परमेश्वर उन वचन
लैव्यव्यवस्था 15
मय दा टु वाहुसोद अशुद्ध स्त्राव
बाक यहोवा मूसा अदिक हारून से अंदुन, “इस्राएलीगोळ से अनी कि या-या गंळ्स उन मय दा टु स्त्राव होगुल, रा आव स्त्राव इन कारण देल अशुद्ध ठहरूसुल. अद चाहे वाहुसतेला ईरूल, चाहे वाहुसोद बंद भी ईरूल, तो भी आऊन अशुध्दता बनस्कु ईत्तीत. यारी स्त्राव ईरूल आव या-या बिछौना मा मिंगुल अद अशुद्ध ठहरूसुल. या वस्तु मा आव कुरतान अद भी अशुध्द ठहरूसुल. अदिक जो यावारा आऊन हासक्या अक मुटुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ठहरूसकु ईरूल. अदिक यार दा स्त्राव ईरूल अदिक आव या वस्तु मा कुर्तकु ईरूल, अदुर मा जो यावारा कुरूल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ठहरूसकु ईरूल. अदिक यारदा स्त्राव ईरूल आऊन से जो यावारा मुटकु आगुल आव तान कपळागोळ इक तोळुकु नीर देल मय तोळुल अदिक द्यावगाताका अशुद्ध ईरूल. अदिक यारदा स्त्राव ईरूल अगर आव यातोदारा शुद्ध मंळसा मा ऊगळुल, रा आव तान कपळागोळ इक तोळुकु नीर देल मय तोळुल, अदिक द्यावगा ताका अशुद्ध ईरूल. अदिक यारदा स्त्राव ईरूल आव सवारी या वस्तु मा कुरूल अद अशुद्ध ठहरूसुल. अदिक जो यावारा यातोदारा वस्तु उक जो आऊन ल्यालमा ईटकु ईरूल मुटुल, आव द्यावगाताका अशुद्ध ईरूल; अदिक जो यावारा हिंग यातोदारा वस्तु उक नेगुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल. अदिक यारदा स्त्राव ईरूल आव यावारा वळ्लीद मंळसा अक बिना कय तोळुकु मुटुल रा आ मंळसा तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल. अदिक यारदा स्त्राव ईरूल आव मुण्ण इन यातोदारा बर्तन इक कय हचुल अद वळकु आगुल, अदिक हुळ्ली इन माळ्द सप्पा प्रकार इन बर्तन नीर देल तोळुकु आगुल.
“बाक यारदा स्त्राव ईरूल आव याग तान रोग देल चंगा आगेगुल, आगी टु शुद्ध ठहरूसोद येळ दिन आळु कोमुल, अदिक अऊरव बितुसदुर मा तान कपळागोळ इक तोळुकु वाहुसतेला नीर देल मय तोळुल; आग आव शुद्ध ठहरूस्यान. अदिक आठवा दिशी आव येढ्ढ पंडुक या कबूतर इन येढ्ढ पाड्डा हुळकु भेंटमाळोद तम्बू उन द्वार मा यहोवा अन्द मुंद होगकु अवरी याजक उक कोळुल. आग याजक अऊर दा टु ऊंद पापबली; अदिक दुसरा अक होमबली इन साटी भेंट येरसुल; अदिक याजक आऊन साटी आऊन स्त्राव इन कारण यहोवा अन्द मुंद प्रायश्चित माळुल.
“बाक अगर यावारा गंळ्स उन वीर्यपात आगेगुल, रा आव तान पुरा मय इक नीर देल तोळुल, अदिक द्यावगाताका अशुद्ध ईरूल. अदिक यातोदारा कपळा या तोगुल मा अद वीर्य बिळुल अद नीर देल तोळुकु आगुल, अदिक द्यावगाताका अशुद्ध ईरूल. अदिक जब यावारा गंळ्स आर्त से प्रसंग माळुल रा आंदुर येढ्ढु मुंदुर नीर देल मय तोळुल, अदिक द्यावगाताका अशुद्ध ईरूल.
“बाक याग यातोदारा आर्त मासीक पाळी देल ईरूल, रा आक येळ दिन ताका अशुद्ध ठहरूसकु ईरूल, अदिक जो यावारा आकीक मुटुल आव द्यावगाताका अशुद्ध ईरूल. अदिक यागासताका अशुद्ध ईरूल आगासताका या-या वस्तु मा आक मिंगुल, अदिक या-या वस्तु मा आक कुरूल अव सप्पा अशुद्ध ठहरूसुल. अदिक जो यावारा आकीन हासक्या अक मुटुल आव तान कपळा अक तोळुकु नीर देल मय तोळुल, अदिक द्यावगाताका अशुद्ध ईरूल. अदिक जो यावारा यातोदारा वस्तु उक मुटुल यदुर मा आक कुर्तकु ईरूल आव तान कपळा तोळुकु नीर देल मय तोळुल, अदिक द्यावगाताका अशुद्ध ईरूल. अदिक अगर हासक्या या अदिक यातोदारा वस्तु मा यदुर मा आक कुर्तकु ईरूल मुटदुर समय आकीन रकत हतकु ईरूल, रा मुट्ठावाळा द्यावगाताका अशुद्ध ईरूल. अदिक अगर यावारा गंळ्स आकीन से प्रसंग माळुल, अदिक आकीन रकत आऊक हत्तेगुल, रा आ गंळ्स येळ दिन ताका अशुद्ध ईरूल, अदिक या-या हासक्या मा आक मिंगुल अव सप्पा अशुद्ध ठहरूसुल.
“बाक अगर यातोदारा आर्त इन तान मासीक धर्म इन नियुक्त समय देल येक्कुल दिन ताका रकत वाहुसतेला ईरूल, या आ नियुक्त समय देल येक्कुल समय ताका मासीक धर्म ईरूल, रा यागासताका आक हिंग दशा दा ईरूल आगासताका आक अशुद्ध ठहरूसकु ईरूल. आकीन मासीक पीळा ईरोद सप्पा दिनगोळ दा या-या बिछौना मा आक मिंगीदुर अव सप्पा आकीन मासीक धर्म इन बिछौना अन्द घाई ठहरूसुल; अदिक या-या वस्तु मा आक कुरूल अव भी आकीन मासीक धर्म ईरोद दिनगोळ्द घाई अशुद्ध ठहरूसुल. अदिक जो यावारा आ वस्तुगोळ इक मुटुल अव अशुद्ध ठहरूसुल, इदुरसाटी आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल. अदिक याग आ आर्त तान मासीक धर्म देल शुद्ध आगेगुल, आगी टु आक येळ दिन आळु कोमुल, अदिक आ दिनगोळ बितुसदुर मा आक शुद्ध ठहरूसुल. बाक आठवा दिशी आक येढ्ढ पंडुक या कबूतर इन येढ्ढ पाड्डा हुळकु भेंटमाळोद तम्बू उन द्वार मा याजक उन हात्ती होगुल. आग याजक ऊंद पाड्डा अक पापबली अदिक दुसरा अक होमबली इन साटी येरसुल; अदिक याजक आकीन साटी आकीन मासीक धर्म इन अशुध्दता अन्द कारण यहोवा अन्द मुंद प्रायश्चित माळुल.
“ई प्रकार देल नीव इस्राएलीगोळ इक आंदुर अशुद्धता देल अलग ईटी, ईलारा हिंग न आगुल कि आंदुर यहोवा अन्द निवास इक जो आंदुर न्याड्या दा आर अशुद्ध माळकु तान अशुद्धता दा फसुसकु सोतोगुल.”
यारदा स्त्राव ईरूल अदिक जो गंळ्स वीर्यपात आगदुर देल अशुद्ध ईरूल; अदिक जो आर्त मासीक धर्म दा ईरूल, अदिक येन गंळ्स येन आर्त, इंदुर दा टु यारीकारा धातुरोग ईरूल, अदिक जो गंळ्स अशुद्ध आर्त इन सांगुळ प्रसंग माळुल, ई सप्पा मुंदुर साटी ईदा व्यवस्था हुंद.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.