Juray Soura Bible
ତଙିୟ୍ନେ 14
ଲୁଲୁ ସମେଁୟ୍ଣ୍ଡ୍ରାନ୍ ପଡ୍ଲେ ଆଜନିର୍
ପ୍ରବୁନ୍ ମୋସନ୍ଆଡଙ୍ ବରେନ୍, “ଆମନ୍ ଇସ୍ରାଏଲନ୍ ଆଅଞ୍ଜିଆଡଙ୍ ବରା, ଆମ୍ୱେଞ୍ଜି ୟର୍ରନ୍ ପିଅଇରୋତନ୍ ଆ ଡରୁଙ୍ୟୋଙ୍ଗଡ୍ ମିଗ୍ଡୋଲନ୍ ଡ ଲୁଲୁ ସମେଁୟ୍ଣ୍ଡ୍ରାନ୍ ଆତୁୟା ବାଲ୍ସପୋନନ୍ ଆମୁକ୍କାବା ତୁପ୍ରାସିଙନ୍ ତୁବ୍ବା । ସିଲତ୍ତେ ପାରୋନ୍ ଇସ୍ରାଏଲନ୍ ଆଅଞ୍ଜି ଆବର୍ନେ ବର୍ତନେ, ଆନିଞ୍ଜି ମିସର୍ ଡେସାଲୋଙ୍ ତଙରନ୍ ଆଡ଼ଏଞ୍ଜି ଆରି ଆରିଙ୍ରିଙନ୍ ଆ ତଙରଞ୍ଜି ଡଙେନ୍ । ଆରି ଞେନ୍ ପାରୋନ୍ ଆଉଗ୍ଗର୍ ରବ୍ଡୋତାୟ୍, ସିଲତ୍ତେ ଆନିନ୍ ଆନିଞ୍ଜିଆଡଙ୍ ସନ୍ଡୋଙ୍ଲେ ଇର୍ତେ; ଆରି ଞେନ୍ ପାରୋନ୍ ଡ ଆସିପ୍ପାୟନ୍ ଅଡ଼୍କୋନ୍ ବାତ୍ତେ ଗନୁଗୁନ୍ ଞାଙ୍ତାୟ୍; ସିଲତ୍ତେ ଞେନ୍ ସଦାପ୍ରବୁ, କେନ୍ଆତେ ମିସ୍ରବାୟ୍ଜି ଜନାତଜି ।” ସିଲତ୍ତେ ଆନିଞ୍ଜି ତିଅନ୍ତମ୍ ଲୁମେଞ୍ଜି । ସିଲତ୍ତେ ଇସ୍ରାଏଲନ୍ ଆମନ୍ରାଞ୍ଜି ଜିରେଞ୍ଜି, କେନ୍ ଆବର୍ନେ ମିସରନ୍ ଆ ରାଜାଆଡଙ୍ ଅନବ୍ଜନାନ୍ ଆଡ୍ରେନ୍, ମନ୍ରାଞ୍ଜି ଆସନ୍ ପାରୋନ୍ ଡ ଆ କମ୍ୱାରିଞ୍ଜି ଆଉଗ୍ଗର୍ ଆବ୍ୟର୍ବୁଡ୍ଡିଲନେ; ସିଲତ୍ତେ ଆନିଞ୍ଜି ବର୍ନେଜି, ଇନ୍ଲେଞ୍ଜି ଇନି କେନ୍ ଲୁମ୍ଲବୁ ? ଇନିବା ଇସ୍ରାଏଲଞ୍ଜିଆଡଙ୍ କମ୍ୱାରିଲେନ୍ ସିଲଡ୍ ଅମ୍ରେଙ୍ଲବୋ ? ତିସିଲଡ୍ ରାଜାନ୍ ଆରତ୍ତାନ୍ ଅବ୍ତୁବ୍ତୁବେନ୍ ଆରି ଆନିନ୍ ସରିନ୍ ଆମନ୍ରାଞ୍ଜିଆଡଙ୍ ଓରୋଙେନ୍ । ଆରି ତୁଡ୍ରୁସଅ ଆସନେଡା ରତ୍ତାନ୍ ଡ ମିସ୍ରିୟଞ୍ଜି ଅଡ଼୍କୋନ୍ ଆରତ୍ତା ଡ ଡିଲେ ରତାଲୋଙନ୍ ଜୁଜେମରଞ୍ଜିଆଡଙ୍ ଓରୋଙେନ୍ । ଆରି ପ୍ରବୁନ୍ ମିସରିଅନ୍ ଆ ରାଜା ପାରୋନ୍ ଆଉଗ୍ଗର୍ ଅପ୍ପେଲାଏନ୍, ଆନିନ୍ ଇସ୍ରାଏଲନ୍ ଆଅଞ୍ଜି ସଣ୍ଡୋଙେଞ୍ଜି; ତିଆଡିଡ୍ ଇସ୍ରାଏଲନ୍ ଆଅଞ୍ଜି ତକ୍କେସିଲନ୍ ଜିରେଞ୍ଜି । ସିଲତ୍ତେ ମିସରବାଜି, ଆଗ୍ରାମ୍ଗାମ୍, ପାରୋନ୍ ଆ କୁର୍ତା ଅଡ଼୍କୋନ୍ ଡ ରତାନ୍ ଡ କୁର୍ତାନ୍ ଆଡନାୟ୍ ସିପ୍ପାୟିଞ୍ଜି ଆନିଞ୍ଜିଆଡଙ୍ ସନ୍ଡୋଙ୍ଲେ ଉର୍ରେ ବାଲ୍ସପୋନ୍ ଆମୁକ୍କାବା ପିଅଇରୋତନ୍ ଆତୁୟା ଲୁଲୁ ସମେଁୟ୍ଣ୍ଡ୍ରାନ୍ ଆନେଙ୍ଲୋଙ୍ ଇସ୍ରାଏଲନ୍ ଆମନ୍ରାଜି ତୁପସିଙ୍ଲନ୍ ଆଡ୍ରକୋଲନ୍ ଆଡିଡ୍ ଆମଙ୍ବାଞ୍ଜି ଅଡ଼ୋଏଞ୍ଜି । ଆରି ପାରୋନ୍ ଆତ୍ରୁୟାୟ୍ଲାଞନ୍ ଆଡିଡ୍, ଇସ୍ରାଏଲନ୍ ଆଅଞ୍ଜି ଆଙାଙ୍ଲେ ଆମ୍ବେଞ୍ଜିଆଡଙ୍ ସଣ୍ଡୋଙ୍ ସଣ୍ଡୋଙ୍ଲେ ଆଜିର୍ତାଞଞ୍ଜି ଆ ମିସର୍ବାୟ୍ଜିଆଡଙ୍ ଗିୟ୍ଲେ ବତଙେଞ୍ଜି, ଆରି ଇସ୍ରାଏଲନ୍ ଆଅଞ୍ଜି ପ୍ରବୁନ୍ଆଡଙ୍ ଓଡ୍ଡେଏଞ୍ଜି । ଆରି ମୋସାନ୍ଆଡଙ୍ ବରେଞ୍ଜି, “ମିସର୍ଲୋଙ୍ ତରିଲ୍ନେନ୍ ଅଡ୍ଡକୋଲୋ ଗାମ୍ଲେ ପଙ୍ ଆରିଙ୍ରିଙ୍ବା ଆମନ୍ ଇନ୍ଲେଞ୍ଜିଆଡଙ୍ ରନବୁବାନ୍ ଓରୋଙ୍ଲଲେନ୍ ? ଆମନ୍ ଇନ୍ଲେଞ୍ଜି ସରିନ୍ ଏନେଲେ ଞଡ୍ରମ୍ଲେ ଇନ୍ଲେଞ୍ଜିଆଡଙ୍ ମିସରନ୍ ସିଲଡ୍ ଇନିଆସନ୍ ଅମ୍ଡୁଙ୍ଲେ ଓରୋଙ୍ଲଲେନ୍ ? ଇନ୍ଲେଞ୍ଜିଆଡଙ୍ ଡରକୋନେନ୍ ତିୟ୍ଲେମ୍ବା, ଇନ୍ଲେନ୍ ମିସରବାଜି ଆ କମ୍ୱାରି ଏଡକୋତନାୟ୍, ଇନିଆସନ୍ଗାମେଣ୍ଡେନ୍ ଆରିଙ୍ରିଙ୍ଲୋଙନ୍ ଆ ରନବୁ ସିଲଡ୍ ମିସରବାଜି ଆସନାକେ ମନଙ୍, ଇନ୍ଲେଞ୍ଜି ମିସର୍ଲୋଙ୍ କେନ୍ ଆବର୍ନେ ଆମନ୍ଆଡଙ୍ ଅବର୍ରମ୍ ପଙ୍ ?” ତିସିଲଡ୍ ମୋସାନ୍ ମନ୍ରାଞ୍ଜିଆଡଙ୍ ବରେଞ୍ଜି, “ଆମ୍ୱେଞ୍ଜି ବତଙ୍ଡଙ୍ବେନ୍ତଡ୍, ରିଙ୍ଲନ୍ ଡକୋନାବା; ପ୍ରବୁନ୍ ଲଙେ ଏଙ୍ଗାଲେ ଡୋବ୍ତବେନ୍, ତିଆତେ ଗିୟ୍ବା; ଆମ୍ୱେଞ୍ଜି ଲଙେ ଏଙ୍ଗାଲେ ମିସର୍ବାୟ୍ଜିଆଡଙ୍ ଏଗିୟ୍ତେ, ତିଅନ୍ତମ୍ ଆଙ୍ଗିୟ୍ଜା ଆରି ଗିୟ୍ଲେ ଅରପ୍ତିଏ ।” ଇସ୍ୱରନ୍ ଆମ୍ୱେଞ୍ଜି ଆସନ୍ ଜୁଜେତନେ, ଆମ୍ୱେଞ୍ଜି ରିଙ୍ଲନ୍ ଏଡକୋତନେ । ପ୍ରବୁନ୍ ମୋସାନ୍ଆଡଙ୍ ବରେନ୍, ଇନ୍ଲେଞ୍ଜିଆଡଙ୍ ଆମନ୍ ଇନିବା ଓଡ୍ଡେତଲେନ୍ ? ଇସ୍ରାଏଲନ୍ ଆଅଞ୍ଜିଆଡଙ୍ ବରା, ଆନିଞ୍ଜିଆଡଙ୍ ଆମ୍ମୁଙ୍ଲନ୍ ଆଜନିର୍ ଆସନ୍ ବରାଜି । ଆରି ଆମନ୍ ଡାଙ୍ଗୋନମ୍ ପାଙ୍ଲେ ସମେଁୟ୍ଣ୍ଡ୍ରାନ୍ ଆତୋଣ୍ଡୋ ତେକେସିଲନ୍ ତିଆତେ ବାଗୁ ପାଲ୍ଲାଙ୍ ଏମ୍ମେଆ; ସିଲତ୍ତେ ଇସ୍ରାଏଲନ୍ ଆଅଞ୍ଜି ସମେଁୟ୍ଣ୍ଡ୍ରାନ୍ ଆସର୍ ତଙର୍ଗଡ୍ ଗନ୍ଲେ ରପ୍ତିତଜି । ଆରି ଗିଜା, ଞେନ୍ ମିସରଞ୍ଜି ଆଉଗ୍ଗର୍ ଆ ରବ୍ଡୋଲାଞନ୍, ଆନିଞ୍ଜିଆଡଙ୍ ସନ୍ଡୋଙ୍ଲେ ଆନିଞ୍ଜି ଜିର୍ତଜି, ସିଲତ୍ତେ ଞେନ୍ ପାରୋନ୍ ଡ ଆସିପ୍ପାୟନ୍ ଅଡ଼୍କୋନ୍ ଡ ରତାନ୍ ଆରି କୁର୍ତାନ୍ ଆଡାୟ୍ଡାଜନ୍ ଆମନ୍ରାଜି ବାତ୍ତେ ସନେଙ୍କେନନ୍ ଞାଙ୍ତାୟ୍ । ଆରି ପାରୋନ୍,ଡ ଆରତ୍ତାନ୍ ଡ କୁର୍ତାନ୍ ଆଡାୟ୍ଡାଜନ୍ ଆମନ୍ରା ବାତ୍ତେ ସନେଙ୍କେନ୍ ଞାଙେନ୍ସିଲଡ୍ ଡେନ୍ ଞେନ୍ ସଦାପ୍ରବୁ, କେନ୍ଆତେ ମିସରନ୍ ଆମନ୍ରାଜି ଜନାତଜି । ତିଆଡିଡ୍ ଇସ୍ରାଏଲନ୍ ଆଡଡ଼ ସାମୁଙ୍ଲନ୍ ଆଜନିର୍ ଇସ୍ୱରନ୍ ଆ ପାଙ୍ଲଙ୍ବର୍ମର୍ ଡେଡାନ୍ଡେଲନ୍ ଆନିଞ୍ଜି ସନ୍ଡୋଙେନ୍, ଆରି ମେଗ ସୋଣ୍ତାଙନ୍ ଆମୁକ୍କାବାଞ୍ଜି ସିଲଡ୍ ଡେଡାନ୍ଡେଲନ୍ ଆକୁନ୍ଡୋଙ୍ବାନ୍ଞ୍ଜି ତନଙେନ୍ । ତି ଆ ମେଗ ସୋଣ୍ତାଙ୍ ମିସରିଅନ୍ ଡ ଇସ୍ରାଏଲନ୍ ଆମଡ୍ଡି ଜିର୍ରାୟ୍, ଆରି ମିସରବାଜି ଆଡରକୋନେବାନ୍ ଅବ୍ଲୋଙଡେନ୍ ବନ୍ଡ ଇସ୍ରାଏଲନ୍ ଆଅଞ୍ଜି ଆଡରକୋନେବାନ୍ ତିଆତେ ତମଗଲ୍ ଅବ୍ସାଆରେନ୍; ତିଆସନ୍ ତମ୍ପଗଲ୍ ବଡଡ଼ ଆରି ବଡଡ଼ ଆମଙ୍ବା ଜିର୍ରେ ଅରପ୍ତିଲୋଜି । ସିଲତ୍ତେ ମସାନ୍ ସମେଁୟ୍ଣ୍ଡ୍ରାନ୍ ଆତୁଣ୍ତୋ ତେକେସିଲନ୍, ପ୍ରବୁନ୍ ସମେଁୟ୍ଣ୍ଡ୍ରାନ୍ ଆ ଡାଆ ବାଗୁ ପାଲ୍ଲାଙ୍ ଏମ୍ମେଲେ ଡରୁଙ୍ୟୋଙ୍ଗଡ୍ ଆ ସୋଡ଼ାରିଙନ୍ ବାତ୍ତେ ତମ୍ପଗଲ୍ ତଙରନ୍ ଅବ୍ସରେନ୍ । ସିଲତ୍ତେ ଇସ୍ରାଏଲନ୍ ଆଅଞ୍ଜି ସମେଁୟ୍ଣ୍ଡ୍ରାନ୍ ଆ ମଡ୍ଡି ଆସର୍ ତଙର୍ଗଡ୍ ତଙିୟ୍ଲଞ୍ଜି, ଆରି ଆ ଅର୍ଜଡ଼ୋମ୍ସିଗଡ୍ ଡ ଆ ଅର୍କାବଡ଼ିଗଡ୍ ଡାଆନ୍ କିନ୍ତାଲନ୍ ଅନ୍ତମ୍ ଡେଏନ୍ । ମିସରିଅବାଜି, ପାରୋନ୍ ଆରତ୍ତା, କୁର୍ତାନ୍ ଡ କୁର୍ତାନ୍ ଆସ୍ନଲାୟ୍ମର୍ଜି ଅଡ଼୍କୋନ୍ ମନ୍ରାନ୍ ଇର୍ରେ ଆନିଞ୍ଜିଆଡଙ୍ ସଣ୍ଡୋଙ୍ଲେ ସମେଁୟ୍ଣ୍ଡ୍ରାଲୋଙନ୍ ଇୟ୍ଲେଗନେଜି । ବନ୍ଡ ତଗଲନ୍ କନ୍ସିମୋଲନ୍ ଆଡିଡ୍ ପ୍ରବୁନ୍ ତଗୋନ୍ ଡ ମେଗସୋଣ୍ଡାଙନ୍ ଆମଡ୍ଡି ସିଲଡ୍ ମିସରିଅବାଜି ଆସିପ୍ପାୟଜିଆଡଙ୍ ଆଙାଙେଞ୍ଜି ଆରି ମିସରିଅଞ୍ଜି ଆ ସିପ୍ପାୟଞ୍ଜିଆଡଙ୍ ଉୟ୍ଲୁକୁଲୁ ଏମ୍ମେଏଞ୍ଜି । ଆନିନ୍ ଆନିଞ୍ଜି ରତାନ୍ ଆଗୁଡ଼ିଜଙ୍ ଅମ୍ଡୁଙେନ୍, ଆନିଞ୍ଜି ଗୋଗୋୟ୍ ଡଣ୍ଡଡମ୍ ଏମ୍ମେଲେ ରତାନ୍ ସଲାୟେନ୍ଞ୍ଜି, ତି ସିଲଡ୍ ମିସ୍ରିୟ୍ନ୍ ଆମନ୍ରାଜି ଇସ୍ରାଏଲଞ୍ଜି ଆମୁକ୍କାବା ସିଲଡ୍ ଜିର୍ବା ଇନିଆସନ୍ଗାମେଣ୍ଡେନ୍ ପ୍ରବୁନ୍ ଆନିଞ୍ଜି ଆମଙ୍ଗଡଞ୍ଜି ମିସ୍ରିୟ୍ନ୍ଞ୍ଜି ଆବିରୁଦଲୋଙ୍ ଜୁଜେତନେଜି । ସିଲତ୍ତେ ପ୍ରବୁନ୍ ମସାନ୍ଆଡଙ୍ ବରେନ୍, ଆମନ୍ ସମେଁୟ୍ଣ୍ଡ୍ରାନ୍ ଆତୋଣ୍ତୋ ତେକେସିନା; ସିଲତ୍ତେ ମିସରବାଜି ଡ ଆରତ୍ତାଞ୍ଜି ଡ କୁର୍ତାନ୍ ଆଡନାୟ୍ମର୍ଜି ଆତୋଣ୍ତୋ ଡାଆନ୍ ୟର୍ତନାୟ୍ । ସିଲତ୍ତେ ମସାନ୍ ସମେଁୟ୍ଣ୍ଡ୍ରାନ୍ ଆତୋଣ୍ଡୋ ତେକ୍କେସିଲନ୍, ଆରି ଆସାଆର୍ବେଡ଼ାନ୍ ସମେଁୟ୍ଣ୍ଡ୍ରାନ୍ ଆମ୍ମୁଙ୍ମା ଅନ୍ତମ୍ ଡାଆନ୍ ମାୟ୍ମାୟ୍ଲନ୍; ତିସିଲଡ୍ ମିସରବାଜି ୟରଃନ୍ ଆଜିର୍ରେଞ୍ଜି ଆଡିଡ୍ ପ୍ରବୁନ୍ ସମେଁୟ୍ଣ୍ଡ୍ରାନ୍ ଆମଡ୍ଡିଲୋଙ୍ ଆନିଞ୍ଜିଆଡଙ୍ ଅଃବୁବ୍ଡାଏଞ୍ଜି । ଆରି ଡାଆନ୍ ୟରଃନ୍ ଆରତ୍ତାଞ୍ଜି ଡ କୁର୍ତାନ୍ ଆଡନାୟ୍ମର୍ଜିଆଡଙ୍ ଇୟ୍ଲାୟ୍ ଞୁମେ; ସିଲତ୍ତେ ପାରୋନ୍ ଅଙ୍ଗା ଅଡ଼୍କୋନ୍ ଆସିପ୍ପାୟ୍ଜି ଆନିଞ୍ଜି ସନ୍ଡୋଙ୍ଲେ ଅମ୍ମ ସମେଁୟ୍ଣ୍ଡ୍ରାନ୍ ଜିରେଞ୍ଜି, ଅବୟ୍ନେଜା ଆନିଞ୍ଜି ସିଲଡ୍ ଆନ୍ନିଙ୍ ଅଃନମେଙ୍ଲଜି । ବନ୍ଡ ଇସ୍ରାଏଲନ୍ ଆଅଞ୍ଜି ଆସର୍ ତଙର୍ ସମେଁୟ୍ଣ୍ତ୍ରାନ୍ଗଡ୍ ତଙିୟ୍ଲନେଜି; ଆରି ଡାଆନ୍ ଆ ଅର୍ଜଡ଼ୋମ୍ଗଡ୍ ଡ ଆ ଅର୍କାବଡ଼ିଗଡ୍ କିନ୍ତାଲନ୍ ଅନ୍ତମ୍ ଡେଏନ୍ । କେନ୍ ଅନ୍ତମ୍ ତି ଆଡିନ୍ନା ପ୍ରବୁନ୍ ମିସରବାଜି ଆସିଲୋଙ୍ ସିଲଡ୍ ଇସ୍ରାଏଲଞ୍ଜିଆଡଙ୍ ଡୋବେନ୍ ଆରି ଇସ୍ରାଏଲନ୍ ଆମନ୍ରାଜି ମଡ୍ଡି ସମେଁୟ୍ଣ୍ଡ୍ରାନ୍ ମିସର୍ବାୟ୍ଜିଆଡଙ୍ ଆରବୁ ଗିଜେଞ୍ଜି । ପ୍ରବୁନ୍ ମିସରବାଜି ଆ ବିରୁଦଲୋଙ୍ କେନ୍ ଅଙ୍ଗା ଆ ସୋଡ଼ା କାବ୍ବାଡ଼ା ଲୁମେନ୍; ସିଲତ୍ତେ ମନ୍ରାଞ୍ଜି ପ୍ରବୁନ୍ଆଡଙ୍ ବତଙ୍ଲେ ପ୍ରବୁନ୍ ଡ ଆ କମ୍ୱାରିନ୍ ମସାନ୍ ଆମଙ୍ବା ଡର୍ରଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.