Mme Saam 111

1Itooro Abọọñ.

Ami ñyaadịppe anyịñ Abọọñ ke afịd esịd mmi

ke eboho ndinen awo ye ke itie akeedodo ake mme awo ebohoke.

2Mme utom Abọọñ ado akwa utom;

afịd mbon e-ekoppo inem ke utom ekere ebaña utom amọ.

3Mme ñkpọ se anye anam ayọhọ ye ubọọñ ye ukpono,

ñko adinenido amọ aba ke nsi-nsi.

4Anye anam yak etoiyo mme utịppeñkpọ se anye anam;

Abọọñ ayọhọ ye mfọn ye mbọm.

5Anye anọ mbon se ibaak anye ndidia;

anye atoiyo edioomo amọ ke nsi-nsi.

6Anye awọt mbon amọ adudu utom amọ,

anọ ammọ mme isọñ idịd mfen.

7Mme utom u-ubọk amọ anamma edoñño akpanikọ ye nnen-nnen

afịd mme mbed amọ edo se edot anyen.

8Ammọ esọọñọ eda ke nsi-nsi nsi-nsi,

edaaha ke akpanikọ ye ke adinenido.

9Anye anọ mbon amọ ufak;

anye adịppe edioomo amọ adaaha ke nsi-nsi,

adisana ye utịppe edo anyịñ amọ.

10Mbaak Abọọñ ado ntọọñọ aniọñ;

afịd mbon e-ekeeneke mbed amọ e-enie mbufiọk.

Nsi-nsi itooro anie anye.