परमेश्वर उन वचन
लैव्यव्यवस्था 9
हारून उन बलि-अर्पण माळोद
आठवा दिशी मूसा हारून अदिक आऊन पारगोळ इक अदिक इस्राएली पुरनिएगोळ इक कार्सुसकु हारून से अंदुन, बाक हारून अंदुन, “पापबली इन साटी ऊंद तंदरूस्त म्यांडा अन्द पाड्डा, अदिक होमबली इन साटी ऊंद तंदरूस्त म्यांडा हुळकु यहोवा अन्द मुंद भेंट येर्स.” अदिक इस्राएलीगोळ देल ईद अन, “नीव पापबली इन साटी ऊंद व्हात, अदिक होमबली इन साटी ऊंद पाड्डा अदिक ऊंद म्यांडा अन्द पाड्डा हुडी, जो ऊंद वर्ष इन ईरूल अदिक तंदरूस्त ईरूल, अदिक मेलबली इन साटी यहोवा अन्द मुंद येरसोर साटी ऊंद वस्ता अदिक म्यांडा, अदिक याण्णा हचकु मैदा अन्द ऊंद अन्नभेट भी तंदकोमी; यतिकी ईंद यहोवा नीमी इक दर्शन कोट्टान.”
अदिक या-या चीज इक आग्या मूसा कोट्टुन आ सप्पा चीज इक आंदुर भेंटमाळोद तम्बू उन मुंद तरूल; अदिक पुरा मंडली हात्ती होगकु यहोवा अन्द मुंद निदरूत. आग मूसा अंदुन, “ईद अद क्याल्सा हुन यदरी माळोर साटी यहोवा आग्या कोटीदुन कि नीव अदरी माळी; अदिक यहोवा अन्द महिमा नीम इक कांळ्सीत.” आग मूसा हारून से अंदुन, “यहोवा अन्द आग्या अन्द अनुसार वेदी इन हात्ती होगकु तान पापबली अदिक होमबली इक येर्सकु तान अदिक सप्पा जनता अन्द साटी प्रायश्चित माळ अदिक जनता अन्द चढ़ावा अक भी येर्सकु आंदुर साटी प्रायश्चित माळ.”
इदुरसाटी हारून वेदी इन हात्ती होगकु तान पापबली इन पाड्डा अक बलिदान माळदुन. अदिक हारून उन पार रकत इक आऊन हात्ती ओतुर, आग आव तान बेळ्ल इक रकत दा नेनाक्कु वेदी इन सींगगोळ मा हचदुन, अदिक मिक्कु रकत इक वेदी इन पायवा मा पलटुस बुट्टुन; अदिक पापबली दाकळोद न्याणद अदिक क्वातागोळ अदिक ईरग्या माकळोद परत इक आव वेदी मा होताकदुन, ह्यांग यहोवा मूसा अक आग्या कोटीदुन. अदिक मास अदिक तोगुल इक आव छावनी टु व्हार्या बेक्की दा होताकदुन.
आग होमबली पशु उक बलिदान माळदुन; अदिक हारून उन पारगोळ रकत इक आऊन कय दा कोट्टुर, अदिक आव अदरी वेदी मा नाकु दी सिप्स बुट्टुन. आग आंदुर होमबली पशु उक तुकळा-तुकळा माळकु ताल्ला सांगुळ आऊन कय दा कोट बुट्टुर अदिक आव अवरी वेदी मा होताक बुट्टुन. अदिक आव कल्लगोळी अदिक कालगोळी इक तोळुकु वेदी मा होमबली इन म्याकुच होताकदुन.
आग आव लॉकुर्द चढ़ावा अक मुंद ओतकु अदिक आ पापबली इन व्हात इक जो आंदुर साटी ईरोद हुळकु अदुर बलिदान माळदुर, अदिक पयला अन्द घाई अदरी भी बलिदान माळकु येर्सदुर. अदिक आव होमबली इक भी हात्ती ओतकु विधी इन अनुसार येर्सदुन. अदिक अन्नभेट इक भी हात्ती ओतकु अदुर दा टु ठ्वामा तीम हुडुकु वेदी मा होताकदुन, ईद व्हातुर इन होमबली इन अलावा येर्सकु आत. वस्ता अदिक म्यांडा, मतलब जो मेल-मिलाप बली पशु, जनता अन्द साटी ईरोद अव भी बली माळकु आदव; अदिक हारून उन पारगोळ रकत इक आऊन कय दा कोट्टुर, अदिक आव अदरी वेदी मा नाकु दी सिप्स बुट्टुन; अदिक आंदुर वस्ता अन्द न्याण इक, अदिक म्यांडा दा टु न्याणद पुसटी इक, अदिक या न्याणद देल कल्लगोळ होचकु ईरताव अदरी, अदिक क्वाता सांगुळ ईरग्या माकळोद परत इक भी आऊन कय दा कोट्टुर; अदिक आंदुर न्याण इक याद्दागोळ मा ईटदुर; अदिक आव अद ण्याण वेदी मा होताकदुन, लेकीन याद्दागोळ अदिक ऊजवा जाँघ इक हारून मूसा अन आग्या अन्द अनुसार हालुसोद भेंट इन साटी यहोवा अन्द मुंद आळगाळस्दुन.
आग हारून लॉकुर दी कय वाळुस्कु आंदरी आशीर्वाद कोट्टुन; अदिक पापबली, होमबली, अदिक मेल-मिलाप इन बली इक येर्सकु आव ल्यालमा ईळुतेला बंदुन. आग मूसा अदिक हारून भेंटमाळोद तम्बू दा होदुर, अदिक अल टु होटकु लॉकुरी आशीर्वाद कोट्टुर; आग यहोवा अन्द महिमा सप्पा लॉकुरी कांळ्सत. अदिक यहोवा अन्द मुंद टु बेक्की होळ्त न्याण सांगुळ होमबली इक वेदी मा भस्म माळदुन; इदरी नोळकु लॉकुर जय-जयकार इन नारा हचदुर, अदिक तान-तान बाय इन भार देल बांगकु प्रणाम माळदुर.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.