୍ କାବନ୍ ବାତ୍ତେ ବେଲ୍ଲାୟ୍ । ଆରି ଲଙିଡ୍ମେନ୍ ଡ ଅଗୁରୁନ୍ ଡ ଦାରୁସିନିନ୍ ବାତ୍ତେ ବରେଲ୍ନେଞେନ୍ ଲଞିଡ୍ଡମ୍ ଅମ୍ମେଲାୟ୍ । ଜିରାୟ୍ ଇନ୍ଲେନ୍ ଡନୁଙ୍ୟମ୍ଲୋଙନ୍ ମଗାଡ୍ଡାଲେ ତନଗାଡ୍ଜାୟ୍ ଏଲୁଡେ । ଇନିଆସନ୍ଗାମେଣ୍ତେନ୍ ଅୟ୍ତବ୍ଞେନ୍ ଅସିଙନ୍ ମନ୍ରାତଡ୍, ଆନିନ୍ ସଙାୟ୍ ଡେସାନ୍ ଜିରେନ୍ । ଆନିନ୍ ମୁନା ତଙ୍କାନ୍ ଞମ୍ଲେ ଜିରେନ୍ ଆରି ଆନିନ୍ ପୁନ୍ନୁୟ୍ଇଁଙନ୍ ଆଡିଡ୍ ୟର୍ତନାୟ୍ ।” କେନ୍ଅନ୍ତମ୍ ମନଅଁୟ୍ଡାନ୍ ଆବର୍ନେ ବର୍ରନ୍ ଆନିନ୍ ଆମନନ୍ ଞିଏନ୍, ଆ ଉସାଲ୍ତମନ୍ ଆ ତମୟ୍ବର୍ ବାତ୍ତେ ଆନିନ୍ଆଡଙ୍ କଣ୍ତାୟ୍ଲେ ଓରୋଙେନ୍ । ଏଙ୍ଗାଲେ ତାଙ୍ଲିୟନ୍ ରନବ୍ବୁନ୍ ଆସନ୍ ପନାଙନ୍ ଡେତେ ଆରି ସିଙ୍କୁଡ଼ିନ୍ ବାତ୍ତେ ଆଜିବାଡନ୍ ଆମନ୍ରା ଡନଣ୍ଡାୟନ୍ ଆସନ୍ ଜିର୍ତେ । ତି ଅନ୍ତମ୍ ଆନିନ୍ ଆନିନ୍ଆଡଙ୍ ସଣ୍ଡୋଙ୍ଲେ ପାଙେନ୍ । ଆରି ଏଙ୍ଗାଲେ ଅନ୍ତିଡନ୍ ଅନୋଡ଼େଙନ୍ ପରାନ୍ନାନ୍ ମୋସ୍ସାତେ ଗାମ୍ଲେ ଏର୍ଜନନାନ୍ ଲଏଙ୍ତେ, ଏତ୍ତେଲେ ଆଗରେଲୋଙନ୍ ଅଆମନ୍ ବାତ୍ତେ ପଲନେ । ତିଆସନ୍ ଏ ଡାଙ୍ଗଡ଼ାଅନ୍ଞେଞ୍ଜି, ବର୍ନେଞେନ୍ ଅମ୍ଡଙ୍ବା ଆରି ତଅଡ୍ଞେନ୍ ଆବର୍ନେ ମାନ୍ନେବା । ତି ଆତଙର୍ଗଡ୍ ଉଗ୍ଗର୍ନମ୍ ଜିର୍ଡଙେତଡ୍, ଆରି ଆମନ୍ ଆ ତଙରନ୍ ଞଣ୍ତ୍ରମ୍ଲେ ଆଡ଼ଡ୍ଡଙମ୍ । ଇନିଆସନ୍ଗାମେଣ୍ତେନ୍ ଆନିନ୍ ଜବ୍ର ମନ୍ରାଞ୍ଜିଆଡଙ୍ ରବ୍ବୁଏନ୍, ଓଓ, ରନବ୍ବୁ ମରଞ୍ଜି ଗୋଗୋୟ୍ଡମ୍ । ଆସିଙନ୍ ତଗୋସିଙ୍ବାନ୍ ଆଜନିର୍ ତଙର୍, ଅଙ୍ଗାତେ ରନବ୍ବୁ ଡରକୋନେବାନ୍ ଜିର୍ତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.