लैव्यव्यवस्था 8

हारून अदिक आऊन पारगोळ्द अभिषेक

(निर्गमन 29:1-37)

1बाक यहोवा मूसा से अंदुन, 2“नी हारून अदिक आऊन पारगोळ्द कपळागोळ इक, अदिक अभिषेक इन याण्णा, अदिक पापबली इन हारोद वस्ता, अदिक येढ्ढु म्यांडागोळ, अदिक अखमीरी रोट्टी इन फुट्टीगोळ इक हुडुकु 3भेंटमाळोद तम्बू उन द्वार मा तर, अदिक अल्या पुरा मंडली इक जमा माळ.”

4यहोवा अन्द ई आग्या अन्द अनुसार मूसा माळदुन; अदिक मंडली भेंटमाळोद तम्बू उन द्वार मा जमा आत. 5आग मूसा मंडली से अंदुन, “जो क्याल्सा माळोद आग्या यहोवा कोट्टुन अद ईद हुन.” 6बाक मूसा हारून अदिक आऊन पारगोळ इक हात्ती वोतकु नीर देल मय तोळसुसदुन. 7आग आव हारून उक अंगरखा हाकसुसदुन, अदिक आऊन नेळु मा कमरबन्द कटकु झागा हाकसुस बुट्टुन, अदिक एपोद1 हचकु एपोद इन नक्षीदार सुंदर पट्टा देल एपोद इक कटकु कसुसबुट्टुन. 8बाक मूसा आऊन मा सीनाबन्द कटदुन अदिक अदुर्दा ऊरीम तुम्मीम ईट बुट्टुन. 9आग आव आऊन ताल्ला मा पगळी कटकु पगळी इन मुंद व्हान्ना अन्द पट्टी अक, मतलब पवित्र मुकुट इक हचदुर, या प्रकार देल यहोवा मूसा अक आग्या कोटीदुन.

10आग मूसा अभिषेक इन याण्णा हुळकु पवित्र निवास दा जो येनारा अदुर्दा ईरोद आ सप्पा चिजगोळ्द भी अभिषेक माळकु अवरी पवित्र माळदुन. 11अदिक आ याण्णा दा टु थ्वाळासा याण्णा आव वेदी मा येळ घन सिपसदुन, अदिक सप्पा सामान सांगुळ वेदी इन अदिक पायवा सांगुळ गंगार इन अभिषेक माळकु अवरी पवित्र माळदुन. 12अदिक आव अभिषेक इन याण्णा दा टु थ्वाळासा हारून उन ताल्ला मा हाक्कु आऊन अभिषेक माळकु आऊक पवित्र माळदुन. 13बाक मूसा हारून उन पारगोळ उक हात्ती तनकु, अंगरखा हाकसुसकु, नेळु उन पट्टा कटकु आऊन ताल्ला मा टोपी ईटबुट्टुन, या प्रकार देल यहोवा मूसा अक आग्या कोटीदुन.

14आग आव पापबली इन हारोद वस्ता अक आंदुर हात्ती वोतुन; अदिक हारून अदिक आऊन पारगोळ तान-तान कय पापबली इन वस्ता अन्द ताल्ला मा ईट्टुल. 15आग अद बली माळकु आत, अदिक मूसा अदुर्द रक्ता इक हुळकु बेळ्ल देल वेदी इन नाकु सींगगोळ मा हचकु पवित्र माळदुन, अदिक रकत इक वेदी इन पायवा मा पलटुस बुट्टुन, अदिक आऊन साटी प्रायश्चित माळकु अवरी शुद्ध माळदुन. 16अदिक मूसा कल्लगोळ्द म्याकुच इन सप्पा न्याणद, अदिक ईरग्या अन्द म्याकुच इन परत, अदिक न्याणद सांगुळ येढ्ढु क्वातागोळ इक हुळकु वेदी मा होताकदुन. 17लेकीन बली माळ्द वस्ता दा टु जो येनारा मिक्कु ईत्तीत अदरी, मतलब सेंगळी सांगुळ अदुर तोगुल अदिक चिच्ची इक आव छावनी टु व्हार्या बेक्की दा होताकदुन, या प्रकार देल यहोवा मूसा अक आग्या कोटीदुन.

18बाक आव मेल-मिलाप इन म्यांडा अक हात्ती वोतुन, अदिक हारून अदिक आऊन पारगोळ इक तान-तान कय म्यांडा अन्द ताल्ला मा ईट्टुल. 19आग अद बली माळकु आत, अदिक मूसा अदुर्द रकत इक वेदी मा नाकु दी सिपसदुन. 20आग म्यांडा तुकळा-तुकळा माळकु आत, अदिक मूसा ताल्ला अदिक न्याण सांगुळ तुकळागोळ इक होताकदुन. 21आग कल्लगोळ अदिक काल नीर देल तोळुकु आदव, अदिक मूसा पूरा म्यांडा अक वेदी मा होताकदुन, अदिक अद सुखदायक सुगन्ध कोळोर साटी होमबली अदिक यहोवा अन्द साटी होमबली आगेत, या प्रकार देल यहोवा मूसा अक आग्या कोटीदुन.

22बाक आव दुसरा म्यांडा अक जो अभिषेक इन म्यांडा ईरोद हात्ती वोतुन, अदिक हारून अदिक आऊन पारगोळ तान-तान कय म्यांडा अन्द ताल्ला मा ईट्टुल. 23आग अद बली माळकु आत, अदिक मूसा अदुर रकत दा टु थ्वाळासा हुळकु हारून इन ऊजवा किव इन स्यांडा मा अदिक अदुर ऊजवा कय अदिक ऊजवा काल इन बेळ्लगोळ मा हचदुन. 24अदिक आव हारून उन पारगोळ इक हात्ती वोतुन, अदिक रकत दा टु थ्वाळासा ऊंद-ऊंद पार उन ऊजवा कीव इन स्यांडा मा अदिक ऊजवा कय अदिक ऊजवा काल इन बेळ्लगोळ मा हचदुन; अदिक मूसा रकत इक वेदी मा नाकु दी सिपसदुन. 25अदिक आव न्याणद पुसटी, अदिक कल्लगोळ म्याकळोद सप्पा न्याणद, अदिक ईरग्या माकळोद परत सांगुळ येढ्ढु क्वातागोळ, अदिक ऊजवा जाँघ, ईव सप्पा हुळकु अलग ईट्टुल; 26अदिक अखमीरी रोट्टी इन फुट्टी जो यहोवा अन्द मुंद ईटकु आगीत अदुर दा टु ऊंद अखमीरी रोट्टी, अदिक याण्णा हतकु मैदा अन्द ऊंद रोट्टी, अदिक ऊंद पापळ हुळकु न्याणद अदिक ऊजवा जाँघ मा ईट बुट्टुन; 27अदिक ईव सप्पा चीजगोळ हारून अदिक आऊन पारगोळ कयगोळ मा ईटकु आत, अदिक हालुसोद भेंट इन साटी यहोवा अन्द मुंद हालुस्कु आत. 28आग मूसा आंदरी मात्त आंदुर कयगोळ दा टु हुळकु आंदरी वेदी मा होमबली इन म्याकुच होताकदुन, ईद सुखदायक सुगन्ध कोळोर साटी बलिदान इन भेंट अदिक यहोवा अन्द साटी संतोष हुंद. 29आग मूसा याद्दा अक हुळकु हालुसोद भेंट इन साटी यहोवा अन्द मुंद आळगाळस्दुन; अदिक अभिषेक इन म्यांडा दा टु मूसा अन्द भाग ईदा ठहरूस्त ह्यांग यहोवा मूसा अक आग्या कोटीदुन.

30आग मूसा अभिषेक इन याण्णा अदिक वेदी माकळोद रकत, येढ्ढु दा टु थ्वाळासा हुळकु हारून अदिक आऊन कपळागोळ मा, अदिक आऊन पारगोळ अदिक आंदुर कपळागोळ मा भी सिपसदुन; अदिक आव कपळागोळ सांगुळ हारून उक भी पवित्र माळदुन.

31आग मूसा हारून अदिक आऊन पारगोळ से अंदुन, “चिच्ची इक भेंटमाळोद तम्बू उन दरवाजा मा कासी, अदिक आ रोट्टी इक जो अभिषेक इन फुट्टी दा आव अवा तिनी, ह्यांग ना आग्या कोट्टीन कि हारून अदिक आऊन पारगोळ अच अदरी तिनुल. 32अदिक चिच्ची अदिक रोट्टी दा टु जो मिक्कु ईतोगुल अदरी बेक्की दा होताक बुळेत. 33अदिक यागासताका नीम्द अभिषेक इन दिन पुरा आगालव आगासताका, मतलब येळ दिन ताका भेंटमाळोद तम्बू उन दरवाजा अन्द व्हार्या होगबाळेतीर, यतिकी आव येळ दिन ताका नीम्द अभिषेक माळतेला ईत्तान. 34या प्रकार ईंद माळकु आग्याद हांग अच माळोद आग्या यहोवा नानी कोटान, ईदुर देल नीम्द पाप ढाँपस्कु आदव. 35इदुरसाटी नीव भेंटमाळोद तम्बू उन द्वार मा येळ दिन ताका ईळ्लक-हागुल ठहरूसकु ईरेतीर, ईद यहोवा अन्द आग्या अक नीव ईला मानसेतीर रा नीव सोत्तीर; कारण परमेश्वर नानी हिंग अच आग्या कोटान.” 36आग यहोवा अन्द ईवा सप्पा निर्देशगोळ्द आग्यागोळ अनुसार जो आव मूसा अन द्वारा कोटीदुन हारून अदिक आऊन पारगोळ माळदुर.