Juray Soura Bible
ଜିସାୟ 21
ବାବିଲନ୍ ଆନସେଡ୍ ଆ ତନାଲ୍ମଡ୍
ସମେଁୟ୍ଣ୍ଡ୍ରାନ୍ ଆତୁୟାୟ୍ ଆରିଙ୍ରିଙ୍ ଡରକୋନେନ୍ ଆସନ୍ ପୁର୍ବାଃତେବରନ୍ । ତିଆତେ ଅର୍ଜଡ଼ୋମ୍ସିଗଡ୍ ଜବ୍ର ଅପ୍ପୁଡ୍ ଆଜିର୍ତାଞନ୍ ଆ ଗାବ୍ୟାର୍ରିଙନ୍ ଅନ୍ତମ୍ ଆରିଙ୍ରିଙ୍ଲୋଙନ୍ ସିଲଡ୍ ଅବୟ୍ ବରନ୍ତଙ୍ଡାନ୍ ଆ ଡେସା ସିଲଡ୍ ଜିର୍ତାୟ୍ । ଅବୟ୍ ଡୁକ୍କଡମନ୍ ଆ ତନାଲ୍ମଡ୍ ଞେନ୍ଆଡଙ୍ ଅନବ୍ଗିଜନ୍ ଡେଏନ୍; ବନାୟ୍ସିମରନ୍ ବାଁୟ୍ସିତଞ୍ଜି ଆରି ଜୁରୁମରନ୍ ଜୁରୁତଞ୍ଜି । ଏ ଏଲମ୍, ତୋଣ୍ତୁନ୍ ଜିରା; ଏ ମାଦିଅ, ଅବ୍ଗେଗେଆ; ଞେନ୍ ତିତ୍ତେ ଆ ୟେୟେଡା ଆସନଡ୍ଡା ଅଡ଼୍କୋନ୍ ସବ୍ଙାୟ୍ତାୟ୍ । ତିଆସନ୍ କୁଃନ୍ଡୁବ୍ଞେନ୍ ଆବତ୍ତା ପରାନ୍ଡଣ୍ଡନ୍ ଡେତିଁୟ୍; କୋକ୍କୋନେବଜନ୍ ଆବତ୍ତା ଅନ୍ତମ୍ ଞେନ୍ ବତ୍ତାତିଞ୍; ଜବ୍ର ବତ୍ତାନ୍ ଆସନ୍ ଞେନ୍ ଅମ୍ଡଙ୍ଲେ ଅଃରପ୍ତିଆୟ୍; ଜବ୍ର ଡନଣ୍ତାୟନ୍ ଆସନ୍ ଞେନ୍ ରପ୍ତି ଅଃଗିଜାୟ୍ । ଉଗର୍ଞେନ୍ ପଲୁଲେକାଁୟ୍ ଡେତେ, ସୋଡ଼ା ବନ୍ତଙନ୍ ଞେନ୍ଆଡଙ୍ ବବ୍ତଙ୍ତିୟ୍; ଅଙ୍ଗା ଆସାଲୁମ୍ ଞେନ୍ ଜଗେଲାୟ୍, ତିଆତେ ଞେନ୍ ଆସନ୍ ଅବୟ୍ ବତଙ୍ଡାଗୋ । ଆନିଞ୍ଜି ମେଜନ୍ ସଜ୍ଜାୟ୍ତଜି, ଆନିଞ୍ଜି ଜନଗ୍ଗେମରନ୍ ତବ୍ନଙ୍ତଜି, ଆନିଞ୍ଜି ଜୋମ୍ତଞ୍ଜି, ଗାତଜି; ଏ ସୋଡ଼ା ସିପ୍ପାୟଞ୍ଜି, ଡୋନାବା, ଡରଙ୍ନେଲୋଙନ୍ ମିଞଲନ୍ ଜଡ୍ବା । ଇନିଆସନ୍ଗାମେଣ୍ତେନ୍, ଞେନ୍ଆଡଙ୍ ପ୍ରବୁନ୍ କେନ୍ ଆବର୍ନେ ବର୍ରିୟ୍, “ଜିରା, ଅବୟ୍ ଜନଗ୍ଗେମରନ୍ ତବ୍ନଙା; ଆନିନ୍ ଇନି ଗିୟ୍ତେ, ତିଆତେ ବର୍ନେତୋ । ଆରି ଆନିନ୍ ଅଙ୍ଗା ଆଡିଡ୍ ବଡଡ଼ ସିପ୍ପାୟନ୍, ତଙ୍ବାଗୁ କୁର୍ତ୍ତାଲୋଙନ୍ ସିପ୍ପାୟ୍ ଆଡନାୟ୍, ବଡଡ଼ ଗୋଡୋଞନ୍ ଆଡନାୟ୍ମର୍ ଡ ବଡଡ଼ ଓଟନ୍ ଆଡନାୟ୍ମର୍ ଗିୟ୍ତେ, ତିଆଡିଡ୍ ଆନିନ୍ ଡାଲୁଡ୍ଲେ ମନଙ୍ ଅମ୍ଡଙ୍ତେ ।” ସିଲତ୍ତେ ଆନିନ୍ ସିଅଁକିଡନ୍ ଅନ୍ତମ୍ ଆକ୍ରାନ୍ ବାବ୍ବାବ୍ଲେ ବର୍ରନେ, “ଏ ପ୍ରବୁ, ଞେନ୍ ତମ୍ପରୁବ୍ ସିପ୍ପାୟ୍ମରେଲ୍ସିଙ୍ଲୋଙନ୍ ତନଙ୍ଲେ ଡକୋତନାୟ୍ ଆରି ତମଗଲ୍ ଞେନ୍ ଜନଗ୍ଗେ ଡରକୋନେଲୋଙନ୍ ଆତନଙ୍ ଡକୋତନାୟ୍,” ଆରି, ଗିଜା, କେନ୍ ତେନ୍ନେ ବଡଡ଼ ମନ୍ରାନ୍ ତଙ୍ବାଗୁ କୋର୍ତ୍ତାନ୍ ଆଡନାୟ୍ ସିପ୍ପାୟନ୍ ଜିର୍ତାଜି । ଆରି, ଆନିନ୍ ଜାଲଙ୍ଲେ ବର୍ନେ, “ବାବିଲ୍ ଅସେଡେନ୍; ଅସେଡେନ୍ ଆରି ଆ କୁଣ୍ତାୟନ୍ ଅଡ଼୍କୋନ୍ ଲଗଡ୍ଲେ ଲବଲୋଙନ୍ ମାୟ୍ଲନେ ।” ଏ ଇସ୍ରାଏଲମର୍ଞେଞ୍ଜି ଆମ୍ବେନ୍ ଜନ୍ରୋମନ୍ ଆର୍ଲେଞ୍ଜି ଅନ୍ତମ୍ ଡଲବେନ୍, ବନ୍ଡ ଞେନ୍ ଇସ୍ରାଏଲନ୍ ଆ ଇସ୍ୱର ପ୍ରବୁନ୍ ଆମଙ୍ ସିଲଡ୍ ଇନିଜି ଅମ୍ଡଙ୍ଲାୟ୍, ତିଆତେ ଆମ୍ୱେଞ୍ଜିଆଡଙ୍ ଅବ୍ଜନାଲବେନ୍ ।
ଇଦୋମନ୍ ଆସନ୍ ପୁର୍ବାଃତେବରନ୍
ଇଦୋମନ୍1 ଆସନ୍ ପୁର୍ବାଃତେବରନ୍ । ଅବୟ୍ନେ ସେୟିରନ୍ ସିଲଡ୍ ଡଅଙ୍ଞେନ୍ ଓଡ୍ଡେଲେ ବର୍ତିଁୟ୍, “ଜନଗ୍ଗେମର୍, ଡିଅଙ୍ଗା ଆତଗଲ୍ ଡେଏନ୍ ? ଜନଗ୍ଗେମର୍, ଡିଅଙ୍ଗା ଆତଗଲ୍ ଡେଏନ୍ ?” ଜନଗ୍ଗେମରନ୍ ବର୍ରନେ, “ତନଗାଡନ୍ ଜିର୍ତାୟ୍ ଆରି ତଗଲନ୍ନିୟ୍ ଜିର୍ତାୟ୍; ଆମ୍ୱେଞ୍ଜି ଏବର୍ତିଂ ବରିୟ୍ବା; ଆମ୍ୱେଞ୍ଜି ୟର୍ନାବା, ଜିରାୟ୍ବା ।”
ଆରବନ୍ ଆସନ୍ ପୁର୍ବାଃତେବରନ୍
କେନ୍ଆତେ ଅବୟ୍ ଆରବିଅନ୍ ଡେସାନ୍ ଆବର୍ନେ ।
ତଙିୟ୍ଲନ୍ ଆଜିର୍ତାଞଞ୍ଜି ଆ ଦେଦାଇତବାଜି, ଆମ୍ବେଞ୍ଜି ଆରବ ଜାଡ଼ିଆରେଙନ୍ ତଗଲନ୍ ଏଡକୋତନ୍ । ଅଙ୍ଗା ଆମନ୍ରା ଆଉର୍ଗାଲ୍ ଡକୋଏନ୍, ଆନିଞ୍ଜି ଆମଙ୍ବାନ୍ ଡାଆନ୍ ପାଙ୍ଲାଜି; ତେମା ଡେସାବାୟ୍ଜି ଜନୋମନ୍ ପାଙ୍ଲେ ଜିର୍ଜିରିୟ୍ମରଞ୍ଜି ସରିନ୍ ଅଲ୍ରବାଙେଞ୍ଜି । ଇନିଆସନ୍ଗାମେଣ୍ତେନ୍ ଆନିଞ୍ଜି କଡ଼ିବନ୍ ସିଲଡ୍, ଞଙାନ୍ ଡ ପରାନ୍ଡଣ୍ଡନ୍ ଆଲ୍ଜୁଜ୍ଜେ ସିଲଡ୍ ଜିରେଞ୍ଜି । ଇନିଆସନ୍ଗାମେଣ୍ତେନ୍ ପ୍ରବୁନ୍ ଞେନ୍ଆଡଙ୍ ବର୍ରିୟ୍, “ବଡିଜୋମ୍ମରନ୍ ଆବର୍ସେଙ୍ ଅନ୍ତମ୍ ବବର୍ସେଙ୍ଲୋଙ୍ କେଦାରନ୍ ଅଡ଼୍କୋନ୍ ମାୟାତେ । ଆରି, କେଦାର କେଜ୍ଜାନ୍ ବୋର୍ସା ଞଙାୟମ୍ମର୍ ଅସୋୟ୍ ଡକୋତଜି” ଇନିଆସନ୍ଗାମେଣ୍ତେନ୍ ପ୍ରବୁନ୍ ଇସ୍ରାଏଲନ୍ ଆ ଇସ୍ୱର କେନ୍ଆତେ ବର୍ତନେ ।
Source notes (1)
- Footnote ଆଗରାମ୍ଗାମ୍ ଦୁମ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.