लैव्यव्यवस्था 14

कोढ़ देल शुद्ध ठहरूसकु आगोद

1बाक यहोवा मूसा से अंदुन, 2“कोढ़ी इन शुद्ध ठहरूसोद व्यवस्था ईद हुन., आव याजक उन हात्ती पोहचुस्कु आगुल; 3अदिक याजक छावनी इन व्हार्या होगुल, अदिक याजक आ कोढ़ी इक नोळुल, अदिक अगर आऊन कोढ़ इन चट्टा चंगा आग्याद, 4रा याजक आग्या कोळुल कि शुद्ध ठहरूसावाळा साटी येढ्ढ शुद्ध अदिक जीत्ता पक्षी, देवदार इन हुळ्ली, अदिक क्याचाँद रंग इन कपळा अदिक जूफा अन मार्र ईव सप्पा हुळकु होगुल; 5अदिक याजक आग्या कोळुल कि ऊंद पक्षी वाहुसतेला नीर इन म्याकुच मुण्ण इन भांडा दा बलि माळकु आगुल. 6आग अद जीत्ता पक्षी इक देवदार इन हुळ्ली अदिक क्याचाँद रंग इन कपळा अदिक जूफा अन मार्र ईव सप्पा अक हुळकु ऊंद सांगुळ आ पक्षी इन रकत दा जो वाहुसतेला नीर इन म्याकुच बलि माळकु आग्याद; 7अदिक कोढ़ देल शुद्ध ठहरूसावाळा मा येळ घन सिप्सकु आऊक शुद्ध ठहरूसुल, आग आ जीत्ता पक्षी इक मैदान दा बिटबुळुल.” 8अदिक शुद्ध ठहरूसावाळा तान कपळागोळ इक तोळुल, अदिक सप्पा चुट्टी बोळस्कु नीर देल मय तोळुल, आग आव शुद्ध ठहरूस्यान; अदिक अदुर बाद्दा आव छावनी दा बरूल, लेकीन येळ दिन ताका ड्यारा टु व्हार्या अच ईरूल. 9अदिक येळवा दिशी आव ताल्ला, दाढ़ी अदिक भौऊ उन सप्पा चुट्टी मुंडुसुल, अदिक सप्पा अंग मुंडन माळसुसुल, अदिक तान कपळागोळ इक तोळुल, अदिक नीर देल मय तोळुल, आग आव शुद्ध ठहरूस्यान.

10“आठवा दिशी आव येढ्ढ तंदरूस्त म्यांडा अन्द पाड्डागोळ, अदिक ऊंद वर्ष इन तंदरूस्त म्यांडा अन्द पाड्डा, अदिक अन्नभेट इन साटी याण्णा देल हचकु एपा अन्द अईद किलो मैदा, अदिक आरधा लीटर याण्णा तरूल. 11अदिक शुद्ध ठहरूसावाळा याजक ई वस्तुगोळ सांगुळ आ शुद्ध आगावाळा मंळसा अक यहोवा अन्द मुंद भेंटमाळोद तम्बू उन द्वार मा निदुरकु ईरूल.” 12आग याजक ऊंद म्यांडा अन्द पाड्डा हुळकु दोषबली इन साटी अदरी अदिक आरधा लीटर इन आसपास याण्णा अक हात्ती तरूल, अदिक ईव येढ्ढु उक हालुसोद भेंट इन साटी यहोवा अन्द मुंद हालुसुल; 13अदिक आव आ म्यांडा अन्द पाड्डा अक अदा जागा दा यल अद पापबली अदिक होमबली पशुगोळ्द बलिदान माळतेला ईरूल, मतलब पवित्र जागा दा बलिदान माळुल; यतिकी जसा पापबली याजक उन निज भाग आदीत हांग अच दोषबली भी आऊन दा निज भाग ठहरूसीत; आव परमपवित्र आन. 14आग याजक दोषबली इन रकत दा टु थ्वाळासा हुळकु शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा कय इन बेल्लगोळ मा हचुल. 15आग याजक आ लोज तीम याण्णा दा टु थ्वाळासा हुळकु तान डाक्या कय इन हथेली मा हाकुल, 16अदिक याजक तान ऊजवा कय इन बेल्ल इक तान डाक्या हथेली इन याण्णा दा डोब्सकु आ याण्णा दा टु येनारा तान बेल्लगोळ देल यहोवा अन्द मुंद येळ घन सिपसुल. 17अदिक जो याण्णा आऊन हथेली मा ईतोदित याजक अदुर दा टु येनारा शुद्ध आगावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन बेल्लगोळ मा दोषबली इन रकत इन म्याकुच हचुल; 18अदिक जो याण्णा याजक उन हथेली मा ईतोदित अदरी आव शुद्ध आगावाळा अन्द ताल्ला मा हाक्क बुळुल. अदिक याजक आऊन साटी यहोवा अन्द मुंद प्रायश्चित माळुल.

19याजक पापबली इक भी येर्सकु आऊन साटी जो तान अशुध्दता देल शुद्ध आगावाळा ईरूल प्रायश्चित माळुल; अदिक आऊन बाद्दा होमबली पशु उन बलिदान माळकु 20अन्नभेट सांगुळ वेदी मा येरसुल अदिक याजक आऊन साटी प्रायश्चित माळुल, अदिक आव शुद्ध ठहरूस्यान.

21“लेकीन अगर आव गरीब ईरूल अदिक येनारा तरोर साटी आऊन हात्ती पूंजी ईला ईरूल, रा आव तान प्रायश्चित माळसुसोर साटी, हालुसोद साटी म्यांडा अन्द पाड्डा दोषबली इन साटी, अदिक याण्णा देल हतकु एपा अईद किलो मैदा अन्नभेट माळकु, अदिक आरधा किलो याण्णा तरूल; 22अदिक येढ्ढ पंडुक, या कबूतर इन येढ्ढ पाड्डा तरूल, जो आव तर सकुल; अदिक इदुर दा टु ऊंद रा पापबली इन साटी अदिक दुसरा होमबली इन साटी ईरूल. 23अदिक आठवा दिशी आव ई सप्पा अक तान शुद्ध ठहरूसोर साटी भेंटमाळोद तम्बू उन द्वार मा, यहोवा अन्द मुंद, याजक उन हात्ती तरूल; 24आग याजक आ आरधा किलो याण्णा अदिक दोषबलीवाळा म्यांडा अन्द पाड्डा अक हुळकु हालुसोद भेंट इन साटी यहोवा अन मुंद आळगाळसुल. 25बाक दोषबली इन म्यांडा अन्द पाड्डा अन बलिदान माळकु आगुल; अदिक याजक अदुर रकत दा टु थ्वाळासा हुळकु शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन अंगूठागोळ मा हचुल. 26बाक याजक आ याण्णा दा टु थ्वाळासा तान डाक्या कय इन हथेली मा हाक्कु, 27तान ऊजवा कय इन बेल्ल देल तान डाक्या हथेली माकळोद याण्णा दा टु याजक थ्वाळासा यहोवा अन्द मुंद येळ घन सिपसुल; 28बाक याजक तान हथेली माकळोद याण्णा दा टु येनारा शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन बेल्लगोळ, मा दोषबली इन रकत इन जागा मा हचुल. 29अदिक जो याण्णा याजक उन हथेली मा ईतोगुल अदरी आव शुद्ध ठहरूसावाळा साटी यहोवा अन्द मुंद प्रायश्चित माळोर साटी कीव इन क्वाना मा हाक्क बुळुल. 30आग आव पंडुक या कबूतर इन पाड्डागोळ दा टु जो आव तर सकीदान ऊंद पाड्डा अक येरसुल, 31मतलब जो पक्षी आव तर सकीदान, अदुर दा टु ऊंद पाड्डा अक पापबली इन साटी अदिक अन्नभेट सांगुळ दुसरा अक होमबली इन साटी येरसुल; ई रीती देल याजक शुद्ध ठहरूसावाळा अन्द साटी यहोवा अन्द मुंद प्रायश्चित माळुल. 32यारी कोढ़ इन चट्टा आग्याव, अदिक आऊन ईट पूंजी ईला ईरूल कि आव शुद्ध ठहरूसोद सामान तर सकुल, रा आऊन साटी ईदा व्यवस्था आद.”

भवन इन कोढ़

33बाक यहोवा मूसा अदिक हारून से अंदुन, 34“याग नीव लॉकुर कनान द्याश दा पोहचुसीर, यारी ना नीम्द खुद इन भूमी आगोर साटी नीमी कोळतीन, आ समय अगर ना कोढ़ इन चट्टा नीम्द अधिकार इन यातोदारा मान्ना दा तोरसाईन, 35रा यार्द अद मान्ना ईरूल आव बनकु याजक उक हेळ बुळुल कि नानी हिंग कांळ्सकु बिळतद कि मान्ना दा मान्सी यावारा चट्टा आद. 36आग याजक आग्या कोळुल कि आ मान्ना दा चट्टा नोळोर साटी नांद होगोर से पयला अदरी खाली माळी, ईलारा हिंग ना आगुल कि जो येनारा मान्ना दा ईरूल सब अशुद्ध ठहरूसुल; अदिक ईदुर बाद्दा याजक मान्ना नोळली बुळ्क होगुल. 37आग आव आ चट्टा अक नोळुल; अदिक अगर अद चट्टा मान्ना अन्द दिवारगोळ मा हिवरा-हिवरा या क्याचाँद-क्याचाँद मान्सी अगुळकु लकीरगोळ्द रूप दा ईरूल, अदिक ईव लकीरगोळ दिवार दा खोल कांळ्सकु बिळतद, 38रा याजक मान्ना टु व्हार्या द्वार मा होगकु मान्ना अक येळ दिन ताका बंद माळकु ईट्टुल. 39अदिक येळवा दिशी याजक बनकु नोळुल; अदिक अगर अद चट्टा मान्ना अन्द दिवारगोळ मा फैलुस्कु ईरूल, 40रा याजक आग्या कोळुल कि या कल्लगोळ इक चट्टा आद अदरी तेगुकु नगर टु व्हार्या यातोदारा अशुद्ध जागा दा भीळ बुळुल; 41अदिक आव मान्ना अन्द बुळ्क इन बुळ्क नाकु दी वरपुसुल, अदिक अद वरपुस्द मुण्ण नगर इन व्हार्या यातोदारा अशुद्ध जागा दा हाक्कु आगुल; 42अदिक आ कल्लगोळ जागा दा अदिक दुसरा कल्ल हुळकु हचुल अदिक याजक ताजा गारा हुळकु मान्ना अन्द जुळाई माळुल.

43“अगर कल्लगोळ तेगुकु आगोद अदिक मान्ना अन्द वरपुस्द जुळाई अदिक पोचकु आगोद बाद्दा अद चट्टा बाक मान्ना दा मात्त होळुल, 44रा याजक बनकु नोळुल; अदिक अगर अद चट्टा मान्ना दा फैलुसेग्याद, रा आव जान्स कोमुल कि मान्ना दा हानिकारक कोढ़ आद; अद मान्ना अशुद्ध आद. 45अदिक अद सप्पा गारा सांगुळ कल्ल, हुळ्ली अदिक मान्ना अक अगुळकु केडु बुळुल; अदिक आ सप्पा वस्तुगोळ इक नेगुकु नगर टु व्हार्या यातोदारा अशुद्ध जागा मा भिळसुस बुळुल. 46अदिक यागासताका अद मान्ना बंद ईरूल आगासताका अगर यावारा अदुर्दा होगुल रा आव द्यावगाताका अशुद्ध ईरूल; 47अदिक जो यावारा आ मान्ना दा मिंगुल आव तान कपळागोळ इक तोळुल; अदिक जो यावारा आ मान्ना दा येनारा तिनुल आव भी तान कपळागोळ इक तोळुल.

48“पर अगर याजक बनकु नोळुल कि यागी टु मान्ना लिपस्कु आग्याद आगी टु अदुर्दा चट्टा फैलुसीदिल, रा ईद जान्सकु कि अद चट्टा दुर आगेग्याद, मान्ना अक शुद्ध ठहरूसुल. 49अदिक आ मान्ना अक पवित्र माळोर साटी येढ्ढ पक्षी, देवदार इन हुळ्ली, क्याचाँद रंग इन कपळा अदिक जूफा अन मार्र तरूल, 50अदिक ऊंद पक्षी वाहुसतेला नीर इन म्याकुच मुण्ण इन बर्तन दा बलिदान माळुल, 51आग अद देवदार मार्र इन हुळ्ली, क्याचाँद रंग इन कपळागोळ अदिक जूफा अदिक जीत्ता पक्षी ई सप्पा अक हुळकु बलिदान माळ्द पक्षी इन रकत दा अदिक वाहुसतेला नीर दा मुळकुस बुळुल, अदिक आ मान्ना मा येळ घन सिपसुल. 52ईद प्रकार अद पक्षी इन रकत, अदिक वाहुसतेला नीर, अदिक जीत्ता पक्षी, अदिक देवदार मार्र इन हुळ्ली, अदिक जूफा अदिक क्याचाँद रंग इन कपळा अन्द द्वारा मान्ना अक पवित्र माळुल; 53आग आव जीत्ता पक्षी इक नगर टु व्हार्या मैदान दा बिट्ट बुळुल; ईदा रीती देल आव मान्ना अन्द साटी प्रायश्चित माळुल, आग आव शुद्ध ठहरूस्यान.”

54सप्पा प्रकार इन कोढ़ इन चट्टा, अदिक सेंहुएँ, 55अदिक कपळा, अदिक मान्ना अन्द कोढ़, 56अदिक सुजन, अदिक फ्वाळा, अदिक दाग इन बारा दा, 57शुद्ध अदिक अशुद्ध ठहरूसोद शिक्षा कोळोद व्यवस्था ईदा हुंद. सप्पा प्रकार इन कोढ़ इन व्यवस्था ईदा हुंद.