Juray Soura Bible
ପର୍ତମ୍ମୁ 15
ଅବ୍ରାମନ୍ ସରିନ୍ ଇସ୍ୱରନ୍ ଆ ସନିବ୍ଡେୟ୍ବର୍
ତି ଆଡ୍ରେନ୍ ସିଲଡ୍ ତନାଲ୍ମଡନ୍ ବାତ୍ତେ ପ୍ରବୁନ୍ ଅବ୍ରାମନ୍ଆଡଙ୍ ଆବର୍ରେନ୍ ଆନିନ୍ ଅମ୍ଡଙେନ୍, “ଏ ଅବ୍ରାମ୍, ବତଙ୍ଡଙମ୍ । ଞେନ୍ ଆମନ୍ଆଡଙ୍ ଡୋବ୍ତମ୍ ଆରି ଓୟୋଁଲ୍କୁୟ୍ନମ୍ ତିୟ୍ତଲ୍ ।”
ତିସିଲଡ୍ ଅବ୍ରାମନ୍ ଗାମେନ୍, “ଏ ପ୍ରବୁ, ଓୟୋଁଲ୍କୁୟ୍ଞେନ୍ ଆମନ୍ ଞେନ୍ଆଡଙ୍ ଇନି ତିୟ୍ତିଁୟ୍, ଞେନ୍ ପସିୟ୍ ତଡ୍ ? ଦମ୍ମେସକବାୟ୍ ଏଲିଆଜରନ୍ ଅସିଙ୍ଞେନ୍ ଆନର୍ଜେ ଜୋମ୍ତେ । ଅବ୍ରାମନ୍ ବର୍ରନେ, ଆମନ୍ ଞେନ୍ଆଡଙ୍ ଅଅନନ୍ ଅଃତିୟ୍ଲିଁୟ୍, ତି ଆସନ୍ ଅସିଂଙ୍ଲୋଙ୍ଞେନ୍ ଆକ୍ରୋଡେଞ୍ଜି ଆ କମ୍ବାରିମର୍ ଅନର୍ଜେଞେନ୍ ଜୋମ୍ତେ ।”
ତି ଆଡିଡ୍ ଆ ଆରି ବତର ପ୍ରବୁନ୍ ଆନିନ୍ଆଡଙ୍ ଆବର୍ରେନ୍ ଆନିନ୍ ଅମ୍ଡଙେନ୍, “ତି ଆକମ୍ବାରିମର୍ ଏଲିଆଜରନ୍ ଅନର୍ଜେନମ୍ ଅଃଜ୍ଜୋମେ; ଡାଙ୍ଗାଡ଼ାଅନ୍ନମ୍ ଅନର୍ଜେନମ୍ ଜୋମ୍ତେ ।” ପ୍ରବୁ ଆନିନ୍ଆଡଙ୍ ଡାଣ୍ଡନ୍ ଓରୋଙ୍ଲେ ବରେନ୍, “ଆମନ୍ ରୁଆଙନ୍ ଆଙାଙ୍ଲେ ତୁତୁଜଞ୍ଜି ଡିଡିଲେ ରପ୍ତିତେ, ଏତ୍ତେଲ୍ଡେନ୍ ଡିଡିଡାଲେ ବର୍ନା । ଆନିନ୍ ଆ ଆରି ବର୍ରନେ,କେନ୍ ଅନ୍ତମ୍ କେଜ୍ଜାନମ୍ ଡେତେ ।” ଅବ୍ରାମନ୍ ପ୍ରବୁନ୍ଆଡଙ୍ ଆଡର୍ରନ୍ ସିଲଡ୍, ପ୍ରବୁ ସର୍ଡାଏନ୍କି ଆନିନ୍ଆଡଙ୍ ଡରମ୍ମମର୍ ଗାମ୍ଲେ ଡନିନ୍ ଡେଏନ୍ ।
ପ୍ରବୁନ୍ ଆନିନ୍ଆଡଙ୍ ବରେନ୍, “ଆନା ଆମନ୍ଆଡଙ୍ କେନ୍ ଆଡେସା ଆତନିୟ୍ ସନ୍ ବାବିଲୋନିଆ ଡକୋନ୍ ଉର୍ ସିଲଡ୍ ଓରୋଙ୍ଲମ୍ ତି ଆପ୍ରବୁ ଞେନ୍ ।”
ବନ୍ଡ ଅବ୍ରାମନ୍ ଗାମେନ୍, “ଏ ପ୍ରବୁ, ଞେନ୍ କେନ୍ ଆଡେସା ଆଡନେମର୍ ଡେତାୟ୍ ଗାମ୍ଲେ ଞେନ୍ ଏଙ୍ଗାଲେ ଜନାଇଁୟ୍ ?”
ପ୍ରବୁନ୍ ବର୍ରନେ, “ଆମନ୍ ୟାଗି ବର୍ସେଙ୍ ଆଡ୍ରେତେନ୍ ଅବୟ୍ ସଡ୍ଡାନ୍, ଅବୟ୍ କିମେଡନ୍, ଅବୟ୍ ମେଣ୍ଡାନ୍, ଆରି ଅବୟ୍ ପାରାନ୍ ଡ କୁକୁରନ୍ ଆଅନ୍ ଞେନ୍ ଆସନ୍ ପାଙାୟ୍ ।” ଅବ୍ରାମନ୍ ଅଡ଼୍କୋନ୍ ଆଜନ୍ତୁଜି ଇସ୍ୱରନ୍ ଆମଙ୍ବା ପାଙ୍ଲେ ଅଡ଼୍କୋନ୍ଆତେ ବାଗୁ ଡେୟ୍ଡେୟ୍ ଏମ୍ମେଲେ ଅବ୍ତୟ୍ତୟ୍ଲେ ବାଗ୍ଡାଡ଼ି ଏମ୍ମେଲେ ଡକ୍କୋଏନ୍ ବନ୍ଡ ଅନ୍ତିଡଞ୍ଜି ବାଗୁ ଡେୟ୍ଡେୟ୍ ଅଃନେମେଲୋ । ଅନ୍ତିଡଞ୍ଜି ଆରବୁ ଜନ୍ତୁଞ୍ଜି ଆଜନୋମ୍ ଆସନ୍ ଏଙ୍ଲାଜି, ବନ୍ଡ ଅବ୍ରାମନ୍ ଅନ୍ତିଡଞ୍ଜିଆଡଙ୍ ଗଙ୍ଗଙେନ୍ । ଆବ୍ରୁବ୍ୟୋଙେନ୍ ଆଡିଡ୍ ଅବ୍ରାମନ୍ ମାଡ୍ଡ ଆମ୍ରବ୍ମବ୍ଡାଏନ୍ ଲୁଡେନ୍ ଆରି ଆର୍ଲୋଙଡେନ୍ ବତଙେନ୍ । ପ୍ରବୁନ୍ ଅବ୍ରାମନ୍ଆଡଙ୍ ବରେନ୍, “କେଜ୍ଜାନମ୍ ଉଞ୍ଜିସଅ ବର୍ସେଙ୍ ବଡେସା ଜିର୍ରେ ଇୟ୍ତେ ଡକୋନେଜି, ଆରି ଆନିଞ୍ଜି ପନବ୍ରଡନ୍ ଞାଙ୍ତଜି । ବନ୍ଡ ଆନିଞ୍ଜି ଅଙ୍ଗା ଆଡେସା ଆମନ୍ରାଜି ଆମଙ୍ କମ୍ବାରିନ୍ ଡକୋଡାଲନ୍ କାବ୍ବାଡ଼ାତଞ୍ଜି, ଞେନ୍ ଆନିଞ୍ଜିଆଡଙ୍ ଡଣ୍ଡାୟ୍ତାଜି; ଆରି ଆନିଞ୍ଜି ତିଆଡେସା ସିଲଡ୍ ଆୟର୍ତନାଞଞ୍ଜି ଆଡିଡ୍ ଆନିଞ୍ଜି ଗୋଗୋୟ୍ ଆରନ୍ନା ପାଙ୍ଲେ ୟର୍ତନାଜି । ଆମନ୍ ଗୋଗୋୟ୍ ବର୍ସେଙ୍ ଅମେଙ୍ଲେ ଡକୋଡାଲନ୍ ଆବନୁଡାଇଙ୍ ରବୁତମ୍ ଆରି ଆମନ୍ଆଡଙ୍ ତିଲ୍ତମ୍ଜି । କେଜ୍ଜାନମ୍ଜି ଉଞ୍ଜି କନୋକ୍କୋଡ୍ ଆତିକି କେଜ୍ଜାନମ୍ଜି କେନ୍ ଆଡେସା ୟର୍ତନାଜି; ତିଆଡିଡ୍ ଇମୋରିଅନ୍ ଆମନ୍ରାଜି ଇର୍ସେ କାବ୍ବାଡ଼ାନ୍ ଲୁମ୍ଲେ ପେଲ୍ଲାତଞ୍ଜି ତିଆସନ୍ ଆନିଞ୍ଜିଆଡଙ୍ ଡଣ୍ଡାୟ୍ତାଜି ।” ଆରି ବୁବ୍ୟୋଙ୍ଡାଲେ ଲୋଙଡ୍ଲେ ଆପ୍ରାଙେନ୍ ସିଲଡ୍, ଓମୋଡନ୍ ଆଡ୍ରୁଙ୍ତନାୟଁନ୍ ଅବୟ୍ କୋଡ଼ାତୁଡନ୍ ଆରି ଆଡୁଡୁନ୍ ଆବଡ଼ାତୋଡ୍ ବାଗୁଡେୟ୍ଡେୟ୍ ଏମ୍ମେଲେ ଆଡକ୍କୋନ୍ ଆଜନ୍ତୁଜି ଆମଡ୍ଡିଗଡ୍ ଜିରେନ୍ । ତି ଆଡିଡ୍ ପ୍ରବୁନ୍ ଅବ୍ରାମନ୍ ସରିନ୍ ବନାଁୟ୍ବରନ୍ ଗବ୍ରିଲେ ବର୍ରନେ, “ଞେନ୍ ମିସର୍ ଆଲସିଲଡ୍ ପରାତ୍ ଆଲଜାୟ୍ କେନ୍ ଆଡେସା କେଜ୍ଜାନମ୍ଜିଆଡଙ୍ ତିୟ୍ତାଜି, କେନିଅନ୍, କନଜିଅନ୍, ଡ କଦ୍ମୋନିଅନ୍, ଇତିଅନ୍, ପରିସିଅନ୍, ରପାୟିଅନ୍, ଇମୋରିଅନ୍, କିଣାନିଅନ୍, ଗିର୍ଗାସିଅନ୍ ଡ ଜିବୁସିଅଞ୍ଜି ଆଡେସା ଆଲବ ଅଡ଼୍କୋନ୍ ତିୟ୍ଲମ୍ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.