Juray Soura Bible
ପର୍ତମ୍ମୁ 17
ସିବ୍ଡୟ୍ବରନ୍ ଆରମ୍ମଡ୍ ଡ ଗନଡ୍ରେଡେବନ୍ ଆନଗଡ୍
ଅବ୍ରାମନ୍ ଉଞ୍ଜିକୁଡ଼ି ଅଣିସେ ବର୍ସେଙ୍ ଆଡ୍ରେନ୍ଆଡିଡ୍, ପ୍ରବୁନ୍ ଆମଙ୍ବାନ୍ ଅବ୍ରାଙ୍ଡାଲନ୍ ବର୍ରନେ, “ଞେନ୍ ଅଡ଼୍କୋନ୍ ସିଲଡ୍ ବୋର୍ସାଡମନ୍ ଆ ଇସ୍ୱର; ଗନିୟ୍ଗିୟ୍ଲୋଙ୍ ଞେନ୍ ଡରମ୍ମ କାବ୍ବାଡ଼ାନ୍ ଲୁମ୍ଲେ ଆମନ୍ ମଡ଼ିର୍ ଡେଆ । ଞେନ୍ ଆମନ୍ ସରିନ୍ ବନାଞ୍ବରନ୍ ଗବ୍ରିଡାଲେ କେଜ୍ଜାନମ୍ ଅବ୍ଗୋଗୋୟ୍ତାୟ୍ ।” ତି ସିଲଡ୍ଲ୍ଲନ୍ ଅବ୍ରାମନ୍ ତୁଙ୍ରୁବ୍ବାଙ୍ଲନ୍ ଆଗରୋଙେନ୍ ସିଲଡ୍, ଇସ୍ୱରନ୍ ଆନିନ୍ ସରିନ୍ କଡାଡ଼ିଡାଲନ୍ ବରେନ୍, “ଞେନ୍ ଆମନ୍ ସରିନ୍ ଅନଗଡନ୍ ତୁବ୍ତାୟ୍, ଞେନ୍ ସିବ୍ଡେୟ୍ ବର୍ତନାୟ୍ ଆମନ୍ ଗୋଗୋୟ୍ କେଜ୍ଜାମରଞ୍ଜି ଆ ପୁର୍ବାମରଞ୍ଜି ଆପ୍ପେୟ୍ ଡେତମ୍ । ଆରି, ଅଞୁମ୍ନମ୍ ଅବ୍ରାମ୍ ଗାମ୍ଲେ ଅଃଡ୍ଡକୋଏ, ବନ୍ଡ ଅବ୍ରାଆମନ୍ ଡେତେ । ଇନିଆସନ୍ଗାମେଣ୍ଡେନ୍ ଞେନ୍ ଆମନ୍ଆଡଙ୍ ଗୋଗୋୟ୍ କେଜ୍ଜାମରଞ୍ଜି ଆ ଆପ୍ପେୟ୍ ଏମ୍ମେଲମ୍ । ଞେନ୍ କେଜ୍ଜାନମ୍ଜି ଅବ୍ଗୋଗୋୟ୍ତାୟ୍, ଅମଙ୍ନମ୍ ସିଲଡ୍ ଗୋଗୋୟ୍ କେଜ୍ଜାନ୍ ଡ ଅମଙ୍ନମ୍ ସିଲଡ୍ ରାଜାଞ୍ଜି ଏଅମ୍ଡୁଙ୍ତାୟ୍ ।
ଞେନ୍ ଆମନ୍ ସରିନ୍ ଡ ତିକ୍କି ଆଓୟୋଙ୍ ଆକେଜ୍ଜାଞ୍ଜି ଆମନ୍ରାଜି ସରିନ୍ ଅଙ୍ଗା ବନାଁୟ୍ ଗବ୍ରିଲାୟ୍ ତିଆତେ ଅଡ଼୍କୋଡିନାନ୍ ଆସନ୍ ଡକୋତନ୍ । ତିଆସନ୍ ଞେନ୍ ଆମନ୍ ଡ ତିକ୍କି ଆଓୟୁଙ୍ ଆ କେଜ୍ଜାନମ୍ ଆ ଇସ୍ୱର ଡେତାୟ୍ । ଆରି, ଆମ୍ୱେନ୍ ନମି କେନ୍ ଆ କିଣାନ ଡେସାଲୋଙ୍ ଏଡକୋତନ୍, ତେତ୍ତେ ଡକୋନ୍ ଅଡ଼୍କୋନ୍ ଞେନ୍ ଆମନ୍ଆଡଙ୍ ଡ ତିକ୍କି ଆକେଜ୍ଜାମର୍ଜି ଅଡ଼୍କୋଡିନାନ୍ ଆସନ୍ ତିୟ୍ତାୟ୍ ଡ ଞେନ୍ ଆ ଇସ୍ୱରଞ୍ଜି ଡେତାୟ୍ ।” ଇସ୍ୱରନ୍ ଆବ୍ରାଆମନ୍ଆଡଙ୍ ବରେନ୍, “ଆମନ୍ ବନାୟ୍ଞେଞ୍ଜି ମାନ୍ନେବା, ଆମନ୍ ଡ ତିକ୍କି କେଜ୍ଜାନମ୍ଜି ଆ ଅଞ୍ଜି ତିଆତେ ମାନ୍ନେଏତଜି ।” ଆମନ୍ ଡ ତିକ୍କି କେଜ୍ଜାନମ୍ଜି ସରିନ୍ ଅଙ୍ଗା ଆନଗଡ୍ ଆମ୍ବେନ୍ ଏପାଡ଼େତେ ତି ଆନଗଡ୍ ଅକେନ୍ ଅଡ଼୍କୋ ଓବ୍ବାମରଞ୍ଜି ଗନଡ୍ରେଡେବନ୍ ଡେତଜି । ଆମ୍ୱେଞ୍ଜି ରମ୍ମଙ୍ ଓବ୍ବାମରନ୍ ଆରମ୍ମଡନ୍ ଆମୁନ୍ତି ଆ ଉସାଲ୍ ଗବ୍ବା; ତିଆତେ ଆମ୍ୱେନ୍ ସରିନ୍ ବନାୟନ୍ ଆରମ୍ମଡ୍ ଡେଏତୋ । କନୋକ୍କୋଡ୍ ଉଲ୍ଲେଙ୍ଅନ୍ନମ୍ଜି ଅଡ଼୍କୋ ଓବ୍ବାଅନନ୍ ଆଟଡିନାଲୋଙ୍ ଗନଡ୍ରେଡେବନ୍ ଡେତେ, ଆରି ଆନାଜି କେଜ୍ଜାମର୍ବେଞ୍ଜି ତଡ୍ ଏନ୍ନେଲେ ଆନାଜି ବଡେସାମର୍ ଅସିଂବେନ୍ କନୋକ୍କୋଡନ୍ ଡେଏଞ୍ଜି ଅଡ଼େ କମ୍ବାରିନ୍ ଏଞିଏଣ୍ଡେନ୍, ଆନିଞ୍ଜି ନିୟ୍ ଗନଡ୍ରେଡେବନ୍ ଡେତେ । ଆରି ଅସିଂଙ୍ନମ୍ ଆକନୋଡ୍କୋଡ୍ ଅଡ଼େ ଡାବ୍ବୋନ୍ ବାତ୍ତେ ଆଞନିମର୍ ଗନବ୍ରେଡନ୍ ଡେତେ ମା; ତିଡେନ୍ ଅଡ଼୍କୋଡିନାନ୍ ଆସନ୍ ଡଅଙ୍ଲୋଙ୍ବେନ୍ ବନାଁୟ୍ଞେନ୍ ଆନବ୍ମଡ୍ ଡକୋତନ୍ । ବନ୍ଡ ଅଙ୍ଗା ଆଓବାମର୍ ଆନବ୍ମଡ୍ ଆମୁନ୍ତି ଆଉସାଲ୍ ଗନଡ୍ରେଡେବନ୍ ଅଃଡ୍ଡେଏ, ଏନ୍ନେଲେ ଏର୍ଗନରେଡବନ୍ ଓବ୍ବାମରନ୍, ତି ଆପୁରାଡ଼ା ଆମନ୍ରାନ୍ ଆମଙ୍ ସିଲଡ୍ ଅନମ୍ଡୁଙନ୍ ଡେତେ; ଆନିନ୍ ଅନସୟ୍ଲୋଙନ୍ ଆଲ୍ଲେଏନ୍ ।
ତି ସିଲଡ୍ଲ୍ଲନ୍ ଇସ୍ୱରନ୍ ଅବ୍ରାଆମନ୍ଆଡଙ୍ ବରେନ୍, “ଆମନ୍ ଡୁକ୍ରିନମ୍ ଆଡଙ୍ ସାରି ଗାମ୍ଲେ ଆରି ଓଡ୍ଡେଡଙ୍; ଆଞୁମନ୍ ସାରା, ଆଗରାମ୍ଗାମ୍ ରାନି ଡେଏନ୍ । ଞେନ୍ ଆନିନ୍ଆଡଙ୍ ଆସିର୍ବାଦତାୟ୍ ଆରି ଆମଙନ୍ ସିଲଡ୍ ଆମନ୍ ଆସନ୍ ଅବୟ୍ ଓବ୍ବାସିୟ୍ ତିୟ୍ତାୟ୍; ଞେନ୍ ଆନିନ୍ଆଡଙ୍ ଆସିର୍ବାଦ ତାୟ୍, ଆନିନ୍ ଗୋଗୋୟ୍ କେଜ୍ଜାନ୍ ଆୟୋଙ୍ ଡେତେ, ଆମଙନ୍ ସିଲଡ୍ ଗୋଗୋୟ୍ ଡେସାନ୍ ଆ ରାଜା ଡୁଙ୍ତନାଜି ।” ତିଆଡିଡ୍ ଅବ୍ରାଆମନ୍ ବରୁମ୍ଡାଲେ କିଜେନ୍, ବନ୍ଡ ଆନିନ୍ ଆମନ୍ନଲୋଙନ୍ କିୟ୍ଲେ ବର୍ରନେ, “ଓବ୍ବାମରନ୍ ବସଅ ବର୍ସେଙ୍ ଆଡିଡ୍ ପଙ୍ ପସିଜନ୍ ଞାଙେ ? ଉଞ୍ଜି କୁଡ଼ି ଦସ ବର୍ସେଙ୍ଲୋଙ୍ ସାରା ପଙ୍ କୋଡନେ ?” ତି ସିଲଡ୍ଲ୍ଲନ୍ ଅବ୍ରାଆମନ୍ ଇସ୍ୱରନ୍ଆଡଙ୍ ବରେନ୍, “ଇସ୍ମାଏଲନ୍ ଅମଙ୍ବାନମ୍ ଅମେଙ୍ଲେ ଡକୋନେ ତୋ ।” ତିଆଡିଡ୍ ଇସ୍ୱରନ୍ ବରେନ୍, “ଡୁକ୍ରିନମ୍ ସାରାନ୍ ଆମନ୍ ଆସନ୍ ଆଜାଡ଼ିନ୍ ମା ଅବୟ୍ ପସିଜନ୍ କୋତ୍ତେ, ଆରି ଆମନ୍ ଆଞୁମନ୍ ଇସାକ ଅବ୍ଞୁମ୍ତେ, ଆରି ଞେନ୍ ଆନିନ୍ ସରିନ୍ ଅନଗଡନ୍ ଏଗବ୍ରିତାୟ୍, ତିଆତେ ଆ ପୁର୍ବାଃଆ କେଜ୍ଜାନ୍ ଆସନ୍ ଅଡ଼୍କୋଡିନାନ୍ ଆସନ୍ ଆନଗଡ୍ ଡକୋତେ । ଆରି ଇସ୍ମାଏଲନ୍ ଆସନ୍ ପାର୍ତନାନମ୍ ଏଅମ୍ଡଙ୍ଲାୟ୍; ଗିଜା ଞେନ୍ ଆନିନ୍ଆଡଙ୍ ଏଆସିର୍ବାଦତାୟ୍, ତିଆସନ୍ ଆଅନଞ୍ଜି ଡ ଆକେଜ୍ଜାନ୍ ଅବ୍ଗୋଗୋୟ୍ତାୟ୍ ଆମଙନ୍ ସିଲଡ୍ ବାରଟା ରାଜାନ୍ ଡୁଙ୍ତନାଜି ଆରି ଞେନ୍ ଆନିନ୍ଆଡଙ୍ ସୋଡ଼ା କେଜ୍ଜା ଏଏମ୍ମେତାୟ୍ । ବନ୍ଡ ଆଜିର୍ତାଞନ୍ ଆବର୍ସେଙ୍ କେନ୍ ମା ଆବନେଡ଼ା ସାରାନ୍ ଆକିମ୍ପୋଙ୍ଲୋଙ୍ ସିଲଡ୍ ଅଙ୍ଗା ଆ ଇସାକନ୍ଆଡଙ୍ କୋତ୍ତେ, ଆନିନ୍ ସରିନ୍ ଞେନ୍ ଅନଗଡ୍ଞେନ୍ ଗବ୍ରିତାୟ୍ ।” କେନ୍ ଏନ୍ନେଲେ ଇସ୍ୱରନ୍ ଅବ୍ରାଆମନ୍ ସରିନ୍ କଡାଡ଼ିଲଞ୍ଜି କି ଆମଙନ୍ ସିଲଡ୍ ରୁଆଙନ୍ ଜିରେନ୍ । ସିଲଡ୍ଲନ୍ ଅବ୍ରାଆମନ୍ ଆ ଡାଙ୍ଗାଡ଼ାଅନନ୍ ଇସ୍ମାଏଲନ୍ ଡ ଆସିଙନ୍ ଆକ୍ରୋଡେଞ୍ଜି ଆ କମ୍ବାରିମର୍ଜି ଆରି ଅଡ଼୍କୋଞନି କମ୍ବାରିଞ୍ଜିଆଡଙ୍ ଆରି ଅଡ଼୍କୋନ୍ ଆମନ୍ରାଜି ଅବ୍ରୁକ୍କୁଏନ୍ ଆରି ଇସ୍ୱରନ୍ ଆବନାଁୟ୍ ଅନ୍ତମ୍ ତିଆଡିନା ଅଡ଼୍କୋମନ୍ରାନ୍ ଆରମ୍ମଡ୍ ଆମୁନ୍ତି ଗନଡ୍ରେଡେବନ୍ ଡେଏନ୍ । ଅବ୍ରାଆମନ୍ ନବେ ନ ବର୍ସେଙ୍ ଆଡ୍ରେନ୍ ଆଡିଡ୍ ଆନିନ୍ଆଡଙ୍ ଗନଡ୍ରେଡେବନ୍ ଡେଏନ୍ । ଆରି, ଆଡାଙ୍ଗାଡ଼ାଅନନ୍ ଇସ୍ମାଏଲନ୍ ତେର ବର୍ସେଙ୍ ଆଡ୍ରେନ୍ ଆଡିଡ୍ ଗନଡ୍ରେଡେବନ୍ ଡେଏନ୍ । କେନ୍ ଅନ୍ତମ୍ ଆବଡିନ୍ନାନ୍ ଅବ୍ରାଆମନ୍ ଡ ଆଡାଙ୍ଗାଡ଼ାଅନନ୍ ଇସ୍ମାଏଲନ୍ ଗନଡ୍ରେଡେବନ୍ ଡେଏନ୍ । ଆରି, ଆସିଙନ୍ ଆକନୋଡ୍କୋଡ୍ମର୍ଜି ଡ ବଡେସା ଆ ମନ୍ରାଜି ଆମଙ୍ସିଲଡ୍ ଆନିଞ୍ଜି କମ୍ୱାରିମରନ୍ ଆସିଙନ୍ ଅଡ଼୍କୋ ଓବ୍ବାମରନ୍ ଆଡଙ୍ ଗନଡ୍ରେଡେବନ୍ ଡେଏନ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.