Juray Soura Bible
ମନଙ୍ ଞନଙ୍ଞଙ୍ବର୍ 4
ଗିଆନନ୍ ଆ ଉପ୍କାର
ଏ ଅଅନ୍ଞେଞ୍ଜି, ଆପ୍ପେୟନ୍ ଆ ଞନଙ୍ଞଙ୍ବର୍ ଅମ୍ଡଙ୍ବା ଆରି ମନଙ୍ ଅନିୟମ୍ ଆ ଗିଆନଲୋଙ୍ ଡାଲୁଡ୍ବା । ଇନିଆସନ୍ଗାମେଣ୍ତେନ୍ ଞେନ୍ ଆମ୍ୱେଞ୍ଜିଆଡଙ୍ ମନଙ୍ ଞଙ୍ଞଙ୍ତବେନ୍, ବନାଁୟ୍ବର୍ଞେନ୍ ଏଅମ୍ରେଙ୍ଡଙେ । ଞେନ୍ ଆପ୍ପେୟ୍ଞେନ୍ ଆ ଡାଙ୍ଗାଡ଼ାଅନ୍ ଡକୋଲିଁୟ୍, ଆରି ଅୟୋଙ୍ଞେନ୍ ଆଗନିୟ୍ଗିୟ୍ଲୋଙ୍ ଲବଡ୍ଡି ଡ ଅବୟ ଡନୁଙ୍ୟମ୍ ଡାଙ୍ଗାଡ଼ାଅନ୍ ଡକୋଲିଁୟ୍ । ଆପ୍ପେୟନ୍ ଞେନ୍ଆଡଙ୍ ଞନଙନ୍ ତିୟ୍ଲେ ବର୍ରନେ । “ମନ୍ନଲୋଙ୍ନମ୍ ବର୍ନେଞେନ୍ ଡକ୍କୋଆ,ଆରି ବନାଁୟ୍ବର୍ଞେନ୍ ଅଡ଼୍କୋନ୍ ମାନ୍ନେଆ ଏତ୍ତେଲ୍ଡେନ୍ ଆମନ୍ ଅମେଙ୍ତମ୍ । ଗିଆନନ୍ ତର୍ତୁମା, ମନଙ୍ ଅନିୟମନ୍ ଞାଙା, ତିଆତେ କରୋଡାଡଙମ୍ ଆରି ତଅଡ୍ଞେନ୍ ଆବର୍ନେ ସିଲଡ୍ ମଡ଼େଙ୍ଡଙେ । ଆନିନ୍ଆଡଙ୍ ଅମ୍ରେଙ୍ଡଙେ; ଏତ୍ତେଲ୍ଡେନ୍ ଆନିନ୍ ଆମନ୍ଆଡଙ୍ ସାକ୍କେତମ୍; ଆନିନ୍ଆଡଙ୍ ଡୁଙ୍ୟମା, ଏତ୍ତେଲ୍ଡେନ୍ ଆନିନ୍ ଆମନ୍ଆଡଙ୍ ଡୋବ୍ତମ୍ । ଗିଆନନ୍ ମାଡ ମନଙ୍ ବରନ୍, ତିଆସନ୍ ଗିଆନନ୍ ଞାଙା; ଆରି ଆମନ୍ ଅଡ଼୍କୋ ଆଞରାଙ୍ତେନ୍ ସିଲଡ୍ ମନଙ୍ ଅନିୟମନ୍ ଞାଙା । ଆନିନ୍ଆଡଙ୍ ମାନ୍ନେଏଣ୍ଡେନ୍ ଆନିନ୍ ଆମନ୍ଆଡଙ୍ ଅମ୍ଡାୟ୍ଲେ ଅବ୍ସୋଡ଼ାତମ୍; ଆରି ଆନିନ୍ଆଡଙ୍ କୋଣ୍ତୋଏଣ୍ଡେନ୍ ଆନିନ୍ ଆମନ୍ଆଡଙ୍ ଅବ୍ଗୁଗୁତମ୍ ।” ଆନିନ୍ ଅବବ୍ଲୋଙ୍ନମ୍ ସନାୟୁମନ୍ ଅନ୍ତମ୍ ରନୁରୁନ୍ ତିୟ୍ତମ୍; ଆନିନ୍ ଆମନ୍ଆଡଙ୍ ମରଅଁୟ୍ଡାନ୍ ଆ ରନୁବ୍ବବ୍ ଅବ୍ରୁବ୍ବବ୍ତମ୍ ।
ଏ ଅ ଅନ୍ଞେନ୍, ଅମ୍ଡଙା, ବର୍ନେଞେନ୍ ଜାଆ । ଏତ୍ତେଲ୍ଡେନ୍ ଅନମେଙ୍ ବର୍ସେଙ୍ନମ୍ ଗୋଗୋୟ୍ତେ । ଞେନ୍ ଆମନ୍ଆଡଙ୍ ଗିଆନନ୍ ଆ ତଙର୍ଗଡ୍ ଆଜନିର୍ ଞଙ୍ଞଙ୍ତମ୍, ଞେନ୍ ବୟ୍ଲେ ତଙର୍ଗଡ୍ ଆମନ୍ଆଡଙ୍ ତଙାର୍ତମ୍ । ଆମ୍ୱେନ୍ ଏତ୍ରଙିୟ୍ତନ୍ ଆଡିଡ୍ ଅଜଙ୍ବେନ୍ ଅଃୟର୍ରନାୟ୍, ଆରୁର୍ତେନ୍ ଆଡିଡ୍ ଆମନ୍ ଅତୁଡ୍ଡୁବମ୍ । ଞନଙ୍ଞଙ୍ବରନ୍ ରବ୍ଡୋଲେ ଞମା, ଞମ୍ଲେ ଡକ୍କୋଆ । ତିଆତେ ଅମ୍ରେଙ୍ଡଙେ ତିଆତେ ଡକ୍କୋଆ । ଇନିଆସନ୍ଗାମେଣ୍ତେନ୍ ତିଆତେ ଅନମେଙ୍ନମ୍ । ଇର୍ସେମରଞ୍ଜି ଆ ତଙର୍ଗଡ୍ ଏଜିର୍ଡଙ୍ । ଆରି ପେଲ୍ଲାମରଞ୍ଜି ଆତଙର୍ଗଡ୍ ଏତଙିୟ୍ଡଙ୍ନେ । ତିଆତେ ଅମ୍ରେଙା, ତିଗଡ୍ ଜିର୍ଡଙେ, ତି ଆତଙର୍ଗଡ୍ ସିଲଡ୍ ୟର୍ନାୟ୍ । ଇନିଆସନ୍ଗାମେଣ୍ତେନ୍ ମନଙ୍ତଡନ୍ ଆ କାବ୍ବାଡ଼ା ଅଃଲୁମ୍ଲଜିଡେନ୍ ଆନିଞ୍ଜି ଅଃଡିମଡେଜି । ଆରି ଆନ୍ନିଙ୍ଆଡଙ୍ ଅନବ୍ସେଡ୍ଲଜିଡେନ୍ ମବ୍ମବ୍ଡାନ୍ ସିଲଡ୍ ଆନିଞ୍ଜି ମଡ଼େତଜି । ଇନିଆସନ୍ଗାମେଣ୍ତେନ୍ ଆନିଞ୍ଜି ପେଲ୍ଲାନ୍ ଅନ୍ତମ୍ ଜନୋମନ୍ ଜୋମ୍ତଜି; ଆରି ଅର୍ସଙ୍ଗତା ଅନ୍ତମ୍ ଦ୍ରାକ୍ୟାଡାନ୍ ଗାତଜି । ବନ୍ଡ ଡରମ୍ମମରଞ୍ଜି ଆତଙର୍ ଡୋତାନ୍ ଆସନାଆର୍ ଅନ୍ତମ୍, ଆରି ତମ୍ୱାଓଲନ୍ ଜାୟ୍ ଓୟୋଙନ୍ ଗୋଗୋୟ୍ ତରାଡ୍ତେ । ଆରି ପେଲ୍ଲାମରଞ୍ଜି ଆତଙର୍ ଲୋଙଡନ୍ ଅନ୍ତମ୍; ଆନିଞ୍ଜି ଅଙ୍ଗାଲୋଙ୍ ତୁଡ୍ଡୁବ୍ତଜି, ତିଆତେ ଅଃଜନାଏଜି ।
ଏ ଅଅନ୍ଞେନ୍, ବର୍ନେଲୋଙ୍ଞେନ୍ ଅମ୍ଡଙା, ବର୍ନେଞେନ୍ ଡାଲୁଡା । ତି ଅଡ଼୍କୋନ୍ ଅମଡ୍ଲୋଙ୍ନମ୍ ସିଲଡ୍ ଜିର୍ଡଙେତଡ୍; ତି ଅଡ଼୍କୋନ୍ ଉଗର୍ଲୋଙ୍ନମ୍ ସିଲଡ୍ ଜୁବାୟ୍ଲେ ଡକ୍କୋଆ । ଇନିଆସନ୍ଗାମେଣ୍ତେନ୍ ତିଆତେ ଅଙ୍ଗା ଆମନ୍ରାଜି ଞାଙ୍ତଜି ଆରି ଆନିଞ୍ଜି ଆସନ୍ ତିଆତେ ଅନମେଙନ୍ ଡ ଅଡ଼୍କୋ ଡଅଙନ୍ ଆସନ୍ ଆ ସନୁକ୍କା । ଉଗର୍ନମ୍ଆଡଙ୍ ମନଙ୍ ଜୁବାୟ୍ଲେ ଡକ୍କୋଆ; ଇନିଆସନ୍ଗାମେଣ୍ତେନ୍ ତେତ୍ତେ ସିଲଡ୍ ଅନମେଙନ୍ ଡୁଙ୍ତନାୟ୍ । ଅମଙ୍ନମ୍ ସିଲଡ୍ ପେଲ୍ଲା ବରନ୍ ଡୁଙ୍ଡଙ୍ନାୟ୍ତଡ୍ ଆରି ଇର୍ସେବରନ୍ ସିଲଡ୍ ଉସାଲ୍ତମ୍ବେନ୍ ଜବ୍ର ସଙାୟ୍ ଡକ୍କୋବା । ଅମଡ୍ନମ୍ ଡାସଙାୟ୍ ଗିଜେତୋ ଆରି ଉସାଲ୍ମଡ୍ନମ୍ ମୁକ୍କାବାନମ୍ ବିଙୟ୍ ଗିଜେତୋ । ତାଲ୍ଜଙ୍ନମ୍ ସବ୍ତଙ୍ଲେ ଆଙ୍ଜଞ୍ଜନା ଆରି ତଙର୍ନମ୍ ଅଡ଼୍କୋନ୍ ଗରିଏତୋ । ଅର୍ଜଡ଼ୋମ୍ଗଡ୍ ଅଡ଼େ ଅର୍କାବଡ଼ିସିଗଡ୍ ଏୟର୍ଡଙ୍ନାୟ୍, ତାଲ୍ଜଙ୍ନମ୍ ଇର୍ସେନ୍ ସିଲଡ୍ ସବ୍ଙାଜା ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.