Juray Soura Bible
ମନଙ୍ ଞନଙ୍ଞଙ୍ବର୍ 8
ଗିଆନନ୍ ଆ ସନେଙ୍କେ
ଗିଆନନ୍ ଇନି ଅଃନୋଡ୍ଡେଏ ପଙ୍ ? ବୁଡ୍ଡିନ୍ ଇନି ଆକ୍ରାନ୍ ଅଃବାବ୍ବାବେ ପଙ୍ ? ଆନିନ୍ ଅନେଙ୍ତଙରନ୍ ଡେଙ୍ଗା ଡରକୋନେରେଙ୍, ତଙରନ୍ ଅଡ଼୍କୋ ପାଡ଼ାର୍ରେଙ୍ ଡରକୋନେଲୋଙ୍ ତନଙ୍ତେ । ଆନିନ୍ ଗଡ଼ାନ୍ ଆଡୁଆରାବା, ଗଡ଼ାନ୍ ଆଗରନ୍ନେ ଡୁଆରାରେଙ୍, ଡୁଆରାନ୍ ଆ ଗରନ୍ନେ ଡରକୋନେରେଙ୍ ଡକୋଲନ୍ ଆକ୍ରାନ୍ ବାବ୍ବାବ୍ଲେ ଓଡ୍ଡେଲେ ବର୍ତେ, ଏ ମନ୍ରାଜି, ଞେନ୍ ଆମ୍ୱେଞ୍ଜିଆଡଙ୍ ଓଡ୍ଡେତବେନ୍; ଆରି, ମନ୍ରାଅନଞ୍ଜି ଆମଙ୍ବା ସର୍ରଙ୍ଞେନ୍ ଡକୋ । ଏ ଉଲ୍ଲୁମର୍, ଜାଗର୍ତ ବର୍ନେନ୍ ବୁଜେଆ; ଏ ଉଲ୍ଲୁମର୍ଜି, ଆମ୍ୱେଞ୍ଜି ମନଙ୍ କାବ୍ବାଡ଼ାନ୍ ଆଲନୁମ୍ ଆ ମନ ଡେବା । ଅମ୍ଡଙ୍ବା, ଇନିଆସନ୍ଗାମେଣ୍ତେନ୍ ଞେନ୍ ମାଡ୍ଡ ମନଙ୍ ଆବର୍ନେ ବର୍ତନାୟ୍; ଉସାଲ୍ତମ୍ଞେନ୍ ରୋଲେ ଆଜାଡ଼ି ବର୍ନେନ୍ ବର୍ତନାୟ୍ । ଇନିଆସନ୍ଗାମେଣ୍ତେନ୍ ତଅଡ୍ଞେନ୍ ଆଜାଡ଼ିବରନ୍ ବର୍ତନେ, ଉସାଲ୍ତମ୍ଞେନ୍ ପେଲ୍ଲାବରନ୍ ଏଡ଼ୁର୍ମଡ୍ତେ । ତଅଡ୍ଞେନ୍ ଆବର୍ନେ ଅଡ଼୍କୋନ୍ ଆଜାଡ଼ିଡମ୍; ତେତ୍ତେ ସିଲଡ୍ ନିଣ୍ଡୟ୍ବରନ୍ ଡ କଣ୍ତାୟ୍ବରନ୍ ଇନ୍ନିଙ୍ ଅବୟ୍ତଡ୍ । ଆନା ତିଆତେ ଜନାତେ, ଆନିନ୍ ଆସନ୍ ତି ଅଡ଼୍କୋନ୍ ରେୟ୍ଲଙ୍; ଆରି ପଡ଼େନେମରଞ୍ଜି ଆସନ୍ ତିଆତେ ଆଜାଡ଼ିଡମ୍ । ରୁପ୍ପାନ୍ ଆପାଲ୍ତେଙ୍ ଞନଙ୍ଞଙ୍ବର୍ଞେନ୍ ସେଡାବା ଆରି ମନଙ୍ ସୁନ୍ନାନ୍ ସିଲଡ୍ ଗିଆନନ୍ ଜାବା । ଇନିଆସନ୍ଗାମେଣ୍ତେନ୍ ଗିଆନନ୍ ମୁକ୍ତାନ୍ ସିଲଡ୍ ମନଙ୍ ଆରି ଅଡ଼୍କୋ ଇସ୍ସୁମ୍ଡମନ୍ ଆଜନବ୍ ବାତ୍ତେ ସରି ଅଡ୍ଡେଏ । ଞେନ୍ ଗିଆନନ୍, ଅନବ୍କିଲ୍କିଲନ୍ ବାତ୍ତେ ଡକୋତନାୟ୍, ଆରି ଗିଆନନ୍ ଡ ମନଙ୍ ପନ୍ସୁଆତିନ୍ ଞାଙ୍ଲାୟ୍ । ପ୍ରବୁନ୍ ଆବର୍ନେ ଆବନତଙ୍, ପରାନ୍ସାତ୍ତିନ୍ ଆ ଏଡ଼ୁର୍ମଡ୍; କଙ୍କ୍ରିନ୍, ଅବ୍ସୋଡ଼ାନେନ୍ ଡ ପରାନ୍ସାତ୍ତିନ୍ ଆତଙର୍ ଆରି କଣ୍ତାୟ୍ ବରନ୍ ଞେନ୍ ଏଡ଼ୁର୍ମଡ୍ତାୟ୍ । ଞନଙ୍ଞଙନ୍ ଡ ଜରୁ ଗିଆନନ୍ ଅମଙ୍ଞେନ୍ ଡକୋ । ଞେନ୍ ଜନାଲେ ରପ୍ତିତାୟ୍ ଆରି ଅମଙ୍ଞେନ୍ ବୋର୍ସାନ୍ ଡକୋ । ଞେନ୍ ଅମ୍ମେଲେ ରାଜାଞ୍ଜି ରାଜାତଞ୍ଜି ଆରି ସୋଡ଼ାଗଡ୍ମରଞ୍ଜି ଞେନ୍ ବାତ୍ତେ ଆଜାଡ଼ି ପନ୍ସୁଆତିତଜି । ଞେନ୍ ଅମ୍ମେଲେ ସୋଡ଼ାମରଞ୍ଜି, ଆମ୍ମୁଙ୍ଗଡ୍ମରଞ୍ଜି ଡ ପୁର୍ତିନ୍ ଆ ପନ୍ସୁଆତିମର୍ଜି ଅଡ଼୍କୋନ୍ ସାସନତଜି । ଅଙ୍ଗା ଆମନ୍ରାଜି ଞେନ୍ଆଡଙ୍ ଡୁଙ୍ୟମ୍ତିଁୟ୍ଜି, ଞେନ୍ ଆନିଞ୍ଜିଆଡଙ୍ ଡୁଙ୍ୟମ୍ତାୟ୍, ଆରି ଅଙ୍ଗା ଆମନ୍ରାଜି ଜୁବାୟ୍ଲେ ଞେନ୍ଆଡଙ୍ ସାୟ୍ଡଙ୍ତିଁୟ୍ଜି, ଆନିଞ୍ଜି ଞେନ୍ଆଡଙ୍ ଞାଙ୍ତଜି । ଅମଙ୍ଞେନ୍ ରନ୍ନାନ୍ ଡ ମନାନ୍ନେନ୍, ଆରି ଅଃନଞିଡେନ୍ ଆନର୍ଜେ ଡ ଡରମ୍ମନ୍ ଡକୋ । ଜଅଞେନ୍ ସୁନ୍ନା, ଓଓ, ମଡ଼ିର୍ ସୁନ୍ନାନ୍ ସିଲଡ୍ ଜବ୍ର ମନଙ୍ । ଆରି ଅନେଲ୍ଞେନ୍ ମନଙ୍ ରୁପ୍ପାନ୍ ସିଲଡ୍ ଆରି ମନଙ୍ । ଞେନ୍ ଡରମ୍ମନ୍ ଆ ତଙର୍ଗଡ୍, ପନ୍ସୁଆତିନ୍ ଆ ତଙର୍ଗଡ୍ ତଙିୟ୍ତନାୟ୍, ଆରି ଅଙ୍ଗା ଆମନ୍ରାଜି ଞେନ୍ଆଡଙ୍ ଡୁଙ୍ୟମ୍ତିଁୟ୍ଜି, ଆନିଞ୍ଜିଆଡଙ୍ ଅଡ଼୍କୋ ଆରନ୍ନା ଆଡନେମର୍ ଏମ୍ମେତେ ଆରି ଆ ଡରକ୍କୋସିଙ୍ଲୋଙନ୍ ବବ୍ରିୟ୍ତେ । ପ୍ରବୁନ୍ ଆନିନ୍ଡମନ୍ ଆତଙର୍ ଆମ୍ମୁଙ୍, ଆନିନ୍ ଆ ପୁର୍ବା ଲନୁମଞ୍ଜି ସିଲଡ୍ ଞେନ୍ଆଡଙ୍ ଗବ୍ଡେଲିଁୟ୍ । ପୁର୍ବାନ୍ ସିଲଡ୍ ଅଡ଼େ ଆମ୍ମୁଙ୍ ମା ସିଲଡ୍, ଅଡ଼େ ପୁର୍ତିନ୍ ତନମ୍ମିଜନ୍ ଅନ୍ରଙ୍ ଡେଏନ୍ ଆମ୍ମୁଙ୍ ଞେନ୍ ଗଡ଼େଲିଁୟ୍ । ସମେଁୟ୍ଣ୍ତ୍ରାନ୍ ଅନ୍ରଙ୍ ଗଡ୍ଡେଲେନ୍ ଆମ୍ମୁଙ୍, ଆରି ଅଡ଼୍କୋ ଡୁଙ୍ଡମ୍ନେଡାନ୍ ବାତ୍ତେ ଡାଆନ୍ ଅନ୍ରଙ୍ ବରିଜେନ୍ ଆମ୍ମୁଙ୍ ଞେନ୍ କନୋଡନ୍ ଡେଲିଁୟ୍ । ଆରି ବରୁଞ୍ଜି ଡ ତଡ଼କୁବଞ୍ଜି ତନମ୍ମିଜନ୍ ଅନ୍ରଙ୍ ଡେଏନ୍ ଆମ୍ମୁଙ୍ ଞେନ୍ କନୋଡନ୍ ଡେଲିଁୟ୍ । ତି ଆଡିଡ୍ ଲବନ୍, ଅଡ଼େ ଆରିଙ୍ରିଙ୍ଲୋଙନ୍, ଅଡ଼େ ପୁର୍ତିନ୍ ଆ ଉମ୍ରିଲ ଆନିନ୍ ଅନ୍ରଙ୍ ଗବ୍ଡେଲେ । ଅଙ୍ଗା ଆଡିଡ୍ ଆନିନ୍ ରୁଆଙନ୍ ଗବ୍ଡେଲେନ୍, ତି ଆଡିଡ୍ ଞେନ୍ ତେତ୍ତେ ଗଡ଼େଲିଁୟ୍, ଅଙ୍ଗା ଆଡିଡ୍ ଆନିନ୍ ସମେଁୟ୍ଣ୍ତ୍ରାନ୍ ଆତୋଣ୍ତୋ ସଣ୍ତିନ୍ ଗବ୍ରିଏନ୍, ଆରି ତୋଣ୍ତୋ ଆ ରୁଆଙ୍ ତବ୍ଙିଜେନ୍ ଆରି ଡାଆନ୍ ଆପନେ ଅଡ଼୍କୋନ୍ ଜବ୍ର ଡେଏନ୍; ଡାଆନ୍ ଅଡ଼୍କୋନ୍ ଏଙ୍ଗାଲେ ଆ ବନାୟଁନ୍ ଆଲ୍ଲେଲେ ଅଃରପ୍ତିଏ, ତିଆସନ୍ ଅଙ୍ଗା ଆଡିଡ୍ ଆନିନ୍ ସମେଁୟ୍ଣ୍ତ୍ରାନ୍ ଆ ସଣ୍ତିନ୍ ଗବ୍ରିଏନ୍ ଆରି ଅଙ୍ଗା ଆଡିଡ୍ ପୁର୍ତିନ୍ ଆଜିମ୍ମି ସଣ୍ଡିଏନ୍; ତି ଆଡିଡ୍ ଞେନ୍ ଆମଙନ୍ କାବ୍ବାଡ଼ାମର୍ ଡକୋଲିଁୟ୍, ଆରି ଞେନ୍ ଡିତାନ୍ ମନଅଁଞନ୍ ବାତ୍ତେ ଆମୁକାବାନ୍ ଆଏଡ଼ର୍ ସର୍ଡାଲନାୟ୍ । ଆରି ଆ ପୁର୍ତିନ୍ ଆ ବସେଙ୍ଲୋଙ୍ ସର୍ଡାଲନାୟ୍ ଆରି ମନ୍ରାନ୍ ଆଅଞ୍ଜି ସରିନ୍ ସର୍ଡାଞେନ୍ ଡକୋଏନ୍ । ତିଆସନ୍ ଏ ଡାଙ୍ଗଡ଼ାଅନ୍ଞେଞ୍ଜି, ବର୍ନେଞେନ୍ ଅମ୍ଡଙ୍ବା, ଇନିଆସନ୍ଗାମେଣ୍ତେନ୍ ଆଙ୍ଗା ଆମନ୍ରାଜି ତଙର୍ଞେନ୍ ଞମ୍ତଜି, ଆନିଞ୍ଜି ସନେନ୍ସେନ୍ଡମ୍ । ଞନଙ୍ଞଙ୍ବରନ୍ ଅମ୍ଡଙ୍ଲେ ଗିଆନମରନ୍ ଡେବା; ଆରି ତିଆତେ ଏବାସ୍ସେଡଙ୍ । ଆନା ବର୍ନେଞେନ୍ ଅମ୍ଡଙ୍ତେ ଆରି ଡୁଆରାବାଞେନ୍ ଆଏଡ଼ର୍ ଜଗ୍ଗେଲେ ଡକୋତନ୍, ସନଙ୍ବାଞେନ୍ ସନ୍ନିଲ୍ତେ, ତି ଆମନ୍ରା ସନେନ୍ସେନ୍ଡମ୍ । ଇନିଆସନ୍ଗାମେଣ୍ତେନ୍ ଆନା ଞେନ୍ଆଡଙ୍ ଞାଙ୍ତେ, ଆନିନ୍ ଅନମେଙନ୍ ଞାଙ୍ତେ ଆରି ପ୍ରବୁନ୍ ଆ ସନାୟୁମ୍ ଞାଙ୍ତେ । ବନ୍ଡ ଆନା ବିରୁଦଲୋଙ୍ଞେନ୍ ଇର୍ସେନ୍ ଲୁମ୍ତେ, ଆନିନ୍ ଆ ପରାନ୍ନାନ୍ ଅମ୍ମୋସାତେ; ଅଙ୍ଗା ଆମନ୍ରାଜି ଞେନ୍ଆଡଙ୍ ଏଡ଼ୁର୍ମଡ୍ତିଁୟ୍ଜି, ଆନିଞ୍ଜି ରନବୁନ୍ ଲଡୟ୍ତଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.