Mme Saam 7

Sikaion ake Defid, anye akekwọọhọ anọ Abọọñ ke abaña Kuus, awo ubon Benyamin.

Afịd se Abọọñ Ase Anam Afọñ

1Abọọñ Abasi mmi, ami ndịbe ke afo;

ñnyaaña nyʌñ nsio miin ke ubọk afịd mbon se imbịne miin

2imiidooho ntoro ammọ eyaenwai miin nte ekpe

enyʌñ ensep mbai-mbai ibaaha awo se iñnyaaña ibọ isuuk.

3Abọọñ Abasi mmi, akpedo mmenam ami

ndin ndudue aba ke ubọk mmi;

4akpedo mmedat idiọọk nsio ufan mmi usiene eti ñkpọ

me ñyịp ñkpọ asua mmi ke unana ntak,

5yak asua mmi ambịne anyʌñ amboiyo miin iso;

yak anye asọnnọ uwem mmi ke isọñ

anyʌñ anam ami nnaa ke ntọñ.

6Dakka da, Abọọñ, ke iyadesịd mfo;

benne idem mfo ke abaña ifiobesịd mme asua mmi.

Demme, Abasi mmi; kpe unen.

7Yak mme esob ubon awo ukanna fiin ekʌk,

ke ini afo atieghe ke ebekpo ke ñkoñ-ñkoñ itie.

8Yak Abọọñ akpe ikpe mme awo.

Kpe ikpe mmi, Abọọñ, nọ asaña akekem ye eti ido mmi,

nọ asaña akekem ye mfọnmma mmi, O Ataa Andikoñ.

9Nam ido afai mbon ibak atre

nyʌñ nam adinen awo asọọñọ ada;

afo, adinen Abasi

a-aduuñọke akikere ye esịd mme awo.

10Ñkoñ Ñkan Abasi ado atuekọñ mmi,

a-akenyaañake mbon se inen ke esịd.

11Abasi ado akpeunen ikpe,

Abasi a-awọttọ iyadesịd amọ afịd usen.

12Adieke anye imiikappake esịd,

anye ayaaban akañkañ amọ;

anye ayaakọọk utịgha amọ.

13Anye abeeñe mme ñkpọ ekọñ nsobo amọ;

anekke mme asak ikañ idañ amọ anịm.

14Awo akeedodo a-ayommoke idiọọk

akere mfịna anyʌñ aman unana idodanyen.

15Awo akeedodo a-atịppeke ube asioño ntan

kpa anye aduọ adʌk ube a-ammọ eketịppeke.

16Mfịna a-ammọ enamma atịmme akeene ammọ;

afai ammọ asọiyọ adoro ammọ ke iwuod.

17Ami ñyaanọ Abọọñ ekọọm ke ntak adinenido amọ;

Ami ñyaakwọ itooro anyịñ Abọọñ Andikoñ Ñkan.