Juray Soura Bible
ତଙିୟ୍ନେ 15:2
Verse 2 is marked below, with the whole chapter around it. Read from the start
ମସାନ୍ ଆ କନନ୍
ତିଆଡିଡ୍ ମସାନ୍ ଡ ଇସ୍ରାଏଲନ୍ ଆଅଞ୍ଜି ପ୍ରବୁନ୍ ଆସନ୍ କେନ୍ ଆ କନନ୍ କନେଞ୍ଜି, ଇନ୍ଲେନ୍ ପ୍ରବୁନ୍ ଆସନ୍ କନନ୍ ଏକନ୍ବା, ଇନିଆସନ୍ଗାମେଣ୍ତେନ୍ ଆନିନ୍ଡମ୍ ଜିନୟେନ୍; ଆନିନ୍ କୁର୍ତାନ୍ ଡ କୁର୍ତ୍ତାଡାୟ୍ମରଞ୍ଜି ସମେଁୟ୍ଣ୍ତ୍ରାଲୋଙ୍ ପିଡେନ୍ । ପ୍ରବୁନ୍ ବୋର୍ସାଞେନ୍ ଡ ସନେଙ୍କେଞେନ୍, ଆରି ଆନିନ୍ ଅନୁର୍ଞେନ୍ ଡେଏନ୍; ଆନିନ୍ ଇସ୍ୱରଞେନ୍, ଞେନ୍ ଆନିନ୍ଆଡଙ୍ ସେଙ୍କେତାୟ୍; ଞେନ୍ ଆନିନ୍ଆଡଙ୍ ସେଙ୍କେନ୍ତାୟ୍ । ପ୍ରବୁନ୍ ଜୋଜେ ରନପ୍ତିମର୍; ଆନିନ୍ ଆଞୁମନ୍ ସଦାପ୍ରବୁ । ଆନିନ୍ ପାରୋନ୍ ଆରତ୍ତା ଡ ଆ ସିପ୍ପାୟଞ୍ଜିଆଡଙ୍ ସମେଁୟ୍ଣ୍ତ୍ରାଲୋଙନ୍ ପିଡେନ୍; ଆରି ଆବନାସେ ରନପ୍ତିମରଞ୍ଜି ଲୁଲୁ ସମେଁୟ୍ଣ୍ତ୍ରାଲୋଙନ୍ ତବ୍ବୁବେଞ୍ଜି । ଜରୁ ଡାଆନ୍ ଆନିଞ୍ଜିଆଡଙ୍ ଞୁମେନ୍, ଆନିଞ୍ଜି ଡାଆରେଙନ୍ ଆଡ୍ରକୋତନ୍ ଆରେଙ୍ ଅନ୍ତମ୍ ତବ୍ବୁବେଞ୍ଜି । ଏ ସଦାପ୍ରବୁ, ଅର୍ଜଡ଼ୋମ୍ ରନପ୍ତିସିଲୋଙ୍ନମ୍ ଗନୁଗୁନ୍; ଏ ସଦାପ୍ରବୁ, ଅର୍ଜଡ଼ୋମ୍ସିନମ୍ ବନେରାମରନ୍ଆଡଙ୍ ରବ୍ଡ଼ିତେ, ଆମନ୍ ମନରଙ୍ଡମ୍ନମ୍ ଆଗନୁଗୁଲୋଙ୍ ସନଙ୍ଗତାମର୍ନମ୍ଞ୍ଜିଆଡଙ୍ ରବୁତଜି; ଆମନ୍ ବନ୍ରାବ୍ଡମ୍ନମ୍ ଆ ତଗୋ ଆପ୍ପାୟ୍ତେ, ତିଆତେ ଆନିଞ୍ଜିଆଡଙ୍ ଅଲାମନ୍ ଅନ୍ତମ୍ ଜୋମ୍ତୋଡ୍ତେ । ଅମୁନମ୍ ଆ ତନଙ୍ୟମ୍ ବାତ୍ତେ ଡାଆନ୍ ତନଙେନ୍; ଆପନେଡାନ୍ କିନ୍ତାଲନ୍ ଅନ୍ତମ୍ ତନଙ୍ଲେ ଡକୋଲନ୍; ସମେଁୟ୍ଣ୍ଡ୍ରାନ୍ ଆମଡ୍ଡିଲୋଙ୍ ଜରୁଡାନ୍ ରୁକୁଲନେ । ବନେରାନ୍ ବର୍ରନ୍; ଇନ୍ଲେଞ୍ଜି କିଣ୍ତୋଙ୍ କିଣ୍ତୋଙ୍ଲେ ଗଙ୍ଲେ ଏଞମ୍ବା, ଇନ୍ଲେନ୍ ରାଉଲନ୍ ଅନ୍ତମ୍ ଏପାଙ୍ବା; ଆଉପରେଙ୍ଲୋଙଞ୍ଜି ଇନ୍ଲେନ୍ ଲୋବଡେତାୟ୍; ଇନ୍ଲେନ୍ ରମଙ୍ ଆକଡ଼ିବ୍ ଏତିୟ୍ବାଜି, ଅସିଙ୍ଲେନ୍ ଆନିଞ୍ଜି ସମ୍ତଜି । ବନ୍ଡ ଆମନ୍ ତନଙ୍ୟମ୍ନମ୍ ବାତ୍ତେ ଉମ୍ପେଲ୍ଲେ ସେଡେନ୍, ସମେଁୟ୍ଣ୍ଡ୍ରାନ୍ ଆନିଞ୍ଜିଆଡଙ୍ ଞୁମେନ୍, ଆନିଞ୍ଜି ଗୁଡ୍ଡିଲାଙନ୍ ଅନ୍ତମ୍ ଜରୁଡାଆଲୋଙ୍ନ୍ ତବୁବେଞ୍ଜି । ଏ ସଦାପ୍ରବୁ, ଆମନ୍ ଅନ୍ତମ୍ ଆରି ଅନ୍ନିଙ୍ ଆସନୁମ୍ଜି ଡକୋ ପଙ୍ ? ମନଡ଼ିର୍ଲୋଙନ୍ ସୋଡ଼ା ସରାନ୍ନିଡାନ୍ ଆମନ୍ ଅନ୍ତମ୍ ଆନା ଡକୋ ? ଆମନ୍ ଅନ୍ତମ୍ ସୋଡ଼ା ବୋର୍ସାନ୍ ଡ ସରାନ୍ନୋଡନ୍ ଅନ୍ ଡକୋ ? ଆମନ୍ ଅର୍ଜଡ଼ୋମ୍ ସିନମ୍ ତେକ୍କେଆ ପୁର୍ତିନ୍ ଆନିଞ୍ଜି ଅବ୍ଗୁରୁଡେନ୍ । ଆମ୍ୱେନ୍ ମନ୍ରାନ୍ଞ୍ଜି କାନକାରମ୍ ଗାମ୍ଲେ ମନ୍ରାଜି ଜିର୍ରତାଜି ଜିର୍ରତଜି, ଆମନ୍ ବୋର୍ସାନମ୍ ବାତ୍ତେ ଆନିଞ୍ଜିଆଡଙ୍ ତଙରନ୍ ଅବ୍ତୁୟ୍ଲେ ମଡ଼ିର୍ ଡରକୋନେବାନମ୍ ଓରୋଙ୍ତଜି । ମନ୍ରାଞ୍ଜି କେନ୍ ଆତେ ଅମ୍ଡଙେଞ୍ଜି, ଆରି ଆନିଞ୍ଜି ବନ୍ତଙନ୍ ତକର୍ତଜି; ବନ୍ତଙନ୍ ପଲେସ୍ଟିଅଞ୍ଜି ଡଙ୍ଡଙ୍ଗରେଡେଞ୍ଜି । ତିଆଡିଡ୍ ଇଦୋମନ୍ ଆରାଜାଜି ବତଙେଞ୍ଜି; ମୋୟାବନ୍ ଆବୋର୍ସାମରଞ୍ଜି ନିୟ୍ ବତଙେଞ୍ଜି, କିଣାନବାଜି ଅଡ଼୍କୋଞ୍ଜି ବନ୍ତଙନ୍ ଅଃବୋର୍ସାଲଜି । ଆନିଞ୍ଜି ଆଉପରେଙ୍ଲୋଙଞ୍ଜି ବତଙ୍ତଜି; ଏ ସଦାପ୍ରବୁ,ଅଙ୍ଗାଜାୟ୍ ମନ୍ରାନ୍ଞ୍ଜି ଅନ୍ର୍ରଙ୍ ଜିର୍ରେଜି,ଅଙ୍ଗାଜାୟ୍ କମ୍ଭାରି ମର୍ନମ୍ଜି ଅନ୍ର୍ରଙ୍ ଜିର୍ରେଜି,ତିଆନ୍ତା ବୋର୍ଷାନମ୍ ବାତ୍ତେ ଆନିଞ୍ଜି ଆଜାଡ଼ିନ୍ ନ୍ୟାୟବାନ୍ ଡେଲୋ । ଏ ସଦାପ୍ରବୁ,ଆମ୍ୱେନ୍ ଡରୋକୋନେବେନ୍ ଆସନ୍ ଅଙ୍ଗାଲୋଙ୍ ଏତୁବେନ୍,ପ୍ରବୁ,ଅଙ୍ଗା ଅସିଙ୍ନମ୍ ଡରମ କାବ୍ବାଡ଼ାନ୍ ତମିୟ୍ତେ ଡକୋତେ, ଆମ୍ୱେନ୍ ଆନିଞ୍ଜି ଓରୋଙାୟ୍ବା କି ବରୋଲୋଙ୍ଲେନ୍ ଆନିଞ୍ଜି ଲୁମ୍ତଜି। ପ୍ରବୁନ୍ ଆ ଜୁଗାଜୁଗା ଅନଞିଡ୍ଡିନାନ୍ଜାୟ୍ ସାସନତେ ।
ମରିଅମନ୍ ଆ କନନ୍
ଇନିଆସନ୍ ଗାମେଣ୍ତେନ୍ ପାରୋନ୍ ଆକୁର୍ତା, ରତ୍ତାନ୍ ଡ କୁର୍ତାଲୋଙନ୍ ଆତଙ୍କୁମନ୍ ଆମନ୍ରାଜି ସମେଁୟ୍ଣ୍ଡ୍ରାନ୍ ଆ ଡାଆଲୋଙ୍ ଆଗରନେଞ୍ଜି ପ୍ରବୁନ୍ ଆଉପରେଙଞ୍ଜି ଆରି ବତର ସନେଁୟ୍ଣ୍ଡ୍ରାଡାନ୍ ପାଙ୍ଲାୟ୍; ବନ୍ଡ ଇସ୍ରାଏଲ୍ମରଞ୍ଜି ଆସର୍ଲଗଡ୍ ସମେଁୟ୍ଣ୍ଡ୍ରାଗଡ୍ ଜିର୍ରେଞ୍ଜି । ତି ସିଲଡ୍ ଆରୋଣନ୍ ଆତନାନ୍ ଗାମେନ୍ ୟ୍ବୟ୍ ଡକୋଏନ୍ ମରିୟମ୍ ଆସିଂଲୋଙ୍ ଡରେବ୍ଡେବ୍ ପାଙ୍ଲେ ସଣ୍ତୋଙ୍ ସଣ୍ତୋଙ୍ଲେ ଅନ୍ନା ଆଇବୟ୍ଜି ଡରେବ୍ଡେବନ୍ ପାଙ୍ଲେ ତଙ୍ଲେ ତଙ୍ଲେ ଡୁଙ୍ଲନାଜି । ତି ଆ ବନେଡ଼ା ମରିୟମନ୍ ମନ୍ରାଜି ଜାଲଙେନ୍, “ଆମ୍ବେଞ୍ଜି ପ୍ରବୁନ୍ ଆଞୁମ୍ଲୋଙ୍ କନ୍ବା, ଇନିଆସନ୍ଗାମେଣ୍ତେନ୍ ଆନିନ୍ ଗୋଗୋୟ୍ ତୋଣ୍ତୋଏନ୍,ଆନିନ୍ ଗୋଡାନ୍ ଡ ଗୋଡାନ୍ଜିର୍ ମରଞ୍ଜି ସମେଁୟ୍ଣ୍ଡ୍ରାବାନ୍ ସେଡେଞ୍ଜି ।”
ଅସାଙ୍ ଡାଆ
ମସାନ୍ ଇସ୍ରାଏଲ ମରଞ୍ଜିଆଡଙ୍ ସୁପ ସମେଁଣ୍ଡ୍ରାନ୍ ସିଲଡ୍ ଅବ୍ତଙିୟେଞ୍ଜି । ଆନିଞ୍ଜି ସୁର ଆରିଙ୍ରିଙ୍ ପଡ଼ିରେଙ୍ ଜିରେଞ୍ଜି, ଆନିଞ୍ଜି ଆରିଙ୍ରିଙ୍ ପଡ଼ିଆଗଡ୍ ୟାଗି ଡିନା ଜାୟ୍ ତଙିୟ୍ଡାଲନ୍ ଡାଆନ୍ ଅଃଞାଙ୍ଲଜି । ତିଆସନ୍ ଆନିଞ୍ଜି ମାରାନ୍ଲୋଙନ୍ ତୁଙେନ୍ଞ୍ଜି,ଡାଆନ୍ ଅସାଙନ୍ ଆସନ୍ ମାରାନ୍ଲୋଙନ୍ ଡାଆନ୍ ଗାଲେ ଅଃର୍ରବ୍ତିଲଜି; ତାସନ୍ ଆଞୁମନ୍ ମାରାଡେନ୍ ଅସାଙ୍ । ତି ଆଡିଡ୍ ମନ୍ରାଜି ମସାନ୍ ବନ୍ର୍ରାବନ୍ବାତେ ବର୍ରଞ୍ଜି, “ଇନ୍ଲେଞ୍ଜି ଇନିଗାମ୍ବୋ ?” ତି ଆସନ୍ ପ୍ରବୁନ୍ ଆମଙ୍ ଆପାର୍ତନାଲନ୍, ପ୍ରବୁନ୍ ଆନିନ୍ ଅବୟ୍ ଅଙଲନ୍ ଅବ୍ତୁଜେନ୍, ଆନିନ୍ ତିଆତେ ଡାଆଲୋଙନ୍ ଆପ୍ରିଡେନ୍, ଡାଆନ୍ ଜବୁଙେନ୍ । ତି ଆଡରକୋନେଲୋଙ୍ ପ୍ରବୁନ୍ ଅନସୟ୍ଲେ ତୁବେନ୍, ଆରି ଆନିଞ୍ଜି ମନାଲ୍ମାଲନ୍ ବର୍ରନ୍ । “ଆମ୍ୱେନ୍ ପ୍ରବୁ ଇସ୍ୱରନ୍ ଆବର୍ନେ ଅମ୍ଡଙ୍ବା, ଗନିୟ୍ଗିୟ୍ଲୋଙନ୍ ଅଙ୍ଗାତେ ମନଙ୍ ତିଆତେ ଲୁମ୍ବା, ଆବର୍ନେନ୍ ଡାଲୁଡ୍ବା ଆରି ଆ ବନାଁୟ୍ବରନ୍ ଅଡ଼୍କୋନ୍ ମାନ୍ନେବା, ଏତ୍ତେଲ୍ଡେନ୍ ଞେନ୍ ମସରବାଜିଆଡଙ୍ ଇନିଜି ଆରୋଗ ଆସୁଜି ବମେଞ୍ଜି ତିଅଡ଼୍କୋନ୍ ଆମ୍ବେଞ୍ଜିଆଡଙ୍ ଅଃତିୟ୍ବେନ୍ ଇନି ମନଙ୍ ତିଆତେ ଲୁମ୍ବା, ଆବର୍ନେନ୍ ଅମ୍ଡଙ୍ବା ଡ ଆନସଜନ୍ ଲୁମ୍ବା, ତିଡେନ୍ ଇନ୍ଲେନ୍ ମିସ୍ରିୟ୍ମରଞ୍ଜି ଅଙ୍ଗା ଆସୁଜି ଏତିୟ୍ଲାୟ୍, ତିଆତେଜି ଆମ୍ବେଞ୍ଜି ଏତ୍ତିୟ୍ବେନ୍; ଇନିଆସନ୍ ଗାମେଣ୍ତେନ୍ ଞେନ୍ ପ୍ରବୁନ୍ ଆମ୍ୱେନ୍ ମନବ୍ନଙ୍ମର୍ ।” ତି ସିଲଡ୍ ଆନିଞ୍ଜି ଏଲିମଲୋଙନ୍ ଅଡ଼ୋଏଞ୍ଜି; ତେତେଲୋଙ୍ ଡାଆନ୍ ବାରଟାନ୍ ଡୁଙ୍ଲନାୟ୍ ଡ ୟାକୁଡ଼ି ଦସ ସିଣ୍ତିନୁବନ୍ ଡକୋଏନ୍, ତିଲୋଙ୍ ଆନିଞ୍ଜି ତି ଆଡା ଅନେଙ୍ବାନ୍ ଜିର୍ରେ ପୁତନ୍ ତୁବେନଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.