Hunde Nouveau Testament
Luka 12
Yesu ahangira abitingo
(Mat 10:26-27)
Mwa mango umo, mbumbi na mbumbi sa bandu niabanakorana ho Yesu ali, ihikira luero lwelyatana. Yesu nianatangira ineena kasa na bemitsa bewe mbu: «Munerekohya kwa chachu ya Bafarisayo, nayo ni abitingo byabo. Hatali kyokibishirwe kyokitendebixulwa. Na kandi hatali na nama yoitendemenyibwa. Kubwishi bwekyo, abyoshe byomwaneenaa mwa mutsimya, byendehulikibwa mu kati ka mwishi. Na byomwamebuhererana kwe kwitwi mwa kaheto, byendepfulwa mu mulenge mule kwa muutu wa nyumba.»
Yashushire iubahwa
(Mat 10:28-31)
Yesu nianaxubebula mbu: «Anibabwira mo bera bani mbu: Ni mutiubahe bobangaita amubiri, nenyuma wa reitao, ni batangakikocha ikola kindi kinwa. Nikababwerekya ula yalirene iubahwa: Munereubaha Ongo yawete maala meuma mundu i kutsimu inyuma wa lupfu. Naki, anibabwira mbu, uyoyo yomunereubaha.
«Mwichi kwa bixwi bitano binautsibwaho bichere bibiri bya faranga. Naho, hatali kiro na kiuma mubyo kyokiibirirwe mwa mbere sa Ongo. Sinabe na sampfiri sosiri kwa mitwe yenyu, Ongo echi amuancho wato. Kunchi, mutereubaha kubwishi, imwe muli na munguruko munene alengitse wa bixwi bingi.»
Iikiritsa neri iiana Yesu
(Mat 10:19-20; 10:32-33; 12:32)
Yesu nianabula kandi mbu: «Anibabwira mbu kintsi mundu yaniikiritsa mwa mbere sa bandu, Muala wa Mundu, endemuikiritsa mwa mbere sa bamalaika ba Ongo. Wetuwe, kintsi mundu yangayiana ingye mwa mbere sa bandu, nani nendeyianaye mwa mbere sa bamalaika ba Ongo. Na kintsi mundu yakendeneena kinwa kibi ku Muala wa Mundu endeshashirwa. Wetuwe kintsi mundu yakendekamba aMutima Akomire, iye atibashashirwe kiro na hake.
«Mwa mango benderebatwala kweburana mwa masinakoki neri mwa mbere sa bachamancha, neri mwa mbere sa bakulukulu, ni mutereiririkana komukahura na komukaneena. Kubwishi mwa kashangi umoho, aMutima Akomire ni akabaiyisa abinwa byomulirene ineena.»
Amushinga wa muxoki kiashaasha
Mundu muuma mwa kichiri kya bandu nianabutsa Yesu mbu: «Mwiyisa, unibwirire muala wetu mbu tuabane amwandu wo tata atusiiraa.» Yesu nianamuxubitsa mbu: «Mbe mwira! Inde yaniiraa muchamancha neri muabi wa bitwe byenyu?» Inyuma kwaho, Yesu nianabwira abandu boshe mbu: «Munerekohya kwa kalabwa ka bitwe, kubwishi abuingo bwa mundu butahulukire kwa bungi bwa bitwe byali nabyo, nakiro mbu angaba muxoki kutsibu.»
Mwa ntsindiro, Yesu nianachirabo amushinga uyu mbu: «Kwabaa muxoki muuma, mwa maxwa mewe ni muerire myaka mingi kutsibu. Nianatangira ianikira neibutsa mbu: ‹Niirende? Amyaka yani yoshe iyi, ndawete handu heningahunikayo!› Ni yaneena mbu: ‹Neira nitya: Nikashambula abitunda byani bibere, nehimba bindi biali. Nomo monikahunika amyaka na bindi bitwe byani. Inyuma kwaho, nikaibwira mbu: “Mbera niibikirire bitwe bingi byo byangabanda myaka mingi. Kunchi, mbera nangatamuka, nilye, nixome, nibenemoa!”›
«Wetuwe Ongo nianamubwira mbu: ‹We kiashaasha iwe! Mwe kiro munoho, wepfa. Kubatyo, abindu byoshe byo wabaa wameibikira byeba byande?›» Yesu nianaxubebula mbu: «Ibyo byobinahikira mundu yanerexonda iihunikirako buxoki bungi, wetuwe ni ate muxoki mwa mbere sa Ongo.»
Areinihira Ongo
(Mat 6:25-34)
Mwa ntsindiro, Yesu nianabwira abemitsa bewe mbu: «Ikyo kyoshakituma nibabwira mbu mutereiririkana kubwishi bwa buingo bwenyu mbu mbeni mukalyaki. Neri mutereiririkana kubwishi bwa mibiri yenyu mbu mbeni mukaimbalaki. Kureba abuingo bwenyu bulengyitse abilyo, na mubiri alengyitse asangimba. Mulolere kwa bichoa. Bitabyala, neri bitanaxola, bitawete kitunda kyehunikiramo. Wetuwe Ongo anerelisabyo. Munamenya kwimwe mulengyitse asanyonyi kutsibu. Na kandi inde mwimwe yangakocha iongerera lwire luuma kwa buingo buwe, itsukira amiririkano yiwe? Muli mutangakocha ikola kindu kike kiri ngekyo, ni amuiririkaniraki kubwishi bwa bindu?
«Muanikire kasa kwa mauwa manaxuka, matakola, matailandira na ngimba. Wetuwe, anibabwira ku anabe na mwami Salomo, mwa ngulu yiwe yoshe, atatangire aimbala lukimba lukwirire ngakuno iuma liuma mwaya. Ongo ali anaimbakya atyo abiti byobinaxungwako munolwire na mungya ni byendeumwa mu muchanwa, mbeni ni atilengeretse ibaimbakya kushe, imwe mwe bandu ba bwimire buke? Mutereiririkana kwexonda byomukalya neri byomukaxoma. Kureba abandu ba kwa kihuo kuno, abapakani, bobanerexonda abindu byoshe ibyo butsira itamo. Wetuwe imwe, muwete Tata yechi ku mulaire kwa bindu ibyo. Wetuwe imwe, munerexonda kasa aBwami bwa Ongo, naye ni yakendebaongerera abindi bindu byoshe ibyo.
«Mutereubahamwe kihyo kike! Kureba Ixo wenyu amexunga ku likwirire abahe abwami buwe.»
Tubike abuxoki bwetu mu mbingu
(Mat 6:19-21)
Yesu nianaxubebula mbu: «Muutse abindu byenyu, na safaranga somukautsabyo, muasikye muto abachene. Muikolere mbikyo sositangakunguha. Munereibikira mu mbingu abuxoki bobutendehwa. Kubwishi iyeyoho, ha mwitsi atangahika kweibaho, na nundu hoitangabihya. Kubwishi ha mbikyo yenyu iri, ni ha myete yenyu ikereba.»
Abapfuku bo bakereresa
Yesu nianabula kandi mbu: «Munereba ni mu iringirirenye kwekola amulimo, na matala menyu ni amawaka. Mube ngakuno bapfubulwa bo balindire ninakuwabo yafuluka itoka mu buheruki. Mwa kashangi akahika nekongota kwa lutsi, ni bamukingulira mwa kashangi umo ho. Bameashanirwa abapfubulwa abo mwa mango ninakuwabo endeshinganabo ni bamulindire kwa hika! Mwa kuli, anibabwira imwe, ninakuwabo uyo endeimbala ngimba sa mulimo, ni abirangirabo mbu bahike balye kwa biryo ni aikalaho ni atekulirabo. Bameashanirwa abapfubulwabo mwa kianiro ninakuwabo endehika mu kati ka kiro neri bwaxondekya ni bakinakereresa.
«Munamenya kushe ku nina nyumba angamenyire akashangi ka mwitsi angahikamo, nge atangasiire abetsi abo mbu batobole anyumba iwe. Nemwe, munereikala ni amuianya, kubwishi ingye ngye Muala wa Mundu nendehika mu kashangi ko mutamuanikira.»
Amupfuku yainihirwe na yatainihirwe
(Mat 24:45-51)
Niyo Petero abutsa Yesu mbu: «Ninakuwetu, amushinga wo wamecha uyo, mbeni wametuchirao, neri wamechirao abandu boshe?»
Ninakuwetu nianaxubya mbu: «Inde ye mupfuku yangainihirwa na kandi awete bwenge? Mupfukwali ngoyo, ninakuwabo angamuira mwimanitsi wa nyumba iwe. Amupfuku uyo, iye, enderelamya abapfuku balikyabo nehabo bilyo mu kashangi kabyo. Ameashanirwa amupfuku uyo, yo ninakuwabo endeba afuluka, ni amushingana ni akinakola amulimo uyo! Mwa kuli anibabwira mbu, ninakuwabo endeira amupfuku uyo yo mwimanitsi wa bitwe biwe byoshe.
«Wetuwe, amukotsi uyo akeneena mwa mutima uwe mbu: ‹Ninakuwetu ameleama ifuluka.› Kubatyo nianatangira ihumbanga abapfuku balikyabo balume na bakatsi, nelya, nexoma, nepfao. Ninakuwabo ni endehika mu lwire lwa mupfuku uyo ataanikire, na mu kashangi katechi. Niyo ninakuwabo endemukolera kubi kitsibu nemutsimba nga mundu yatangainihirwa.
«Amupfuku yechi areshasha ra ninakuwabo, wetuwe aketinda iiringiriranya nekola nga ko ninakuwabo ashashire, ni endehumbwa ngonyi nyingi. Wetuwe, amupfuku yatechi areshasha ra ninakuwabo, akekola kyokingatuma ahumbwa, uyo, iye, ni endehumbwa ngonyi nyike. Amupfuku yahabwaa bingi, endebutsibwa na bingi. Na yabikibwaa bingi kutsibu endebutsibwa bindu bingi kutsibu.»
Yesu ameleta amilikalikano
(Mat 10:34-36)
Yesu niananeena kandi mbu: «Nahikaa iuma muchanwa kwa kihuo. Nangatsiire kutsibu ixunga amuchanwa uyo ni amekindewaka. Niri na mutsio wa minubo wo nishushire iheka. Na kwikyo, aninuba kutsibu mwa mwete wani ihikira alwire lwa minubo iyo yendebererera.
«Amuanikira mbu ingye nihikire ileta buholo kwa kihuo? Ihi! Milikalikano yonahikaa ileta. Ihuluka tsene, bandu batano ba nyumba nguma bendeabana, bashatu bendebaa babiri, na babiri bendebaa bashatu. Na mwana wa butsana ne ishe bendelikalikana. Na mwananyere ne nina bendelikalikana. Na mwatsana ne netsala bendelikalikana1.»
Ixonchomola atulolero twa kianiro
(Mat 16:2-3)
Yesu nianabwira amubuanano wa bandu mbu: «Mwa kashangi munerexunga kipfu ali akihuluka imalengetsuba, munabula mbu: ‹Ampfula ikawa.› Ampfula ni yanawa. Na mwa kashangi amuyaa atoka ibunyetako, ni mwabula mbu: ‹Kukaba kyuka kingi›. Na kyuka ni kyanaba kingi. Muli boshetulimi tubiri! Mwichi ilinganya akianiro kya kwa kihuo na kya mwa kyanya. Kubwishi bwaki mutangakocha ixonchomola abinwa byobitsuka mwa biro muno?»
Areikiritsanya na mulenda
(Mat 5:25-26)
Yesu niananeena kandi mbu: «Kubwishi bwaki mutangaichira lubancha lwa binwa bitunganene byo mushushirekola? Mwa kashangi waenda iburana na mulenda wawe, ni waxonda kweungarongana naye ni mukinali mwa nchira yareya kwa kibu. Lutabere lutyo, ni akakusongera nekutwala ku mucha-mancha, na mucha-mancha uyo, ni akakutwala ku musura, na musura uyo, ni akakukabula mu nyumba ya muliki. Anikubwira, ku ni utitenge umo utatsawapfuha alufaranga lutsindu.»
Source notes (1)
- Footnote Soma Mika 7:6.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.