Juray Soura Bible
ଜିସାୟ 20
ମିସର୍ ଡ କୁସ ଡେସାନ୍ ଆବିରୁଦ ଆସନ୍ ପୁର୍ବାଃତେବରନ୍
ଅସୁରନ୍ ଆ ରାଜା ସର୍ଗୋନନ୍ ଆନାପ୍ପାୟ୍ମର୍ ତର୍ତ୍ତାନନ୍ ସିପ୍ପାୟନ୍ ଆସୋଡ଼ାମର୍ ଅଙ୍ଗା ବର୍ସେଙ୍ ଅସ୍ଦୋତନ୍ ଜିର୍ରେ ଆ ବିରୁଦଲୋଙନ୍ ଜୁଜ୍ଜେଡାଲନ୍ ଆନିନ୍ଆତେ ଏମ୍ମେଏନ୍ । ତି ଆଡିଡ୍ ଆମୋସନ୍ ଆ ଡାଙ୍ଗାଡ଼ାଅନ୍ ଜିସାୟନ୍ ବାତ୍ତେ ପ୍ରବୁନ୍ କେନ୍ ଆବର୍ନେ ବର୍ରନେ, “ଜିରା, କିଣ୍ଡୁବ୍ନମ୍ ସିଲଡ୍ ଅକାକାବନ୍ ଉୟ୍ନା ଆରି ତାଲ୍ଜଙ୍ନମ୍ ସିଲଡ୍ ପାଣ୍ତୋଞନ୍ ଉୟ୍ନା,” ସିଲତ୍ତେ ଆନିନ୍ ତିଅନ୍ତମ୍ ଲୁମ୍ଲେ ଆଉର୍ଡିଜନ୍ ଡ ଆରିକ୍କାଜଙନ୍ ବୁଲ୍ଲେଏନ୍ । ସିଲଡ୍ତ୍ତେ ପ୍ରବୁନ୍ ବର୍ରନେ, “କମ୍ୱାରିଞେନ୍ ଜିସାୟନ୍ ମିସର୍ ଡ କୁସ ଡେସାନ୍ ଆସନ୍ ଅବୟ୍ ଅରମ୍ମଡନ୍ ଡ ସାନ୍ନି ଅନବ୍ଗିଜନ୍ ଅନ୍ତମ୍ ଆଡନେ ଆସନ୍ ଏଙ୍ଗାଲେ ୟାଗି ବର୍ସେଙ୍ ଆଉର୍ଡିଜନ୍ ଡ ଆରିକ୍କାଜଙନ୍ ବୁଲ୍ଲେଏନ୍ । ଏତ୍ତେଲେମା ଅସୁରନ୍ ଆ ରାଜା ମିସିରିଅଞ୍ଜି ଆଗନ୍ରୟ୍ ଆସନ୍ ବେଣ୍ତିଆ ଡ ବୁଡାକୋୟ୍ ଆଉର୍ଡିଜନ୍, ଆରିକ୍କାଜଙନ୍ ଡ କୁଣ୍ଡୁବନ୍ ଏର୍ନବ୍ସସନ୍ ଉୟ୍ଲେ ଓରୁଙ୍ତେ । ସିଲତ୍ତେ ଅଙ୍ଗା ଆମନ୍ରାଜି କୁସ୍ଲୋଙ୍ ଡର୍ନେଜି ଡ ମିସର୍ ଆସନ୍ ଦର୍ପଲଞ୍ଜି ଆନିଞ୍ଜି ବତଙ୍ତଜି ଆରି ଗରୟ୍ତଜି । ଆରି ତି ଆଡିନ୍ନା ସମେଁୟ୍ଣ୍ଡ୍ରାରେଙନ୍ ଆଡ୍ରକୋତଞ୍ଜି ଆମନ୍ରାଜି ବର୍ତଞ୍ଜି, ଗିୟ୍ବା, ଅସୁର ରାଜାନ୍ ସିଲଡ୍ ଡନୋବନ୍ ଆଞନାଙ୍ ଆସନ୍ ଅଙ୍ଗା ଆମନ୍ରାଜି ଆମଙ୍ଲୋଙ୍ ଞେନ୍ ଡର୍ରନେବୋ ଡ ସନାୟ୍ସିନ୍ ଆଞନାଙ୍ ଆସନ୍ ଅଙ୍ଗାଲୋଙ୍ ଜିର୍ରବୋ, ଆନା ଆମଙ୍ ଡର୍ରନେବୋ ଆନିନ୍ କେନ୍ ଅନ୍ତମ୍; ଏତ୍ତେଲ୍ଡେନ୍ ଞେନ୍ ଏଙ୍ଗାଲେ ଡନୋବନ୍ ଞାଙ୍ବୋ ?”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.