Juray Soura Bible
ଜିସାୟ 22
ଜିରୁସାଲମନ୍ ଆସନ୍ ପୁର୍ବାଃତେବରନ୍
ଗର୍ଡନ୍ ଆ ତନାଲ୍ମଡ୍ ଆସନ୍ ପୁର୍ବାଃତେବରନ୍ । ନମିଞେନ୍ ଆମ୍ୱେନ୍ଆତେ ଇନି ଡେତେ ଡ, ଅଡ଼୍କୋନ୍ବେନ୍ ତୋଣ୍ତୁ ମେଡ଼ସିଙନ୍ ଏଜିରେନ୍ ? ଏ ସର୍ଡାନ୍ ସନଡ୍ଡ ଆବରିୟ୍ ଗଡ଼ାନ୍ୟୋଙ୍ୟାଙ୍ ଆଗଡ଼ା, ତଙ୍ସେନ୍ ଡନୁଙ୍ୟମ୍ ଗଡ଼ା; ରନବୁମର୍ବେଞ୍ଜି କଡ଼ିବନ୍ ବାତ୍ତେ ରନବୁନ୍ ଅଃଡ୍ଡେଲଜି, ଅଡ଼େ ଆନିଞ୍ଜି ଜୁଜ୍ଜେଲୋଙନ୍ ଅଃରବୁଲଜି । ଅଡ଼୍କୋନ୍ ରାଜ୍ୟପାଡ଼ବେଞ୍ଜି ମାୟ୍ଲନ୍ ଆ ବରୁକୁନ୍ ଜିରେଞ୍ଜି, ଆନିଞ୍ଜି ଞଙାନ୍ ଆଞଣ୍ତ୍ରମତଞ୍ଜି ଆମନରାଜି ବାତ୍ତେ ଆଜନିବାଡ୍ ଡେଏଞ୍ଜି; ଆମ୍ୱେଞ୍ଜି ସରିନ୍ ଏଡ୍ରକୋତନ୍ ଆମନ୍ରାଜି ସଙାୟ୍ ଜିରେଞ୍ଜି ଜନଙ୍ଡେନ୍, ଆନିଞ୍ଜି ଆବରୁକୁନ୍ ଞମ୍ଲେ ଆଜନିବାଡ୍ ଡେତଜି । ତିଆସନ୍ ଞେନ୍ ବର୍ରନାୟ୍, “ଞେନ୍ଆଡଙ୍ ଉମ୍ରେଙ୍ଲେ ଆନ୍ନାଗଡ୍ ଆଙାଙ୍ନା, ଞେନ୍ ଜବ୍ର ୟେତାୟ୍; କେଜ୍ଜାଞେନ୍ ଆଡାଙ୍ଗଡ଼ି ଆନସେଡ୍ ଆବର୍ନେଲୋଙ୍ ଞେନ୍ଆଡଙ୍ ବନବ୍ୟୋନ୍ ଆସନ୍ ଏର୍ଡଙ୍ଗୋୟ୍ଡଙ୍ । ଇନିଆସନ୍ଗାମେଣ୍ତେନ୍ ପ୍ରବୁ ପ୍ରବୁନ୍ ସିଲଡ୍ ତନଲ୍ମଡ୍ ଗର୍ଡଲୋଙନ୍ ଅନାରେନ୍, ଞନାଡାନ୍, ପନବ୍ରଡ୍ ଡିନ୍ନାନ୍, କିନ୍ତାଲଞ୍ଜି ଆ ରିଡ଼ାଙ୍ ଡ ବରୁଞ୍ଜି ଆ ୟେୟେଡା ଆସନଡ୍ଡା ଆଡ୍ରେତେନ୍ ଆଡିନ୍ନା କେନ୍ । ଆରି ଏଲମ୍ ଡେସାନ୍ ସିଲଡ୍ ରତ୍ତାଲୋଙନ୍ ଡାୟ୍ଲେ ସିପ୍ପାୟଞ୍ଜି ସରିନ୍ ଅଆମନ୍ ଡ ଞଙାନ୍ ଞମେନ୍ ଆରି ବୋର୍ସାମରନ୍ ଆଡରଙ୍ନେ ସବାଙାଜେନ୍ । ଆରି ଜବ୍ର ମନଙ୍ ଗର୍ଡଞ୍ଜି ଅଡ଼୍କୋନ୍ ରତ୍ତାନ୍ ଆବରିୟ୍ ଡକୋଏନ୍ ଆରି କୁର୍ତ୍ତାଲୋଙନ୍ ଆଡାୟ୍ଡାଜନ୍ ଆମନ୍ରାଜି ଗଡ଼ାନ୍ ଆ ଡୁଆରାରେଙ୍ ଅତିଆରନ୍ ଞମ୍ଲେ ଅବ୍ଜାଡାଲନ୍ ଡକୋଲଞ୍ଜି ।” ଆରି ପ୍ରବନ୍ ଜିଉଦାନ୍ ଆ ଆଡରଙ୍ନେ ତବ୍ତଜି ଆରି ତି ଆଡିନ୍ନା ଆମ୍ୱେନ୍ କିନ୍ରେଙ୍ ଡରକୋନେସିଙ୍ଲୋଙନ୍ ଅଲ୍ଜୁଜ୍ଜେ ଅତିଆରନ୍ ଏଆସାଲନେ । ଆରି ଦାଉଦ ଗଡ଼ାନ୍ ଆରୁଡ଼ାଙ୍ ଡରକୋନେନ୍ ଗୋଗୋୟ୍ଡମ୍ ଗାମ୍ଲେ ଆମ୍ୱେଞ୍ଜି ଏଗିଜେନ୍ ଆରି ଜାୟ୍ତା ଆ ବଣ୍ତାଲୋଙନ୍ ଡାଆନ୍ ଅଡ଼୍କୋନ୍ ଏରୁକ୍କୁଏନ୍ । ଆରି ଆମ୍ୱେଞ୍ଜି ଜିରୁସାଲମନ୍ ଆସିଙ୍ ଅଡ଼୍କୋନ୍ ଏଡିଡିଏନ୍ ଆରି କିନ୍ତାଲନ୍ ଆ ରନବ୍ଡୋ ଆସନ୍ ଅସିଙନ୍ ଅଡ଼୍କୋନ୍ ଏରୁବ୍ଡ଼ାଙେନ୍ । ଆମ୍ୱେଞ୍ଜି ପାପୁର୍ ବଣ୍ତାନ୍ ଆ ଡାଆ ଆପନାଙ୍ ଆସନ୍ ବାଗୁ କିନ୍ତାଲନ୍ ଆମଡ୍ଡି ଅବୟ୍ ବଣ୍ତାନ୍ ଏତୁବେନ୍; ବନ୍ଡ ଅଙ୍ଗା ଆମନ୍ରା କେନ୍ ଆତେ ଲୁମେନ୍, ଅଡ଼େ ଅଙ୍ଗା ଆମନ୍ରା ଆମ୍ମୁଙ୍ ମା ସିଲଡ୍ କେନ୍ ଆତେ ଇଃୟମେନ୍, ଆନିନ୍ ଆସନ୍ ଆମ୍ୱେନ୍ ଏଡୁଙ୍ୟମ୍ଲୋ । ଅଡ଼୍କୋନ୍ ସିଲଡ୍ ବୋର୍ସାଡମନ୍ ଆ ପ୍ରବୁ ଆମ୍ବେଞ୍ଜିଆଡଙ୍ ୟେୟେଡାନ୍ ଡ ୟନେନ୍ ଆସନ୍, ଗଡୁନ୍ ଡ ଅକାକାବନ୍ ଜିଜିନେନ୍ ଆସନ୍ ଓଡ୍ଡେଲବେନ୍ । ବନ୍ଡ ଗିୟ୍ବା, କିୟ୍ଲେକଲେ ଏସର୍ଡାନେବା, ଆରି ଜନ୍ତୁନ୍ ଡ ମେଣ୍ତାନ୍ ଆରନବୁ, ଜେଲୁଜୋମନ୍ ଡ ଦ୍ରାକ୍ୟାଡାନ୍ ଆଗନା ଡେତେ; ଜିରାୟ୍ବା, ଇନ୍ଲେଞ୍ଜି ଏଜୋମ୍ବା ଏଗାବା, ଇନିଆସନ୍ଗାମେଣ୍ତେନ୍ ବିଅଡ଼େଃ ଇନ୍ଲେଞ୍ଜି ରବୁଲଙ୍ତନ୍ । ଆରି, ପ୍ରବୁନ୍ ଅମଙ୍ଲୋଙ୍ବେନ୍ କେନ୍ ଆବର୍ନେ ଅବ୍ଜନାଲେ ବର୍ରନେ, ଆଜାଡ଼ିଡମ୍ ରନବୁବେନ୍ ଜାୟ୍ କେନ୍ ଇର୍ସେବେନ୍ କେମାବେନ୍ ତନିୟନ୍ ଅଃଡ୍ଡେଏ, ପ୍ରବୁ ପ୍ରବୁନ୍ କେନ୍ ଆବର୍ନେ ବର୍ତନେ । ପ୍ରବୁ ପ୍ରବୁନ୍ କେନ୍ ଆବର୍ନେ ବର୍ତନେ, ଆମ୍ୱେନ୍ କେନ୍ ଡକ୍କୋଡାବ୍ମରନ୍ ଆମଙ୍ବା, ଆଗରାମ୍ଗାମ୍, ରାଜାସିଙନ୍ ଆସୋଡ଼ାମର୍ ସିବନନ୍ ଆମଙ୍ବାନ୍ ଇୟ୍ଲେ ଇୟ୍ବର୍ବା, ଆମନ୍ କେନ୍ତେନ୍ନେ ଇନି ଏଙ୍ଗାତନେ ? ଆରି କେନ୍ତେନ୍ନେ ମନ୍ରାନମ୍ ଆନା ଡକୋ ଡ, ଆମନ୍ଡମ୍ ଆସନ୍ ଅବୟ୍ ମସାନ୍ନିନ୍ ଗାୟେନ୍ ? ଆନିନ୍ ଡେଣ୍ଡା ଡରକୋନେଲୋଙ୍ ଆ ମସାନ୍ନି ଗାୟେନ୍ ଆରି ଅରେଙ୍ଲୋଙନ୍ ଆମନ୍ଡମ୍ ଆସନ୍ ଡରକୋନେନ୍ ସେଜେନ୍ ! ଗିୟ୍ବା, ବୋର୍ସାମରଞ୍ଜି ପ୍ରବୁନ୍ ଆମନ୍ଆଡଙ୍ ପାପାଉଡ୍ଲେ ସେଡ୍ତମ୍, ଓଓ, ଆନିନ୍ ଗଙ୍ଲେ ଆମନ୍ଆଡଙ୍ ଞମ୍ତମ୍ । ଆଜାଡ଼ିନ୍ ଆନିନ୍ ଆମନ୍ଆଡଙ୍ ବଲନ୍ ଅନ୍ତମ୍ ସାଇଡ୍ଲେ ଆରି ପପ୍ୟର୍ରେ ସୋଡ଼ା ଡେସାଲୋଙନ୍ ଆମନ୍ଆଡଙ୍ ସେଡ୍ତମ୍; ତେତ୍ତେ ଆମନ୍ ରବୁତମ୍ ଆରି ଗନୁଗୁ ପନେମେଙନ୍ ରତ୍ତାନ୍ ତେତ୍ତେ ଅଡ଼୍କୋନ୍ ଡକୋତନ୍, ଆମନ୍ ପ୍ରବୁନମ୍ ଆସିଙ୍ଲୋଙ୍ ଏରଡୁଙ୍ୟମନ୍ ଅନ୍ତମ୍ ଡେତମ୍ । ଆରି ଞେନ୍ ଆମନ୍ଆଡଙ୍ ତଙ୍କୁମ୍ଲୋଙ୍ନମ୍ ସିଲଡ୍ ଗଙ୍ତିଡ୍ତମ୍ ଡ ଆନିନ୍ ଆମନ୍ଆଡଙ୍ ଡରକୋନେନମ୍ ସିଲଡ୍ ଡିଙ୍ଲେ ଜାୟ୍ତାନ୍ ସେଡ୍ତମ୍ । ଆରି ତି ଆଡିନ୍ନା କମ୍ୱାରିଞେନ୍ ଆଡଙ୍, ଇଲ୍କିଅରନ୍ ଆ ଡାଙ୍ଗାଡ଼ାଅନ୍ ଇଲିଆକିମ୍ଆଡଙ୍ ଓଡ୍ଡେତାୟ୍; ଆରି, ଞେନ୍ ଆନିନ୍ଆଡସଙ୍ ସିନ୍ରିନମ୍ ଅବ୍ଜିଜିତାୟ୍ ଆରି ରନେଡୁବ୍ନବ୍ ବାତ୍ତେ ଆନିନ୍ଆଡଙ୍ ଅଃବୋର୍ସାତାୟ୍ ଡ ରାଜାଗଡ୍ନମ୍ ଆସିଲୋଙନ୍ ସୋରୋପ୍ପାୟ୍ତାୟ୍ । ଆନିନ୍ ଜିରୁସାଲମ୍ବାଜି ଡ ଜିଉଦା କେଜ୍ଜାନ୍ ଆପ୍ପେୟ୍ ଡେତେ । ଆରି ଞେନ୍ ଦାଉଦନ୍ ଆକେଜ୍ଜା ଆକଡ୍ଡା ଆତାରଙ୍ଲୋଙନ୍ ଡକ୍କୋତାୟ୍, ଆନିନ୍ ରୋଏଣ୍ଡେନ୍, ଆନ୍ନିଙ୍ ଇଙଡ୍ଲେ ଅଃରପ୍ତିଏ ଆରି ଆନିନ୍ ଇଙଡେଣ୍ଡେନ୍, ଆନ୍ନିଙ୍ ରୋଲେ ଅଃରପ୍ତିଏ । ଆରି ଞେନ୍ ମେକନ୍ ଅନ୍ତମ୍ ଅବୟ୍ ରଡୋ ଡରକୋନେଲୋଙ୍ ଆନିନ୍ଆଡଙ୍ ତାଙ୍ତାୟ୍ ଡ ଆନିନ୍ ଆପ୍ପେୟନ୍ ଆକେଜ୍ଜା ଆ ଗନୁଗୁ ପନେମେଙ୍ ଆକୁର୍ସି ଅନ୍ତମ୍ ଡେତେ । ଆରି, ମନ୍ରାଞ୍ଜି ଆପ୍ପେୟ୍ ଆକେଜ୍ଜା ଅଡ଼୍କୋନ୍ ଆ ଗନୁଗୁ ପନେମେଙ୍, ଅଅନଞ୍ଜି ଡ ଗରାଡାନେସିମନ୍ ସିଲଡ୍ କଡ଼ସିନ୍ ଜାୟ୍ ସନ୍ନାରାନ୍ ଆସିମ୍ମା ଆ ଡଅଙ୍ଲୋଙନ୍ ୟୁଡ୍ତଜି । ପ୍ରବୁନ୍ ବର୍ତନେ, “ଅଙ୍ଗା ଆମେକ ରଡୋ ଡରକୋନେଲୋଙ୍ ଆତାଙ୍ତାଙ୍ ଡକୋଏନ୍, ତିଆତେ ତି ଆଡିନ୍ନା ମାୟାତେ ଆରି ତିଆତେ ଗାୟ୍ଲନ୍ ଜାୟ୍ତାନ୍ ଅସେଡ୍ତେ, ଆରି ତେତ୍ତେ ଡକୋନ୍ ଆବୁଡ଼ାର୍ ରସମ୍ତେ, ଇନିଆସନ୍ଗାମେଣ୍ତେନ୍ ପ୍ରବୁନ୍ କେନ୍ ଆତେ ବର୍ରନେ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.