Juray Soura Bible
ମନଙ୍ ଞନଙ୍ଞଙ୍ବର୍ 6
ଅନବ୍କିଲ୍କିଲ୍ବରନ୍
ଏ ଅଅନ୍ଞେନ୍, ଅସମଁୟ୍ ଆମନ୍ ତୟ୍ଲିସିଙ୍ନମ୍ ଆମନ୍ରା ଆସନ୍ ଜାମନିଲନ୍ଡେନ୍, ଆରି ଆମନ୍ ଆନ୍ନାମରନ୍ ଆସନ୍ ସିବ୍ଡୟ୍ଲେ, ତିଡେନ୍ ଆମନ୍ ତଅଡ୍ନମ୍ ଆବର୍ନେ ଅନ୍ତମ୍ ଆପାସଲୋଙ୍ ଗଲୋଲମ୍ ଆରି ମୁକ୍କାନମ୍ ଆବର୍ନେ ବାତ୍ତେ ଞନମ୍ଡାଲମ୍ । ଏ ଡାଙ୍ଗଡ଼ାଅଞେନ୍, ଆମନ୍ ନମିଞେନ୍ କେନ୍ ଆକାବ୍ବାଡ଼ା ଲୁମା, ଆମନ୍ଡମନ୍ଆଡଙ୍ ଡୋବା; ଇନିଆସନ୍ଗାମେଣ୍ତେନ୍ ଆମନ୍ କୁଲମ୍ନମ୍ ଆସିଲୋଙ୍ ଆମନ୍ ଡକୋ; ଆମନ୍ଡମନ୍ଆଡଙ୍ ଲବ୍ଗଃଡମ୍ଲନ୍ ତୟ୍ଲିସିଙ୍ନମ୍ ଆମଙ୍ବା ନମିନ୍ ନମିନ୍ କାକୁର୍ତିନା । ଅମଡ୍ନମ୍ ଡିମଡ୍ନେନ୍ ତିୟ୍ଡଙ୍, ଅଡ଼େ ଉସାଲ୍ମଡ୍ନମ୍ ମବ୍ମବ୍ଡାନ୍ ତିୟ୍ଡଙ୍ । ଆମନ୍ଡମ୍ଆଡଙ୍ ଅଲବନ୍ ଆନୋଡ଼େଙ୍ ଅସିନ୍ ସିଲଡ୍, ଅନ୍ତିଡନ୍ ଅନ୍ତମ୍ ଜନ୍ତାନ୍ ଆନୋଡ଼େଙ୍ ସିଲଡ୍ ଡୋବିଁୟ୍ ।
ଏ ଆଡ଼ସା, ଆମନ୍ ମୁୟ୍ଡାନ୍ ଆମଙ୍ବା ଇୟା, ଆ କାବ୍ବାଡ଼ାନ୍ ଇଃୟମା ଆରି ଗିଆନନ୍ ଞାଙା । ଆ ପନ୍ସୁଆତିମରନ୍ ଅଡ଼େ ଆ ସୋଡ଼ାମରନ୍ ଅଡ଼େ ଆ ପ୍ରବୁନ୍ ଆନ୍ନିଙ୍ ଅଃଡକୋଲୋ ବନ୍ଡ ଆନିନ୍ ଡାଗାଡାଇଙନ୍ ଆଜନୋମନ୍ ଆସନ୍ ତର୍ତୁମ୍ତେ, ଆରି ଜନ୍ରୋମନ୍ ଆଡିଡ୍ ଜନୋମନ୍ ତର୍ତୁମ୍ତେ । ଏ ଆଡ଼ସାମର୍, ଆମନ୍ ଡିଅଙ୍ଗା ଜାୟ୍ ଲୁଡ୍ଲେ ଡକୋତନ୍ ? ଆମନ୍ ଆଙ୍ଗା ମଡ଼େଲନ୍ ଡୋତନ୍ ? “ଆରି ଅସୋୟ୍ ଲୁଡେନ୍ଡେନ୍, ଆରି ଅସୋୟ୍ ମବେଣ୍ଡେନ୍, ଆରି ଅସୋୟ୍ ଡିମଡ୍ନେନ୍ ଆସନ୍ ଞଙ୍ଲନ୍ଗିଡ୍ଲଣ୍ଡେନ୍ ।” ଡୋଲେୟ୍ନମ୍ ବେମଡ୍ମରନ୍ ଅନ୍ତମ୍ ଡ ଅରିର୍ସୋୟମରଞ୍ଜି ଅନ୍ତମ୍ ଅଡ଼ୋତାୟ୍ ।
ଇର୍ସେନ୍ ଆର୍ଲୁମ୍ତେନ୍ ଆମନ୍ରା, ଡ ଡୋସାନ୍ ଆର୍ଲୁମ୍ତେନ୍ ଆମନ୍ରା, ଆନିନ୍ ପାତ୍ୟାବରନ୍ ବର୍ରନ୍ ତଙିୟ୍ତନ୍ । ଆନିନ୍ ଅମଡନ୍ ବାତ୍ତେ ଇଡ୍ମଡ୍ତେ, ଆନିନ୍ ଅଜଙନ୍ ବାତ୍ତେ ବର୍ନେନ୍ ବର୍ତନ୍, ଆନିନ୍ ଅଣ୍ତେର୍ସିନ୍ ବାତ୍ତେ ରସିଲେ ଅବ୍ତୁୟ୍ତେ, ଆ ଉଗ୍ଗର୍ଲୋଙନ୍ ପେଲ୍ଲାନ୍ ଡକୋ, ଆନିନ୍ ଆଏଡ଼ର୍ ଅନବ୍ସେଡ୍ ବରନ୍ ଇୟମ୍ତେ, ଆନିନ୍ ଗୋଡ଼େ ଜମ୍ମଲନ୍ ବିଡ୍ତେ । ତିଆସନ୍ ଆ ତନଙଡନ୍ ଏରବ୍ବୋମଙ୍ ଅଡ଼ୋତାୟ୍, ଆରି ଆନିନ୍ ସନାୟ୍ସିନ୍ ଏର୍ଞନାଙନ୍ ଏରବ୍ବୋମଙ୍ ଅସେଡ୍ତେ ।
ତୁଡ୍ରୁ ବିସୟନ୍ଆଡଙ୍ ପ୍ରବୁନ୍ ଏଡ଼ୁର୍ମଡ୍ତେ; ସାତ ଜନବନ୍ ନିୟ୍ ଆନିନ୍ ଏଡ଼ୁର୍ମଡ୍ତେ । କଙ୍କ୍ରି ଗନିଜନ୍, ପାତ୍ୟା ଅଲାଙନ୍ ଡ ଏର୍ଡୋସାମରନ୍ ଆ ସନମ୍ୱବ୍ ଆସି, ଅନବ୍ସେଡ୍ ଅନିୟମ୍ ଉଗ୍ଗରନ୍, ଏର୍ମନଙ୍ କାବ୍ବାଡ଼ାନ୍ ଆଲନୁମ୍ ଆସନ୍ ଅପ୍ପୁଡ୍ ଅଜଙନ୍; କଣ୍ତାୟ୍ ସାକିନ୍ ଆନା ପାତ୍ୟା ବର୍ତନ୍ ଆରି ଆନା ବୋଞାଙଞ୍ଜି ଆମଙ୍ଲୋଙ୍ ଗୋଡ଼େ ଜମ୍ମଲନ୍ ବିଡ୍ତେ ।
ଜୋଣ୍ଡଡ଼ିନ୍ ଆ ବିରୁଦଲୋଙ୍ ଅନବ୍କିଲ୍କିଲ୍ବର୍
ଏ ଡାଙ୍ଗଡ଼ାଅନ୍ଞେନ୍, ଆମନ୍ ଆପ୍ପେୟ୍ନମ୍ ଆବନାଁୟ୍ବର୍ ମାନ୍ନେଆ,ଆରି ଅୟୋଙ୍ନମ୍ ଆ ଞନଙ୍ଞଙ୍ ଅମ୍ରେଙ୍ଡଙ୍ । ତିଆତେ ଆଏଡ଼ର୍ ଉଗ୍ଗର୍ଲୋଙ୍ନମ୍ ୟୁଡ୍ଲେ ଡକ୍କୋଆ,ଆରି ସଙ୍କାଲୋଙ୍ନମ୍ ଜିଆ । ଆମନ୍ ତରଙିଁୟ୍ତନ୍ ଆଡିଡ୍ ତିଆତେ ଆମନ୍ଆଡଙ୍ ତଙରନ୍ ଅବ୍ତୁୟ୍ତମ୍, ଆରି ଆର୍ଲୁଡ୍ତ୍ତେନ୍ ଆଡିଡ୍ ତିଆତେ ଜନଗ୍ଗେମର୍ନମ୍ ଡେତେ, ଆମନ୍ ଆଡରୋତନ୍ ଆଡିଡ୍ ତିଆତେ ଆମନ୍ ସରିନ୍ କଡାଡ଼ିତନ୍ । ଇନିଆସନ୍ଗାମେଣ୍ତେନ୍ ତି ଆବନାଁୟ୍ବର୍ ପିଙ୍କତୋଡ୍; ଆରି ତି ଆବନାଁୟ୍ ସାଆର୍; ଆରି ଞନଙ୍ଞଙ୍ କନେଁୟ୍ ଅନମେଙ୍ ତଙରନ୍ । ଆନିନ୍ ଆମନ୍ଆଡଙ୍ ପେଲ୍ଲାବଜନ୍ ସିଲଡ୍ ଡ ବମନ୍ରା ଆଡୁକ୍ରି ଆତମୟ୍ଲାଙ୍ ସିଲଡ୍ ଡୋବ୍ତମ୍ । ଉଗର୍ଲୋଙ୍ନମ୍ ଅସେଲ୍ ମୁକ୍କାନ୍ଆଡଙ୍ ଗିୟ୍ଲେ ଡୁଙ୍ୟମ୍ଡଙ୍; ଅଡ଼େ ଆ ଗନିୟ୍ଗିଜନ୍ ବାତ୍ତେ ଆମନ୍ଆଡଙ୍ ଆଞନମ୍ ଆସନ୍ ତିୟ୍ଡଙେ । ଇନିଆସନ୍ଗାମେଣ୍ତେନ୍ ଜୋଣ୍ତଡ଼ିନ୍ ଆସନ୍ ମନ୍ରାନ୍ ଆଜନୋମ୍ଜୋମ୍ ଅସୋୟ୍ତେ,ଆରି ଡାରିବଜନ୍ ମନ୍ରାନ୍ ଆ ମଡ଼ଗା ପରାନ୍ନା ଆଞନମ୍ ଆସନ୍ ବେନ୍ତାତେ । ଅନ୍ନିଙ୍ ଆମନ୍ରା ଅସମଁୟ୍ ଆ ମାୟଙ୍ଲୋଙନ୍ ତଗୋନ୍ ଡକ୍କୋଏଣ୍ଡେନ୍, ଏତ୍ତେଲ୍ଡେନ୍ ଇନି ଆସିନ୍ରିନ୍ ଅଜୋମ୍ତୋଡେ ପଙ୍ ? ଅଡ଼େ ଆନ୍ନିଙ୍ ଆରଡ଼େତୋଡ୍ଲୋଙନ୍ ତଙିୟ୍ଲନ୍ଣ୍ଡେନ୍, ଇନି ଆତାଲ୍ଜଙନ୍ ଅଃବାଲ୍ସଏ ପଙ୍ ? ଅଙ୍ଗା ଆମନ୍ରା ତୟ୍ଲିସିଙ୍ମରନ୍ ଆଡୁକ୍ରି ଆମଙ୍ବା ଇୟ୍ତେ, ଆନିନ୍ ତି ଅନ୍ତମ୍; ଆନା ଆନିନ୍ଆଡଙ୍ ସୁଙେତେ, ଆନିନ୍ ଡନଣ୍ଡାୟନ୍ ଞାଙ୍ତେ । ଆପରାନ୍ନାନ୍ ଆଡନୋବ୍ ଆସନ୍ ରାଉମରନ୍ ଡୋଲଜନ୍ ଆସନ୍ ରାଉଲନ୍ଡେନ୍ ମନ୍ରାନ୍ ଆନିନ୍ଆଡଙ୍ ଅନେଡ଼ୁର୍ମଡେଜି । ବନ୍ଡ ଆନିନ୍ ଞନମ୍ଡାଏଣ୍ଡେନ୍, ଆନିନ୍ ସାତ ଗୁନ ଅନାବ୍ଡିଡନ୍ ଡେତେ, ଆସିଙନ୍ ଆନର୍ଜେ ଅଡ଼୍କୋନ୍ ଆନିନ୍ଆଡଙ୍ ତିୟ୍ତେ । ବନ୍ଡ ଜୋଣ୍ତଡ଼ାମରନ୍ ଆଜାଡ଼ିନ୍ ଏର୍ବୁଡ୍ଡି; ଆନିନ୍ଡମ୍ ଆ ପରାନ୍ନାନ୍ ଅନବ୍ସେଡନ୍ ଆସନ୍ ଆନିନ୍ ତିଆତେ ଲୁମ୍ତେ । ଆନିନ୍ ତନୁଡନ୍ ଡ ଗନବ୍ରଜନ୍ ଞାଙ୍ତେ; ଆରି ଆ ଡୋସାନ୍ ଗନିୟ୍ଡାନ୍ ଅଡ୍ଡେଏ । ଇନିଆସନ୍ଗାମେଣ୍ତେନ୍ ଆଇବୟ୍ଲୋଙନ୍ ଆବର୍ନେ ସଙ୍ଗତାମରନ୍ ଜବ୍ର ବରାବ୍ତେ; ଆଡ୍ରୁଲ୍ତିଡ୍ତନ୍ ଆଡିଡ୍ ଆନିନ୍ ଇନ୍ନିଙ୍ ଅକେମାଏ । ଆନିନ୍ ଇନ୍ନିଙ୍ ଆ ତନାଣ୍ତେ ଅଃନଡ଼େଏ; ଆରି ଆମନ୍ ଗୋଗୋୟ୍ ତଙ୍କାନ୍ ତିୟେନ୍ ଜାକିଁୟ୍ଡେନ୍ ଆନିନ୍ ଅଃମ୍ମାନ୍ନେଏ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.