Juray Soura Bible
ମନଙ୍ ଞନଙ୍ଞଙ୍ବର୍ 5
ଡାରିନେନ୍ ଆ ବିରୁଦଲୋଙ୍ ଅନବ୍କିଲ୍କିଲନ୍
ଏ ଅଅନ୍ଞେନ୍, ଗିଆନଲୋଙ୍ଞେନ୍ ମନ୍ନନମ୍ ତିୟା; ବୁଡ୍ଡିଲୋଙ୍ଞେନ୍ ଡାଲୁଡା । ଏଙ୍ଗାଲେ ଆମନ୍ ମନଙ୍ ଅନିୟମନ୍ ଡୋବ୍ଲେ ରପ୍ତିତେ ଆରି ଏଙ୍ଗାଲେ ଉସାଲ୍ତମ୍ନମ୍ ଗିଆନବର୍ଞେନ୍ ମାନ୍ନେଲେ ରପ୍ତିତେ । ଇନିଆସନ୍ଗାମେଣ୍ତେନ୍ ଜୋଣ୍ତଡ଼ିବଜନ୍ ଆ ଉସାଲ୍ତମ୍ ସିଲଡ୍ ଆ ବର୍ନେନ୍ ଆଡଙ୍ଡାନ୍ ଅନ୍ତମ୍ ଜତଡ୍ତେ, ଆ ତଅଡ୍ଗଡ୍ ଆବର୍ନେ ମିଞଲନ୍ ସିଲଡ୍ ଜବ୍ର ଲତ୍ତି । ବନ୍ଡ ଆନିନ୍ ଆତନିକ୍କି ଆଡିଡ୍ ରେସାଙନ୍ ଅନ୍ତମ୍ ଅସାଙ୍, ଆରି ବାର୍ମଡ଼ିୟ୍ତାଲନ୍ ଆକଡ଼ିବ୍ ଅନ୍ତମ୍ ଅସୁବ୍ । ଆତାଲ୍ଜଙନ୍ ରନବୁବାନ୍ ପଡ୍ଲନ୍ ଜିର୍ତେ; ଆରି ଆ ତାଲ୍ଜଙନ୍ ପାତାଡ଼ଲୋଙନ୍ ପତ୍ତନେ । ତିଆସନ୍ ଆନିନ୍ ଅନମେଙ୍ ତଙରନ୍ ଅଃଞାଙେ; ବନ୍ଡ ଆ ତଙରନ୍ ଅଡ଼୍କୋନ୍ ଅପୁଡ୍ଡମ୍, ଆରି ଆନିନ୍ ତିଆତେ ଅଃଜ୍ଜନାଏ । ତିଆସନ୍ ଏ ଅ ଅଅନ୍ଞେଞ୍ଜି, ବର୍ନେଞେନ୍ ଅମ୍ଡଙ୍ବା ଆରି ତଅଡ୍ଲୋଙ୍ଞେନ୍ ଆବର୍ନେ ସିଲଡ୍ ଆନ୍ନାଗଡ୍ ଜିର୍ଡଙ୍ । ତି ଆଇବୟ୍ ସିଲଡ୍ ତଙର୍ନମ୍ ସଙାୟ୍ ଡକ୍କୋଆ ଆରି ଆସିଙନ୍ ଆଡୁଆରାବା ଇୟ୍ଡଙେ । ଓଡେନ୍ନଙ୍ ଆମନ୍ ବୋର୍ସାନମ୍ ଅଡ଼୍କୋନ୍ ଆନ୍ନାମରଞ୍ଜିଆଡଙ୍ ତିୟ୍ତେ,ଆରି ବର୍ସେଙ୍ନମ୍ କାନ୍କାରମ୍ ଅଃଗାମେଞ୍ଜି ଆମନ୍ରାଜିଆଡଙ୍ ତିୟ୍ତେ । ଓଡେନ୍ନଙ୍ ଏର୍ନମ୍ମଡ୍ ମରଞ୍ଜି ଅନର୍ଜେନମ୍ ବାତ୍ତେ ବରିୟ୍ତଜି ଆରି କାବ୍ବାଡ଼ାନମ୍ ଆ ଜଅ ବଡେସାବାୟ୍ ଆସିଙ୍ଲୋଙ୍ ତନର୍ତୁମନ୍ ଡେତେ । ଆରି ବନୁଡାଇଙ୍ନମ୍ ଆଡିଡ୍ ଜେଲୁନମ୍ ଡ ଡଅଙ୍ନମ୍ ବୋର୍ସାତଡ୍ ଡେତମ୍, ଆମନ୍ ତିଆଡିଡ୍ ୟେୟେଡାତନ୍ ! ଆରି ବର୍ତନେ, “ଞେନ୍ ଞନଙ୍ଞଙ୍ବରନ୍ ଏଙ୍ଗାଲେ ଏଡ଼ୁର୍ମଡ୍ଲାୟ୍ ? ଆରି ମନଞେନ୍ ସାଞେଙ୍ବରନ୍ଆଡଙ୍ ଏଙ୍ଗାଲେ ଆଲ୍ଲେଏନ୍ ? ଞେନ୍ ଞନଙ୍ତିୟ୍ମର୍ଞେଞ୍ଜି ଆବର୍ନେ ଅଃନମ୍ଡଙ୍ଲାୟ୍ ଆରି ଅଙ୍ଗା ଆ ମନ୍ରାଜି ଞେନ୍ଆଡଙ୍ ଞଙ୍ଞଙ୍ଲିଁୟ୍ଞ୍ଜି, ଆବର୍ନେଞ୍ଜି ଅଲୁଡ୍ଞେନ୍ ଅଃଡ୍ଡାଲୁଡ୍ଲୋ, ଞେନ୍ ରନୁକ୍କୁନ୍ ଡ ମଣ୍ତଡ଼ିଲୋଙନ୍ ସିଲଡ୍ ଅଡ଼୍କୋନ୍ ଆଗନବ୍ରୟ୍ ଡ ପନବ୍ରଡ୍ଲୋଙନ୍ ଗଲୋଲିଁୟ୍ ।” ଆମନ୍ ବଣ୍ତାନମ୍ ଆଡାଆ ଡ କୁଆନମ୍ ସିଲଡ୍ ଆଡ୍ରୁଙ୍ତନାଞନ୍ ଆଡାଆ ଗାତେ । ଆମନ୍ ଡୁଙ୍ଡମ୍ନେଡାନମ୍ ଅଡ଼େତେ ଅଡ଼େନେ ଲାର୍ରେ ପାଙ୍ତେ ?ଆରି ଲାଆଙ୍ ରୋତରେଙନ୍ ଇନି ଡାଆନ୍ ଆପନ୍ନେ ମନଙ୍ ପଙ୍ ? ତିଆତେ ଆମନ୍ ଆତେ ତୁମ୍ ଡେଏତୋ, ଆମନ୍ ସରିନ୍ ଏର୍ନମ୍ମଡ୍ ମରଞ୍ଜି ଆତେ ଡେଡଙେତଡ୍ । ଡୁଙ୍ଡମ୍ନେଡାନମ୍ ସନେନ୍ସେନ୍ ଡେଏତୋ ଆରି ଆମନ୍ ବନେଣ୍ତିଆଇଙ୍ନମ୍ ଆଡୁକ୍ରି ସରିନ୍ ସର୍ଡାନା । ଆନିନ୍ ଡନୁଙ୍ୟମ୍ ଅଲବନ୍ ଡ ମନଙ୍ ଜାଡ଼ିଆମେଡନ୍ ଅନ୍ତମ୍, ଆ ମାୟଙନ୍ ଆଏଡ଼ର୍ ଆମନ୍ଆଡଙ୍ ଅବ୍ସର୍ଡାଅମ୍ତୋ; ଆରି ଆ ଡନୁଙ୍ୟମ୍ଲୋଙନ୍ ଆମନ୍ ଆଏଡ଼ର୍ ମଗାଡ୍ଲନ୍ ଡକୋନା । ଏ ଅଅନ୍ଞେନ୍, ଆନ୍ନାବଜନ୍ ଆମଙ୍ବା ଆମନ୍ ଇନିବା ମଗାଡ୍ତମ୍ ? ଆରି ଆନ୍ନାବଜନ୍ ଆବୁଲୁ ଇନିଆସନ୍ କୋଣ୍ତୋଅମ୍ ? ଇନିଆସନ୍ଗାମେଣ୍ତେନ୍ ମନ୍ରାନ୍ ଆତ୍ରଙିୟ୍ତନ୍ ଆତଙର୍ ଅଡ଼୍କୋନ୍ ପ୍ରବୁନ୍ ଗିୟ୍ତେ ଆରି ଆନିନ୍ ଆତଙର୍ ଅଡ଼୍କୋନ୍ ଆବସରିନ୍ ଏମ୍ମେତେ । ପେଲ୍ଲାମରନ୍ ଆନିନ୍ଡମ୍ ଆ ଡୋସାନ୍ ବାତ୍ତେ ଞନମ୍ଡାତେ । ଆନିନ୍ ଆ ଇର୍ସେ ଲୁଆଡନ୍ ବାତ୍ତେ ଜନିବାଡନ୍ ଡେତେ । ଆନିନ୍ ଞନଙ୍ଞଙ୍ବରନ୍ ଅବାବଲୋଙ୍ ରବ୍ବୁତେ ଆରି ଆନୁଲ୍ଲୁନ୍ ଆଗନୋଗୋୟ୍ ବାତ୍ତେ ଆଡ଼ତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.