Juray Soura Bible
ପର୍ତମ୍ମୁ 16
ଆଗାରନ୍ ଡ ଇସ୍ମାଏଲନ୍
ଅବ୍ରାମନ୍ ଆଡୁକ୍ରି ସାରିନ୍ ଏର୍କନୋଡନ୍ ଡକୋଏନ୍, ଆରି, ଆଗର ଆଞୁମ୍ବୟ୍ ଅବୟ୍ ମିସରିଅ କମ୍ବାରିବୟ୍ ଡକୋଏନ୍ । ତି ସିଲଡ୍ଲ୍ଲନ୍ ସାରିନ୍ ଅବ୍ରାମନ୍ଆଡଙ୍ ବରେନ୍, “ଗିଜା, ପ୍ରବୁନ୍ ଞେନ୍ଆଡଙ୍ ଆଞ୍ଜେବୟ୍ ଏମ୍ମେମେଲିଁୟ୍; ତିଆସନ୍ ଞେନ୍ କାକୁର୍ତିତନାୟ୍, କେନ୍ କମ୍ୱାରିବୟ୍ଞେନ୍ ସରିନ୍ ଲୁଡ୍ବା; ଓଡେନ୍ କେନ୍ ଆଲାଗ୍ରେଙନ୍ ଞେନ୍ ଓବାଅନନ୍ ଞାଙ୍ଲେ ରପ୍ତିତାୟ୍ ।” ତିଆସନ୍ ଅବ୍ରାମନ୍ ସାରିନ୍ ଆବର୍ନେ ମାନ୍ନେଲେ ଅଡ଼େଏନ୍ । ଅବ୍ରାମନ୍ କିଣାନ୍ ଡେସାଲୋଙ୍ ଦସ ବର୍ସେଙ୍ ଆଡ୍ରକୋଲନ୍ ସିଲଡ୍ ଆଡୁକ୍ରିନ୍ ସାରିନ୍ ଆ କମ୍ୱାରିନ୍ ଆଗାରନ୍ଆଡଙ୍ ଓରୋଙ୍ଲେ ଆ ଅୟ୍ତବନ୍ ଅବ୍ରାମନ୍ ସରିନ୍ ଅଃବିବାଏନ୍ । ତି ସିଲଡ୍ଲ୍ଲନ୍ ଅବ୍ରାମନ୍ ଆଗାରନ୍ ସରିନ୍ ଆର୍ଲୁଡେନ୍ ଆନିନ୍ ତିଲ୍କୋଡେନ୍; ଆରି, ତିଲ୍କୋଡ୍ଲିଁୟ୍ ଗାମ୍ଲେ ଜନାଡାଲେ ଆବିନ୍ରାଡନ୍ଆଡଙ୍ ଗବ୍ରୟ୍ମଡେନ୍ । ତି ସିଲଡ୍ଲ୍ଲନ୍ ସାରିନ୍ ଅବ୍ରାମନ୍ଆଡଙ୍ ବରେନ୍, “ଞେନ୍ଆଡଙ୍ କେନ୍ ଆରିନ୍ନତିଞନ୍ ଆ ଜଅ ଆମନ୍ଆତେ ଡେଏତୋ । ଞେନ୍ ଅଙ୍ଗା କମ୍ୱାରିଞେନ୍ ଆନମ୍ଆଡଙ୍ ତିୟ୍ଲମ୍, ଆନିନ୍ ନମି ତିଲ୍କୋଡ୍ଲିଁୟ୍ ଗାମ୍ଲେ ଜନାଲେ ଞେନ୍ଆଡଙ୍ ଗବ୍ରୟ୍ମଡ୍ତିୟ୍; ପ୍ରବୁନ୍ ଆମନ୍ଆଡଙ୍ ଡ ଡଅଙ୍ଞେନ୍ ଅବ୍ପସୁଆତିଏତୋ ।” ତି ସିଲଡ୍ଲ୍ଲନ୍ ଅବ୍ରାମନ୍ ସାରିନ୍ଆଡଙ୍ ବରେନ୍, “ଗିଜା କମ୍ୱାରିବୟ୍ନମ୍ ଅସିଲୋଙ୍ନମ୍ ଡକୋ; ଗନିୟ୍ଗିୟ୍ଲୋଙ୍ନମ୍ ଇନି ମନଙ୍ ତିଅନ୍ତମ୍ ଆନିନ୍ଆଡଙ୍ ବାଞା ।” ତି ସିଲଡ୍ଲ୍ଲନ୍ ସାରିନ୍ ଆଗାରନ୍ଆଡଙ୍ କାବ୍ବାଡ଼ାନ୍ ଅଃଲୁମ୍ଲୁମ୍ଲେ ଅବ୍ଡଣ୍ଡାୟେନ୍ ତିଆସନ୍ ଆଗାରନ୍ ଅସିଙନ୍ ଅମ୍ରେଙ୍ଲେ ଡୁଙ୍ଲନ୍ ଜିରେନ୍ । ତି ସିଲଡ୍ଲ୍ଲନ୍ ପ୍ରବୁନ୍ ଆପାଙ୍ଲଙ୍ବର୍ମରନ୍ ଆରିଙ୍ରିଙ୍ରେଙନ୍ ଅବୟ୍ ସୁର ଆତଙର୍ଗଡ୍ ଅଙ୍ଗା ଆ ଡୁଙ୍ନେଡାନ୍ ଡକୋ, ଆନିନ୍ ତି ଆତୁୟାୟ୍ ଆଗାରନ୍ଆଡଙ୍ ଗିୟ୍ଲେ ବରେନ୍, “ଏ ସାରିନ୍ ଆ କମ୍ୱାରି ଆଗାର୍, ଆମନ୍ ଅଙ୍ଗାଲୋଙ୍ସିଲଡ୍ ଜିର୍ରାୟ୍ ? ଆରି, ଅଙ୍ଗାଜିର୍ତେ ?” ତି ସିଲଡ୍ଲ୍ଲନ୍ ଆନିନ୍ ବର୍ନେ, “ଗମାଙ୍ବୟ୍ ଞେନ୍ ସାରିନ୍ ଆମଙ୍ ସିଲଡ୍ ଡୁଙ୍ଲନ୍ ଜିର୍ତେ ।” ତି ଆଡିଡ୍ ପ୍ରବୁ ଆପାଙ୍ଲଙ୍ବର୍ମର୍ ଆନିନ୍ଆଡଙ୍ ବରେନ୍, “ଆମନ୍ ଗମାଙ୍ବୟ୍ନମ୍ ଆମଙ୍ ୟର୍ରନ୍ ଲବଡ୍ଡିନ୍ ବାତ୍ତେ ଆନିନ୍ଆଡଙ୍ ମାନ୍ନେଲେ ଡକୋନା ।” ପ୍ରବୁ ଆ ପାଙ୍ଲଙ୍ବର୍ମରନ୍ ଆରି ବର୍ରନେ, “ଞେନ୍ କେଜ୍ଜାନମ୍ ଏନେଲେ ମବ୍ରଙ୍ତାୟ୍ ଡ, ଗନୋଗୋୟ୍ବେନ୍ ଆସନ୍ ଡିଡିଲନ୍ ଅଃରପ୍ତିନେ ।” ପ୍ରବୁ ଆପାଙ୍ଲଙ୍ବର୍ମରନ୍ ଆରି ବରନେ, “ଗିଜା, ଆମନ୍ ନମି ଆତିଲ୍କୋଡ୍, ଆମନ୍ ଓବ୍ବାସିୟ୍ କୋତ୍ତେ, ଆଞୁମନ୍ ଇସ୍ମାଏଲ୍ ଅବ୍ଞୁମ୍ତେ, ଆଗ୍ରାମ୍ଗାମନ୍ ପ୍ରବୁ ଡୁକନମ୍ ଅମ୍ଡଙେନ୍ । ଆରି ଆନିନ୍ ମନ୍ରାଞ୍ଜି ଆମଙ୍ଲୋଙ୍ କିନ୍ରେଙ୍ ଗୋଡୋଁୟନ୍ ଅନ୍ତମ୍ ଡେତେ, ଆସିନ୍ ଅଡ଼୍କୋମନ୍ରାଞ୍ଜି ଆସଙ୍ଗତା ଡ ଅଡ଼୍କୋମନ୍ରାନ୍ ଆସି ଆ ସନଙ୍ତାଲ୍ଲୋଙନ୍ ଡକୋତେ, ଆରି, ଆନିନ୍ ଆ ବୋଞାଙଞ୍ଜି ଆବନେରାମର୍ଜି ଅନ୍ତମ୍ ଡକୋତନ୍ ।”
ଆରି ଆଗାରନ୍ ବାତ୍ତେ ଆରଲ୍ବରେଞ୍ଜି ଆ ପ୍ରବୁ ଆଞୁମ୍, ମଦର୍ସକ ଇସ୍ୱର ଡକ୍କୋଏନ୍, ଆଗ୍ରାମ୍ଗାମନ୍ “ଏ ଇସ୍ୱର ଆମନ୍ ଞେନ୍ଆଡଙ୍ ଗିୟ୍ତିଁୟ୍ ?” ଆନା ଞେନ୍ଆଡଙ୍ବର୍ତିଁୟ୍ “ଞେନ୍ପଙ୍ ତେନ୍ନେ ଆରି ଅମେଙିୟ୍ ।” ତିଆସନ୍ ତି ଆକୁଆ ଆଞୁମ୍ ବେରେଦ୍ କେନ୍ ଆଗରାମ୍ଗାମ୍ ଗନିୟ୍ ଅନମେଙ୍କୁଆ ଡନକ୍କୋନ୍ ଡେଏନ୍ । ତି ଆକୁଆ କାଦେସନ୍ ଡ ବେରଡନ୍ ଆମଡ୍ଡି ଡକୋ । ଆଗାରନ୍ ଅବ୍ରାମନ୍ ଆସନ୍ ଓବାଅନନ୍ ଆକ୍ରୋଡେନ୍ ସିଲଡ୍, ଅବ୍ରାମନ୍ ଆଗାରନ୍ସିଲଡ୍ ଆକନୋଡ୍ ଆଅନନ୍ ଆଞୁମ୍ ଇସ୍ମାଏଲ୍ ଅବ୍ଞୁମେନ୍ । ଅବ୍ରାମନ୍ ଉଞ୍ଜିକୁଡ଼ିତୁଡ୍ରୁ ବର୍ସେଙ୍ ଆଡ୍ରେନ୍ ଆଡିଡ୍ ଆଗାରନ୍ ଅବ୍ରାମନ୍ ଆସନ୍ ଇସ୍ମାଏଲନ୍ଆଡଙ୍ କୋଡେନ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.