लैव्यव्यवस्था 10

नादाब अदिक अबीहू उन पाप

1आग हारून उन नादाब अदिक अबीहू हेसुर ईनव येढ्ढ पारगोळ तान-तान धूपदान हुळदुर, अदिक अदुर दा बेक्की तुमदुर, अदिक अदुर दा लुबान हाक्कु आ अनुचित बेक्की इक यदुर आग्या यहोवा कोटिदील यहोवा अन्द मुंद अर्पित माळदुर. 2आग यहोवा अन्द मुंद टु बेक्की होळ्‍त अदिक आ येढ्ढु मुंदरी भस्म माळ बुट्टुन, अदिक आंदुर यहोवा अन्द मुंद सोतोदुर. 3आग मूसा हारून से अंदुन, “ ईद अदा मात हुंद यदरी यहोवा अंदीदुन, कि जो नांद हात्ती बंदान जरूरी आद कि आव नानी पवित्र जानसुल, अदिक पुरा जनता अन्द मुंद नांद महिमा माळुल.” अदिक हारून सुंगा ईत्तुन.

4आग मूसा मीशाएल अदिक एलसाफान उक जो हारून इन काका उज्जीएल उन पार ईरोन कारूकु अंदुन, “हात्ती बरी, अदिक तान मुतणागोळ इक पवित्र जागा अन्द मुंद टु नेगुकु छावनी इन व्हार्या वोई.” 5मूसा अन्द आग्या अन्द अनुसार आंदुर हात्ती होगकु आंदरी अंगरखा सांगुळ नेगुकु छावनी इन व्हार्या ओतुर.

6आग मूसा हारून से अदिक आऊन पार एलीआजर अदिक ईतामार से अंदुन, “ नीव लॉकुर तान ताल्लागोळ चुट्टी बगरूसबाळी, अदिक न तान कपळागोळी हरूबाळी, हिंग आगबाळुल कि नीव भी सोतोदीर, अदिक पुरा मंडली मा आऊन गुस्सा भळकुसुल; लेकीन इस्राएल इन सप्पा घराना अन्द लॉकुर जो नीम्द वार्टबन्धु आर नादाब अदिक अबीहू यहोवा अन्द हचकु बेक्की मा होत्तुर शोक माळुल. 7अदिक नीव लॉकुर भेंटमाळोद तम्बू उन दरवाजा अन्द व्हार्या होगबाळेतीर, हिंग आगबाळुल कि नीव सोतोदीर; यतिकी यहोवा अन्द अभिषेक इन याण्णा नीम मा हतकु आद.” मूसा अन्द ई वचन इन अनुसार आंदुर हिंग माळदुर.

याजकगोळ साटी नियम

8बाक यहोवा हारून से अंदुन, 9“याग-याग नी या नीन पार भेंटमाळोद तम्बू दा बंदीर आग-आग नीम दा टु यावारा भी अंगुर इन रास्सा अदिक सारा कुडुकु ईरबाळुल अदिक न यातोदु प्रकार इन सार्रा, ईलारा हिंग आगबाळुल कि नीव सोतोदीर; नीम्द पीढ़ी-पीढ़ी दा ईद विधी नळुतेला ईरूल, 10ईदुर देल नीव पवित्र अदिक अपवित्र दा, अदिक शुद्ध अदिक अशुद्ध दा अंतर माळ सकी; 11अदिक इस्राएलीगोळ इक आ सप्पा विधीगोळ इक कल्स सकुल यदरी यहोवा मूसा अन्द द्वारा आंदरी हेळ बुट्टान.”

12बाक मूसा हारून से अदिक आऊन मिक्कु येढ्ढु पार एलीआजर अदिक ईतामार से भी अंदुन, “यहोवा अन्द चढ़ावा दा टु जो अन्नभेट मिक्कु आद अदरी हुळकु होमबली इन हात्ती बिना खमीर हचकु तिनी, यतिकी आव हापाळ वळ्लीद आद; 13अदिक नीव अदरी यातोदारा पवित्र जागा दा तिनी, अद यहोवा अन्द होमबली दा टु नींद अदिक नीन पारगोळ्द हक आद; यतिकी नानी हिंग अच आग्या सिक्याद. 14आग हालुस्कु भेंट इन याद्दा अदिक नेग्द भेंट इन जाँघ इक नीव लॉकुर, मतलब नी अदिक नीन पोर-पारगोळ सप्पा यातोदारा शुद्ध जागा दा तिनी; यतिकी आ इस्राएलीगोळ्द मेल-मिलाप इन बली दा टु नीनी अदिक नीन चिकोरगोळ्द हक ठहरूस्कु आगेग्याद. 15न्याण इन होमबली गोळ सांगुळ जो नेग्द जाँघ अदिक हालुस्कु याद्दा यहोवा अन्द मुंद हालुसोर साटी बंदीत, ईद भाग यहोवा अन्द आग्या अन्द अनुसार हमेशा अन्द विधी इन व्यवस्था देल नींद अदिक नीन चिकोरगोळ साटी हुंद.”

16बाक मूसा पापबली इन व्हात इन खोजबीन माळदुन, रा येन मालुम आत कि अद होत्‍ताकु आग्याद, इदुरसाटी एलीआजर अदिक ईतामार जो हारून उन पार मिक्कु ईरोर आंदुर से आव गुस्सा दा बंदकु अनली कुरतुन, 17“पापबली जो परम पवित्र आद अदिक अदरी यहोवा नीमी इदुरसाटी कोटीदुन कि नीव मंडली इन अधर्म इन भार ताम मा नेगुकु आंदुर साटी यहोवा अन्द मुंद प्रायश्चित माळी, नीव आऊन मास पवित्र जागा दा येती तिंदीदील? 18नोळी, आऊन रकत पवित्र जागा अन्द बुळ्क रा तंदकु उच आगीदिल, बिना सक देल उचित ईरोद कि नीव नांद आग्या अन्द अनुसार आऊन चिच्ची इक पवित्र जागा दा तिनायदीर.”

19इदुर उत्तर हारून मूसा अक ई प्रकार देल कोट्टुन, “नोळ, ईंद अच आंदुर तान पापबली अदिक होमबली इक यहोवा अन्द मुंद येर्सदुर; बाक नान मा हिंग मुसिबतगोळ होट बंदाव! इदुरसाटी अगर ना ईंद पापबली इन चिच्ची तिनायदीन रा येन ईद मात यहोवा अन्द मुंद भला ईराइत?”1 20याग मूसा ईद केळदुन आग आऊक वळ्लीद हत्त.